2026-01-13
Blog Page 247

Greba hasi dute GAES Amplifoneko langileek

Zubiate(e)ko Aritz
-
0
Greba hasi dute GAES Amplifoneko langileek

Zerbitzu soziosanitarioak eskaintzen dituzten Gipuzkoako merkataritzako langileak dira GAES Amplifonekoak, eta lan hitzarmena 2008tik berriztu gabe dagoela salatu nahi dute. Hala, haien lan baldintzak eta soldatak eguneratu gabe daude orduz geroztik, eta azken urtean enpresari egoera hobetzeko hainbat proposamen egin dizkioten arren, behin eta berriz ezezkoa jaso dute. Bada, astebeteko greba hasi dute gaur, apirilaren 1era arte iraungo duena.

Eibar, Azpeitia, Ordizia, Irun, Orereta, Bergara, Hernani, Lasarte, Beasain edota Arrasateko dendak itxita egon dira goizean grebaren eraginez, eta lurralde mailako mobilizazioa egin dute goizean Donostian, Groseko GAES Amplifon dendatik abiatuta kalejira-piketea egin dutelarik. Ekintza hori grebaren egun guztietan errepikatuko dute. Enpresak 20 zentro eta 40 langile inguru ditu Gipuzkoan, eta gehien-gehienek bat egin dute deialdiarekin.

Orain arte, Gipuzkoako langileek aukeratutako ordezkaritza sindikala, LABena, probintzia-mailakoa zen, baina 2021ean, nazioarteko enpresa batek GAES erosi ondoren, negoziazio-esparrua Estatu mailara aldatu zen, eta bertako langileen aldarrikapenak gutxiengoa izatera pasatu ziren; izan ere, Estatuan, batzorde bat osatzen duten sindikatu nagusiak daude, eta langile guztiei eragiten dieten lan-arloko erabakiak hartzen dituzte. Sindikatuen arteko batzorde horretan ez dute oredezkaritzarik ez LABek, ez Gaes Amplifon Gipuzkoako langileek.

Azken egunotan hainbat bilera egin dituzte Enpresa Zuzendaritzarekin, beren lan baldintzek okerrera egitearen inguruan dituzten kezken berri emateko: “Gure eskaerak beti baztertu izan dira. Gure aldarrikapenei dagokienez, oso argiak dira: benetako negoziazioa nahi dugu Gipuzkoako langileentzat, gure egoera soziala eta laborala kontuan hartuko duena, gure lurralde-errealitatearekin bat etorriz”. Gipuzkoako metalaren merkataritzaren hitzarmen kolektiboa errespetatu eta aplika dadin eskatzen dute. Baina, era berean, soldaten berrikuspena eta eguneratzea ere bai, gaur egun pairatzen duten errealitate ekonomikoaren arabera (KPIaren gaineko soldata igoerak, alegia).


Horregatik guztiagatik, Amplifon Gipuzkoako langileek antolatu eta kalera ateratzea erabaki
dute, borroka sindikalaren bidez beren lan-eskubideak defendatzeko asmoz. Hala, martxoaren 27tik
apirilaren 1era arte astebeteko greba egingo dute.

DSBE jasotzen duten pertsonen etxez etxeko ikuskapenak salatzen ditugu, pobrezia estigmatizatzen eta kriminalizatzen dutenak

Zubiate(e)ko Aritz
-
0
DSBE jasotzen duten pertsonen etxez etxeko ikuskapenak salatzen ditugu, pobrezia estigmatizatzen eta kriminalizatzen dutenak

Berriki, EAEko erakunde eta plataforma sozialek salatu dute Diru-sarrerak Bermatzeko Errenta jasotzen duten pertsonen aurkako polizia-abusua eta jazarpena. Honen erakusgarri dago poliziak jasotzaileak bizi diren auzoetara joatea, auzokideen artean ikertzeko zer ordutegi dituzten, non lan egiten duten edo seme-alabak zein eskolatara joaten diren, edota pertsonen etxeetara sartzea informazio hau lortzeko.

LAB sindikatutik Administrazio Publikoak eta bere ordezkariek egindako edozein motatako botere-abusuak arbuiatzen ditugu. Onartezina da sistema kapitalista, heteropatriarkal eta arrazista honek sortzen duen egiturazko pobretzearen aurrean Administrazio Publikoak lehentasuna ematea DSBEa jasotzen duten eta pobrezia egoeran dauden pertsonak kontrolatzeari, egoera hauen ondorioei eta, batez ere, sortzen dituzten kausei heldu beharrean. Izan ere, ez-nahikoak diren kopuruak, prestazio hau eskuratzeko oztopoak eta jasotzen duten pertsonen kontrol eta kriminalizazio neurriak gogortzea dira DSBEaren erreforma onartu berriaren oinarriak.

Bereziki larritzat jotzen dugu DSBEa jasotzen duten pertsonak kontrolatzeko etxebizitzetara sartzeak dakarren abusua eta eskubide-urraketa, are larriagoa “ikuskapen” horiek gorputz polizialek eginak izateagatik. Izan ere, etxeen ikuskapen hauek ez dira administrazio-ekintza hutsa, pertsonek beren intimitatea eta eguneroko bizitza garatzen duten tokian ematen baitira. DSBEari buruzko legearen eztabaida parlamentarioan zalantzaz salatu genuen jada Lanbideko langileek ikuskapen mota hori egiteko izan dezaketen prestakuntza.

Egun, ikusten dugu nola indar polizialak burutzen ari diren etxeko ikuskapenak kontrol mekanismo, estigma eta jazarpen iturri bihurtzen ari diren; ikuskapenak egiteko adostasun askea hertsatzen dute ikuskapen hauek, zeren eta hauek “oztopatzea” edota “laguntzeari uko egitea” arau-hauste larritzat jotzen da eta horrek prestazioa etetea ekar dezake.

Azken batean, salatzen ari diren botere-abusuak Eusko Jaurlaritzaren politiken isla dira. Izan ere, Eusko Jaurlaritzak pobretzeari aurre egitea baino, ez-nahikoa den sistema bat eustea du helburu, non bazterkeria-egoeran dauden pertsonen herenak ez duen gizarte-babeseko sistemara sarbiderik, eta pobrezia egoeran dauden pertsonen iruditeria faltsua elikatzen du, mehatxu, kostu eta gastu defizitario gisa (iruzurra ez denean prestazioen % 0,5era ere iristen).

Horren aurrean, LABek polizia-abusu horiek berehala etetea eskatzen du, eta horien aurrean DSBE jasotzen duten pertsonentzako bermeak eta babesa ezartzea. Baita ere, berehala har daitezela bizi duinerako oinarrizko diru-sarrerak bermatzeko neurriak aldarrikatzen dugu, besteak beste, DSBEren kopuruak handitzea edota pentsioak 1.080 eurotaraino osagarritzea.

Gainera, azpimarratu nahi dugu beharrezkoa dela Euskal Herrian nahi ditugun politika publiko eta sozialei buruzko eztabaida integrala, intersekzionala eta parte-hartzailea. LABen enpleguaren, zainketen eta aberastasunaren bidezko banaketaren aldeko apustua egiten dugu, bidegabea eta desorekatua den egungo eredu sozioekonomikoa eraldatzeko.

DSBE arautzen duen lege berriari buruzko gure azterketa osoa:

LABen-azterketa_Inklusio-eta-diru-sarrerak-bermatzeko-euskal-sistemaren-lege-erreformaren-azterketaDeskargatu

Telefonica arduradun, azpikontratazioak hil egiten du

Zubiate(e)ko Aritz
-
0
Telefonica arduradun, azpikontratazioak hil egiten du

LABek, ESK, STEILAS, EHNE eta HIRU sindikatuekin batera, elkarretaratzea egin du Telefonicak Gasteizen duen egoitzaren aurrean, enpresak bi hilabeteko epean bi lan-istripu oso larritan izan duen erantzukizuna salatzeko. Lehen lan-istripua urtarrilean gertatu zen, Donostian. Langile bat hil zen zuntz optikoa instalatzen ari zela etxebizitza batetik erorita.

Bigarren lan-istripua martxoaren 15ean gertatu zen Legution. Langilea larri zauritu zen telefono-linea bat konpontzen ari zela 10 metroko altueratik erorita.

Bi kasuetan, zauritutako langileak eta hildakoak azpikontratatutako enpresetan lan egiten zuten Telefonicako zerbitzuak emateko.

Telefonicak erabiltzen duen azpikontratazio masiboko politika kriminala salatu dugu, beste multinazional askok erabiltzen duten bezala. Azpikontratazio-politika kriminala da, langileen lan-baldintzak prekarizatzen dituena, eta langile zaurgarri hauek lan-istripua izateko arrisku handiagoa izatea eragiten duena. Azpikontratazioa arrisku faktore bat da. Lan istripu gehiago daude prekarioak diren lanetan, azpikontratazioaren kasuan bezala.

Langile horiei eskaintzen zaizkie lanik arriskutsuenak eta laneko babes- eta segurtasun-maila txikiena dutenak.

Zehazki, telekomunikazioen sektorean prekarietatea erabatekoa da, soldata oso baxuekin. Azpikontratazio-kate luzeko enpresa guztiak diruaren zati batekin geratzen dira, eta langileak lan pilo bat egitera behartzen dituzte, biziraun ahal izateko.
Hori guztia Telefonicak urtez urte etekin izugarriak aitortzen dituen bitartean. Patronalaren zekenkeriak laneko heriotzak eragiten ditu.

LABek, halaber, enpresa eredu hori zalantzan jartzen ez duen eta azpikontratazioaren gehiegizko erabilera eta lan-baldintzak prekarizatzea ahalbidetzen duen Eusko Jaurlaritzaren konplizitatea seinalatu nahi du.

Eta Osalani, Lan Ikuskaritzari eta Fiskaltzari ere eskatzen diegu beste alde batera begiratzeari utz diezaiotela, eta enpresa “boteretsuak” direnean ere inplika daitezela.

LABek gertatutakoa sakon ikertzeko eskatzen du eta behar diren erantzukizunak argitzea. Jakin ahal izan dugunez, Legutioko istripuaren kasuan, langilea egurrezko zutoin ustel bati lotuta zegoen, eta Telefonicaren erantzukizun zuzena da hura ondo mantentzea.

Azkenik, balioan jarri nahi dugu lan-istripuei erantzuteko protokoloak indarrean jarraitzen duela eta, egoera tamalgarri honen aurrean, sindikatuen arteko lankidetza inoiz baino beharrezkoagoa dela. LABek uste du protokoloa indartzeko garaia dela, lan istripuen arazo latza lehen mailako arazo politiko eta soziala bilakatu arte.

Lan istripu gehiagorik ez!

Bilboko manifestazioan ozen entzunarazi dituzte aldarrikapenak Osakidetzako garbitzaileek

Zubiate(e)ko Aritz
-
0
Bilboko manifestazioan ozen entzunarazi dituzte aldarrikapenak Osakidetzako garbitzaileek

Apirilaren 2ra arte greban daude osasungintza sare publikoan garbiketa zerbitzua ematen duten enpresetako langileak, LAB-UGT-CCOO-ESK intersindikalak deituta.

Osakidetzako langileekiko homologazioa exigitzeko borroka daramate aurrera, eta goizean Bilboko kaleak bete dituzte Bizkaiatik bertatik zein Araba eta Gipuzkoatik etorritako beharginek. Hitzarmenaren negoziazioaren blokeoa askatzeko eskatu dute beste behin ere.

DHL Parcel Gipuzkoan borrokan jarraitzen dugu

Zubiate(e)ko Aritz
-
0
DHL Parcel Gipuzkoan borrokan jarraitzen dugu

Langileen ordezkaritza eta enpresaren artean DHL PARCEL GIPUZKOAko hitzarmen kolektiboa berritzeko bilera ugari egin diren arren, akordiorik lortu gabe jarraitzen dugu.

Gure ustez, badaude hitzarmen bidez erregulatu beharreko eguneroko produkzioko kontu ugari eta, horiekin batera, langileen eros-ahalmena bermatzea ezinbestekoa dela uste dugu. Azken hori marra gorritzat daukagu, eta enpresak KPI-a eskaintzeko borondaterik ez duela ikusita, kalera atera gara!

Asteetan zehar, lan-zentroaren ingurua pankartaz josi dugu eta enpresara sartzeko Donostiako Belartza poligonoaren sarreran bi kontzentrazio egin ditugu.

Enpresaren aldetik mugimendurik ez dagoela ikusita, borrokan jarraitzen dugu. Atzo, martxoak 23, kotxe-karabana antolatu genuen: Belartzatik DHL enpresak Mikeletegi pasealekuan dituen bulegoetaraino joan ginen, ibilgailuak kartelez bete eta gure aldarrikapenak zeintzuk diren adieraziz. Ondoren, pankarta bat eskegi genuen ofizinen parean, “DHL borrokan, hitzarmen duinaren alde” lelopean.

Langileok gogotsu gaude eta lan-baldintza duinen alde borrokan jarraituko dugu! Datorren ostiralerako, martxoak 31, Belartzako lan-zentro parean kontzentrazio bat deitu eguerdiko 13:00etatik 13:30etara eta, horrekin batera, datozen egunetan kaleetan gure presentzia indartzen segiko dugu.

Zerbitzuaren kalitatea eta lan baldintza duinak defendatzera atera dira kalera GUFEko langileak

Zubiate(e)ko Aritz
-
0
Zerbitzuaren kalitatea eta lan baldintza duinak defendatzera atera dira kalera GUFEko langileak

Enpresa-batzordearen ustez, Gizarte Urgazpenerako Foru Erakundeak (GUFE) ematen duen zerbitzuan eragin oso negatiboa duten hainbat erabaki hartzen ari dira. Horren guztiaren berri emateko, GUFEko Enpresa-batzordeak agerraldia egin du Bizkaiko Batzar Nagusietan.

Zaintza-eredua aldatzeko eta bizikidetza-unitateak sortzeko aitzakiarekin eginiko moldaketak salatu dituzte. Jarraian zerrendatuta daude neurri horiek:

Adinekoei zuzendutako kudeaketa publikoko 110 plaza murriztuko dituzte:

Oso gutxi dira kolektibo horri zuzendutako egoitza publikoko plazak, eta Sailaren asmoa ildo horretatik jarraitzea da. Zerbitzu publikoen murrizketa bat gehiago da, eta Aldundiak eta hura sostengatzen eta defendatzen duten alderdi politikoek duten titulartasun publikoaren eta kudeaketa pribatuaren eredua bultzatzen du.

Asistentziaren kalitatea larriki kaltetzen dute, gaueko erizaintza ezabatuz.

Lanpostuak desagertzen dira zerbitzari garbitzaileen eta ordenantzen kategorietan.

Langileen lan-baldintzak kaltetzen dituzte. Txanda finkoak ezarriz.


Batzarkide-taldeei eskatu diegu zerbitzu publikoen alde egin dezatela, itunpeko sarearen alde egin beharrean, eta zabaltzen diren zentroak, oro har, zuzeneko kudeaketa publikokoak izan daitezela, GUFEren bidez.

Beharrezkoa da kudeaketa zuzeneko zerbitzu publikoen sare sendoa izatea, bai gizarte-zerbitzuetan, baita beste zerbitzu askotan ere, osasungintzan, kasurako.

Mutualitate patronalen bidez osasun sistema pribatizatzeko estatu mailako egitasmo baten berri eman dugu

Zubiate(e)ko Aritz
-
0
Mutualitate patronalen bidez osasun sistema pribatizatzeko estatu mailako egitasmo baten berri eman dugu

Eusko Jaurlaritzari eta Nafarroako Gobernuari eskatu diegu egitasmo horren kontra azaldu daitezen

  • Jarraian ikus daiteke LABek eskuratutako dokumentua:
LABekEskuratutakoDokumentuaDeskargatu

Gaixotasun arrunten kudeaketa mutualitate patronalen esku uzteko hitzarmen zirriborro bat eskuratu du LABek. Zirriborroa Espainiako Gizarte Segurantzak eta AMAT mutualitate patronalen elkarteak adostu dute eta erkidego bakoitzari pasa diote, dagokion osasun sailaren eta mutualitate patronalen artean gauzatzeko. Eusko Jaurlaritzaren eta Nafarroako Gobernuaren mahai gainean dago, beraz.

Inko Iriarte Lan Osasuneko idazkariak azaldu duenez, “Osasun Sistema Publikoa eta, horrekin batera, langile eta herritarren osasunaren zatirik handiena enpresen esku geratuko litzatekeela” erakusten du dokumentuak. Ondorioz, “ezagutu dugun pribatizazio prozesu bortitzena” litzateke.

Akordioak jasotzen dituenak

Iriartek azaldu du akordio horren arabera, mutualitate patronalekin zerbitzuak kontratatuta dituzten enpresetako langileen kasuan, bajan daudenean, mutualitate horien esku geratuko liratekeela gertakizun arruntak eta horiei lotutako frogak, tratamenduak, interbentzioak, errehabilitazioak eta bestelakoak. Gaineratu du horrek ekarriko lukeela, besteak beste, mutualitateek irizpide produktibo eta ekonomizistak baliatzea eta, ondorioz, altak lehenbailehen eman nahi izatea, langileen osasuna bigarren planoan geratuko litzatekeelarik, gizarte segurantzaren kontura, gainera. Aipatutako neurriak langileria aktiboaren %80-90i eragingo lioke.

Bestalde, mutualitateak alta proposamena ematean, akordioak boterea emango lioke Osakidetzako edo Osasunbideko medikua fiskalizatu eta bost eguneko epe laburrean beharrezko txosten teknikoak eskatzeko, mutualitatearen aurrean azalpen zabalak eskaini behar izanik: “Honek orain arteko logika aldatzen du eta Osasun Sistema Publikoko medikua enpresa pribatu bateko medikuaren aginduetara jartzen du”. Egoera horretan, isiltasun administratibo deritzonak mutualitateen alde jokatuko luke, eta beren esku jarri Osasun Sistema Publikoaren lan karga, Iriartek zehaztu duenez.

Aldi baterako ezintasunen lehenengo egunetik, mutualitateak tratamendu, froga edo interbentzio bat proposatzen badu eta osasungintza publikoko medikuak garaiz erantzuten ez badu, baimena izango luke nahi dituen esku-hartzeak egiteko, “beti enpresaren interes produktiboen mesedetan, baja murrizteko”.

Akordioak inolako kontrol publikorik gabeko proba pilotua ere jasotzen duela salatu du Iriartek, baita historia klinikoetarako sarbidea ere.

Azkenik, Lan Osasuneko idazkariak azpimarratu nahi izan du depresio nahasmenduen, tendinitisaren edota ornoarteko diskoei eragiten dieten arazoen kasuan, 15 egunean behin jarraipena egin behar dela eta bajan jarraitzea justifikatu behar dela.

Pribatizaziorako urratsa

Igor Arroyo koordinatzaile orokorraren iritziz, osasun sistema publikoa pribatizatzeko saiakera bat dago kolaborazio hitzarmen gisa aurkeztutako dokumentu honen atzean: “1995tik hona Espainiako estatuan gero eta botere handiagoa eman zaie mutuei, EAJ eta UPNren laguntzaz. Oraingoan Mutualitate Patronalak populazio aktiboaren osasun zerbitzua bereganatzea da asmoa, Osasun Sistema Publikoa hustuz. Honela, dotrina neoliberalari jarraikiz, honako hau da dokumentuaren egileen planteamendua: sistemarentzat produktiboak diren horientzat mutua patronalen bidezko arreta, ahalik eta lasterren lanera bueltatu daitezen lortzeko; produktibotzat jotzen ez diren horientzat, berriz, baliabidez hustutako osasun sistema publikoa”.

Arroyoren esanetan, osasun sistema publikoaren itxaron zerrendak arintzea da erabiltzen den aitzakia. “Baina horretarako bidea ez da pribatizazioa, kontrakoa baizik: sektore publikoan inbertitzea. Mutualitate patronalak langileon kotizazioen kontura bizi dira. Bada, bideratu ditzagun kotizazio horiek sistema publikora, publifikatu ditzagun mutuak eta osa dezagun sistema publiko sendo bat. Badaude horretarako bide legalak, borondate politikoa besterik ez da behar”.

Arroyok Eusko Jaurlaritza eta Nafarroako Gobernuak interpelatu ditu: “Lehenik eta behin, saiakera pribatizatzaile honi ezezko borobila eman diezaioten eskatzen diogu Urkullu eta Chiviteri. Konpromiso argia har dezatela, langileon gaixotasun arrunten arreta ez dela mutua patronalen esku utziko. Bigarrenik, sustatu dezatela kontrako norabidea, alegia, enpresek gaixotasun profesionalen arreta Gizarte Segurantzarekin hitzartzea eta ondorioz osasun sistema publikotik kudeatzea. Langileon osasunerako bermerik onena sistema publiko indartsua da”.

Bizkaiko metalgintzako hitzarmena sinatu dugu

Zubiate(e)ko Aritz
-
0
Bizkaiko metalgintzako hitzarmena sinatu dugu

Gaur osteguna, martxoak 23, Bilboko Lan Harremanen Kontseiluaren egoitzan, LAB, CCOO eta UGT sindikatuok 2022-2025 aldirako Bizkaiko metalgintzaren hitzarmena sinatu dugu.

Sinadura hori FVEM patronalarekin 2003ko otsailaren 3an lortutako aurreakordioaren ondorioa da. Orain erregistratzea eta sektorean aplikatzea dagokigu.

Hitzarmen honen edukiek nabarmen hobetzen dituzte 2019. urterako sinatutako hitzarmenean jasotako hainbat aspektu, eta, gainera, inolako atzerapenik gabe. Konpromiso hori hartu zuen LABek negoziazioaren hasieran, eta bete egin dugu. Hitzarmen hau sinatzeak, kolpean, publikatzen den momentuan, %10etik gorako igoera suposatuko du, atzerapenak jasotzeko eskubidearekin. 2024. eta 2025. urteetarako soldata igoera finko batzuk izango dira, beti ere KPIaren igoeren zenbatekoak bermatuz, beraz erosahalmena bermatuz hitzarmenaren bukaeran. Eta hori guztia, neurrigabeko inflazioa eta goranzko euriborraren testuinguru batean.

Soldataren kapituluari dagokionez, metalaren gutxieneko tauletan ezarritakoak baino soldata handiagoak dituzten enpresentzako gutxieneko bermeari eustea nabarmendu nahi dugu. Horrela, gutxieneko igoera bat edo oinarrizko igoera bat bermatzen da, enpresetan hura hobetu edo jaso dezaten, azken hau enpresaren aurrean negoziatzeko gaitasunik ez dutenek batipat. Aipatutakoaz gain, hitzarmenak aurreikusten du sektoreko enpresa guztiei lanaldia murriztea norberaren aukerako ordu gisa (2025etik aurrera 4 orduraino), ordaindutako lizentzietan aurrerapen nabarmena egitea, subrogazioa kolektibo jakin batzuetara zabaltzea, LGTBIQ kolektiboko pertsonak sexu-jazarpenaren eta sexuan oinarritutako jazarpenaren aurkako protokoloan sartzea… Bizkaiko metaleko langileentzako akordio oso positiboa osatuz.

Hori guztia sektoreko milaka langileren borrokaren eta konpromisoaren emaitza izan da. Patronalaren lehen asmoa hitzarmena berriro lurperatzea zen. Ezin izan zuen halakorik egin, eta, ondorioz, FVEMn negoziazioan elementu atzerakoiak sartzen saiatu zen (malgutasuna handitzea, gutxieneko bermea kentzea, bajen soldata osagarriak okertzea…), bai eta Bizkaiko metaleko langile-klasea pobrezia egoerara kondenatzen zuten soldata-igoerak ere. Grebalarien borrokak, beste behin ere, patronalaren planak zapuztu ditu, eta patronala akordio batera behartu duen egoera ahalbidetu du.

Oso harro gaude sektorean egindako borrokaz zein lortutako akordioaz, eta borrokak beti merezi duela azpimarratu nahi izan du.

Gogor salatzen dugu gas lakrimogenoaren erabilpena gaurko Baionako manifestaldiaren bukaeran

Zubiate(e)ko Aritz
-
0
Gogor salatzen dugu gas lakrimogenoaren erabilpena gaurko Baionako manifestaldiaren bukaeran

Frantziako poliziak Macronen erretretaren erreforma bidegabearen aurka mobilizatu diren manifestariak gasatu ditu Baionan. Manifestazioan haur, adindun edo mugikortasun urriko persona asko presente ziren.

LABen ustez onartezina da gertatutakoa: “Gure karriketan segurtasun eta lasaitasun osoz, lankideen eta lagunen artean, familian manifestatzearen eskubidea defendatzen dugu, poliziaren aldetik gero eta gehiegizkoagoa den indarkeria jasan gabe”.

Manifestazioaren ondoren, polizia frantsesak hainbat atxiloketa egin ditu bortizkeria handia erabiliz. Gainera, Baionako AEKren lokalan sartu eta miatu dute manifestarien bila. Hori ere onartezintzat jo du sindikatuak.

Horregatik guztiagatik, LABek sostengua adierazi die gasatuak eta atxilotuak izan direnei, baita AEKko langileei ere.

Gaur, arratsaldeko 18:30tan, Baionako komisaldegiaren aurrean izanen den elkarretaratzera dei egin du LABek: “Macronen munduaren aurka mobilizatzen segi dezagun! Segi dezagun borrokan!”

1...246247248...1,584Page 247 of 1,584

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus