2026-07-24
Blog Page 491

Atxiloturik zeuden sindikatuko bost kideak kalera atera dira, epailea bera ikusi gabe

Aritz Sorzabal
-
0
Atxiloturik zeuden sindikatuko bost kideak kalera atera dira, epailea bera ikusi gabe

Espainiako Poliziak LAB sindikatuko 6 kide atxilotu zituen asteartean Nafarroan. Horietako bat berehala askatu zuten, baina bertze bortzek egun osoa eman dute polizien eskuetan. Asteazken goizean, bederatziak aldera, epailearen aitzinera ziren pasatzekoak. Baina epaileak ez ditu hartu. Galdetu diete ea deklaratu behar zuten, eta ezetz erran dutenez, aske utzi dituzte, karguekin. LAB sindikatuaren ustez, epaileak atxilotuak ikusi ez izanak are handiagoa egiten du polizia operazioaren burugabekeria.

Sei atxilotuei egotzi diete martxoaren 8an CEN Nafarroako Enpresaburuen Elkartearen Iruñeko egoitzan eginiko protesta ekintza batean edo apirilaren 9an ISN enpresaren kamioi batekin eginiko protesta ekintza batean parte hartzea. Mehatxuak, bortxa, kalteak eta -kamioiaren kasuan- zirkulazioaren segurtasunaren aurkako delitua leporatzen diete, abokatuen ustez “oso pobrea” den atestatu batean. Bide batez, aipatzekoa da abokatuek ikusi ahal izan duten atestatu horretan ez direla pertsona gehiago agertzen, nahiz eta Poliziak eta Gobernu Ordezkaritzak berak atzo erran zuten 11 izanen zirela atxilotuak.

LAB sindikatuak asteartean salatu zuen -berresten dugu gure salaketa- LABen aurkako operazio honetan patronala eta polizia eskuz esku ibili direla. Izan ere, kamioiaren ekintzaren kasuan aipatzekoa da Foruzaingoak ofizioz hasi zituela diligentziak, eta gero atxilotua izan denetako bat deklaratzen egon zela haiekin, baina ISN enpresak salaketa Espainiako Polizian jarri zuenez, hark hartu zuela kasua, eta martxoaren 8ko ekintza harekin lotuta, antzezlan handi hau muntatu duela.

Soldata arrakala salatzeko ekintza bat, eta Garbiketen sektoreko hitzarmenaren negoziazioetan zegoen blokeoa salatzeko bertze ekintza bat. Alegia, emakumeen lan baldintza kaskarrak salatzeko eta haien eskubideak aldarrikatzeko bi ekintza. Bi ekintza baketsu eta LABek bere ekintza sindikalean ohikoak dituenak. Horixe da patronalak eta Espainiako Poliziak jomugan jarri dituenak. Eta Poliziak atxiloketen bortizkeria erabili du emakume sindikalista horien jarduera sindikala baldintzatzeko eta eragozteko eta, oro har, emakumeen borrokei zilegitasuna kentzeko.

LAB sindikatuaren ustez, bi ekintza horietan ez dago deliturik. Baina Poliziak bi ekintza horietan delitu zantzurik ikusi baldin badu, nahikoa zuen sei sindikalista horiek deklaratzera deitzea. Ez zen beharrezkoa halako operatibo poliziala muntatzea. Ez zen beharrezkoa parametro demokratikoetan, noski. Baina LABek uste du patronalak eta Poliziak halako operazio hanpatua egin dutela, batetik, LABek ordezkatzen duen sindikalismo borrokalariaren aurka zuzenean jotzeko eta, bertzetik, gerora etorriko diren zigor eskaerak indartzeko.

Bukatzeko, LAB sindikatuak dei egin nahi die Nafarroako langileei parte har dezaten larunbatean Iruñean eginen den manifestazioan, borroka sindikalaren alde, patronalaren eta poliziaren muntaiaren aurka. Manifestazioa 17:00etan aterako da, Iruñeko Baluarte plazatik. Bestalde, ostiralean mobilizazioak egingo ditugu Euskal Herriko hainbat eskualdetan.

Nazio Komitearen deia

Gure sindikalismo borrokalariaren aurkako polizia operazioa gogor salatu du LABeko Nazio Komiteak, eta mobilizatzeko deia luzatu die langileei.

Arabako helduen egoitzetan greba egin dute, koronabirusak jota iaz zendutako langilea gogoan

Aritz Sorzabal
-
0
Arabako helduen egoitzetan greba egin dute, koronabirusak jota iaz zendutako langilea gogoan

Arabako helduen egoitza pribatuetan beste mobilizazio egun bat egin dute, hitzarmen duin baten defentsan, LAB, ELA, UGT eta CCOO sindikatuok deituta.

Langileen lan baldintzen defentsan egindako protestekin batera, Caser egoitzan iaz hildako langileari omenaldia egin diote, koronabirusak jota hil diren gainontzeko herritarrak gogoan izateaz gain.

Haurreskoletako langile eta familien aldarrikapenen erakusketa egin dugu Eusko Jaurlaritzaren aurrean

Aritz Sorzabal
-
0
Haurreskoletako langile eta familien aldarrikapenen erakusketa egin dugu Eusko Jaurlaritzaren aurrean

LAB, STEILAS eta ELA sindikatuok eta Haurreskolak Partzuergoko langileek familiekin batera euskarri desberdinetan jasotako aldarrikapenen erakusketa egin dugu arratsaldean Lakuan. Ekintza hori matrikulazio epe ofizialaren bukaeraren eta Mahai Negoziatzailearen kontestuaren baitan burutu dugu, Administrazioaren aurrean langile eta familiek Haurreskolak Partzuergoarekiko duten konpromiso irmoa erakusteko asmoarekin.

Izan ere, Administrazioak erakutsi ez duen bezala, txalotzekoa da zikloarekiko hezkuntza komunitateak agertu duen atxikimendua eta konpromiso erakustaldia.

Hortaz, lerro hauen bitartez, dinamika horretan (zein orain artekoetan) parte hartu duten lankide eta familiei eskertu nahi diegu egindako ahalegina. Langile eta senideen mobilizazioa eta inplikazioa ezinbestekoa izango da Haurreskolak Partzuergoak etorkizunera begira dituen erronkak gainditu eta aldarrikapenak gauzatzeko.

Haurreskolak Partzuergoko Lan Hitzarmen berriaren negoziazioa hasi berri dugun momentuan, ezin dugu ahaztu Haurreskolak Partzuergoaren doakotasuna eta hezkuntzan integrazioa eta langileen egonkortasuna direla oraindik ere borrokaren ardatza. Jaiotzatik hezkuntzarako eskubideak unibertsala behar duela izan uste eta sinisten dugulako eutsiko diogu borroka horri.

Era berean, LAB, STEILAS eta ELA sindikatuok salatu nahi dugu aurreko Mahai Negoziatzailean Administrazioak eta Haurreskolak Partzuergoak hartutako konpromiso batzuk bete gabe jarraitzen dutela; besteak beste, indarrean dauden akordioak betetzea. Beraz, argi dago gaur hasitako negoziazio prozesuak izango duen ibilbidean erne egon beharko dugula aurrera ematen dugun urrats bakoitzean.

Gauzak horrela, orain arte egin bezala, ohar honi bukaera eman baino lehenago alderdi politiko eta eragile desberdinei dei egiten diegu Haurreskolak Partzuergoaren doakotasuna eta hezkuntzan integrazioa ahalbideratzeko pausoak eman ditzaten.

Halaber, euskal jendarteari ere dei egiten diogu borroka horrekin bat egin eta aldarrikapen horiek bereak egin ditzan, guztiok irabaziko baitugu horrekin.

Denon artean lortuko dugu!

Nafarroan ez dago batere borondate politikorik Oinarrizko Osasun Laguntza indartzeko

Aritz Sorzabal
-
0
Nafarroan ez dago batere borondate politikorik Oinarrizko Osasun Laguntza indartzeko

Indurain kontseilariak eta Carlos Artundo Osasuneko zuzendari nagusiak Oinarrizko Osasun Laguntzaren aldeko apustu argirik egin ez dutenez, garbi gelditu da Osasunbideko kudeatzaileek ez dutela batere asmorik Nafarroako herritarrei osasun arreta ekitatiboa eta eraginkorra emateko eta langile horien lan baldintzak duintzeko. LAB sindikatutik behin eta berriz salatu dugu ez dagoela batere borondate politikorik Oinarrizko Osasun Laguntza indartzeko eta dimentsionatzeko behar diren neurriei ekiteko, eta behar den guztietan salatzen jarraituko dugu.

Osasun Departamentuak pandemia aitzakia gisa erabili du aspalditik maila politikoan prestatzen ari ziren aldaketa batzuk egiteko. Azken hilabeteotan, ia ez da langilerik kontratatu osasun etxeetan, eta, bitartean, langileria arloko baliabide gehienak Iruñeko ospitalez kanpoko larrialdi-zerbitzura bideratu dira. Hori dela eta, Oinarrizko Osasun Laguntzako gainerako zerbitzu eta zentroak langilerik gabe, baliabiderik gabe eta beren lana modu polibalentean eta erabakigarrian betetzeko gaitasunik gabe geratu dira. Egoera are larriagoa da osasun etxeetako eta ospitaleetako langile asko txertaketa-kanpainara lekualdatu direlako, eta horrek arazoak sortuko ditu, bai pazienteei ematen zaien arretari dagokionez, bai langileen librantzetan eta oporretan.

Osasun etxeetan, plantillak gaizki dimentsionatuak daude, eta kolektibo eta zerbitzu jakin batzuen alde egiten da beste batzuen kalterako. Adibidez, Erizaintzako Zainketa Teknikarien kolektiboa osasun etxeetatik eta ospitalez kanpoko larrialdi-zerbitzutik ia desagertu da. Horrek garbi erakusten du gure agintariek ez dakitela zein diren kolektibo horren funtzioak eta gaitasun profesionala; irizpide argirik gabe sartu edo kendu dituzte osasun etxeetatik, eta ez dute inoiz jaso Oinarrizko Osasun Laguntzako Gerentziaren sostengua. Gerentzia hori ez da gai izan COVIDek sortutako egoera aprobetxatu eta osasun etxeek dituzten gabeziak optimizatzeko, eta unean-unean dagoen eskariari erantzuteko eredu baten alde egin dute, eredu prebentibo, irisgarri, jarraitu eta koordinatu baten alde egin beharrean.

Bestalde, kontratazioari buruzko hainbat kexa jasotzen ari dira, erakusten dutenak ez dagoela kontratazio prozesuak egiteko irizpide homogeneorik eta konparaziozko bidegabekeria handiak daudela zentro batzuen eta besteen artean. Antolaketa eta kudeaketa falta izugarria dela kausa, osasun etxeak babesik gabe gelditzen ari dira, bai aurrekontuen aldetik, bai langile-baliabideen aldetik.

LAB sindikatutik salatu nahi dugu egiturazko kontratu ugari sinatzen ari direla batere kontrolik gabe, eta produktibitateak modu arbitrarioan ordaintzen ari direla, gardentasun gutxirekin eta zenbait bururen onespenarekin, haiek ere kobratu baitituzte.

Horrek guztiak egiaztatu digu Oinarrizko Osasun Laguntzako Gerentziak eta kontseilariak berak ez dutela inolako interesik honako gai hauek jorratzeko: langileen lan baldintzak duintzea, kontratatzeko zailak diren lanpostuak betetzea, osasun txartelen ratioa gutxitzea, osasun etxe bakoitzeko erizainen ratioa handitzea, taldeetan profesional berriak sartzea eta beste kolektibo batzuk finkatzea, eta lehendik dauden profesionalak aintzat hartzea (bai ekonomikoki, bai lan arloan). Eta bitartean, aurrekontuak efizientzia gutxiko beste baliabide asistentzial batzuetara bideratzen dira.

Horren guztiaren aurrean, LABek beti babestuko ditu osasun sistema publikoa eta langileen lan baldintza duinak defendatzeko proposatzen diren mobilizazio eta aldarrikapen guztiak.

Patronala eta polizia eskuz esku aritu dira sindikalismo borrokalariaren aurkako operazioan

Aritz Sorzabal
-
0
Patronala eta polizia eskuz esku aritu dira sindikalismo borrokalariaren aurkako operazioan

Operazio koordinatu batean, Espainiako Poliziak LAB sindikatuko 6 kide atxilotu ditu Nafarroan -bortz Iruñean eta bertze bat Altsasun-, martxoaren 8an CEN enpresaburuen elkartearen egoitzan eginiko protesta batengatik eta apirilaren 9an Garbiketen greba iragartzeko ISN enpresako kamioi baten gainera igotzeagatik.

LAB sindikatuak salatu du patronala eta polizia elkarlanean aritu direla sindikalismo borrokalariaren aurkako operazio honetan, CEN patronalak eta ISN enpresak eginiko salaketa batzuen harira egin baitituzte atxiloketak.

Lerrok idazterakoan sei atxilotuetako bortz polizien esku jarraitzen zuten, horietako bat (Izaskun Juarez, LABeko Iruñerria-Pirinioak eskualdeko idazkaria) 10:00ak aldera askatu baitute. Oraindik barnean daudenak gaur arratsaldean edo bihar goizean pasatuko omen dira epailearen aitzinean; dirudienez, Fermin Otamendi izanen da epaile hori. Bertze aldetik, Poliziak LABeko abokatuei jakinarazi dienez, polizia operazioa zabalik dago oraindik eta guztira 11 pertsona izanen dira atxilotuak. Horren harira, LABeko bozeramaile Imanol Karrerak Espainiako Gobernu Ordezkaritzari eskatu dio aurreikusita omen dituzten bertze atxiloketa horiek ez egiteko eta deklaratzera notifikazioen bidez deitzeko, “edozein demokrazia homologatutan egiten den gisara”.

LAB sindikatuak gogor eta irmo salatu nahi du Espainiako Poliziak gaur bere aurka egin duen operazioa. Bi protesta ekintza baketsu egiteagatik atxilotu dituzte sei sindikalistak. “Nahikoa zuten notifikazioa judiziala bidaltzea”, adierazi du Karrerak. “Baina, ez. Nahiago izan dute operatibo polizial handia muntatu eta atxiloketak eszenifikatu, Europako edozein bazterretan ohikoak diren protesta ekintzak egiteagatik”. Era berean, LABek gogor salatu nahi du sindikalismo borrokalariaren aurkako operazio honetan patronala eta polizia elkarlanean aritu izana, CEN enpresaburuen elkartearen eta ISN enpresaren salaketei kasu eginez egin baitu Poliziak operazioa, haien artean zerikusirik ez zuten bi protesta ekintza operatibo bakarrean lotuz.

Bertze aldetik, LABek nabarmendu nahi du nola Poliziak jomugan jarri dituen emakumeak protagonista zituen bi ekintza baketsu -atxilotuetako lau emakumeak dira eta bi ekintzetan soldata arrakala salatzen zen-, eta nola Poliziak atxiloketen bortizkeria erabili duen emakume sindikalista horien jarduera sindikala baldintzatzeko eta eragozteko eta, oro har, emakumeen borrokei zilegitasuna kentzeko.

LABen aurkako gaurko errepresioa ez da atxiloketekin bukatu. Izan ere, goizeko hamarrak aldera dozenaka herritar bildu dira Espainiako Poliziak Iruñean duen komisariaren inguruetara, atxilotuei bertatik bertara elkartasuna adierazteko, eta poliziek horietako hogei inguru identifikatu dituzte, “elkarretaratze ilegal batean parte hartzeagatik” isuna jarri ahal izateko. Imanol Karrera bera identifikatu dute -eta, beraz, isuna jarriko-, hedabideei adierazpenak egin eta gero.

Larunbatean, manifestazioa Iruñean

LAB sindikatuak hainbat ekimen abiatuko ditu sindikalismoaren aurka eginiko gehiegikeria hau salatzeko eta borroka sindikalaren beharra azpimarratzeko. Horien artean, eta Espainiako Gobernu Ordezkaritzak debekatzen ez baditu, asmoa du bihar goizean elkarretaratzea egiteko Iruñeko (in)Justizia Jauregiaren parean eta larunbat arratsaldean manifestazioa egiteko; manifestazioa 17:00etan aterako litzateke, Iruñeko Baluarte plazatik.

Manifestazio bateratua egingo dugu Baionan, Maiatzaren Lehenean

Aritz Sorzabal
-
0
Manifestazio bateratua egingo dugu Baionan, Maiatzaren Lehenean

Azken urteetan egin bezala, Maiatzaren Lehenean modu bateratuan mobilizatuko gara Ipar Euskal Herrian. Hain zuzen ere, beste sindikatu eta eragilerekin batera, agerraldia egin dugu Baionan, egun horretako mobilizazioen berri emateko. Hala, Maiatzaren Lehenean, 11:00etan, Lapurdiko hiriburuko Lan Burtsatik abiatuko dugu mobilizazio nagusia.

LABeko Ipar Euskal Herriko bozeramaile Eñaut Aramendi kezkatuta azaldu da etorkizunean eman daitezkeen kaleratzeen inguruan, eta borroka beste biderik ez dagoela berretsi du. “Sistema honi ezin zaio eutsi, ez sozialki, ez ekologikoki. Ezinbestekoa da borrokatzea”, adierazi dugu LABeko kideok, Euskal Herri mailan egindako irakurketarekin bat.

“Prekaritateak emakume aurpegia du zerbitzu publikoetan”

Aritz Sorzabal
-
0
“Prekaritateak emakume aurpegia du zerbitzu publikoetan”

LABek pikete feministaren mobilizazioa egin du Bilbon, Basurtuko ospitaleko sarreran. Apirilaren 22ko greba egunaren bezperetan, EAEko administrazioetako langileek bizi duten behin-behinekotasuna salatu dugu, eta gaitz horren barruan emakumeak kaltetuenak direla nabarmendu dugu.

Zerbitzu Publikoen Federazioko ordezkari Eider Casanovak hartu du hitza protestan: “Prekaritateak emakume aurpegia du zerbitzu publikoetan. Zerbitzu publikoetan ematen diren pribatizazio prozesu guztiak kolektibo feminizatuetan ematen dira; orokorrean behin-behinekotasun tasa handia bada, tasa hori are eta altuagoa da kolektibo feminizatuetan; zerbitzu publikoetan soldata arrakala ere badago, emakumeok garapen profesionalerako ditugun arazoak bere horretan mantentzen direlako eta zaintzarako baimenak, lizentziak eta abar emakumeon bizkar gainean erortzen direlako. Horregatik, argi esan nahi dugu konponbide eraginkorrak behar ditugula, eta, hori lortzeko, tresnak behar ditugu; legeak, alegia. Zaintza sistema publiko bat behar dugu, bizitza sostengatzeko emakumeon lanen aitortza egiteko”.

Aktibazioaren beharra berretsi nahi dugu, Arabako metalgintzako lan baldintzak duintzeko

Aritz Sorzabal
-
0
Aktibazioaren beharra berretsi nahi dugu, Arabako metalgintzako lan baldintzak duintzeko

Arabako metalgintzako mahai negoziatzailea bildu da 14 hilabete pasatu ondoren. Bileran, LABek funtsezko aldarrikapenak berretsi ditu. Arabako enpresa askotara ere eraman ditugu aldarrikapenok.

Azkenengo bileratik 14 hilabete pasatu direnean gaur bildu da berriro Arabako metalgintzako mahai negoziatzailea, hain justu LABek azken asteetan aktibazioa bultzatzeko dinamika bat abiatu duen testuinguruan. Bileran LABek negoziatzeko bere prestasuna agertu du eta sektoreko arazoei erantzuteko Arabako metalgintzako hitzarmenak jaso behar dituen aldarrikapenak defendatu ditu:

– Soldata duinak, gutxienez 1.200 euro garbi hilean, eta igoera ziurtatuz sektore osoan.
– Lanaldia jaitsi, lana banatzeko.
– Prekarietateari aurre egitea, ebentualitatea jaitsiz, kontratetan subrogazioa bermatuz, ABLEak baztertuz eta praktikak eta formazio duala duinduz.
– Lan baldintza duinak, malgutasuna jaitsiz eta baimenak hobetuz.
– Emakumeen diskriminazioari aurre egiteko neurri eraginkorrak.
– Lan osasuna bermatzeko neurri eraginkorrak eta bajan egonda soldata ez galtzea, are gutxiago bajak lanekoak badira.
– Lan erreformari eta estatalizazioari aurre egitea.

LABen ustez, oso adierazgarria da SEAk ezer ez eramatea mahai negoziatzailera. 14 hilabete pasatu dira aurreko bileratik eta ez dira batere mugitu negoziazioa hasi zenetik.

Hori ikusita, LABek berretsi nahi du aktibazioa erabat beharrezkoa dela Arabako metalgintzan lan baldintzak duintzeko. Horren kontura, gaur bertan, Arabako metalaren bileraren egunean, sektoreko aldarrikapenak eraman ditugu Arabako enpresa askotara (Mercedes, Sidenor, Ferrovial-Michelin, SNA Europe, Condesa, Laminaciones Arregui, WEC, SDA Factory,…) eta zenbait poligonotara.

Dinamika honekin jarraituko dugu hurrengo asteetan enpresetan, poligonoetan eta kaleetan, soilik langileen aktibazio eta mobilizazioren bitartez lortuko baitugu metalgintzako hitzarmen duin bat.

Atxiloketak demokrazia batean ez gaudenaren seinale direla adierazi du Imanol Karrerak

Aritz Sorzabal
-
0
Atxiloketak demokrazia batean ez gaudenaren seinale direla adierazi du Imanol Karrerak

LABeko sei kide atxilotu ditu gutxienez Espainiako Poliziak Iruñean, goizean, martxoaren 8arekin eta Nafarroako garbiketa sektorearen prekaritatearekin lotutako protesta ekintza batzuk aitzakia hartuta. Atxiloketa gehiago egon daitezke, “mehatxuak, behartzea eta errepide segurtasuna” delituak leporatuta, besteak beste. Atxiloketak gertatu bezain pronto, Iruñeko komisaldegiaren aurrean elkarretaratzea egin dugu, atxilotuak askatzeko exijitzeko. Espainiako Poliziak identifikazioak egin ditu bertan.

11:00etan, Maiatzaren Lehenaren aurkezpena genuen iragarrita Iruñeko LABen egoitzan, baina prentsaurrekoa bertan behera utzi behar izan dugu, besteak beste, atxilotuen artean agerraldian hizlari izan behar zuen Izaskun Juarez, Iruñerria-Pirinioak eskualdeko idazkaria, atxilotuen artean zegoelako. Goizean zehar utzi dute aske.

11:00etan, dena den, agerraldia egin dugu Nafarroako bozeramaile Imanol Karreraren bitartez, atxiloketei buruz hitz egiteko. LABeko kideak adierazi du demokrazia batean ez gaudenaren seinale direla atxiloketak, eta, abokatuek ohartarazi bezala, polizia operazioa oraindik irekita dagoela jakinarazi du. Gogor salatu du sindikalistak ekintza publikoak egiteagatik izan direla atxilotuak, eta hori egin dela emakume langileen eta sindikalismoaren ahalduntzearen aurka joateko. Fokoa egindako ekintza publiko horien arrazoietan jarri behar dela nabarmendu du; hots, funtsezkoak diren emakume langileen eta garbitzaileen aldarrikapenetan. Sindikalista borrokalariak atxilotu bai, baina “bitxia da nola Polizia ez den CEN patronalaren egoitzara joaten lan istripu bat dagoenean”, erantsi du Imanol Karrerak.

Atxilotu batzuk polizia etxetik atera dituzte eta autoetan sartu, pentsatzekoa da auzitegira eramateko; Zerbitzu Pribatuetako federazioko kide Imanol Salinas, tartean.

Atxiloketen harira, erreakzio ugari izan dira. LABeko Idazkaritza Feministak salatu du ez dugula onartuko sindikatuaren kontrako inolako erasorik emakume* langileen defentsan egiten ditugun ekintzengatik. Bilbon, LABeko pikete feministak mobilizazioa egin du zerbitzu publikoetako apirilaren 22ko greba dela eta. Bada, bertan, Zerbitzu Publikoetako Federazioko ordezkari Eider Casanovak Nafarroan izandako atxiloketak salatu ditu, eta berretsi du emakumeen langileen eskubideen defentsan jarraituko dugula lanean.

Euskal Herriko eta Nazioarte mailako hainbat eragile eta sindikatuen artetik ere jaso ditugu salaketa, elkartasun eta babes mezuak.

1...490491492...1,637Page 491 of 1,637

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus