Sindikatuko ordezkariak Gasteizko Legebiltzarrean egon dira dekretuari buruzko eztabaida bertatik bertara jarraitzen.
EAEko Jaurlaritzak berriki ateratako dekretuan gauerako ratio berri bat ezarri du, eta nahikoa izan gabe jarraitzen du. LABetik gaueko ratio zehatz eta espezifiko bat aurkeztu genuen, 15 egoiliarreko bi langile egon behar zirela aldarrikatzen zuena. Erizaina 24 orduz bermatua egon beharko zela ere jasotzen zuen, gaua barne.
Sektorean, enpresa gehienetan langile bakarra dago 30 egoiliar baino gehiago zaintzeko. Hori jasanezina eta onartezina da. Zaintza duin baterako sektorean langile gehiago behar dira, eta adinduen egoitzetako gaueko egoera kezkagarriaren aurrean instituzioek erantzukizun handia dute.
Arabako, Bizkaiko eta Gipuzkoako gobernuak ateratako dekretu berriaren aurrean honako hau adierazten dugu:
Salatzen dugu:
– Dekretuak ez dituela ez langileen ez egoiliarren lan eta bizi baldintzak erdigunean jartze, ezta beharrak ere
– Dekretu honek adinekoen egoitzetako pribatizazio eta zaintzarekiko negozioa sustatu eta indartzen du, eta horrek langileongan eta egoiliarrengan dituen ondorio larriak salatzen ditugu.
– Proposatzen den ratio aldaketak ez dio inolako hobekuntzarik ekartzen ez sektoreari, ez egoiliarrei.
– Dekretu hau langileen eta zaintza-sistema gizatiarrago baten alde inplikatuta eta interesatuta dauden kolektibo eta gizarte-eragileen bizkar egin da. Historikoki langileak zein eragile ezberdinek egindako aldarrikapenak ez da jaso.
– Pertsonen arreta zentralizatuan sakontzeko dekretua hobekuntza arkitektonikoei buruzkoa da, eta langileen lan-baldintzak bigarren mailan uzten ditu.
Exijitzen dugu:
– LABek ratio proposamen konkretu bat aurkeztu du, sektoreko langileen zein egoiliarren lan eta bizi baldintzak hobetuko lituzkeena. Gure proposamena mahai gainean jarri eta ratioa hobetzeko konpromisoa eta neurriak hartzea exijitzen dugu.
– Sindikatuak, eragile sozialak eta zaintza sistema gizatiarrago baten aldeko borrokan dauden eragileak kontuan izatea. Aldebakarrez egindako dekretuek, gu guztion parte-hartzerik gabe, ezingo dute hobekuntzarik ekarri sektorera, ezta bertan ematen den zerbitzura ere.
– Zaintza sektoreko langileek egiten duten lan publikoaren aitortza.
– Zaintza sistema publiko komunitarioaren aldeko konpromiso eta urrats errealak.
Honen aurrean, LAB sindikatuak zaintza sistema publiko komunitario eta duinago baten alde borrokan eta antolatzen ari diren eragile eta mugimendu ezberdinekin elkarlanean jarraituko du. Mugimendu feministak deitutako greba feminista orokorrean eta datozen urteetan garatu eta piztu beharreko borroketan burubelarri segiko du.