2026-01-27
Blog Page 676

Garbiñe Aranburu: “Greba feminista egungo sistema zalantzan jartzeko eguna izatea nahi dugu”

admin
-
0
Garbiñe Aranburu: “Greba feminista egungo sistema zalantzan jartzeko eguna izatea nahi dugu”

Hainbat sindikatuk martxoaren 8ko greba erregistroa egin dugu gaur Bilbon zein Iruñean. LABeko idazkari nagusi Garbiñe Aranburuk hartu du hitza Bilbon, Eusko Jaurlaritzaren egoitzaren aurrean, eta gogoratu du emakumeek egiturazko diskriminazioa pairatzen dutela egungo sistema kapitalista, heteropatriarkal eta kolonialistan.

Iruñeko erregistroan parte hartu duten emakumeak; tartean, LABeko kide Aitziber San Martin eta Amaia Urzelai.

Garbiñe Aranbururen hitzetan, “greba feminista egungo sistema zalantzan jartzeko eguna izatea nahi dugu. Izan ere, egungo sistema kapitalista, heteropatriarkal eta kolonialistaren barruan, emakumeok egiturazko diskriminazioa pairatzen jarraitzen dugu”.

Sindikatutik borroka feministari eta Euskal Herriko mugimendu feministari bultzada eman nahi diegula nabarmendu du: “Mugimendu feminista indartzen ari da eta sistema bide desberdinak erabiltzen ari da aurrerabide hori gelditzeko. Modu zuzenean egiten du, ultraeskuindarrei eta faxismoari hauspoa emanez, baina zeharka ere ari da egiten, gure diskurtsoa eta aldarrikapenak bere egiten, baina pairatzen dugun diskriminazio errealitateari inolako konponbiderik eman gabe. Hauxe ari da gertatzen politika publikoekin edo enpresen berdintasun planekin; aurpegia zuritzeko besterik ez dituzte erabiltzen”.

Greba feminista oso garrantzitsua izango da sindikatuaren ildo feminista indartzeko. Hain zuzen ere, LABeko idazkari nagusiak azaldu du grebak zaintza lanak ikusgarri egiteko eta hauek balioan jartzeko balioko duela, baita sexuaren araberako lanaren banaketak ekartzen dituen diskriminazioa eta esplotazioa agerian uzteko ere. “Iazko plantoak indartu egin ditu sektore feminizatuetako borrokak”, adierazi du.

Martxoaren 8ak ere klase subjektua berregituratzeko balioko du: “Langileen kolektiboen barruan errealitate desberdinak daude eta emakumeon errealitatea ere oso anitza da, baina gure borrokak kolektibizatu behar ditugu”.

Greba Euskal Herritik Euskal Herrirako izango dela azpimarratu du Garbiñe Aranburuk: “Demokratizazioaren bidean, sistema hau eraldatzeko pausoak eman behar dira. Gure gorputzen gainean erabaki nahi dugu, eta dena nahi dugu erabaki. Emakume askeak izan nahi dugu, herrialde libre eta feminista batean”. Hain justu, aldarrikapen hori bera egin genuen urtarrilean, LABeko emakumeon batzarrean.

 

 

 

Kaleratutako langilea berronartzeko exijitu dute Bizitegi erakundearen egoitzaren aurrean

admin
-
0
Kaleratutako langilea berronartzeko exijitu dute Bizitegi erakundearen egoitzaren aurrean

Bizitegi irabazi asmorik gabeko erakundearen zuzendaritzak, Eusko Jaurlaritzako Osasun sailarekin zuen hitzarmenaren amaieran oinarrituz, eta gerentziak duela egun gutxi esandakoari uko eginez, lankide bat kaleratzearen erabakia hartu du. Hala, enpresa batzordeak elkarretaratze bat egin du gaur enpresak Bilboko Otxarkoaga auzoan duen egoitzaren aurrean, langilearen berronartzea exijitzeko.
 

 

 

Nicolas Maduroren zilegitasun demokratikoa aldarrikatzen dugu

admin
-
0
LAB sindikatutik Uruguay eta Mexikok abian jarritako elkarrizketa bidea babesten dugu.

Venezuelan pasa den urtarrilaren 23tik aurrera eman diren gertakizunen aurrean honakoa adierazi nahi dio Euskal Herriari.

Pasa den urtarrilaren 23tik aurrera Venezuelan herriak legitimoki eta demokratikoki bozkaturiko Nicolas Maduro eta chavismoa boteretik kentzeko estatu kolpe bat martxan dago. Estatu kolpe hau Estatu Batuak eta Europar Batasunak zuzenduriko estrategia inperialistaren baitan kokatzen dugu, eta Batzar Nazional Konstituziogilearen eta handik eratorritako hauteskunde prozesuaren zilegitasun demokratikoa onartzen ditugunez Venezuelako herriaren borondatearen gainetik herria desegonkortzeko estrategia hau arbuiatzen dugu. Gauzak horrela LAB sindikatutik honakoa adierazi nahi diogu euskal gizarteari;

1) LAB sindikatuak Batzar Nazional Konstituziogilearen eta hark deituriko hauteskunde demokratikoen bitartez hautatua izan zen Nicolas Maduroren zilegitasun demokratikoa aldarrikatzen dugu. Gauzak horrela bere burua Venezuelako lehendakari izendatu duen Juan Guaidó Euskal Herriko nahiz nazioarteko alderdi politiko, gobernu eta parlamentuk errekonozitu izana gaitzesten dugu Venezuelako herriaren bizitza politikoan injerentzia garbi bat delako, eta injerentzia horrek Venezuelako herria desegonkortzea duelako helburu. Chavismoaren kontrako manifestazioan EAJk, Alderdi Popularrak eta Ciudadanosek espazio berdina konpartitu izana esanguratsua da oso.

2) Estrategia guzti honen atzean, urte luzez inperialismoak prestaturiko estrategia garbi bat ikusten dugu. Estatu Batuek eta haren politiken jarraitzaile sutsu den Europar Batasunak momentu egokia itxaron dute Juan Guaidoren aitortzaren bitartez chavismoaren kontrako estatu kolpe bat emateko eta kapitalaren zerbitzura egongo den gobernu bat ezartzen saiatzeko.

3) LAB Sindikatutik chavismoak 20 urte hauetan Venezuelako herrian emandako eraldaketa aldarrikatu nahi dugu. Chavismoaren eskutik urte hauetan Venezuelako herri sektoreek bizituriko ahalduntzea goraipatu beharrekoa da, arazoak arazo, inperioaren atzeko patioa izatetik herri burujabe bat izatera pasa delarik.

4) LAB sindikatutik Uruguay eta Mexikok abian jarritako elkarrizketa bidea babesten dugu. Aurretik esandako guztia berretsiz, Venezuelak bizi duen egoera gainditzeko elkarrizketa eta negoziazioa beharrezkoak direla uste dugu, beti ere Venezuelaren burujabetza eta herriak harturiko erabakien gainean ematen bada. Gauzak horrela ostegun honetan, otsailaren 7an, Montevideon egingo den konferentziari zorterik hoberena desio diogu, Venezuelan herriaren borondatearen defentsan eta Venezuelako herriaren burujabetzan oinarrituko den fase bat ireki dadin.
 

 

 

Debagoienako Ospitalean ez dugula inongo jarrera errepresiborik onartuko ohartarazi dugu

admin
-
0
Debagoienako Ospitalean ez dugula inongo jarrera errepresiborik onartuko ohartarazi dugu

Gaur LABek, ESKrekin batera, kontzentrazio batera deitu du Osakidetzari berriro esateko ez dugula EPEn izandako filtrazioen aferan sasi konponketarik onartuko, ezta osasun publikoko lanpostuen banaketan ematen diren jarduerak salatu dituztenen kontrako inongo jarrera errepresiborik ere.

Arrasate eskandalu honen erdigunea izateko arrazoi asko daude, ez soilik salaketa egin duten anestesistak hemen lan egiten dutelako.

Gure lankideak Kardiologiako Epaimahaiko buruak gidatzen duen Gerentziaren aldetik presioak jasotzen ari dira. Eskainitako hogeita bi lanpostuekin eta hogeita bi azterketa biribilekin, Kardiologia da, Epaimahai honen buru den Arrasateko Gerenteak prestatu dituen azterketekin, kategoria deigarriena.

Epaimahaiko Buru eta aldi berean Gerentea den pertsona honi, azterketa eguna baino 25 egun lehenago epaimahai kide batek e-mailez azterketa hori filtratu egingo zela jakinarazi zion, eta dimisioa eman duten GGBB Zuzendariak eta Hautaketa eta Horniketa ardunarekin batera ez ikusiarena egitea erabaki zuen. Ez hori bakarrik, azterketaren emaitza deigarriak ezagutu ondoren jarrera berdina mantendu zuten. Egun gutxira LABek azterketa kopuru baten ikerketa estatistiko batzuk argitaratu zituen, Kardiologiakoak barne. Harrigarria iruditzen zaigu horrelako pertsona batek Arrasate bezalako ospitale baten gerentzia mantentzea.

Gerentzi honek EPE honetan aurkeztu diren pertsona guztiekiko izugarrizko errespetu falta erakutsi du, baita euskal gizarte osoarekiko ere. Praktika hauek ohikoak irudituko zaizkio, bere jarrera ikusirik, salaketa egin zutenen gainean mendekua bilatuz, eta horrez gain inguruko gizarte osoari errespetua faltatzen ari zaio ospitale honen behar-beharrezko diren Mikrobiologia eta Patologi Anatomiako zerbitzuak modu ilunean suntsituz. Azken gai honi buruz LAB-ek 2018ko abuztuaz geroztik sarritan galdetu du, eta gaur egun erantzunik gabe jarraitzen dugu.

Argi utzi nahi dugu: Luisa Maria Diez Azurmendi bezalako pertsonak, kategori baten epaimahaiko arduraduna izan eta gerta litezkeen filtrazioen aurrean ez ikusiarena egin duenak, salatzaileei jazarpen eta lan-zigorrak ezartzen saiatzen dena eta inoren aurrean kontuak eman gabe mikrobiologia eta anatomia patologikoko zerbitzuak desegin dituenak, Osakidetzako ardura postuak utzi behar dituztenen adibideak dira.

Osakidetzak Luisa Maria Diez Azurmendi bezalako pertsonei ardura postuetan mantenduz, babesa ematen dien bitartean, EPE eredu berriak eta Arartekoaren gomendioak alferrikakoak izango dira.

 

 

 

Lanuzteekin hasi dira Gestamp taldeko GTO enpresan integrazio akordioaren alde

admin
-
0
Lanuzteekin hasi dira Gestamp taldeko GTO enpresan integrazio akordioaren alde

Gestamp Try Out Services (GTO) Erandioko lantegiko 43 langileak integratzeko akordio baten alde ari dira borrokan. Honek, Gestamp taldean urtez luzaz egon izan den desberdintasun egoera bidegabearekin amaitzea ekarri beharko luke, taldeak berak sortutako “low cost” azpikontrata honekin.

Gestamp taldea mulniazionala da, autogintzarako osagaien diseinu eta ekoizpenean ari dena, estanpazioan eta matrizerian, Riberas Mera familia da bere jabe nagusia eta burtsan kotizatzen du 2017tik hona. 22 lantegi baino gehiago du mundu osoan, 100 herrialde baino gehiagotan, eta 40.000 langiletik gora. 2017an 8.200 miloi eurotako fakturazioa izango zuen.

Eskandaluzko zenbaki hauekin, GTOko enpresa-batzordetik negoziazioak abiatu ziren iazko apirilean langileen integraziorako akordio bati ekiteko GTE eta Adralen. Bi hauetan taldeko gainontzeko enpresetan baino baldintza okerragoak dituzte lana berdina izan arren. Egoera hau, taldearen barruan urteak egon ondoren, ez zaigu bidezkoa iruditzen eta ez da onargarria Erandioko lantegiko 43 langileentzat. Hilabetetako blokeoaren ondoren eta enpresa-batzordea eta zuzendaritzaren arteko jarrerak aldenduta zeudenez, asanbladak, gehiengo zabalarekin, otsailetik aurrera mobilizazioei ekitea erabaki zuen.

Orain zuzendaritzak bi proposamen ditu mahai gainean baloratuak izan daitezen. LAB eta ELAk osatzen dugu enpresa-batzordearen gehiengoa osatzen dugunak, Erandioko lantegiko langileak asebeteko dituen akordioa lortzea ahalbidetuko duen erantzun baten zain jarraitzen dugu.

Bien bitartean, enpresa-batzordearen gehiengoak bi ordutako lanuzteei ekin die. Gaur egin dute lehena eta otsaileko astelehen, asteazken eta ostiral guztietan ere egingo dituzte. Bi astetan zehar egingo dituzte aipatu lanuzteak. Zuzendaritzak enpresa-batzordeak egindako bi proposamenetatik bakarren batean aurrera egiteko moduko erantzuna eman ezean, hilabeteko azken bi asteetako lanuzteak 4 ordutakoak izango dira.

 

 

 

Lan istripuen aurrean neurriak hartu eta beharrezko baldintzak ezartzeko exijitzen diogu Jaurlaritzari

admin
-
0
Lan istripuen aurrean neurriak hartu eta beharrezko baldintzak ezartzeko exijitzen diogu Jaurlaritzari

Gaur, astelehena, langile baten heriotza eragin duen lan istripu baten berri izan dugu. Zizurkilen dagoen Ula Construcciones Metálicas enpresan pieza batek S.S.O.E. 43 urteko Begiralia S.L enpresako langilea kolpatu du, eta bertan hil da.

Lehenik eta behin, LAB sindikatutik gure elkartasun eta babes osoa helarazi nahi diegu langilearen senide lagun zein lankideei momentu gogor hauetan.

Bigarrenik, istripuaren gaineko ikerketa zehatza eta erantzunkizunak esijitzen ditugu. Honekin 5 dira gutxienez urte hasieratik Euskal Herrian hildako langileak.

Istripuak ez dira gauzatzen arrazoi puntual edo koiunturalengatik. Oinarrizko arazo bat dugu, estrukturala.- Eredua da arazoa, langileon osasuna kolokan jartzen duena, bizitza galtzeraino.

Berriz diogu botere harreman aldaketa ematen ez den bitartean holako gertaerek jarraituko dute. Industria politika I+G+B edo sektore estrategikoez hitz egiten entzuten dugu, sektorean aldiz, prekarizazioa, azpikontratazioa eta osasuna galera zein istripuak etengabean gora doaz.

Behingoz eta bide batez administrazioari, beharrezko ikerketa abiaraztea exijitzen diegu eta kasu honetan Jaurlaritzari, lan istripuen aurrean neurriak hartu eta beharrezko baldintzak ezartzea. Epaileei, istripuen erantzuleen gainean ardurak exijitzea eskatzen diegu. Nahikoa da, nazkatuta gaude. Langileontzat justizia exijitzen dugu. Ezin ditugu onartu istripuak laneko ezaugarritzat.

Azkenik dei egiten dugu hurrengo orduetan antolatu daitezkeen salatze elkartaratzeetan parte hartzera, eta modu berean borrokan jarraitzera lan zentru eta lantokietan eredu berri baten, baldintza duinen eta langileon bizitza eta osasuna erdigunean jarriko duen jendarte eta herri baten alde.
 

 

 

Kaleratutako langilea berronartzeko exijitu diote Bizitegiri

admin
-
0
Bizitegi irabazi asmorik gabeko erakundearen zuzendaritzak, Eusko Jaurlaritzako Osasun sailarekin zuen hitzarmenaren amaieran oinarrituz, eta gerentziak duela egun gutxi esandakoari uko eginez, lankide bat kaleratzearen erabakia hartu du. Hala, elkarretaratze batera deitu du biharko, otsailaren 5erako, enpresa batzordeak.

Hauxe da Bizitegi erakundeko enpresa batzordearen oharra:

2019. urtearen hasieran, enpresak Eusko Jaurlaritzarekin zuen hitzarmen baten amaieraren berri eman zigun. Honekin batera, lasaitasun mezu bat bidali zigun, zeinetan argi uzten zuen, egoera honek ez zuela erabaki traumatikorik erakarriko. Albiste hau eman eta egun gutxira, erakundean hamarkada bat baino gehiago lanean daraman langile baten kaleratzea jakinarazi dute.

BIZITEGI, bere web orrian argi uzten duen bezala, partehartze, elkartasun, gardentasun eta ardura balio batzuetaz harrotu egiten da. Beste behin ere, hau itxurakeria hutsa besterik ez dela argi utzi dute.

Hartutako erabakiarekin, langile eredugarri bat enplegu barik uzten dute. Gainera, Otxarkoagako interbentzio unitatea erizain zerbitzu barik uzten dute, erabiltzaileen ongizaterako guztiz beharrezkoa den jarduera bat ezabatuz, honek dakarren zerbitzuaren kalitatearen galerarekin.

BIZITEGIko komiteak, zuzendaritzarekin premiazko bilera bat eskatuko du, erakundearen egoeraren berri jakiteko eta gure lankidearen berronartzea eskatzeko. Gainera, biharko kontzentrazio bat deitu dugu, otsailak 5, 14:00etan enpresako lokalaren aurrean (Langaran 14, Otxarkoaga).

Instituzioek, "zerbitzu sozialen zorroa"-ren bidez sektorerako nahi duten norabide eta etorkizuna, sektorea bera arriskuan jartzen dute, lehenengo kaleratze hau adibide argia izanik. Honengatik, adi egon behar gara, ez ditugularik etorkizun hurbilean sektorearen defentsarako ekintza eta mobilizazioak baztertzen.
 

 

 

Langabeziak gora egin du urtarrilean eta 154.329 pertsonetan kokatzen da Hego Euskal Herrian

admin
-
0
PSOEren gobernuak konpromisoa hartu du epe laburrean langabeziaren aurreko babes esparru berri bat garatzeko, indarrean dauden diru-laguntzen sakabanaketa ordezkatuko duena. Baina laguntzen berregituratze eta bateratze batek, bere horretan, ez du langabeziaren aurreko babesa hobetuko ezinbestean, estaldura eta zenbatekoek modu esanguratsuan gora egiten ez duten bitartean.

Enplegu zerbitzu publikoetan erregistratutako langabeziak 1.813 pertsonetan egin zuen gora urtarrilean aurreko hilabetearekiko. Honekin, 154.329 langabetutakoa da Hego Euskal Herriko kopuru ofiziala.

Honen berehalako arrazoia gabonetako kanpainaren amaiera eta bere ondorioak dira, nagusiki, merkataritza eta ostalaritzan. Baina sakonean jatorrian dagoena sortu den enpleguaren zati handi baten kalitatea txarrean dago:, baldintza koiunturalei lotutako enplegua, prekarioa, gaizki ordaindu eta egonkortasunik gabea.

Hori dela, langabeziaren bilakaerak urtarrilean ondorio bereziki negatiboak izan ditu zerbitzu sektorean eta emakumeen artean. Izan ere, emakumezko 2.974 langabetu gehiagorekin amaitu da hilabetea (%3,5 gehiago), eta gizonezko langabetuen kopuruak behera egin du 1.161 pertsonetan, abenduarekin alderatuta.

Bestalde, garrantzitsua da ohartaraztea langabezian dagoen pertsona bakoitzeko beste bi daudela enplegu zerbitzu publikoetan izena emanda. Zalantza barik, egun dagoen enpleguaren baldintza eta soldata txarrak daude enplegu hobea bilatzeko izena ematen duten okupatuen kopuruaren igoeraren atzean.

Kontratazioari dagokionez, sinatu ziren 10 kontratutatik 9 aldi baterakoak izan ziren. Honek azaltzen du gurean ematen den aldi-baterakotasun tasa, %26an kokatzen dela, Europar Batasuneko handienen artean egotea, Polonia honezkero gaindituta (%23,8), Espainiako estatua baino ez du aurretik (%26,9).

Langabeziagatiko babes sistemari dagokionez, salatu beharra dugu bere estaldura maila apala. Egun, ofizialki langabetuak direnen %30,8ak baino ez du langabeziagatiko prestazioren bat jasotzen, honek dakarrena da arretarik gabe uztea langabezian dauden ia 105.000 pertsona.

Gainera, onuradunen %38ak prestazio asistentzialen bat jasotzen du, batazbestean, hilean 430 eurotara iristen ez dena.

Eta emakumeek jasotzen duten prestazio kontributiboaren zenbatekoa gizonek jasotzen dutenean baino apalagoa izaten da, batazbeste %15 gutxiago kobratzen baitute (SEPEk emandako azken datua, 2018ko abenduari dagokiona Estatu mailan).
 

 

 

Barakaldoko Udal Gobernuak egindako murrizketak salatu ditugu

admin
-
0
Barakaldoko Udal Gobernuak egindako murrizketak salatu ditugu

Hainbat eragilek, LABek barne, protesta egin dugu Barakaldon, udaletxearen aurrean, gizarte arloan egindako murrizketak salatzeko. Hain zuzen ere, gaur da lehen eguna emergentziazko laguntzak eskatzeko Barakaldon. Iaz, 1.553 familiak eskatu zuten laguntza lehen egunean; hori bai, gero sei hilabete pasa ziren espedienteak onartu edo ez erabaki arte. Hortaz, murrizketak ez ezik, gai honetan udalak duen jokabidea eta utzikeria ere salatu dugu gaur, komunikabideei igorritako ohar batean azaldu dugun bezala.
 

 

 
1...675676677...1,587Page 676 of 1,587

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus