2026-07-17
Blog Page 381

Erronka demografikoaren eztabaidaren muina lan eta bizi baldintza duinak bermatzeko politikak dira

Aritz Sorzabal
-
0
Erronka demografikoaren eztabaidaren muina lan eta bizi baldintza duinak bermatzeko politikak dira

Atzo, erronka demografikoaren inguruko saio monografikoa egin zen Gasteizko Legebiltzarrean. Beste behin, sakoneko eztabaidei eta epe luzeko estrategia integralari bide eman baino Urkulluren gobernuak nahiago izan du eragin mugatua eta isolatuak diren neurrien alde egin.

LABen ustez, erronka demografikoaren aferari ezin zaio politika natalistekin erantzun. Gainera, beste behin ere, emakumeoi gure gorputzekin zer egin behar dugun esaten digute. Emakumeok erreprodukziora dedikatu behar gara. Ezinbestekoa da herritarron lan eta bizi baldintzak duintzeko politika publiko indartsu eta ausartekin sakoneko aldaketak gauzatzea.

Jaiotze tasa baxuen atzean, prekaritate eta pobretze prozesuen hedatzea dago. Ume gutxi jaiotzea arazo gisa saldu digute, baita pentsio prestazioetan eragina izango duela argudiatu ohi da. Baina ez da egia. Benetako arazoa, bizitza duinerako dugun eskubidea ukatzen zaigula da.

Aitortua egonik ere, kalitatezko etxebizitza duina izateko eskubidea ez dago bermatuta, Gaztelagun programak ez du lortzen gazteen emantzipazioa 30 urteetatik beherakoa izatea, zaintza lanen aitortza ezak eta emakumeen bizkarrean jarraitzeak zein sektore feminizatuetan oro har dauden lan baldintza prekarioak bere horretan diraute eta zerbitzu publikoen eraispen etengabearen aldeko politiketan ez dago aldaketarik.

Gauzak horrela, jaio berri diren ume bakoitzeko, hiru urtez 200 eurotako diru laguntza zuzena urrats bat izan daiteke, baina guztiz ez nahikoa da lehen aipatutako eremuetan eskuhartze sendorik ez badago. Era berean, garraio publikoari begirako prezioak aztertzeko konpromisoak gutxirako balioko du garraio publikoaren aldeo estrategia indartsurik ez badago. Eta gutxi balitz, hezkuntza akordioan adostasun zabalez onartutako Haurreskolak Partzuergoaren zerbitzuaren unibertsalizazioa eta doakotasuna atzeratzearen alde bozkatu zuten atzo EAJ, PSE eta PP-k.

Iragarritako neurri zehatzez harago, nola pentsatu daiteke erronka demografikoari behar bezala helduko zaiola zaintza sistema publikoaren inguruko proposamenik gabe? Edota gurera beste herrialdeetatik datozen langile migratuen egoera administratiboa erregularizatzeko ekimen politikorik gabe? Alegia, biztanlegoa zahartzen ari den honetan, zaintza lanetan dihardutenen lanak duindu gabe, lan hauek desfamiliarizatu eta sistema publiko eta komunitarioaren aldeko apusturik gabe eta herritar ugari modu administratibo irregularrean eskubiderik bermatu gabe ez dago erronka demografikoari aurre egiteko modu eraginkorrik.

Horregatik, LABek bere Programa Sozioekonomikoan jaso eta legebiltzarrean aurkeztutako Euskal Lan Kode eta Gizarte Seguratza propioaren aldeko legeen ildotik, besteren artean oradaindutako zaintzagatiko etetearen proposamenaren alde egiten dugu; zerbitzu publikoetan inbertsioak handitu, etxebizitza prezioa mugatzeko neurriak hartu, 30 orduko lanaldi eta gutxieneko soldata 1.400 eurotan ezarri dadin akordio interprofesionala galdegiten dugu.

Lan eta bizi baldintzak duindu behar dira, bizitza bizigarrien aldeko politika publikoak garatu eta horretarako, enplegua, zaintza lanak eta aberastasuna banatzeko neurriak eta, batez ere, borondate politikoa behar da.

Gipuzkoako egoitzen gatazkari irtenbidea emateko herrialdeko lan hitzarmena eta ratioen hobekuntza ezinbesteko baldintzak direla berretsi dugu

Aritz Sorzabal
-
0
Gipuzkoako egoitzen gatazkari irtenbidea emateko herrialdeko lan hitzarmena eta ratioen hobekuntza ezinbesteko baldintzak direla berretsi dugu

Gipuzkoako helduen egoitzetako langileek beste greba eta mobilizazio egun bat egin dute, lan baldintza duinen eta kalitatezko zerbitzu baten defentsan. Jardunaldiko mobilizazio nagusia Bulebarretik abiatu dute, eta, Donostiako hirigunetik igaro ostean, Gipuzkoako Foru Aldundian amaitu dute protesta.

Bi urteren ostean erabat blokeatuta zegoen negoziazio mahaia biltzea lortu dugu. Testuinguru horretan gauzatu dugu gaurko greba, aurreko greba egunetan ez bezala. Hemendik aurrera, ordea, Patronalaren eta Gipuzkoako Foru Aldundiaren erantzukizuna da mahaia berriro ez blokeatzea. Edukiez hitz egiten hasteko momentua den honetan, borondateetatik harago, proposamen zehatzak mahai gainean jarri beharko dira. Eta LAB sindikatutik behin eta berriz errepikatu dugun moduan, herrialdeko lan hitzarmena eta ratioen hobekuntza ezinbesteko baldintzak dira gatazkari irtenbidea emateko.

Zentzu honetan, sektoreko langileek aurrera daramaten borroka nekaezin eta eredugarria babestu eta presio sozial zein sindikala biderkatzeko unea da.

Mutualiaren eta Osakidetzaren arteko akordioak langileriaren konfidentzialtasunerako eskubidea urratzen du

Aritz Sorzabal
-
0
Mutualiaren eta Osakidetzaren arteko akordioak langileriaren konfidentzialtasunerako eskubidea urratzen du

Euskal gehiengo sindikalak deituta, elkarretaratzea egin dugu Bilbon, Mutualiaren egoitzaren aurrean, Mutualiak eta Osakidetzak sinatu berri duten akordioak patronalaren interesen alde egin eta mediku historialetan izan dezakeen eragina salatzeko.

LAB sindikatutik dei egiten diogu langile klaseari Mutualiari aurrez baimenik eman ez diezaion, ez espreski, ezta idatziz ere, langileen txostenetara modu zuzenean sartu ahal izateko Gizarte Segurantzak mutualitateari legez esleitutako edozein lankidetza arlotan; hala nola, lan istripuen eta lanbide gaixotasunen kontingentzietan, kontingentzia arruntak eragindako aldi baterako ezintasunean, haurdunaldiko eta edoskitze naturaleko arriskuetan, minbizia edo beste gaixotasun larriren bat duten adingabeen zaintzan… Era berean, dei egiten diegu langileei ez diezaiotela Mutualiari Osakidetzako historia klinikoan sartzeko aurrez baimenik eman, ez espreski, ezta idatziz ere.

LAB, ELA, ESK, STEILAS, ETXALDE eta HIRU sindikatuon oharra:

Osakidetzak eta Mutualiak lankidetza hitzarmena sinatu dute bi erakundeetako medikuek pazienteen mediku historiala elkarbanatzeko. LAB, ELA, STEILAS, Etxalde eta Hiru sindikatuentzat osasun publikoaren pribatizaziorako beste urrats bat da, eta mediku historialetan esku sartze larria eragingo du, enpresen interesen mesedetan.

Mutualia da EAEko muturik handiena, eta hitzarmenak 421.959 langile ingururi eragingo die. Pentsa daiteke beste mutuek ere bide berari jarraituko dutela. Gure historia mediko osoa ezagutzeko aukera izango duten akordio berri honekin, are zailagoa izango da mutuek behar bezala artatzea, irizpide medikoak irizpide ekonomizisten aurretik jarriz.

Sindikatuek urteak daramatzate mutualitateen jardunbide txarrak salatzen, kontingentzia bat lan kontingentzia gisa onartzerakoan, esaterako, edo behar bezala sendatzeko beharrezkoakoak diren baja egunak ezartzerakoan.

Mutualitateak hasiera batean enpresa elkarteen langileen kontingentzia profesionalak kudeatzeko sortu ziren; elkarte patronal pribatuak dira. 1996tik aurrera, Madrilgo gobernuak eskumen handiagoak ematen hasi zitzaizkien. 2015eko erreformarekin, Gizarte Segurantzaren Mutua laguntzaile izatera igaro ziren, eskumen handiagoak bereganatuz eta, ondorioz, botere handiagoa izanik, hala nola kontingentzia arruntetako prestazioaren kudeaketa, haurdunaldiko edo edoskitzaroko arrisku prestazioa, edo langileen jardun prestazioa, besteak beste. 2014an, Gizarte Segurantzaren Lege Orokorraren erreformaren bidez, historia klinikorako sarbidea ireki zitzaien mutualitateetako profesionalei, baina, azkenean, Datuak Babesteko Legeak eragotzi egin zuen.

Hala ere, Osakidetzak eta Mutualiak lankidetza hitzarmen bat sinatu dute pasa den astean, osasun sistema publikoko datu medikoak eskuratzeko, teorian pazienteen berariazko baimenarekin.

Hitzarmen horrek botere handiagoa emango dio Mutualiari, eta datu medikoen konfidentzialtasunerako eskubidea urratuko du. Gainera, osasun sistema publikoan pazientearen eta medikuaren arteko harremana larriki kaltetu dezake; izan ere, baliteke beren historian arreta edo kalteak agertzea nahi ez izatea, eta, ondorioz, beren lan bizitzan aurka erabil daitezke.

Larunbatean Donostian egingo den “Euskara aurrera” manifestazioan parte hartzeko deia egiten dugu

Aritz Sorzabal
-
0
Larunbatean Donostian egingo den “Euskara aurrera” manifestazioan parte hartzeko deia egiten dugu

Langileok ere “Euskara aurrera!” esateko ordua da. LABek larunbatean Donostian egingo den “Euskara aurrera” manifestazioan parte hartzeko deia egiten du. Mobilizazioa 17:30ean hasiko da Antiguoko tuneletik eta Igor Arroyo idazkari nagusi ondokoa buru duen sindikatuko ordezkaritza zabal batek ere bertan parte hartuko du.

Gazteek ahotsa altxatu dute. Euskaraz egin nahi eta ezin. Euskaraz bizi nahi eta trabak edonon. Aisialdirik ez euskaraz, euskarazko edukirik ez pantailetan, egunerokoan euskaraz aritzeko oztopoak… Berreuskalduntze politikak ez dira espero zen fruitua ematen ari eta horretaz aski dakite gazteek, politika horien muinean hazitakoak baitira asko. Ageriko kontua da aspalditik. Baita politika horien erantzule direnen begietara ere. Eta zer esan euskara guztiz diskriminaturik eta isildurik dagoen zonaldeetako egoeraz!

Behin eta berriro esan dugu euskaraz bizi nahi dugula. Behin eta berriro altxatu dugu ahotsa: ez dago euskaraz bizitzerik, lan mundua euskalduntzen ez bada. Euskaldunon eskubide linguistikoak sistematikoki zapaltzen diren eremua da lan mundua. Hala ere, euskararen alde argazkiak ateratzen dituzten berberak dira bidegabekeria honekin amaitu nahi ez dutenak. Patronalak balizko euskara planen inguruan hitz egiten hasteko mahaian jesartze hutsari ere ezetza eman dio.

Eta gobernu eta administrazioak ez dira atzean gelditzen. Batzuek alboz jartzea arte bihurtu dute, dena boluntarismoaren esku utzita. Baina ez dago aurrera egiterik neurri eta erabaki eraginkor eta ausartik hartzen ez bada. Eta jakin badakite. Ezin dugu ahaztu ere Euskal Herriko punta batetik bestera pairatzen ari garen oldarraldi judiziala, inboluzio legal batean gaude.

Hala ere, hainbat eta hainbat gure hizkuntzak atzera egiteko ahaleginetan tematzen diren bitartean, guk “Euskara aurrera!” ozen aldarrikatzen dugu, egunero, nork bere eremutik. Larunbateko manifestazioan aho batez oihukatuko dugun bezala. Euskaraz bizitzeko determinazio osoa daukan komunitatea gara, erasoak eraso eta oztopoak oztopo, mendeetan aurrera egitea lortu duen komunitatea eta amore emateko prest ez dagoena.

Grebara deitu dugu maiatzaren 30ean Bizkaiko egoitzetan, sektore publikoarekiko ekiparazioa eta langile gehiago eskatzeko

Aritz Sorzabal
-
0
Grebara deitu dugu maiatzaren 30ean Bizkaiko egoitzetan, sektore publikoarekiko ekiparazioa eta langile gehiago eskatzeko

Sektorean egindako aurreko hiru greba-egunen ondoren, egoerak ez du hobera egin. LABek Bizkaiko Foru Aldundiari egindako interpelazioek ez dute erantzunik jaso.

Azken hilabete honetan, LABek Batzar Nagusietan parte hartu du sektorearen egoera larria azaltzeko. Era berean, bilera bat izan genuen Asier Alustiza, Bizkaiko Foru Aldundiko Gizarte Ekintzako Pertsonen Autonomia Sustatzeko zuzendari nagusiarekin. Bilera honetan, hitzarmen kolektiboaren negoziazioan aktiboki parte hartzeko eskatu genion Aldundiari. Aldundiak diru publikoa bideratzen du enpresa pribatuetara, eta horregatik, langileen lan-baldintzen ardura izan behar dute.

Greba-egun berri honekin, 5.000 langileri eragiten dien gatazka honetan Aldundiaren pasibotasuna eta inplikaziorik eza salatuko ditugu. Aldundiak sektoreko langileekin erakutsitako hitz hutsak eta enpatia falta ere salatuko ditugu. Laugarren greba egun honekin sektorearentzako gure aldarrikapen nagusiak defendatzen jarraituko dugu: parekatzea eta ratio duinak.

Premiazkoa da sektoreko langileen lan-baldintzak hobetzea, eta horregatik, sektoreko langile guztiei mobilizazioetan parte hartzeko deia egiten diegu.

Sindikatuak berriro altxatu gara osasungintzako mahai sektorialetik, edukirik eza eta Osakidetzaren jarrera inposatzailea ikusita

Aritz Sorzabal
-
0
Sindikatuak berriro altxatu gara osasungintzako mahai sektorialetik, edukirik eza eta Osakidetzaren jarrera inposatzailea ikusita

LAB, SATSE, ELA, CCOO, UGT eta ESK sindikatuon ohar bateratua:

Osasuneko Mahai Sektorialeko kide garen sindikatuok kapitulu berri bat bizi izan dugu gaurkoan, edukirik ez daukan foro horren historian.

Hori dela eta, edukirik ez daukalako, pasa den urtarrilean mahaitik altxatu ginen, eta salatu genuen informazio foro baten aurrean gaudela, ez negoziazio esparru batean, eta gainera, Osakidetzak ez dituela errespetatzen lortzen diren akordio apurrak.

Gogora dezagun pasa den astean Eusko Jaurlaritzak iragarri zuela Gobernu Kontseiluak onartu zuela, joan den uztailean Mahaiko kide batzuen abala jaso zuen Garapen Profesionalerako aparteko deialdia. Iragarpen horren ondoren, Osakidetzak aparteko Mahai bat deitu du gaurko. Mahai horrek bi puntu zituen gai-zerrendan: garapen profesionala eta Basurtuko Bihotz-kirurgia.

Harrigarria bada ere, eta berriro ere bere fede txarra eta negoziatzeko borondate eza erakutsiz eta propagandaren bidean sakonduz, Osakidetzak adierazi digu ez dakiela noiz jarriko duen martxan pendiente dagoen deialdia. Era berean, eta deialdian izandako atzerapenaren ondorioz, osagarri hori kobratu zezaketen pertsona batzuk kanpoan gera zitezkeela ikusita, Osakidetzak adierazi du “batzuk kanpoan geratuko direla eta beste batzuk sartuko direla”. Horrelako planteamenduak onartezinak dira eta argi erakusten digute Osakidetzak langileekiko daukan errespetu falta.

Gogora dezagun uztailean sinatu zen akordio baten aurrean gaudela, eta iazko abenduaren 31n gauzatu behar zela. Osakdietzak 6 hilabete daramatza bete gabe, eta gaur adierazitakoa ikusita, oraingoz, bete gabe jarraituko du. Soldata-murrizketa hau 2012tik dago indarrean.

Osasun Sailak sinatutakoari ematen dion balio ezaren adibide ona da hau. Osakidetzak, alde bakarrez, edukirik gabe uzten ditu akordio hauek hala komeni zaionean.

Egoera hori ikusita, Mahaian gauden sindikatu guztiok bilera uztea erabaki dugu.

Hori gutxi balitz, azpimarratu eta salatu nahi dugu Osakidetzak ez dituela sartu gaurko bileraren gai-zerrendan, behin ta berriz mahai gainean jarri ditugun aldarrikapenak. Aldarrikapen horien inguruan hainbat greba-egun deitu ditugu sindikatuok, azkena astelehen honetan.

Lakuan mobilizatu gara, Hezkuntza Sailaren aldebakarreko jokabidea salatzeko

Aritz Sorzabal
-
0
Lakuan mobilizatu gara, Hezkuntza Sailaren aldebakarreko jokabidea salatzeko

Ikastetxeen egunerokoa baldintzatuko duten erabakiak hartzerako orduan Hezkuntza Sailak izan duen aldebakarreko jokabidea salatu dugu LAB, STEILAS, CCOO eta UGT sindikatuok Gasteizen, Eusko Jaurlaritzaren egoitza nagusiaren aurrean.

Sindikatuon oharraDeskargatu

Ikastetxeen egonkortasuna bermatzeko estabilizazio-prozesuak ezinbestekoak dira. Eta akordioen bidez adostu nahi diren bestelako lan baldintzen gaineko erabakiak hartzeko, negoziazioa beharrezkoa da. Halaxe salatu dugu gaurko mobilizazioan. Horrez gain, lan zama arintzeko neurri gehiago ezarri ditzan exijitu diogu Hezkuntza Sailari.

Mobilizatzea ezinbesteko deritzogu irakasleon lan-baldintzetan eragin zuzena izango duten neurrien aurrean.

Irizar E-Mobility-ko garaipenaren ostean, gazte prekaritatea borrokatzeko tresna izateko konpromisoa berretsi dugu #LortuDugu

Aritz Sorzabal
-
0
Irizar E-Mobility-ko garaipenaren ostean, gazte prekaritatea borrokatzeko tresna izateko konpromisoa berretsi dugu #LortuDugu

Irizar E-Mobilityko enpresa batzordean 9 ordezkaritik 8 dira LABekoak. Sindikatuko idazkari nagusi ondoko Igor Arroyo LABeko ordezkariekin batera azaldu da prentsaurrean, akordioaren edukien berri eman, jasotako babesa eskertu eta gazte prekaritatearen aurka borroka sindikal gehiago pizteko apustua adierazteko.

22 greba egun ostean, Irizar E-Mobilityko langileek onura garrantzitsuak dakartzan akordioa lortu dute enpresarekin. Langileen determinazioa eta batasuna, egindako greba aktiboa nahiz inguruko eskualdeen elkartasuna, funtsezkoak izan dira horretarako. Hona hemen akordioaren edukiak:

-Promozio prozedurak objektiboak eta automatikoak izatea lortu da, lan berdinak soldata berdina izango duela bermatuz.

-Malgutasuna nabarmen mugatu da.

-Kontzialiazioan hobekuntzak lortu dira.

-Txandakako plusa ezartzea lortu da.

-Lan osasunean konpromisoak lortu dira.

-Soldata igoera garrantzitsuak lortu dira, KPItik gorakoak 3 urterako.

-Bidaietarako baldintzak hobetu eta berdindu dira.

Egindako borroka balioan jartzearekin batera, Irizar Taldean irekita dagoen beste auzia konpontzeko deia egin diote E-Mobilityko langileek Irizarreko zuzendaritzari, Alconzan planteatutako 25 kaleratzeak bertan behera utziz.

Baina gainera, E-Mobilityko borrokak gazte prekaritatearen auzia agerian utzi duela nabarmendu du LABek. Izan ere, bataz besteko adina 27 urtekoa izanda, langile hauen lan baldintzak zegokiena baino kaskarragoak ziren, grebari ekin aurretik. Emakumeen edota langile migranteen kasuan bezala, gazteen kasuan ere lan baldintzetan arrakala nabarmena ematen dela argi dago:

-25 urte azpiko langabezia tasa %28koa da.

-25 urte azpiko gazteek, urtean 13.000 euro gordin baino ez dituzte jasotzen, batazbesteko soldata bainokasik 16.000 euro gutxiago. 10 urtetan, arrakala hau %63 hazi da.

-Emakume gazteen kasuan, adinaren araberako arrakalari sexuaren araberakoa gehitzen zaio. Izan ere, 25urte azpiko emakumeek adin bereko gizonezkoek baino %14 soldata baxuagoak dituzte.

Gazte prekaritatea, lan esku merkean oinarritutako eredu ekonomiko baten ondorioetako bat da. Patronalak estrategia desberdinak erabiltzen ditu etekinak areagotzeko: azpikontratazioa, soldata eskala bikoitza, kontratu partzialak, kaleratze merkea, uberizazioa, ABLEak…

Marko legala da Patronalari trikimailu hauek erabiltzea errazten diotena. 80ko hamarkadatik hona Patronalari mesede egiteko hamaika neurri hartu dira lan erreforma bakoitzean. Azken kolpea, PPren lan erreforma izan zen eta Espainiako Gobernuak eutsi egin dio erreforma horren osagai nagusiei, hala nola, estatalizazioa eta kaleratze merkea.

Egoera hau iraultzeko antolakuntza eta borroka sindikala egitea ezinbestekoa da, Irizar E-Mobilityn egin duten bezala. Kasu honetan, langileak LABekin antolatu eta grebara jotzea erabaki dute, enplegu duina bermatuko duen lan ituna lortu arte. Ez da nolanahiko greba izan, gainera: greba zabal eta aktiboa izan da, lantegitik harago zabaldu dena, elkartasuna bilatu duena, gazte esparruan aliantzak bilatu eta aurkitu dituena. Irizarren borrokatu duten langileek, nagusiki gazteak, argi utzi dute, ez daudela prest bizi osorako prekaritatera kondenatu nahi dituen lan harreman eredu hau ontzat emateko. Horregatik, beraien borroka eredu bilakatu da gazte askorentzat. Horrelako borrokak eta horrelako grebak sustatu nahi ditu LABek abian den borroka ziklo berri honetan.

Ildo honetan, kontutan hartu beharra dago antolatzeko eta borrokatzeko baldintzak ez direla berberak lantokiz lantoki eta eremuz eremu: fabrika batean, ostatu batean, riderren gisa edota etxeko langile gisa. LAB eredu sindikala egoera berrietara egokitzen ari da, birpentsatzeko ariketa etengabea eginez. Gauzak horrela, eremu bakoitzari egokitutako antolakuntza eta borroka eskaintza egitea da LABen konpromisoa. Beti egoera bakoitzari egokituriko borroka molde eranginkorrenak bilatuz. Adunako lantegi batean enpresako itunaren alde egindako borroka honetan bezala, praktiketan ari diren ikasleen eskubideak bermatzeko, riderren harreman laborala aitortzeko edota etxeko langileen lehen hitzarmena ezartzeko borroka egingo du LABek, gazte prekaritateari muga jarri eta enplegu duinaren alde urratsak emateko.

Borroka laboralak sustatzearekin batera, LABek berretsi egiten du Euskal Herriko instituzioetatik egiturazko neurriak hartzeko beharra. Euskal Herrian lan harremanetarako esparru propio bat eraiki beharra dago, gazte prekaritatea eta oro har lan esplotazioa gure herritik ezabatu ahal izateko.

Arabako metalgintzak argi esan dio SEA patronalari nahikoa dela eta hitzarmen duin bat behar duela orain

Aritz Sorzabal
-
0
Arabako metalgintzak argi esan dio SEA patronalari nahikoa dela eta hitzarmen duin bat behar duela orain

Gaur Arabako metalgintzako lehenengo greba eguna izan da, LAB, ELA, CCOO, USO, ESK eta CGT sindikatuok deituta, eta oso jarraipen garrantzitsua izan du enpresa handi zein txikietan. Horrekin, sektoreak mezu argia helarazi dio SEA patronalari: Nahikoa da, hitzarmen duin bat orain! Eguerdiko manifestaldian ere, milaka eta milaka pertsonek parte hartu dute, egun historiko honen isla moduan.

Gogorarazi nahi dugu, apirilaren 8an 5 sindikatuk deitutako lanuztea lehenego pausua izan zela langileen aktibazioan eta erraztu egin zuela orain greben fasean sartzea, gaur hasi dena, modu ezin hobean gainera. Izan ere, Arabako metalgintzako langileak grebara deituta zeuden eta LABen ustez jarraipena oso garrantzitsua izan da:

Grebak eragin handia izan du enpresa handienetan: Mercedeseko produkzioa ohikoaren 1/3 bat izan da gutxi- gorabehera, SIDENORreko sekzio batzuk produkziorik gabe egon dira, TUBOS REUNIDOSen bezala, AERNNOVAn ere nabaria izan da sekzio batzuetan eta TUBACEXen produkzioa geldirik egon da. Mercedesi dagokionez, salatu nahi dugu enpresak ez diela sartzen utzi greba komiteko kideei, grebarako eskubidea urratuz. Hori dela eta, sindikatuok salatu egingo dugu gertaera hau.

Gainontzeko enpresetako askotan, ertainak eta txikiak, jarraipena masiboa izan da : Ferrovial Servicios (Michelin), Condesa Fabril, SDA Factory, Alestis, TLAn, Talleres Legutiano, Elecnor, Talleres Betoño, Laminaciones Arregui – Urbina, Detesa,…

Esan dezakegu egun historikoa izan dela Arabako metalgintzan, sektoreak masiboki egin duela bat grebarekin eta milaka eta milaka lagunek parte hartu dutela eguerdiko manifestaldian. Gasteizko manifestazio jendetsuenen pareko izan da gaurkoa, SEAren sasi-datu tamalgarriak agerian utziz. Orain, pilota bere teilatuan dago berriro, sektoreak aldarrikapenekin bat egin baitu aktiboki:

  •  Soldata igoera duinak, langileen erosahalmenari eutsi ahal izateko eta bajan egonda soldata ez galtzeko.
  •  Lanaldia jaitsi eta bestelako neurriak, baimenetan eta abar, pertsonak erdigunean jartzeko eta zaintza laneiheltzeko, kontziliazioa eta erantzukidetasuna erraztuz.
  •  Prekaritatearekin amaitzea: subrogazio eraginkorra azpikontratetan, ABLEei eta ebentualitateari mugakjartzea,…
  •  Neurri eraginkorrak berdintasun errealari begira, emakumeen eta beste kolektibo batzuendiskriminazioarekin bukatzeko.
  •  Neurri eraginkorrak lan osasunean, sektorean urtero ia 2.000 lan istripu baitaude.

Horregatik, SEA patronalak konpromiso irmoak hartu behar ditu, inmobilismoa alde batera utzita eta sektoreak dituen arazoei erantzungo duen hitzarmen bat adosteko. Edonola ere, SEAk jarrera arduragabea mantentzen duen bitartean sektoreak borrokan jarraituko du eta hurrengo astean beste 2 greba egun deituta daude, maiatzaren 24 eta 26an. LABek deialdi horietan, gaur bezala, langileak modu masiboan parte hartzera deitzen ditu, borrokaren bidez lortuko baitugu metalgintzako hitzarmen duin bat.

1...380381382...1,635Page 381 of 1,635

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus