2026-05-04
Blog Page 547

Espazio autogestionatuak funtsezkoak dira eraldaketa sozialaren bidean

admin
-
0
Espazio autogestionatuak funtsezkoak dira eraldaketa sozialaren bidean

LAB sindikatutik, koronabirusaren salbuespenezko egoera baliatuta, azken egunotan Gasteizko Talka espazio feminista, Añorgako Firestone lantegi berreskuratua eta Getxoko Itzubaltzetako gaztetxean eman diren huste zein prozeduren abiatzeak salatu eta gure elkartasun eta babes osoa adierazi nahi diegu proiektu eta espazio autogestionatuak aurrera eramaten dabiltzan Euskal Herriko gazte, feminista eta bizilagun guztiei. Halako erasoaldiaren ostean, garrantzitsua iruditzen zaigu ekimen herritarren aldeko konpromisoan berrestea, eta adieraztea, hain zuzen, gure lurralde, gorputz eta identitateez bortizki desjabetu nahi gaituzten honetan hori dela borrokarako bidea.

Osasun krisiaren aitzakiapean, EAJk proiektu herritar eta autogestionatuen aurkako eraso bat bestearen atzetik agindu duela ikusten ari gara, eta hain zuzen ere, bizi dugun une erabakior honetan, honelako proiektuek betetzen duten paper garrantzitsua aitortu eta berresteko unea dela uste dugu. Urkullu, Urtaran, Agirre eta Goia kapitalismoaren eta elite ekonomikoen aldeko bortizkeria politikoa sustatzen ari direnean, beldurra hedatu eta gehiegikeria polizialak justifikatuz, orain proiektu askeen, kolektiboen eta espazio autogestionatuen eta lantegi berreskuratuen are behar gehiago dugula azpimarratu nahi dugu, zapalkuntza oroz gaindi, herri gisa antolatzeko, ahalduntzeko eta euskal langileria are itoago nahi gaituen kapitalismo heteropatriarkalaren aurrean alternatibak ereiteko haziguneak direlako.

Beraz, dei egin nahi diegu euskal herritarrei salbuespen egoera honetan bizitzen ari garen eskubideen urraketen aurrean, ekintza kolektiboa eragotzi nahi diguten honetan, autoritarismoaren eta kapitalaren hazkundearen aurrean, proiektu hauek babesteko deialdiekin bat egitera. Defenda ditzagun guztion bizitzak bizigarri eta duinak izateko funtsezko balioak eta proiektuak, aldaketa sozialaren eta burujabetzaren aldeko indar bilakatuz. Bizitza erdigunean jartzeko espazio eta proiektu askak eraikitzen jarraituko dugu. Parean izango gaituzue!
 

 

 

Lan Ikuskaritzari eskatu diogu UPV/EHUko Administrazio eta Zerbitzuetako Pertsonalaren jarduera presentzialera itzultzea gelditzeko

admin
-
0
Lan Ikuskaritzari eskatu diogu UPV/EHUko Administrazio eta Zerbitzuetako Pertsonalaren jarduera presentzialera itzultzea gelditzeko

LABek UPV/EHUn duen atal sindikalak salaketa aurkeztu zuen atzo goizean Bizkaiko Lan Ikuskaritzan. Bertan, eskatzen dugu unibertsitatearen Administrazio eta Zerbitzuetako Pertsonalaren (AZP) jarduera presentzialera itzultzea geldiaraztea, harik eta salatutako eskubide-urraketak konpontzen diren arte eta langileen osasunerako eta segurtasunerako eskubidea modu eraginkorrean bermatzen den arte.

Salaketan, SARS-CoV-2 birusak eragindako pandemiaren ondorioz hartutako hainbat erabaki gogoratzen ditugu, eta hartutako erabaki gehienak sindikatu eta lan-osasun ordezkarien zein Lan-Segurtasun eta Osasun Batzordeen aldez aurretiko parte hartzerik eta ezagutzarik gabe jarri direla indarrean salatzen dugu.

Era berean, gerentziari eskatutako hainbat informazio ere ukatu egin zaigula adierazten dugu eta, bide batez, salatu egiten dugu administrazioak sortarazitako nahasmena langileen artean, batzuk maiatzaren 11tik bertatik lanera joateko deituak izan baitziren, lanik ez zegoenean antolatuta.

Ildo beretik, UPV/EHUk talde kalteberen langileekin izaten ari den jokabidea salatzen dugu, besteak beste, errektoreak berak onartutako lehen Itzulera Planean jasotakoa ez baita betetzen ari, hots, aurrez aurreko lanera itzultzekotan, talde horietako langileak izango zirela azken txandan bertaratuko zirenak eta telelanean jarraitzeko lehentasuna izango zutenak. Hori bera salatu genuen astelehenean ere gerentearekin izandako bilera “ez formalean”.

Aipatzekoa da, iragan asteleheneko bilera goizeko 11:30ean hasi zela eta gerentearen azken erabaki-proposamena 8:49an jaso genuela sindikatuetako kideok. Deialdia bera ere, ez zuen bete horrelako bilerak deitzeko gorde behar den aldez aurreko denbora-tartea.

Bilkuran, LABek bere ezinegona adierazi zuen guzti horregatik, eta duela gutxi publiko egin ditugun aldarrikapen nagusiak defendatu genituen. Sindikatuoi ez zitzaigun eman ezta, aurreko baten bezala, 24 orduko epea proposamenak egiteko. Eta berriro bildu gabe, atzo argitaratu du UPV/EHUk gerentearen azken erabakia, AZPko langileak aurrez aurreko jardunera itzultzeko plana “eguneratzeko” dena.

Bilerak, hala ere, bizpahiru gauza argi geratzeko balio izan zuen: Lehenik eta behin, UPV/EHUko errektoreak ez duela ezelako asmorik langileon osasun egoera testeatzeko, ez premiazko zerbitzuetan egondakoak, ez kalteberak diren taldeetakoak, ez aurrez aurreko jardunera itzuli beharko direnak. Gerentearen esanetan, “behartzen ez gaituztenera arte”, behinik behin.

Bigarrenik, ikastegi, zerbitzu, sail eta unitate ezberdinetako berezko itzulera planak ez direla aldez aurretik jarriko lan-osasun ordezkarien esku, ezta Lan-segurtasun eta Osasun Batzordeen esku ere. Eta plan horiek balioztatu eta onartzea, gerentearen beraren esku geratuko da. Beste behin ere, langileoi eta lan-osasun ordezkariei zein batzordeei dagozkien eskumenak kontuan hartu gabe.

Hirugarrenik, SARS-CoV-2 birusarekiko kalteberak diren langileak gaur, lehen txandan, sartuko direla lanera baieztatzeko balio izan zuen, eta hori onartezina iruditzen zaigu, besteak beste, aurretik esandakoa gezurtatzen duelako eta ez delako kontuan hartzen haien lanpostuetan dituzten baldintzak eta zereginek osasunean eragin dezaketen kaltea.

Ez dugu aipatu gabe utzi nahi UPV-EHUk haien jardunerako lan-arropa erabiltzen duten langileek (mantentze zerbitzuko langileak, kasurako) bere etxera eraman dezatela garbitzera nahi du, hots, birusa etxera eramateko aukerari ateak parez pare zabaltzen dizkio, horiek garbitu eta desinfektatzea enpresaren ardura izan behar denean, noiz eta arrisku biologiko baten aurrean gaudenean. Zur eta lur geratzeko moduko “prebentzio” neurria, alajaina.

Halaber, ez gatoz bat administrazioak telelanaren eta kontziliazioaren aurrean duen jarrerarekin; izan ere, adierazi duenez, "nahitaezko betebeharrengatiko baimena" lehen hiru egunetarako baino ez zuen eman. Hiru egun horietatik aurrera haien defentsarako bide posibleak aztertzen ari gara. Era berean, ulertezina da unibertsitateko langile batzuek ikasturtea amaitu arte UPV/EHUn telelana egin ahal izatea eta beste batzuek bigarren hezkuntzako ikasturtea amaitu arte soilik egin ahal izatea. Dirudienez, UPV/EHUk aitona-amonek haurrak zaintzea nahi du.

Espero dugu Lan Ikuskaritzak, UPV/EHUren lan-arriskuei buruzko legezko eta erregelamenduzko ez betetzeak kontuan hartuta, gure eskubideak defendatzearen aldeko hautua egitea. Edonola ere, LABen ez dugu baztertzen gure eskubideak eta aldarrikapenak defendatzeko biderik.

 

 

 

Zerbitzuen murrizketa, hondatze eta pribatizazioa eta egoiliar eta langileentzako prebentzio- eta sendatze-neurrien falta salatzen dugu

admin
-
0
Zerbitzuen murrizketa, hondatze eta pribatizazioa eta egoiliar eta langileentzako prebentzio- eta sendatze-neurrien falta salatzen dugu

LABen bat egiten dugu egoitzetako langileen, zerbitzuen erabiltzaileen elkarteen eta nagusi eta pentsionisten mobilizazio eta aldarrikapenekin, eta dei egiten dugu bizitza, lan-baldintza eta pentsio duinen alde lanean jarraitzera, lan-zentroetan zein kalean.

Konfinamendu eredu hau Kapitalaren neurrira antolaturiko salbuespen egoera da. Langile eta herri sektore zabalak babesgabe utzi eta gogor pairatzen ari garen itxialdia. Gobernu espainiarrak ezarritako alarma egoeraren bidez, estatua birzentralizatzen ari da, gure errealitateari hobe erantzuteko burujabetza inoiz baino garrantzitsuagoa den bitartean eta Nafarroako zein funtzioetan dagoen EAEko Gobernuaren geldotasunaren aurrean.

Azken asteetan asko hitz egin da pertsona helduen egoeraz eta alarma egoeraren baitan harturiko neurriek zer nolako eragina izan duen kolektibo honen bizitzatan. Neurriok hartzerako garaian, ordea, ez diote kolektibo honi ahotsa eman eta eskubiderik gabeko herritar gisa biktimizatu dituzte.

Zalantzarik gabe, pertsona helduak dira krisi sanitarioa gehien pairatu dutenak, heriotza kopuru altuena kolektibo honetako izaten ari delako. Datu bat aipatzearren, Hego Euskal Herriko hildakoen %40a bano gehiago zahar egoitzetan izan da. Hala ere, kontuan hartu behar da instituzioek datu horiek modu kontzientean ezkutatu dituztela, gizarteari informaziorako eskubidea ukatuz. Koronabirusaren erasoa pairatu dute, baina sistemaren krisia lehenagokoa da. Politika neoliberalak gidatu dituzte politika publikoak eta sistemaren aurretiazko murrizketak edota indarrean babes sozialerako ereduaren ondorioak zuzen zuzenean pairatu dituzte.

Pertsona helduak edota dependentzia egoeran bizi diren herritarrak zerbitzu sozial anitzen erabiltzaileak dira (eguneko zentroak, nagusien egoitzak, etxez-etxeko laguntza, udaletako zerbitzu sozialak… ), egoera honi aurre egiteko guztiz ez nahikoak izan diren zerbitzuak. Zentzu honetan, babes sozialerako eredua eta egin den kudeaketaren inguruko salaketa ozena egin nahi dugu, eremu honetan ere kapitalaren araberako neurriak nagusitu direlako. Bizitza sostengatzeko ezinbestekoak dira zerbitzu sozialak modu integralean garatzea eta jabetza eta kudeaketa publikoa ziurtatzea; azkeneko urteetan handituz joan da azpikontratazioan oinarritutako eredua. Horrek, langileen prekarietatea areagotzeaz gain, zerbitzuan ere defizit handiak dakartza, irabaziak lehenetsiz bizitzaren kaltetan.

Ezaguna den helduen egoitzetako langileen egoera prekarioari, bertako erabiltzaileen egoera latza gehitu beha zaio. Hilotzak pilatzen ari dira, zenbat diren ere oraindik ez dago argi eta udal batzuk egindakoa salbu (Errenteria kasu) ez da egon helduak babesteko ekimen instituzionalik. Ez haien baldintza ekonomikoak ziurtatzeko pentsioei begirakoak ez eta haien zaintzari begira.Aipatzekoa da, zentzu horretan, auzolanean sorturiko Zaintza Sareek egin duten lana pertsona helduen eta zaurgarrienen zaintza bermatuz.

Egoera honen aurrean, LAB sindikatuak ezinbestekoa ikusten du pentsionisten mugimenduaren aldarrikapenak indartzea. Sistemaren krisi anizkoitz honi aurre egiteko, jendarte eredu berria behar dugu eta pentsionistek sustatu dituzten aldarrikapenak erdigunean kokatu behar dira, politika publikoak pertsonen beharrizanen arabera kokatuz:

-Zerbitzu sozial publiko integralak, behar propioei erantzungo dietenak, pertsona guztientzat irekiak izango direnak eta pertsona helduen gaitasunak zein autonomia sustatuko dituztenak.

-Osasun sistema publikoa indartzea.

-Dependentzia eta Zaintza Lege propioa EAE eta Nafarroan.

-Pentsio sistema propioa eta 1.080 eurotako gutxieneko pentsioa.

-Aldarrikapen guzti hauei orube politiko instituzionala emango dien Lan Harreman eta Babes Sozialerako Euskal Esparrua.
 

 

 

Hezkuntza komunitatearen osasuna bermatzeko exijitu diogu Jaurlaritzari, sindikatuekin neurriak adostuta

admin
-
0
Hezkuntza komunitatearen osasuna bermatzeko exijitu diogu Jaurlaritzari, sindikatuekin neurriak adostuta

Bilboko Eusko Jaurlaritzaren egoitzaren aurrean mobilizatu gara EAEko Hezkuntzako sindikatu guztiak, "Hezkuntza komunitatearen osasuna bermatu, neurriak negoziatu" lemarekin. Hain zuzen ere, Eusko Jaurlaritzako Hezkuntza Sailari eskatu diogu bere ardurak bere gain hartzeko, osasuna bermatuko duten baldintzak ahalbidetzeko eta eskoletara itzultzeko neurriak eragileokin negoziatzeko. Halaxe adierazi dugu sindikatuok argitaratutako ohar bateratuan.

 

 

 

Ikastetxeetako garbitzaileen ustez, maiatzaren 18an geletara itzultzea presaka hartutako erabakia izan da

admin
-
0
Ikastetxeetako garbitzaileen ustez, maiatzaren 18an geletara itzultzea presaka hartutako erabakia izan da

Hezkuntza Saileko garbitzaileek salatu dutenez, ikasgeletara itzultzeko egun gutxi falta direnean ez zaie itzulera-plan berririk jakinarazi, egokitzapenprotokolorik entregatu edo jarraibide espezifikorik eman, egoera berri honetan ikastetxeen higienizazio egokia bermatzeko.

Kezkatuta dago Euskal Autonomia Erkidegoko ikastetxeetako garbiketa-taldea, Hezkuntza Saileko langile publikoek eta garbiketa-kontraten langileek osatzen dutena.

Komunikabideen bidez jakin zuten Eusko Jaurlaritzaren planei buruz, lehenengoz ikasleak ikasgeletara itzultzea maiatzaren 18an inposatuz (eta hezkuntza-komunitatea osatzen duten eragile guztien kritiken ondoren, azkenik, "baimenduz"). Garbitzaileek salatu dutenez, itzulera hori gauzatu eta egun gutxira, garbiketa-taldeak ez du inolako komunikazio ofizialik jaso, ez Hezkuntza Sailetik, ez enpresen aldetik ere.

Talde honek garbiketa-zerbitzuak ematen jarraitu du, konfinamenduaren faserik zorrotzenean ere. Funtsezko zerbitzua denez, egunero joan behar izan dute lanera, ia beti garraio publikoan, garbituta eta itxita zeuden zentroak garbitzera, maskara bakar bat ere eman gabe.

Zerbitzuaren arduradunek bi hilabete izan dituzte zentroak noiz eta nola irekiko ziren aztertu eta egokitzeko, baina gaur egun ez dute inolako aldaketarik jakinarazi garbiketa zerbitzuari dagokionez.

Ez dago ikastetxeak higienizatzeko protokolo berririk, ez zaie desinfekzio prestakuntzarik eman, ez eta egoera berrietara egokitzeko jarraibiderik komunikatu ere.

Herritarroi arreta handiz ibiltzeko eskatzen zaigun une batean, deseskalatzeko 1. fasea deiturikoa mugatuz, zentroak irekitzeko baimena eman dute, garbiketa zerbitzua nola egokituko den aztertu gabe, haien osasungarritasuna bermatu ahal izateko.
LAB sindikatuak salaketa hori publiko egin nahi du, eta Hezkuntza Sailari eta Eusko Jaurlaritzari erantzukizunez jokatzeko eskatzen die, atzera egiteko eta presak alde batera uzteko.

Bilerak egiteko garaia da, nolanahi ere, irailean abiarazi beharko diren higiene eta osasun neurriak lantzeko eta eztabaidatzeko, denon artean ikastetxeak ikasleentzako eta bertan zerbitzua ematen duten langileentzako gune seguruak izango direla bermatzeko.

Garbiketako langileei prestakuntza emateko unea da, produktu eta teknika egokienak aztertzeko, zerbitzua berrantolatu eta indartzeko, lanaldia luzatuz eta kontratazio berriak eginez, norbera babesteko ekipamenduen hornidura ziurtatzeko, eta hezkuntza-komunitate osoaren osasunaren zaintza bermatzeko. Hori guztia egin arte, ikastetxeak irekitzea benetako arduragabekeria da.
 

 

 

Michelineko ABEEE berriaren kontrako jarrera hartzen dugu

admin
-
0
Michelineko ABEEE berriaren kontrako jarrera hartzen dugu

Gaur, maiatzaren 12an, enpresak akordio bat lortu du Michelin España y Portugal SAn (MEPSA) ABEEE berri bat ezartzeko. Honek multinazionalak Euskal Herrian dituen lantegietan izango du eragina, Gasteizen (3.500 langile) eta Lasarten (500 langile).

ABEEE berri bat ezartzeko akordioaren aurkako jarrera du LABek Michelinen duen atal sindikalak.

Soldataren osagarria %80koa izango da, eta gabonetako eta irabazietako ezohiko pagetan ere eragina izango du.
LABen kezkaz ikusten dugu gure lantegietako sektorerik zaurgarrienek jasan beharko dituztela neurri handienean ABEEE berri honen ondorioak, hain zuzen ere soldata apalanek dituztenak. Izan ere, enpresak ez die hauei osagarria igo nahi izan, eskatu diogun moduan. Michelinentzat azpikontratatutako enpresetan lanean ari direnak ere kaltetuak izango dira, enpresak ez baitie inolako bermerik eskaini.

ABEEEren akordioan ez da jasotzen inolako enpleguaren bermerik gutxieneko ziurtasun batekin epe ertainera etorkizunari aurre egitea ahalbidetu duenik. MEPSAk izkin egin dion enpleguarekiko edozein konpromiso esplizituri, eta honek ziurgabetasun egoeran kokatzen gaitu ABEEE amaitzerakoan.

Gainera, salatu nahi dugu Michelinek, akordioa sinatu duten CCOO, CSI eta UGTrekin batera, ABEEEren jarraipen batzordetik kanpo utzi dutela LAB zentroz zentroko ezarpenean, azken hau denean Lasarteko lantegian ordezkaritza handiena duena.
 

 

 

Aernnovak adostu gabeko ABEEEren alde egin du, baldintzak okertu nahi dituelako enplegua ezta 6 hilabetez ere bermatu gabe

admin
-
0
Azken proposamenaren baldintzek ez zuten akordioa bilatzen, soilik enpresa arduratsuaren etiketa luzatu nahi zuen xehetasun kosmetikoekin. Honela, enpresa honetan ABEEEtarako hitzartutakoak baino baldintza okerragoak eskaintzen zituen, eta uko egin zion enplegua bermatzeari, ezta 8/2020 Errege Dekretuak jasotzen dituen 6 hilabeteetan ere.

Aernnovako Zuzendaritzak ABEEE honen negoziazioa erabili nahi izan du langileen baldintza ekonomikoak jaisteko eta etorkizunarekiko eta enpleguarekiko edozein konpromiso saihesteko. Horrela, zuzendaritzak eta langileen batzordeak, Eusko Jaurlaritzaren bitartekaritzarekin, 2016-2020 aldirako sinatutako akordioaren esparruan jada hitzartutako ABEEEi buruzko baldintzak okertu nahi izan ditu. Beraz, enpresak akordio hori murriztu nahi zuen, baldintza horiek aplikatu gabe.

Lehen hitzartutako ordainsari ekonomikoen hobekuntzak alde batera utzita, LABek konpromiso bat adostu nahi zuen, egungo plantilla-mailei eusteko borondatea dagoela egiaztatzeko. Jakin badakigu egungo ziurgabetasunak ondorioak izango dituela hegazkingitza sektorean eta, beraz, zuzenean gure enpresan. Hala ere, kudeaketa partekatua ahalbidetuko lukeen akordioa lortzeko aukera posible zela uste dugu, epe ertainean egoerari heltzeko formula adostuak bilatuz. Hala ere, enpresak lehen minututik errefusatu du aukera hori.

Aernnovak ez du enpresaren etorkizunari aurre egiteko barne negoziazio prozesu hori jorratu nahi izan, baina epe laburrean enplegua bermatzea ere baztertu du. Izan ere, uko egin dio 8/2020 Errege Dekretuak jasotzen dituen 6 hilabeteetan enpleguari eustea onartzeari, eta horrek zalantzan jartzen ditu bere asmoak.

Gainera, enpresak ezarritako negoziazio eredua salatu nahi dugu. ABEEEtik kanpoko elementuak gehitzen aritu da hasieratik, zuzenean edo iradokizunekin, azken egunean bakarrik argitu duen nahasmena sortuz. Are gehiago, negoziazioak luzatzeko aukera ukatu du, akordioa lortzeko azken aukerak arakatzeari uko eginez.

Hori guztia dela eta, LABek ezin du onartu Aernnovako langileentzako baldintzek okertzea, ziurgabetasunez betetako agertoki bati atea irekiz, non enpresak bere nahierara egin edo desegin dezakeen, kaleratzeak baztertu gabe. Batzordearen gehiengoa jarrera horrekin bat datorrenez, enpresak ABEEEa akordiorik gabe erregistratuko du.

Nolanahi ere, LABek berresten du prest dagoela negoziazio-prozesu bati ekiteko, Aernnovaren etorkizunari modu adostu eta partekatuan aurre egin ahal izateko, betiere enplegua eta langileen eskubideak defendatuz.
 

 

 

Jaurlaritzako Hezkuntza Sailak ikasketa presentzialetara itzulera ikastetxe bakoitzaren ardurapean uzteko erabakia are arduragabeagoa litzatekeela salatu dugu sindikatuok

admin
-
0
Jaurlaritzako Hezkuntza Sailak ikasketa presentzialetara itzulera ikastetxe bakoitzaren ardurapean uzteko erabakia are arduragabeagoa litzatekeela salatu dugu sindikatuok

EAEko Hezkuntza Sailari eskatzen diogu bere ardurak bere gain hartzeko, osasuna bermatuko duten baldintzak ahalbideratzeko eta itzulera neurriak eragileokin negoziatzeko. Sindikatuok mobilizazioa egingo dugu maiatzaren 13an, asteazkena, 11:00etan, Bilboko Eusko Jaurlaritzaren egoitzaren aurrean (Gran Via, 85), "Hezkuntza komunitatearen osasuna bermatu, neurriak negoziatu" lemarekin.

LAB, ELA, STEILAS, CCOO eta UGTren ohar bateratua:

Hezkuntza Sailburuak pasa den Ostegunean hezkuntzako hainbat eragileri aurkeztutako plana, hezkuntza eragileekin negoziatu eta landu gabeko plana izan da. Plan horretan jaso beharko lirateken irizpide zein neurriak aplikatu, aurrera eraman, bete eta betearazi beharko dutenen parte hartzerik gabe Hezkuntza Sailak hartutako aldebakarreko erabaki baten aurrean gaude beraz. Behin plana ezagututa gainera, sindikatuon deialdiari jarraituz gaur burutu dugun bileran hezkuntza eragileok ondorio komun batera iritsi gara, gaur gaurkoz langile zein ikasleen osasuna bermatuz datorren maiatzaren 18tik aurrera itzulera abian jartzeko baldintzarik ez dagoela. Are gehiago, familien zein ikasleen iritzia, langileen ordezkariena bezalaxe, ez dela inolako momentuan kontuan hartu eta osasunaren ardura ere haingan jarri dutela.

Plana, motz geratzen diren segurtasun irizpide orokorregiak jasotzera mugatzen da. Hezkuntza Sailak irizpide orokor horiek betetzeko hartuko diren neurriak ikastetxeekin landu gabe hartu ditu, baita neurri horiek abian jartzeko baliabideak aurreikusi gabe ere, zentruetako zuzendaritzengan neurrigabeko ardura maila ezarriz. Itzulera planaren ezaugarri nagusia inprobisazioa, prezipitazioa eta zehazgabetasuna direla esan dezakegu beraz.

Egoera honetan erabateko arduragabekeria litzateke datorrean maiatzaren 18an planteatutako itzulera abian jartzea, langile zein ikasleen osasuna, eta ondorioz gizarte osoarena, arrisku larrian jarriko litzatekeelako.

Planak Hezkuntza Komunitate osoaren gaitzespena eta kritika jaso ditu ezagutzera eman zenetik. Komunikabideen bidez jakin dugunez, eta eragindako presioaren eraginez, badirudi Hezkuntza Sailak bere erabakia aldatu dezakeela. Hezkuntza Sailak Batxilergoan, Lanbide Heziketan eta DBH4n ikasketa presentzialetara itzultzea edo ez, zein datetan eta zein baldintzetan, ikastetxe bakoitzaren esku uztea planteatuko luke. Erabaki hau are arduragebekia handiagotzat jotzen dugu eragileok sindikatuok. Alde batetik, osasuna bermatu gabe jarraitzen duen bitartean, Hezkuntza sailak ardura guztia ikastetxeen, familien eta ikasleen bizkar gainean jartzen duelako, bere arduraz beste larriki kale eginez.

Hezkuntza Sailari dagokio osasuna bermatzeko irizpide zehatzak, protokoloak, neurriak eta hauek aurrera eramateko baliabideak plan egoki batean jaso eta aurreikustea, ondoren ikastetxe bakoitzak bere autonomiaren baitan aurrera eraman ahal ditzan. Bestetik, erabakia ikastetxe bakoitzaren esku utzita, ikastetxe ezberdinetako ikasleen arteko arrakalak sortu edo areagotzeko arrisku argia duelako, batzuk ikasketa presentzialak jasoko lituzketelako eta besteek ez esaterako. Dagoeneko egoera honek ikasleen arteko hezkuntza prozesuetan eragin duena.

Idatzi hau sinatzen dugun sindikatuok, hezkuntza sailari galdegiten diogu bere ardurak bere gain hartzeko, hezkuntza eragile bakoitzarekin, dagokion esparruan, itzulera neurriak negoziatu ditzala eta osasuna bermatzeko neurriak ahalbideratu ditzala.
 

 

 

IƱigo Urkulluri aurrez aurre helarazi diogu gure haserrea eta langileen babesgabetasuna Gurutzetako Ospitalean

admin
-
0
IƱigo Urkulluri aurrez aurre helarazi diogu gure haserrea eta langileen babesgabetasuna Gurutzetako Ospitalean

Urkullu Lehendakaria, Murga sailburu eta Osakidetzako zuzendari nagusi Juan Diegorekin batera, bisitan egon da gaur goizean Gurutzetako Ospitalean, COVID arretarako birmoldatu diren instalazioak ezagutzeko asmotan. Bisitak iraun bitartean, dozenaka langile eta ordezkari sindikalek protesta ekimena egin dugu osasun arloko langileok bizi dugun egoera salatzeko, eta gobernu zein osasun arlotik egin den kudeaketa kaskarra eta propagandistikoa agerian uzteko.

LABen ordezkarien hitzetan, osasungintzako langileok pairatu behar izan ditugun egoera jasan ezinak eta gure osasuna eta bizitza bera arriskuan jarri dituztenak ekidin zitezkeen neurri handi batean, baina langileon eta jendartearen osasun gainetik, interes ekonomikoak eta kalkulu elektoralak ipini ditu EAJ alderdiak. Horregatik, LAB sindikatutik Murga sailburuaren dimisioa eskatu dugu.

Bisitariei gure kexak eta aldarrikapenak helaraztea eragozten saiatu badira ere, LABeko delegatuok lortu dugu lehendakariari aurrez aurre helaraztea gure haserrea eta gure babesgabetasuna haien errua dela argi uztea.

Zentzu honetan, adierazpen askatasuna eta gure eskubideak mugatzeko saiakera berri hau salatu nahi dugu. Urkulluk, Murgak eta Juan Diegok eman nahi duten irudi bukolikoa babesten saiatu dira, langile irribarretsuak eta bisitagatik eskertuak, osakidetzako langile guztion haserrea ezkutatzen duten bitartean. Baina gaur, txarto atera zaie jokaldia eta gure haserrea entzun behar izan dute.
 

 

 
1...546547548...1,614Page 547 of 1,614

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLƍTICA DE PRIVACIDAD

www.lab.eus