Greba Feminista Orokorrak badu data: azaroaren 30ean izango da, ostegunez. Joan den martxoan Nazio Biltzarrak —Biltzar Nagusien artean LABen zuzendaritza organo gorena dena— onartu bezala, LABek parte hartuko du Greba Feminista Orokorrean.
Zaintzarena eskubide kolektiboa da, baina zaintza lanak pribatizatuta daude, negozio bihurtu dituzte. Pertsona guztiok ditugu zaintza beharrak, baina ez zaintza duinerako eskubidea bermatua. Eremu pribatuan eta familia nuklearretan sostengatu dira zaintza lanak, emakumeen* bizkar, beti. Halaber, zaintza lanetan diharduten langileek jasaten duten prekarietatea eta esplotazioaren aurrean —etxeko langileena da egoerarik muturrekoena—, lan horiek aitortu, demokratizatu eta duindu egin behar dira.
Egungo gure jendarteak duen arazorik larrienetarikoa da zaintza krisia, erantzunak eskatzen ditu. LABetik zaintza sistema publiko komunitarioa aldarrikatzen dugu eta zaintzaren errealitatea iraultzeko borrokan jarraitzen dugu, orain, azaroaren 30eko Greba Feminista Orokorra ortzimugan hartuta.