Beste behin ere, ikastetxe publikoetako eskola-jangeletako langileek, catering enpresetakoek, erakutsi dugu gure hitzarmena azkenera arte defendatzeko prest gaudela eta horrela ulertu du sektoreko patronalak. 

Azkenean, baloratzeko modukoa den aurreakordioa jarri digute mahai gainean:

-2019ko urtarriletik abuztura, Hezkuntza Saileko sukaldarien igoera portzentaia berdina (%3,62 metatua egungo taulekiko).

2019ko irailetik aurrera sukaldarien soldata %100ean berdinduko da Eusko Jaularitzaren Hezkuntza Saileko sukaldarienarekiko, eta langile laguntzaileen soldata Saileko langileen soldatei %98an ekiparatuko zaie.

-2020ko urtarrilean %99koa izango da langile laguntzaileen ekiparazioa Hezkuntza Saileko sukaldarien erreferentzia taulekiko.

-2021eko urtarrilean %99koa izango da ekiparazioa .

-2022ko urtarrilean, %99,5ekoa.

-2023ko urtarrilean %100ekoa izango da ekiparazioa, eta ordurako eskola jangeletako langile kolektiboaren ekiparazioa lortuko da.

LABek argi utzi zuen bere egunean hau izango zela, behingoz, kudeketa zuzeneko kolektiboaren %100eko ekiparazioaren helburu historikoa beteko zuen hitzarmena.

Lorpen honek %100 lortzea dakar. Gainera, hitzarmena sinatzen denetik, Hezkuntza Saileko langileei soldata igotzen dieteb bakoitzean, hurrengo hilabetean automatikoki ezarriko zaigu guri, catering enpresetako edo kudeaketa zuzeneko langileei. Funtsezkoa irizten digoun zerbaitetan egin dugu aurrera, lan berdina, lan- baldintza berdinak.

Aurreakordioak kolektiboarentzat garrantzitsuak diren beste aldarrikapen batzuk ere jasotzen ditu:

Lantokiaren aintzinatasuna, enpleguan egonkortasuna ematen diguna, sartze eta irteeren gaia argituz, eta baita soberan dauden orduen gaia ere.

– 10 egunetako eszedentzia zatitzeko aukera, hiru alditan.

– Permanentzia plusa argitzea ikasturte osoa ez dauden langileentzat.

– Kanpaina amaierako osagarrian lan efektibotzat jotzen da baja baten ondorioz izandako opor egunak. Azkenean, patronalak utzi egin dio gure osasunaren kontura negozioa egiteari.

– Ezinbestekoa den denbora seme-alabak medikura laguntzeko (adin mugarik gabe).

LABen uste dugu hitzarmena sinatzea aurrera pauso bat izango litzatekeela oraindik egiteke ditugun gainontzeko borroketan aurrera egiteko.

Eusko Jaurlaritzarekin ere batzartu da LAB ratio eta funtzioen inguruan hitz egiteko eta aldatu egingo dute honezkero zaharkituta dagoen 2000ko araudia.

Eusko Jaurlaritzarena da ikastetxe publikoetako eskola-jangeletako funtzionamendu eta kudeaketaren erantzunkizun osoa, eta kontuan izan behar da zerbitzu publikoa dela, diru publikoz funtzioanatzen duena. Guztion diruarekin.

Eskola-jangelen ereduaren inguruan eta Eusko Jaurlaritzaren asmoen inguruan uste dugu egiteko asko dagoela.

Langileok erakutsi dugu, kontratu partzialak dituen sektore prekarizatu eta feminizatu baten egon arren, prest gaudela gure eskubideen alde borroka egitera eta %100eko ekiparazioa jasotzen duen hitzarmena sinatu ahal dugula greba egunik gabe.

Bihar LABek langileen asanbladak egingo ditu Araba, Bizkaia eta Gipuzkoan aurreakordioaren inguruan. Hauek aurreakordioa berretsiko balute, LABek bertan behera utziko luke otsailaren 26rako deitutako greba.