2026-04-25
Blog Page 399

Lanbide Heziketako irakasle tekniko guztientzako oposizioetarako baldintza berdintasuna eskatzen diogu EAEko Hezkuntza Sailari

Aritz Sorzabal
-
0
Lanbide Heziketako irakasle tekniko guztientzako oposizioetarako baldintza berdintasuna eskatzen diogu EAEko Hezkuntza Sailari

Azken hiru urteotan asko dira LABetik EAEko Lanbide Heziketako langile teknikoentzat irtenbide osoa ematearen alde lan egiten ari garen ahaleginak, Jaurlaritzak afera askatzeko emandako aukera ez-nahikoen aurrean. Azken horien artean zegoen EHUk eskainitako Formakuntza Pedagogikoa egiteko aukera ematea oposizioetan aurkeztu ahal izateko behar zuten irakasleei. Baina, horra hor, formakuntza horretara sarbidea ematen duen matrikulazioa egiteko garaian, jakin izan dugu aukera hau ez zaiela irakasle guztiei zabaltzen, nazioarteko hizkuntza batean dagoeneko B1 akreditazioa edo ziurtagiria dutenei soilik baizik.

Formakuntza Pedagogikoa egiteko B1 akreditazioa espainiar unibertsitate-araudiak ezarritako ezinbesteko baldintza bada ere, zenbait unibertsitatetan, horren ziurtagirik aurkeztu ezean, hizkuntza-mailaren azteketaren bidez akreditatu daiteke. Eta hori da, hain zuzen ere, Hezkuntza Sailari eskatu diogun irtenbidea, formakuntza irakasle guztiek egin ahal dezaten, EHUk bi aukera eman ditzan eskatzea, alegia: batetik, hizkuntza gaitasuna akreditatzeko froga egin ahal izatea eta, bestetik, hizkuntza gaitasuna titulua lortzeko baldintza gisa ezartzea eta ez izen-emateko orduan aurkezteko ezinbestekoa (kontuan hartuta, gainera, azterketa ofizialak ekainean izango direla). Horrela, irakasle guztiek izango lukete Formakuntza Pedagogikoa egiteko aukera eta, ondorioz, lanean jarraitu ahal izatearena.

Aurreko ikasturtearen amaieran, 16 espezialitate ez singularretako ordezko irakasleentzat Jaurlaritzak egindako proposamenean, hurrengo LEPean aurkeztu ahal izatea eta Formakuntza Pedagogikoa egiteko aukera ere eskaintzen zitzaien. Hala ere ez-nahikotzat jo genuen une horretan, besteak beste LEPa gaindituko ez luketenen etorkizuna zein izango zen ez baitzigun esan Hezkuntza Sailak. Orain, berriz, ikusten dugu uztailaren proposamen horrek ere beste kolektibo bat kanpoan utzi ahal duela.

Beraz, LABetik ez dugu onartzen langileen kolektiboka kanporatze-prozesu hau, eta irtenbide integrala exijitzen jarraituko dugu irakasle guztientzat salbuespenik gabe. Lanbide Heziketako langile guztien lanpostuen defendatzen jarraituko dugu!

Grebara deitu dugu Bizkaiko helduen egoitzetan datorren otsailaren 8rako, lan-baldintzak sektore publikokoekin parekatzea eta ratio duinak eskatzeko

Aritz Sorzabal
-
0
Grebara deitu dugu Bizkaiko helduen egoitzetan datorren otsailaren 8rako, lan-baldintzak sektore publikokoekin parekatzea eta ratio duinak eskatzeko

Bizkaiko egoitza pribatuetako egoerak jasanezina izaten jarraitzen du, zaintza lanen pribatizazioak miseria baino ez dakarkie langileei eta egoiliarrei. Egoitzen egoerak okerrera baino ez du egiten; egunez egun, langileen lan- eta bizi-baldintzek ez dute hobera egiten, eta horrek eragin zuzena du egoiliarrengan. Zaintza lanak negozio bat dira, enpresek dirua irabazten dute erabiltzaile-plaza berri bakoitzarekin, eta Aldundia da gurpil horren arduraduna, gutxi batzuk aberastu eta sektoreko 5.000 langile baino gehiago prekarizatu eta esplotatu besterik egiten ez duena.

Duela hilabete salatu genuen bezala, Hitzarmen Kolektiboaren negoziazio-mahaiak blokeatuta jarraitzen du patronalaren aldetik, eta Bizkaiko Aldundiak desagertuta jarraitzen du gatazka honetan.

Abenduaren 14an kalera irten ginen egoitza pribatuetako langileen sektore publikoko langileen lan-baldintzekin parekatzea eskatzeko. Era berean, ratio duinak exijitu genituen, gaixotu besterik egiten ez gaituzten lan-kargak murrizteko.

Gaur, berriz ere, borrokarekin jarraitzera behartuta gaude, langileen egoerak okerrera baino ez du egin. Bizkaiko Aldundia eta patronala seinalatzen ditugu zuzeneko erantzule moduan. 

LABen ustez greba oinarrizko tresna da lan gatazka guztietan, zoritxarrez sektore feminizatuetan erakunde publikoek greba egitea debekatzen dute, %100eko zerbitzu minimoak ezarriz. Honen aurrean, LABek ez du atzerapausorik emango eta debekuen aurrean grebaren zilegitasuna eta garrantzia defendatuko du. 

Gure ustez, gaur egun lantokietatik eta kaleetatik defendatu behar ditugu gure lan eta bizi eskubideak. Gure lan-baldintzak sektore publikoko langileekin parekatzea beharrezkoa eta premiazkoa da. Lan beragatik, lan-baldintza berberak izan behar ditugu. Ratio gizatiarragoak ere eskatzen ditugu. Gaur egungoak baztertzen ditugu, eskasak eta bidegabeak direlako. Patronal eta aldundi mugiezin baten aurrean, LABek GREBA deitzen du Bizkaiko egoitza pribatuen sektorean otsailaren 8an. ELArekin adostu dugu greba-eguna, bi sindikatuen artean egiten ari diren sindikatuarteko bileretan.

Sektoreko langile guztiei dei egiten diegu otsailaren 8an mobilizatzeko. Beharrezkoa da gure egoera eta zaintza jasotzen dituzten pertsonen egoera ikustaraztea eta erdigunean jartzea.

Garbiñe Aranburu: “Espainiako Gobernuak bere hitza jan du”

Aritz Sorzabal
-
0
Garbiñe Aranburu: “Espainiako Gobernuak bere hitza jan du”

LABeko idazkari nagusi Garbiñe Aranburu Euskal Telebistako “Egun on Euskadi” saioan izan da, aktualitateko gaiei buruz hitz egiteko. Lan erreforma izan du hizpide bereziki eta, ondorioz, urtarrilaren 30ean kalera irtetzeko arrazoiei buruz aritu da.

Idazkari nagusiak nabarmendu bezala, lan erreforma honekin ez da negoziazio kolektiboaren marko propioa errespetatzen; kaleratzeen atala ez da ukitzen, kaleratzeak erraz eta merke izaten jarraitzen baitu; eta ez dago lan harremanen eraberritzerik, malgutasunak bere horretan jarraitzen baitu, behin behinekotasunari dagokionez, mugagabe izateko ere pikareskari ateak irekitzen zaizkiolako. Iruzur egoerak gertatuz gero, zer gertatuko den ere ez da esaten, ez eta inspekzio eta salaketa gehiago egongo diren ala ez. “Lege honek ez ditu konponduko azken urteetan, erreformaz erreforma, lan harremanetan sortutako desorekak. Ia erabateko aldebakartasuna du patronalak”, zehaztu du. 

Garbiñe Aranbururen hitzetan, “patronalak arrazoiak baditu pozik egoteko, eta, hori da, azken batean, akordioaren tamaina erakusten diguna. Langileei iruzur handia egin zaie, gobernuak ez baitu bete agindutakoa”.

Azken batean, LABeko arduradunaren esanetan, “Espainiako Gobernuak bere hitza jan du. Ezin da langileei halako espektatibak sortu eta langileekin jolastu”. 

Nafarroako Gobernuak pandemia kudeatzeko moduak mugara eraman ditu zerbitzu publiko asko

Aritz Sorzabal
-
0
Nafarroako Gobernuak pandemia kudeatzeko moduak mugara eraman ditu zerbitzu publiko asko

Nafarroako Gobernuak pandemia kudeatzeko moduak mugara eraman ditu zerbitzu publiko asko. Beharbada, kasurik nabarmenena Osasunbidea da, baina ez da bakarra. Nafarroako SOS Zerbitzua kolapsatzeko zorian dago. Adinekoen egoitzetan oso tentsionatuta dago egoera. Ikastetxeetan, aurre egin behar diote kutsatzeen gorakadari eta plangintza egokien faltari. Jarrai genezake, horrek guztiak ia zerbitzu publikoei eragiten baitie, modu batera edo bestera. 

Ia bi urte daramatzagu pandemian eta badirudi ez dugula deus ikasi. Olatuak bata bestearen ondotik etorri dira, baina akats berberak errepikatzen dira, protokoloak maiz aldatzen dira eta ez da neurririk hartzen. Ondorioa da nabarmen okerrera egin dutela lan baldintzek eta herritarrei eskaintzen dizkiegun zerbitzuek. Bien bitartean, gure kudeatzaileei bururatzen zaien gauza bakarra da plantilla estutzen jarraitzea.

Horregatik, aski da! esaten dugu ozen, eta Nafarroako Gobernuari eskatzen diogu zuzentzeko, langileei eta haien ordezkariei entzuteko eta egoerari aurre egiteko benetako neurri zehatzak hartzeko.

Horregatik guztiagatik, LAB sindikatuak elkarretaratzeak deitu ditu Nafarroako hainbat lekutan datorren asteazkenean, hilak 19, goizeko 11etan.

Elkarretaratzeak leku hauetan egingo dira:
• Iruñea:
Karlos III.a, Nafarroako Jauregiaren aurrean
Conde Olivetoko zentroa
Ospitaleko eremua: Vianako Printzea kontsulta zentroa
• Tutera: Ospitalea
• Lizarra: Ospitalea

Urtarrilaren 30ean manifestazioak egingo ditugu hiriburuetan, euskal gehiengo sindikalak deituta, lan erreforma errefusatu eta lan harremanen euskal esparrua defendatzeko

Aritz Sorzabal
-
0
Urtarrilaren 30ean manifestazioak egingo ditugu hiriburuetan, euskal gehiengo sindikalak deituta, lan erreforma errefusatu eta lan harremanen euskal esparrua defendatzeko

Agerraldia egin dugu Bilbon eta Iruñean, euskal gehiengo sindikalaren izenean, lan erreformaren aurka modu bateratuan antolatuko ditugun mobilizazioen berri emateko. Hain zuzen ere, urtarrilaren 30ean manifestazioak egingo ditugu, 12:00etan, Hego Euskal Herriko hiriburuetan. Lan erreformaren bozketa bezperan, berriz, elkarretaratzeak egingo ditugu lantokietan. Lan harremanen euskal esparruaren defentsan mobilizatzea ezinbestekoa dela nabarmendu du LABeko idazkari nagusi Garbiñe Aranburuk: “Lan erreforma hau Madrilen, Euskal Herrian eta Estatuko nazio desberdinetan errefusatu behar dugu, baita Kongresuan, lantokietan eta kalean ere”.

Lan harremanen euskal esparruaren alde. Kaleratze errazen aurka. Lan erreforma honi ez!Deskargatu
MobilizazioakDeskargatu

Garbiñe Aranburuk adierazi du lan erreformak bi arrazoi hauengatik indargabetu behar direla bereziki:

-Gure hitzarmenak hemen inolako esku-sartzerik gabe negoziatzeko dugun eskubidea bermatu behar da. Negoziazio kolektiborako gure esparru propioa bermatu behar da, eta, horren ondorioz, autonomia-erkidegoko eta herrialdeetako hitzarmenek Estatuko hitzarmenen gainetik egon behar dute.

-Kaleratzeen araudia aldatu behar da; arrazoiak gogortuz, lan-agintaritzaren eginkizuna berreskuratuz edo kalte-ordainak handituz, besteak beste.

LABeko idazkari nagusiak berretsi bezala, “elkarrizketa sozialaren azken emaitza da ez dagoela indargabetzerik, ez dagoela kontrarreformarik, ez dagoela lan-merkatuaren modernizaziorik. PPren erreformaren funtsa mantentzen da. Akordio hori Euskal Herriko gehiengo sindikaletik at gauzatu da, eta ez die hemen dauden sindikatuen aldarrikapenei erantzuten. Akordio horrek oso argi uzten du non dauden autogobernuaren mugak”.

Euskal Herriko langileentzat ez dela akordio ona berretsi du, hainbat arrazoirengatik: ez duelako bermatzen gure negoziazio kolektiboaren esparrua; kaleratzeak askeak eta oso merkeak izaten jarraituko dutelako; eta lan-merkatua eraldatuko ez duelako, besteak beste. “Langile klasearen prekarizazioa eta pobretzea eragiten duen eredua da. Akordio horrek ez du aldatu lanaren sexu-banaketan oinarritutako eredua, eta ez du onartzen emakumeok egiten dugun lanaren balio politiko, ekonomiko eta soziala”, azaldu du.

Garbiñe Aranbururen esanetan, “lan-erreforma hau indarrik gabe utzi behar da. Madrilen partidaren minutu batzuk jokatzen dira, eta minutu horiek oso garrantzitsuak dira, baina partida osoa ez da Madrilen jokatzen. Partida dago, baita Euskal Herrian ere. Lan-erreforma hau aplikatzea oztopatu behar dugu. Aldi berean, lan-harremanak eraldatzeko beharra defendatzen jarraituko dugu, bai eta erreforma egin ondoren sortu den eredua iraultzeko beharra ere. Eraldaketa hori ez da posible izango Madrilen. Subiranotasunaren beharra aldarrikatzen dugu, hortaz. Gaurtik aurrera, lan duina bermatzeko lan-harremanen berezko esparru bat antola daiteke”.

Bilbon mobilizatu dira ehungintzako, larrungintzako eta oinetakoetako merkataritzako langileak

Aritz Sorzabal
-
0
Bilbon mobilizatu dira ehungintzako, larrungintzako eta oinetakoetako merkataritzako langileak

Manifestazioa egin dute, Plaza Zirkularrean dagoen Primark-etik abiatuta, LAB eta ELA sindikatuok deituta. Urteak daramatzate soldata eguneratu gabe eta lan-baldintzak hobetu gabe.

Langileen oharra:

Ehungintzako, larrungintzako eta oinetakoetako merkataritzak langileok urteak daramatzagu gure soldata eguneratu gabe eta lan-baldintzak hobetu gabe.

CECOBIk, merkataritzako patronalak, esan digugnez, covid 19tik eratorrritako krisia duten enpresek ezin dute soldata-igorerarik onartu dendetako salmentak murrizteagatik. Bi urte igaro dira eta aitzakia berarekin jarraitzen dute, ez dute hitz egin nahi dendek online salmentarekin eman duten jauzi handiaz. Milioi askoko irabaziak zuzenean enpresarien poltsikoetara.

Erosahalmenaren galerarekin ez dira asetzen, eta gure lan-baldintzetan elementu atzerakorrak planteatzera ere ausartu dira. Zehazki:

  • Udako larunbat arratsaldeetan lan egitea.
  • Antzinatasuna desagertzea.
  • Saltokiak igande eta jaigunetan irekitzea.
  • Enpresen emaitzei lotutako soldata-igoerak.

Langileok esan dugu: nahikoa da! Gure baldintzak ez daude merkealdian! Ez gaude prest urteetako borrokan lortutako eskubide guztiak galtzeko.

Horregatik, ezinbestekoa ikusten dugu beste behin ere kaleetan ikustea, gure eskubideen alde borrokatuz. Horregatik, urtarrilaren 5ean hasitako mobilizazioa-kanpainari jarraipena emanez, hurrengo mobilizazioak urtarrilaren 14an eta 28an egingo dira.

Gure lan-baldintzak ez daudelako merkealdian, mobilizatu zaitez!

Borroka indartzea defendatzen dugu Arabako metalgintzan lan baldintzak duintzeko

Zubiate(e)ko Aritz
-
0
Borroka indartzea defendatzen dugu Arabako metalgintzan lan baldintzak duintzeko

Gaur, urtarrilak 14, berriro bildu da Arabako Metalaren Negoziazio Mahaia. Bileran, SEAk ez die erantzunik eman sektoreko aldarrikapenei, eta berriro luzatu nahi izan du negoziazioa. Horregatik, mobilizazioak areagotzearen aldeko apustua egin dugu, sektorean lan-baldintza duinak lortzeko.

Joan den abenduaren 21ean, LABek, ELAk eta CCOOk plataforma bateratu bat aurkeztu genion SEAri, eta Arabako Metalaren Negoziazio Mahaia deitu genuen. Bada, gaur bilera hori egin da, eta bertan, SEA patronalak negoziazioa luzatzeko jarrera berberarekin jarraitu du, aldarrikapen komun horiei erantzunik eman gabe.

Plataforma hori ezagutu zuenetik ia 4 aste igaro ondoren, sektorearentzat funtsezkoak diren gaiak baztertu edo ez ditu erantzun SEAk: soldata-igoerak KPIaren gainetik, lanaldiaren jaitsiera, subrogazioa, bajan egoteagatiko osagarriak, berdintasun eraginkorra eta laneko osasuna bermatzeko neurri zehatzak, baimenak hobetzea kontziliazioari eta erantzukidetasunari begira, errelebo-kontratua, Formazio Duala… Erantzuna beste hilabete batez atzeratu du, aurrerantz ihes egiteko eta negoziazioa blokeatzeko jarrera horri eusten diola erakutsiz.

Jarrera horren aurrean, aurreikusitako mobilizazioak areagotzearen alde egiten dugu. Urtarrilean eta otsailean enpresa eta poligonoetan sozializazio dinamika burutuko da, kotxe karabanak, kontzentrazioak eta manifestazio bateratu eta handi bat egingo da otsailaren 19an.

Hortaz, LABen ustez eta egoera ikusita, datozen hilabete hauetan lanuzte eta greba ziklo batean egon gaitezke.

Ezin dugu onartu beste 9 urte hitzarmenik gabe egotea Bizkaiko bulego eta langelen sektorean

Aritz Sorzabal
-
0
Ezin dugu onartu beste 9 urte hitzarmenik gabe egotea Bizkaiko bulego eta langelen sektorean

Urtarrilaren 13an bulegoen negoziazio-mahaiari ekin zaio berriro, telelana arautzeko proposamen berri bat dela eta. LAB sindikatutik, sindikatuen eta patronalaren arteko elkarrizketarako aukera berri bat ikusten genuen, baina berriro ere, mahai honetan CEBEKen etengabeko blokeoa dagoela egiaztatu da. Patronalaren ordubeteko joan-etorrien ondoren, bilera hasi bezala amaitu da, CEBEKen eskakizun askorekin eta leiho irekirik gabe, sektore honek berriro hitzarmen probintzial bat izan dezan.

CEBEkek aurretik genekiena egiaztatu du, hau da, enpresak ez daudela prest sektore honekin zerikusirik duen ezer negoziatzeko, oso eroso bizi baitira egoera honetan, bakoitzak bere burua salba dezala egoera honetan.

Horren aurrean, LABek argi dauka aktibatzeko eta patronalari aurre egiteko garaia dela. Ezin dugu onartu beste 9 urte hitzarmenik gabe igarotzea.

Lan heriotzen odolusteak ez du etenik, 2022. urtean ere ez

Aritz Sorzabal
-
0
Lan heriotzen odolusteak ez du etenik, 2022. urtean ere ez

Ikaztegietara eraman dugu salaketa ostiralean eta Gasteizen mobilizatu ginen ostegunean, euskal gehiengo sindikalaren izenean. Hain justu, azken bi lan heriotzen eszenatokietan bertan egin dugu protesta, prekaritateak hil egiten duela salatzeko eta erakundeei beste alde batera begiratzeari utz diezaiotela berriro exijitzeko.

Gutxienez, hiru langile hil dira jada aurten Euskal Herrian, horietatik bi altueratik erorita.

Gasteiz.
1...398399400...1,612Page 399 of 1,612

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus