2026-01-30
Blog Page 636

Lanean sexu aniztasuna eta askatasuna bermatzeko neurriak exijitu dizkiegu Hego Euskal Herriko patronalei

admin
-
0
Lanean sexu aniztasuna eta askatasuna bermatzeko neurriak exijitu dizkiegu Hego Euskal Herriko patronalei

Gaur da maiatzaren 17a, lesbo-, homo-, trans- eta bifobiaren (LGTBfobia) kontrako eguna. Honen aurrean, eta lan munduan ere aniztasun eta askatasun sexuala bermatzeko helburuarekin, LABek Hego Euskal Herriko patronalak (Confebask EAEn eta CEN Nafarroan) interpelatu ditu lan zentroetan diskriminaziorik eman ez dadin neurriak eta LGTBfobiaren kontrako ekimenak eskatuz. Iruñean, Imanol Karrera Nafarroako bozeramailea eta Itsaso Torregrosa Iruñerriko idazkaria CENen egon dira. Bilbon, Arantxa Vazquez LABen Batzorde Exekutiboko kideak eta Urtzi Ostolozaga sindikatuko Ekintza Sozialeko idazkariaren ondokoak zuzendu dizkiote patronalari aipatutako neurriak.

Itsaso Torregrosa eta Imanol Karrera, Iruñean.

Hauxe da Confebask eta CEN patronaletan erregistratu dugun idatzia:

Balore heterosexistetan oinarritzen den jendarte kapitalista eta patriarkalean bizi gara. Modu ezberdinetan derrigorrezko heterosexualitatea inposatzen zaigu: behin eta berriz gure identitateak estereotipatuz, gure bizitza sexualak kuestionatuz, izekak eta umilazioak… Langile guztiok eskubide guztiak bermatuak izan behar ditugu, eta ez dugu inongo diskriminaziorik jasan behar, ez zuzenean, ez zeharka, ez kontatatuak izateko orduan, ez lanean gaudela ere. Gure intimitatea errespetatua izan dadin eskubidea dugu, duintasunerako eskubidea dugu, eta gure identitate eta aukerak ez izkutatzeko eskubidea daukagu, edo azalpenik ez emateko horrela erabakitzen badugu.. Lantokiek, diskriminazio hauek eman ez daitezen, prebentzio neurriak hartu behar dituzte enpresek.

Aniztasuna ezin da izan diskriminaziorako, akosorako bazterketarako arrazoia.

Enpresek gure aniztasun sexualarekiko inongo diskriminaziorik eman ez dadin baldintzak bermatzeko derrigortasuna izan behar dute. Era berean, jarrera Lesbo-Homo-Trans-Bifoborik izan ez dadin, neurri zehatzak eta jarraibideak jaso behar dituzte, eta kexei, salaketei eta erreklamazioei erantzun behar diete.

Langile klasearen sentsibilizazioa guztiz beharrezkoa da, guzti horregatik, LAB sindikatutik, gida eta protokoloen derrigortasuna inplementatzea aldarrikatzen dugu diskriminazioarekin bukatzeko, eta lan munduan askatasuna eta aniztasuna irabazteko.

 

 

 

Anbulantzietako hitzarmenak langileen arteko marko komun bat ahalbidetuko du EAEn

admin
-
0
Borrokan eta negoziaketetan hiru urte igaro ondoren, hainbeste desiatutako hitzarmen autonomikoa egia bihurtuko da, azkenean, anbulantzietako sektorean. Hitzarmen honek langileen lan baldintzak hobetuko ditu, bizi ohi dituzten egoera prekarioei aurre egingo die eta bateratu egingo ditu, langileen arteko marko komun bat sortuz EAEn, etorkizunari begira.

Azkenean, langile batek soldata bera eta eskubide berak izango ditu Bilbon zein Legution, Irunen zein Gasteizen. Azkenean, hiru herrialdeen arteko parekatzea lortu dute. Izan ere, Erkidego berean eta bezero berarentzat (Osasun Sailarentzat) lan egin arren, langileen arteko aldeak lotsagarriak ziren. Azkenean, EAEko sektoreko langile guztientzat aterpe propio bat lortu dute, guztientzat gutxieneko baldintza batzuk bermatzen dituena.

Gainera, estatalizazioa gelditzeko tresna bat da hitzarmena, Madrilgo gobernuak, Estatuko sindikatuek, enpresek eta instituzioek gure herrian inposatu nahi digutenari aurre egiteko. Garrantzia handia du honek, Euskal Herrian gure lan baldintzak negoziatzeko dugun eskubidearen mesedetan, gure bizitza kalitatea mantentzeko helburuarekin, estatalizazioaren bitartez zenbait enpresarik inposatu nahi izan dizkiguten murrizketen gainetik.

LABek hasieratik bultzatu du hitzarmen hau. Lehen bileretara deitu zuen sindikatua izan ginen, gainontzeko sindikatuekin plataforma bateratu bat prestatzeko zein mahai negoziatzailea egituratzeko (gehiengoa duen sindikatua ez izan arren). Negoziazio honetako alde desberdinekin bilera ugari izan ditugu, akta ofizialetan agertzen ez direnak barne (Eusko Jaurlaritza, Osasun Saila, Lan Saila). LAB ere izan da EAErako hitzarmenaren beharra bizirik mantentzeko erronkaren pisua eraman duen sindikatua, enpresen eta Eusko Jaurlaritzaren oposizio gogorrari eta beste sindikatu batzuen interesei aurre eginda.

Eta gogoratu beharra dugu hitzarmen honen sinadura ez dela zerutik erori. Horren atzean Arabako anbulantzietako langileen 5 urteko greba dago, LABek babestuta uneoro, lanean jarraitu baitugu, epe motzean denok nahi genituen emaitzak ikusi ez ditugun arren. Era berean, ez da ahaztu behar hitzarmen honen jatorria kalean gauzatutako beste borroka batean dagoela, 40 egunetik gorako greba batean, hain zuzen ere. Borroka horrek Bizkaiko azken hitzarmena ekarri zuen, eta hitzarmen horren bigarren klausula osagarrian jasota dago mahai negoziatzailearen eraketa; oraingo hitzarmena ekarri duen ezaugarria, hain justu. Urrats bakoitzak borroka bat du atzean, eta borroka bakoitzak emaitzak ekartzen ditu.

Honako hau lehen hitzarmen autonomikoa da, aurrera egiteko balio behar duen oinarri komun eta sendo bat, beti ere LABek etorkizunerako ezarritako helburu zehatza lortzeko: erabateko parekatzea Osakidetzako langileekin, soldata eta baldintzetan. Helburu bakoitzak bere urratsak eskatzen ditu, eta, hitzarmen honekin, lan baldintzak hobetzeaz gain, lehen pausoa eman da parekatzea lortzeko, herrialde guztientzako negoziazio marko komun bat lortu eta gero.

 

 

 

Gobernu taldeak ez dituela konpromisoak betetzen salatu du Donostiako Udaleko Langileen Batzordeak

admin
-
0
Gobernu taldeak ez dituela konpromisoak betetzen salatu du Donostiako Udaleko Langileen Batzordeak

Udalak eta Langileen Batzordeak hilabeteak eman dituzte lanpostuen balorazioa berraztertzen. Ondainsari mailak berriro analizatu eta Udaleko lanpostu bakoitzaren funtzio nahiz zereginetara egokitzea da helburua. Bada, Udalak ez ditu agindutako konpromisoak bete. Hori salatzeko, agerraldia egin du Donostiako Udaleko Langileen Batzordeak.


 

 

 

Bizkaiko Etxez Etxeko Laguntza Zerbitzuko langileek laugarren greba eguna egin dute

admin
-
0
Bizkaiko Etxez Etxeko Laguntza Zerbitzuko langileek laugarren greba eguna egin dute

Bizkaiko Etxez Etxeko Laguntza Zerbitzuko langileak laugarren greba eguna egin dute. Hain justu, astebeteko greba egiten ari dira, enpleguaren eta kalitatezko zerbitzuaren alde, eta egunero Prekarietatearen Aurkako Martxa izenekoa egiten ari dira. Gaur Algorta eta Areeta artean egin dute protesta, eta, bihar, grebaren azken egunean, Basaurin hasi eta Bilbon amaituko dute mobilizazioa.
 

 

 

Bizkaiko metalgintzako mahai negoziatzailera bueltatuko gara

admin
-
0
Iazko ekainean, patronalak zuen jarrera immobilista eta blokeatzailearen inguruan, LABek bere partehartzea etetea erabaki zuen Bizkaiko metalgintzako mahai negoziatzailean. Sektoreko langileengana joateko erabakia hartu genuen, hauek baitira hitzarmen hau benetan behar eta nahi dutenak, euren lan baldintzak hobetzea behar dutenak eta lan-zentroetan jasaten ari diren prekarietatearekin amaitzea behar dutenak.

Ia urtebete beranduago, mahai negoziatzailean ordezkaritza dugun lau sindikatuok, pasa den ostiralean plataforma bateratua eta greben egutegia aurkeztu genituen sektorerako. Hori dela eta, LABek erabaki du bihar berriro bueltatuko dela Bizkaiko metalgintzako negoziazio mahaiara.

Guztion artean eta borrokarekin, posible da Bizkaiko metalgintzarako hitzarmen duina lortzea.
 

 

 
 

EPE prozesuetarako Osakidetzak aurkeztu dituen neurrietako batzuk bide onetik doaz, baina ez dira nahikoak prozesu garbi eta gardena bermatzeko

admin
-
0
EPE prozesuetarako Osakidetzak aurkeztu dituen neurrietako batzuk bide onetik doaz, baina ez dira nahikoak prozesu garbi eta gardena bermatzeko

LABen iritziz, Osakidetzako Zuzendari Nagusiak aurkeztu dituen neurrietako batzuk EPE prozesuetan gardentasuna hobetzeko balio dezakete, baina eurak bakarrik, ez dira nahikoak izango kategoria batzuetan errotuta dauden praktika ustelak desagerrarazteko, ezta EPE prozesua %100ean garbia bermatzeko ere. Izan ere, edozein neurri soilik izango da eraginkorra Osakidetzaren zuzendaritzaren aldetik jarrera irmo eta konbentzituarekin batera badoa, orain arte gertatu ez dena, alegia.

Proposatutako beste neurri batzuekin ez gatoz bat. Hona hemen neurrion gainean egiten dugun irakurketa kritikoa:

• Epaimahaien osaketan kide gehiegi proposatzen dira: zenbat eta kide gehiago, orduan eta zailagoa izango da, filtraziorik egotekotan, balizko erantzule zuzena aurkitzea.

• Osakidetzak behin-behinekotzat hartzen ditu neurri gehienak.

• Osakidetzak errealitatea onartu behar du, aldatu baino lehen. Filtrazioak egon direla ez onartzeak ez dauka zentzurik; azken finean, errealitatea hau ezeztatzeak berdintasun, meritu eta kapazitate printzipioak apurtzen dituzten pertsonak babestu baina ez du egiten. EPE sistema aldatzeko neurriak proposatzen direnean aurretiaz filtrazioak egon direla ez onartzeak zalantzan jartzen du neurrion benetako helburua. Beraz, beste ezer baino Osakidetza kudeatzen duten kideen irudia garbitzeko ahalegin propagandistikoa dirudi.

• Osakidetzaren gaur arteko jarrera ikusita, azpimarratu nahi dugu ez dagoela funtzionatuko duen EPE eredu berririk, azterketak egiteko eta zaintzeko prozesuan parte hartzen dutenek oso garbi ez badaukate Osakidetzak modu zorrotzean jokatu duela edozein irregulartasunen aurrean. Gaur egun inputaturik dauden pertsonak euren buruzagitza kargutan (izendapen askekoak) mantentzeak Osakidetzaren jarreraren gaineko kezka larria sortzen du.

• Osakidetzak eta Osasun Sailak argitu behar dute azken hilabeteotako dimisioen arrazoia.

• EAEtik kanpoko adituen beharra aldarrikatzea suposatzen du, praktikan, EAEn ez garela EPE gardena egiteko gai. Gure ustez, hau bezalako neurriak dira, ez LABek egiten duen salaketa lana, Osakidetzako profesionalen ohorea zalantzan ipintzen dutena. Era berean, azterketak kanpo profesionalen esku uzteak ez du inondik inora ezer ziurtatzen, Kongresu zein hitzaldietan leku ezberdinetako espezialistak elkartzen baitira eta elkar ezagutzen baitute; XXI. mendean gaude, distantzia ez da muga bat.

• Osakidetza gonbidatzen dugu euren eskubideak urraturik ikusi dituzten milaka oposiziogileri barkamena eskatzera, parte hartu duten EPE ustel honetan iragartzeko erabili zuen indar mediatiko zein instituzional berarekin.
 

 

 

Kalerako deia egin dugu Josu Urrutikoetxearen atxiloketaren aurrean, bakea eta konponbidea helburu

admin
-
0
Gaur izan dugu Josu Urrutikoetxea eta beste bi pertsonaren atxiloketaren berri. Honen aurrean, LAB sindikatuak mendekua ikusten du, eta gatazkaren konponbidearen inplikazioaren kontrako zigorra, are gehiago ia zortzi urte bete direnean ETAk borroka armatuaren amaiera iragarri zuenetik, urte bi gizarte zibilaren laguntzaz desarmatu zenetik eta urtebete desegin zenetik. Zeharo aldatu da Euskal Herriko testuingurua azken hamarkadan. Bakea eta konponbideranzko urrats eztabaidaezinak egin dira. Ondorioz, atxilotuak ahalik eta azkarren askatzea eskatzen dugu.

Duela aste batzuk esaten genuen kartzelak husteko garaia zela, ez betetzekoa; eta bultzada politikodun operazio polizial honek, Estatuak kontrako bidean tematuta daudela erakusten digu, errepresioaren eta salbuespenaren betierekotzean.

Atxiloketa hauek berriz ere uzten dute agerian Espainiako estatuaren izaera antidemokratikoa, gaindituta egon beharko liratekeen bide errepresiboetan sakontzearekin tematuta jarraitzen duela erakusten baitu.

Egun, estatuarena da gatazkarekin lotuta aktibo eta indar betean dagoen indarkeria bakarra. Bakea eta errepresioaren arteko aukeran, nabarmena da zein den bere apustua.

Herri honek irtenbideak behar ditu, ez zigorra, kartzela, mina eta sufrimendua areagotzen dituzten bide agortuak. Herri honen nahiaren aurkako erasoa dira atxiloketak. Bakea eta askatasunaren alde, azken eraso honen aurrean indarrak bildu eta erantzuteko deia egiten die LABek euskal langileei.
 

 

 

Sindikalismoak eredu sozioekonomiko berriaren alde jokatu behar duen paperari buruzko gogoeta kolektiboari ekin diogu

admin
-
0
Sindikalismoak eredu sozioekonomiko berriaren alde jokatu behar duen paperari buruzko gogoeta kolektiboari ekin diogu

Sindikalismoari buruzko gogoeta kolektiboarekin jarraitzeko bildu gara Ordizian. Sindikalismoak gure herrian eredu sozio-ekonomiko berriaren alde jokatu behar duen papera eta egin behar dituen proposamenak eztabaidatzeko mintegi bat antolatu dugu, eta, bertan, lan taldetan banatu gara hausnarketa hori gauzatzeko; hau guztia, "Sindikalismoa [Bir]Pentsatzen. Gure garaia: Euskal Herria eraldatzeko proposamenak” leloarekin. Ordiziako mintegian abiatutako prozesua dela eta, lau iturri hauetatik edango dugu eredu-sozioekonomikoa birpentsatzeko: feminismotik, ekosozialismotik, demokratizaziotik eta nazio garapena eta kohesiotik.

Sindikalismoaren inguruko gogoeta sakona egiten jarraitzen dugu. Langileen eskubideen eta bizi baldintzen defentsa oinarri izanik, eta iparra Euskal Herria askearen xedean ezarrita, gure burua eraberritzen ari gara. Testuinguru ekonomiko, sozial eta politikoa etengabeko aldaketan dago eta egoera horietan sindikalismoak eraginkor izan behar du aipatu helburuen alde. Gogoeta hori “Sindikalismoa [Bir]Pentsatzen” prozesuaren barnean egiten hasi ginen duela urte batzuk. Hainbat aldaketa egin ditugu gure ekintza sozio-sindikalean eta antolatzeko moduan, 2017ko Biltzar Nagusian finkatu zirenak. Orain, prozesu horrek bigarren urrats bat du. Sindikalismoak gure herrian eredu sozio-ekonomiko berriaren alde jokatu behar duen papera eta egin behar dituen proposamenak eztabaidatzen hasi gara, eta prozesu hori Ordizian egindako mintegian abiatu dugu.

Igor Arroyo idazkari nagusi ondokoak eta Prestakuntza idazkari Jagoba Zuluetak agerraldi bat egin zuten astelehenean, eta, bertan, “Sindikalismoa [Bir]Pentsatzen. Gure garaia: Euskal Herria eraldatzeko proposamenak” prozesuaren nondik norakoak eta gako politiko nagusiak azaldu zituzten.
 

 

 

Elkartasuna Kataluniako Irakaskuntza publikoko langileekin

admin
-
0
Elkartasuna Kataluniako Irakaskuntza publikoko langileekin

Gaur, maiatzak 16, Katalunia osoko irakaskuntza publikoko langileak lanean pairatzen dituzten lan baldintza prekarioak salatzeko 24 orduko greba orokor batetara deituak daude. Greba orokor hau USTEC·STEs (IAC), CCOO, I-CSC, ASPEC-SPS, CGT, UGT sindikatuek deitu dute; sektorean ordezkaritza daukaten sindikatu guztiek, alegia.

Greba deialdi hau sindikatuen aldarrikapen ekimen batzuen ondoren etorri da. Konkretuki, maiatzaren 2an sindikatuetako ordezkariek Kataluniako hezkuntza departamenduan itxialdi bat burutu zuten. Langile eta sindikatuen aldarrikapena 2019/2020 kurtsoa aurtengo ikasturtea hasi zuten baldintza berdinetan ez hastea da. Konkretuki greba honetarako egiten dituzten aldarrikapenak honakoak dira:

• Eskola ordutegia murrizketen aurreko zenbakietara bueltatzea.
• Ratioen murrizketa eta irakaskuntza publikoko talderik ez ixteko bermea.
• Murrizketa osoak lehengoratzeko helburua duen benetazko negoziaketa zintzo bat hastea.

Orain arte sindikatuek ez dute Kataluniako gobernuko hezkuntza departamentutik inolako erantzun positiborik jaso, eta, gauzak horrela, sindikatuek sektore publikoko langileen 24 orduko greba eguna deitzea beste erremediorik ez dute izan. Langileen eskariak betetzeko nahikoa litzateke aurrekontuaren igoera suposatuko lukeen urgentziazko lege dekretu bat onartzea, baina gaur egun gobernuaren aldetik ez da holakorik egiteko inolako borondate politikorik ikusi.

Horregatik, LAB sindikatutik Kataluniako Irakaskuntzako langileek deituriko greba hau babestu egiten dugu, eta langile eta sindikatu hauen aldarrikapenak gure egiten ditugu. Euskal Herrian antzeko egoeratik pasa gara eta Alderdi Popularraren nahiz Alderdi Sozialistaren murrizketak aplikatzen zituzten EAE eta Nafarroako gobernuen politikak pairatu ditugu eta pairatzen jarraitzen dugu. Horretaz gain, Ipar Euskal Herrian irakaskuntzako langileek ere grebak eta mobilizazioak burutu dituzte. Horregatik, gaurko greba eguna Kataluniako irakasleen indar erakustaldi bat izatea espero dugu, murrizketen garaia behin betirako historiaren zabor ontzira botatzeko.

 

 

 
1...635636637...1,588Page 636 of 1,588

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus