2026-01-12
Blog Page 218

Osakidetzako zerbitzuen beste lau pribatizatze-saiakera geldiarazi ditugu

Zubiate(e)ko Aritz
-
0
Osakidetzako zerbitzuen beste lau pribatizatze-saiakera geldiarazi ditugu

LAB sindikatuak beste 4 kanporatze-espediente geldiarazi ditu, eta dagoeneko hamar plegu baino gehiago daude geldirik, 160 milioi eurotik gorako balioarekin, hau da, 2023rako Osakidetzara bideratutako 3.733 milioi euroen %4,28.

Informatika zerbitzuetako zein elektromedikuntzako teknikarien arloan geldiarazitako pleguez gain, azken asteetan pribatizazio estrategian sakondu eta osasun zerbitzu publikoko beste hainbat kategoriatako lana kanpora ateratzeko pleguak geldiarazi ditugu, honako alor hauei eragingo lieketenak: zerbitzuetako langileak, joskintzako lanak, ospitaleko mantentze-lanak eta erradiofisika.

1.- Santa Marina Ospitaleko sukaldeko ostalaritza-makinetarako laguntza teknikoa eta berrikuspenak; 2.430.540€ (mantentze-lanetako ofiziala)

2.- Santa Marina Ospitalerako ikuztegi eta joskintza zerbitzua; 3.026.700€ (zerbitzuetako eta joskintzako langileak).

3.-Ikuzketa zerbitzua Ezkerraldea-Enkarterri Gurutzeta Erakunde Sanitario Integratuaren lehen mailako arretan; (544.242,78 €) (zerbitzuetako langileak)

4.- Osakidetzako laguntza-sareko zentroetako erradiodiagnostikoko instalazioen segurtasunaren eta kalitate-irizpide normalizatuen arloko ebaluazioetarako zerbitzuak; 1.094.400 € (Ospitaleko erradiofisikoa).

Sagarduik eta Urkulluk jarraitzen duten bitartean herritarrei esaten Osakidetzan pribatizaziorik ez dagoela, LAB sindikatuak 160 milioi euro gerarazi ditu azken urtean. Hala, hainbat profesional erakunde horretan egotea eta bertan jarraitzea arriskuan jartzen zuten kanporatzeak ekidin ditu.

LABen esanetan, Osakidetzan asko pribatizatzen ari da, eta, gainera, kontratazio publikoaren legeak ezartzen dituen gutxienekoak bete gabe egiten saiatzen dira askotan. Horrek agerian uzten du sailak dituen baliabide ekonomikoak kudeatzeko orduan arretarik ez dagoela.

Osakidetzako zuzendaritza justifikaziorik gabeko gastuak egiten ari da pribatizazioa bultzatzeko; esaterako, LAB inpugnatzen ari den pleguak aurrera ateratzeko aholkularitza juridikoaren kontratatzea. Kontratazio horrek, halaber, mespretxatu egiten ditu orain arte zeregin horietaz arduratzen ziren Osakidetzako profesionalak, eta, gainera, Osakidetzaz kanpoko erakunde batean inpugnatzeko aukera ematen duen atalasera iristen ez den prezioarekin egiten du. Hala ere, sindikatu honek, berraztertzeko errekurtso baten bidez ere errekurritu du.

Hau da, Osakidetzan asko pribatizatzen da, eta Osakidetzako zuzendaritzak ez du inolako asmorik erakusten pribatizatu beharrean zerbitzuak bere gain hartzeko. Aldiz, LAB ari da pribatizazio horiek geldiarazten, plantillari kalte baino ez diote egiten eta. Bada, zuzendaritzak kanpoko aholkulari juridikoak kontratatzen ditu, Osakidetzak LABen ekintza sindikala saihesteko nahikoa baliabide juridiko ez balu bezala.

Ahalegin handia egiten dute osasun publikoa suntsitzeko, eta baliabide guztiak erabiltzen dituzte enpresa pribatuetara bideratzeko lanok Osakidetzako lankideek primeran egin ditzaketenean.

Premiazkoa da Osakidetzaren kudeaketa aldatzea, hura indartzeko asmoarekin, dituen baliabideen eraginkortasuna eta optimizazioa handitzeko. Osakidetzako zuzendaritzak pribatizazioaren bidea utzi behar du eta kontratazioa sustatu behar du kanpora ateratzen saiatzen ari diren zeregin horiek Osakidetzako langile publikoek egiteko.

Sindikatuok mobilizatzen hasiko gara Nafarroako Optiken Merkataritzako hitzarmenean eros-ahalmena bermatu eta lanaldia murritz dezaten

Zubiate(e)ko Aritz
-
0
Sindikatuok mobilizatzen hasiko gara Nafarroako Optiken Merkataritzako hitzarmenean eros-ahalmena bermatu eta lanaldia murritz dezaten

Nafarroako Optiken Merkataritzako hitzarmenari buruzko azken bileran, iragan maiatzaren 30ean egina, LAB, ELA eta UGT sindikatuok ultimatuma eman genion patronalari, hau da, mobilizazioei ekinen geniela abisatu genuen, baldin eta enpresek egungo proposamenari eutsiz gero. Bada, patronala mugitu ez denez, ortzegun honetan, ekainaren 22an, eguerdian, bi elkarretaratze eginen ditugu Iruñean, erreferentziazko bi optikaren aurrean.

12:30ean Optika Rouzaut-en aitzinean, Txapitela 21ean, eta 12:45ean Optika Alforjaren parean, Udaletxeko plazan. Horiek dira LAB, ELA eta UGT sindikatuok KPIri lotutako soldata igoerak bermatuko dituen eta lanaldia murriztuko duen hitzarmen duina eskatzeko eginen ditugun lehenengo bi mobilizazioak.

Optiken Merkataritzako lan hitzarmena negoziatzen duen mahaia hainbat aldiz elkartu ondoren, bertan parte hartzen ari garen hiru sindikatuok patronalari proposamen bateratu bat egin genion, jakinarazteko akordioa sinatzeko gure gutxieneko puntuak zein diren.

Soldatetan KPI bermatzea da gure helburua, gutxienez iraunaldian. Beraz, maiatzaren 9an egin ziguten proposamen ekonomikoari gehitu behar zaio soldata erregularizazio bat, 2021ean eta 2022an galdutako eros-ahalmena konpentsatzeko. Sindikatuok hitzarmena sinatzeko proposamena hau litzateke:

• 2022. urtea: %3,5

• 2023. urtea: %5

• 2024. urtea: 2023ko KPI

• 2025. urtea: 2024ko KPI

• 2026ko urtarrilaren 1ean soldata tauletan %3,2ko igoera aplikatuko litzateke (soldata igoeren eta 2021- 2025 bitarteko KPIen baturaren arteko aldea)

Bertze puntu garrantzitsu bat da lanaldiaren murrizketa; azken hamabortz urteetan ez da ordu bakar bat gutxitu. Orain zortzi orduko jaitsiera nahi dugu. Langile bakoitzak urtean jaiegun bat gehiago izateak enpresendako ez du zuzeneko kostu ekonomikorik eragiten, ez baitute ordezkapenik eginen.

Azkenik, soldatarik apalenak dituzten kategoriak (I. eta II. Taldeak) desagertzea proposatzen dugu; horrela sektoreko gutxieneko soldata hilean 1.400 euro gordinekoa izanen litzateke; larunbat arratsaldeko plusa hobetu behar da; eta hitzarmenaren aurreraeragin mugagabea ezarri.

Gipuzkoako Odol Bankuan karrera profesionalaren inguruan adostutakoa betetzea eskatzen dugu

Zubiate(e)ko Aritz
-
0
Gipuzkoako Odol Bankuan karrera profesionalaren inguruan adostutakoa betetzea eskatzen dugu

2009an, Gipuzkoako Odol Bankuko langileek, Transfusio eta Giza Ehunen Euskal Zentroaren Fundazioa, akordio bat sinatu zuten enpresako zuzendaritzarekin, garapen edo karrera profesionala aitortzen ziena (zituzten hirurteko batzuen truke), gainera, gerora Osakidetzan egingo ziren ziren deialdi bakoitzarekin lotzen zen.

Harrezkero, Osakidetzak bi deialdi egin ditu, eta, gaur egun, Fundazioko patronatukideek (Osakidetza, EAEko Administrazio Orokorra, Gipuzkoako Foru Aldundia eta Odol Emaileen Elkartea) ez diete langileei deialdirik egin, eta bere garaian sinatu zutena ordaindu gabe jarraitzen dute.

Langileek diote nazkatuta daudela egoera honetaz. Hala eta guztiz ere, erantzukizunarekin eta erantzukizunetik lan egiten jarraitzen dute, ulertzen dutelako lan publikoa eta funtsezkoa egiten ari diren langileak direla.

Beraz, Fundazioko kide eta nagusiei eskatzen diete gatazka hau konpontzeko euren aldetik behar dena jar dezatela, eta behingoz bete dadila bere garaian bi aldeek adostutakoa.

Politika eta jarduera instituzional arrazistarik ez. Mantero izatea ez da delitua, lana baizik

Zubiate(e)ko Aritz
-
0
Politika eta jarduera instituzional arrazistarik ez. Mantero izatea ez da delitua, lana baizik

Ekainaren 18ko igande eguerdian, Bilboko Alde Zaharrean, bide publikoan kalez kaleko salmenta egiten zuten langileen aurka Udaltzaingoak eta Ertzaintzak prestatutako neurriz kanpoko aktuazio baten lekuko izan ziren hainbat auzokide eta bertatik pasatzen ziren oinezko.

Top-manta milaka migratu eta pertsona arrazializaturen biziraupen-estrategia bat da. Espainiar estatuko atzerritartasun legeak pertsona hauei enplegua baldintza duinetan lortzea ukatzen die eta ezkutuko ekonomian bizitzera kondenatzen ditu.

Guretzat, pertsona manterak langileak dira, eta eskatzen dugu administrazioak eta toki-erakundeek guztiontzako eskubide, aukera eta baldintza duinak berma ditzatela.

LAB sindikatutik egungo erakundeen politika arrazista eta indarkeria instituzionala gaitzesten ditugu. Politika instituzional horiek polizia-jardunbide desegokietarako baldintzak sortzen dituzte, hala nola neurriz kanpoko operatiboak, gehiegizko indarra erabiltzea edo etnia- eta arraza-profileko kontrolak, Arartekoak berak behin baino gehiagotan salatu duen bezala.

Halaber, operatibo horiek polizia demokratikoaren eta hurbileko poliziaren eredutik aldentzen gaituzte. Sindikatu eta polizia-elementu batzuen mezu segurokrata eta errepresiboa indartzen dute, eta gurea ez den eredu instituzional bati erantzuten diote.

LAB sindikatuak bat egiten du gaur SOS Arrazakeria Bizkaiak eta MBOOLO Manteroen Kolektiboak deitutako elkarretaratzearekin: ekainaren 19an, astelehena, 18:30ean, Bilboko Alde Zaharreko Bidebarrieta eta Victor kaleen kale-kantoian.

Manteroa izatea ez da delitua. Herri-elkartasuna ez da delitua.
STOP jarrera arrazistei. Guztiontzako eskubideak.

Politika eta jarduera instituzional arrazistarik ez

Langileon osasunaren aldeko borroka lantokietara, kalera nahiz Osalan eta NOPLOIra eramango dugu

Zubiate(e)ko Aritz
-
0
Langileon osasunaren aldeko borroka lantokietara, kalera nahiz Osalan eta NOPLOIra eramango dugu

LABeko koordinatzaile orokor Igor Arroyok eta Lan Osasuneko arduradun Inko Iriartek Bilbon emandako prentsaurrekoan jakinarazi dutenez, LAB Osalanen parte hartzen hasiko da ekainaren 29tik aurrera, Eusko Jaurlaritzaren politikaren gabeziak agerian utzi eta langileon osasunaren aldeko neurri zehatzak aldarrikatzeko.

Arroyok azaldu duenez, Osalanen parte hartzen hasteko erabakiak Biltzar Nagusian adostutako bi helburu nagusiri erantzuten dio. Lehenengo helburua, honako hau: kontrabotere ikuspegi batetik langileak antolatu eta Kapitalari eremu guztiak lehiatzea.

Lantokietan, kalean nahiz instituzioetan langileen aldeko politikak aldarrikatu eta borrokatzeko determinazioa dugu. EAEko instituzio nagusiek bizkar eman diote, urte luzez, langileon beharrei, kostu politiko gutxirekin eman ere berriki arte. Gehiengo sindikalaren esku-hartzerik gabe, parte hartze instituzionalerako guneetan jaurlaritzak ez du oposiziorik izan; Osalan eta bestelako erakundeak propaganda instituzionala egiteko erabili ditu.

Aldiz, azken hauteskundeetan ikusi bezala, langileok badugu zer esanik eta eragiteko gaitasunik esparru guztietan, baita esparru instituzionalean ere. Politika publikoetan aldaketak eragiteko, lantokietan eta kalean antolatu eta aktibatzea da dugun bermea. Ildo honetan, borrokaldi oparoa bizi dugu; langileek ahaldundu eta beraien eskubideen alde egiteko prest daudela erakutsi dute. Lantokietan eta kalean bildutako indar hori baliatuko dugu, erakundeetan ere aldaketak borrokatzeko.

LABen bigarren helburua langileon osasunaren aldeko borroka indartzea da. Azken hamarkada luzean ez da egon aurrerapauso esanguratsurik langileon osasunari dagokionean, areago, zenbait alderditan atzerantz goaz. Prekarizazio prozesuak eta prebentzio neurrien ez betetzeak, mutualitateek laneko gaixotasunak eta lan istripuak ezkutatzeko darabilten estrategiak eragin zuzena dauka langileon osasun galeran.

Arroyok salatu duenez, Eusko Jaurlaritzak ez du borondaterik prebentzio legea betearazteko eta enpresariei merkeago ateratzen zaie ez betetzea: “Enpresariak inpunitate osoz ari dira, horrela bakarrik ulertu daiteke, ekidin daitezkeen istripuak ekiditeko neurririk ez hartzea. ‘Aski da!’ esateko unea da. Lantokietan gure osasuna defendatzeko ekintza sindikala indartzera goaz. Kaleko mobilizazioak indartuko ditugu. Eta eremu instituzionalean ere lan osasunari dagozkion politika publikoen gabeziak agerian utzi eta neurri zehatzak aldarrikatzera goaz”.

Inko Iriartek, bere aldetik, LABek Osalanera eta Nafarroako Osasun Publikoaren eta Lan Osasunaren Institutura (NOPLOI) eramango dituen aldarrikapenak azaldu ditu.

Lehenik eta behin, Osalan eta NOPLOIren izaera aldatzea proposatzen dugu: aholkularitza entitate izatetik, babes sozialeko, ikuskatzeko eta prebentzio sistema publiko eta propioa eraikitzeko tresna izatera. Horretarako, lan ikuskaritzaren transferentzia osoa eskuratzea defendatzen dugu, baita lan ikuskaritzaren eta lan osasunaren babeserako egitura publikoen arteko bat egitea ere.

Era berean, Osalan eta NOPLOIeko teknikariek ahalmen exekutiboa izatea eta prebentzio legearen arau hausteak detektatu eta zigortzeko profildun ikuskarien kopurua esponentzialki handitzea (Bizkaian 100, Gipuzkoan 50, Araban 25 eta Nafarroan 50) proposatzen du LABek. Ikuskatze lana bereziki indartu beharra dago honako sektore hauetan: basogintza, eraikuntza (alturatik erorketak), industria (makina-erraminta) eta sektore feminizatuak (gaixotasun psikologiko eta muskuloeskeletikoen kontrola, izugarri hedatzen ari direnak). Lan osasunean genero aldagaia aintzat hartzea ezinbestekoa da.

Bestalde,mutualitateen nahiz prebentzio zerbitzuen jardunbide txarrak ezabatzeko mediku-ikuskapenak burutzea eskatzen dugu, baita laneko gaixotasunen jarraipena egiteko erregistroa sortzea ere.

Azkenik, hildakoak eragin dituzten edota larriak izan diren la- istripuetan zein laneko gaixotasunez hildakoak dauden enpresetan prebentzio neurri eza dagoela ebatziko balitz, NOPLOIk eta Osalanek fiskaltzaren esku jarriko dute duten informazio guztia eta dagokion kasu penalean aktiboki parte hartzeko konpromisoa eskatuko du LABek.

Norabide horretan eragiten hasteko, konpromiso baten berri eman du Iriartek: Osalanen parte hartzeagatik LABek jasoko duen diruarekin funts bat sortuko du, lan istripuen eta laneko gaixotasunen ondoriozko prozedura penalak indartzeko erabiliko dena: “Bada ordua inpunitatearekin amaitzeko, ardurak eta erantzunkizunak argitzeko”.

Irati Tobar: “Hezkuntza Legeak trantsizio fase bat ahalbidetu behar luke”

Zubiate(e)ko Aritz
-
0
Irati Tobar: “Hezkuntza Legeak trantsizio fase bat ahalbidetu behar luke”

Hezkuntzan gaurkotasun betekoak diren hainbat gai aletu ditu Irati Tobar LABeko Irakaskuntzako arduradunak, Naiz Irratian egin dioten elkarrizketan; nagusiki, Hezkuntza Legeari dagozkionak. Lege aurreproiektua hizpide hartuta, ereduari dagokionez hobetzeko asko duela nabarmendu du Tobarrek. Legeak “lurraldetasua, Euskal herriaren aitortza” jaso behar lukeela defendatu du, baita Euskal Herriak bere hezkuntza propioa eratzeko duen eskubidea ere: “Zergatik ez baliatu legea hezkuntza eskumenetan sakontzeko?”

Bestalde, LABek euskal hezkuntza zerbitzuari “publiko” abizena jarri izana ez duela ontzat jotzen berretsi du Tobarrek. Publikoak titularitate publikoa dutenak direla adierazi du, nahiz eta badiren izaera publikoa dutenak ere; ikastolak, kasurako. Halaber, “ituntze unibertsala pixkanaka mugatzeko” neurriak eskatu ditu, eta gaineratu, diru publikoa jasotzen duten ikastetxeen betekizunak “zorroztu” egin beharko liratekela, baita betekizun horiek ez betetzeak izan beharko lituzkeen ondorioak ere.

Edozein kasutan, legeak “trantsizio fase bat ahalbidetu” behar lukeela azpimarratu du Tobarrek, LABek jomugan duen sare publiko, bakar eta deszentralizaturako bidean. Bide horretan, sindikatuaren beste proposamen bat ere gogoratu du: titulartasun partekatuko ikastetxeak sortzea. Administrazio publikoak ikastetxeen titulartasunean parte hartzeak “kontrol publiko hobea” egiteko aukera ekarriko lukeela nabarmendu du.

Ereduari buruzkoak ez ezik, hezkuntzako langileen baldintzen ingurukoak ere izan ditu hizpide Tobarrek. Eusko Jaurlaritzaren Hezkuntza Sailarekin erdietsitako akordioak ezarritako oinarriak gogoratu ditu, betiere, zehaztuz ondoren mahai negoziatzaile bakoitzera eraman beharko direla akordio orokor horretan jasotakoak. LABek Hezkuntza Legearen eztabaida hasi zenetik heldu dio lan baldintzen gaiari, eta horrekiko “arduraz” jokatu duela esan du: “Esaten genuen, ereduaz gain, lan baldintzetan ere emaitzak behar genituela, eta lorpenak behar genituela. Horrek ez du kentzen ereduari begira bataila batzuk ez ditugunik, izan euskalduntzeari dagokionez, eskola publikoa erdigunean jartzeari dagokionez, laikotasunari dagokionez nahiz lurraldetasunari dagokionez”.

Hemen entzun daiteke elkarrizketa, osorik: https://irratia.naiz.eus/eu/info_irratia/20230616/hezkuntzan-egun-dugun-ituntze-sistema-unibertsala-mugatzen-joan-behar-da

Michelin Lasarteko enpresa batzordeak grebei berrekin die eta zuzendaritzak negoziazioak berrabiaraztea premiazkotzat jotzen du

Zubiate(e)ko Aritz
-
0
Michelin Lasarteko enpresa batzordeak grebei berrekin die eta zuzendaritzak negoziazioak berrabiaraztea premiazkotzat jotzen du

Gaur, hilak 16, txandakako grebak abiatuko dituzte, asteburu osoan zehar gauzatuko direnak. Astelehean, berriz, greba eguna izango da lantoki osoan.

Asteartean zentroarteko hitzarmenaren negoziazioen baitan Enpresa Zuzendaritzak egindako mugimenduen eta mugimendu horiek Lasarteko lantegiko langileen artean sortu duten ikusminaren harira, Enpresa Batzordeak honako hau adierazi nahi du:

  1. Enpresak egindako eskaintzak SOILIK zentroarteko eremuari eragiten diola. Oraintsu arte Enpresa Batzordeak EZ du Michelineko Zuzendaritzaren bilera deialdirik jaso, eta beraz, gaur-gaurkoz Michelinek Lasarteko langileei dagokienez egiten duen hitzarmenerako eskaintza maiatzaren 23an egin zuen berbera da.
  1. Ez ditugu ezagutzen Michelingo Zuzendaritzak Lasarteko Hitzarmenaren Negoziazio Mahaia deitu ez izanaren arrazoiak. Nolanahi ere, Lasarteko Enpresa Batzordeak, maiatzaren 23az geroztik bezala, Negoziazio Mahaian eserita jarraitu du Enpresako Zuzendaritzak negoziazioak noiz berrabiaraziko zain. Zentzu horretan, Enpresa Zuzendaritza deitu genuen komitetik Mahai Negoziatzaileraren bilera batera, gaur, ostirala, 12:00etan. Bada, enpresak jakinarazi digu ez dela agertuko eta datorren astearterako deitu gaitu, 9:00etan.

Gauzak horrela, Lasarteko Enpresa Batzordeak gogorarazi nahi du gaur, ostirala, 2Rko gaueko txandan hasi eta ekainaren 19an (astelehena) amaituko den bigarren greba-deialdia hasi dela. Mobilizazioetan batasunari eusteko garrantzia azpimarratu nahi dugu, bermedun hitzarmen bat lortzeko hurrengo urratsa eman dezagun.

  • GREBA DEIALDIAK

Ekainak 16, ostirala: 2R Taillerra C Txandan

Ekainak 17, larunbata: MAT/SF, CAP A Txandan.

Ekainak 18, igandea: Gainbegirale eta Galdarak C Txandan

Ekainak 19, astelehena: GREBA EGUNA LANTOKI OSOAN

  • MOBILIZAZIO DEIALDIAK

Ekainak 16 eta 17: Lantoki atarian greban den txanda hasiera baino ordu bete lehenago.

Ekainak 19: Lantoki atarian elkarretaratzea goizeko 05:00etan hasita.

Goizeko 9:30ean kotxe karabana Donostiarantz, lantokiko ataritik.

Lantoki atarian elkarretaratzea 13:00etatik 14:30era.

18:00etan manifestazioa Lasartetik. Irteera eta helmuga lantokiko atarian.

Lantoki atarian elkarretaratzea 21:00etatik aurrera

Dei egiten diogu Eusko Jaurlaritzari EAEko ikastetxeetako jangeletako eta eskola-garraioko langileen lan-baldintzak hobetzeko

Zubiate(e)ko Aritz
-
0
Dei egiten diogu Eusko Jaurlaritzari EAEko ikastetxeetako jangeletako eta eskola-garraioko langileen lan-baldintzak hobetzeko

Ekainaren 2an iragarri genuen hezkuntza eremu osoko langileen lan baldintzak hobetzeko oinarrizko akordio bat lortu genuela EAEko Hezkuntza Sailarekin, arlo honek behar dituen eraldaketa sakonak ezinezkoak baitira langileak aintzat hartu gabe. Akordio horretan aintzat hartzen ziren hezkuntzan azpikontratatuta diharduten langileak ere. Zehazki jasotzen da jangela ereduaren inguruko azterketa egiteko konpromisoa, baita hau langile publikoekin betetzeko aukera aztertzekoa ere.

Lan-baldintzei buruzko akordioan jasotako edukiak mahai sektorial bakoitzean garatu beharko dira. LAB sindikatua lehen indarra da Eusko Jaurlaritzako Hezkuntza Sailaren mendeko jangeletan eta eskola-garraioan. Horregatik, LAB prest dago jangela ereduari eta bertako eta eskola-garraioko langileen lan-baldintzei buruzko hausnarketa- eta negoziazio-prozesuari ekiteko.

Jangelak ezinbesteko espazio hezitzaileak dira gure haur eta gazteentzat. Elikadura osasuntsu eta gertuko baten alde ezinbesteko da esku pribatuetatik askatzea, bai eta egun dauden ratioak berraztertzea ere.

Egungo jangela ereduak ez ditu asetzen haurren elikadura beharrak eta gainera, langileak egoera prekarioan ditu, eta hori haurrek ere nozitzen dute. Egungo eredua sostengaezina da beraz, eta bistan da eraldaketa bat beharrezkoa dela. LABetik ez gara Hezkuntza Sailak egiten duenaren zain geratuko, baditugu gure proposamenak akordioan jasotako konpromiso hori gauzatzeko. Hezkuntza Sailari aurkeztuko dizkiogu eta negoziazio mahaietan defendatuko ditugu, eta beharrezkoa denean ekintza sindikala aktibatuko dugu.

Beraz, LAB sindikatuak dei egiten dio Hezkuntza Sailari ondorengo gaiei heltzeko:

Jangeletan

  • Jangela hezkuntza-gune bihurtu behar da, eta, horretarako, beharrezkoa da ikastetxe bakoitzaren hezkuntza-proiektuan sartzea.
  • Langileen hezkuntza-lana aitortzea.
  • Indarrean dauden araudiak aldatzea:2000ko martxoaren 22ko Agindua, EAEko unibertsitateaz kanpoko ikastetxe publikoetako jangelak arautzen dituena derrigorrezko hezkuntzan eta Haur Hezkuntzan.
  • Ikastetxeko erabaki-organoetan parte-hartze aktiboa izatea, ikastetxeko gainerako langileek bezala.
  • Administrazio eta Zerbitzuen sailburuordearen zirkularra, kudeaketa zuzeneko jangelen funtzionamenduari buruzkoa (ratioak, funtzioak, lanaldiak, jangela-ordutegia…).
  • Itunpeko ikastetxeetako eta ikastoletako jangeletako langileen eta sare publikoko jangeletako langileen soldatak parekatzea.
  • Kudeaketa-eredu berria (ez bakarrik kudeaketa zuzena), langileak zuzenean Hezkuntza Sailekoak bihurtuz (birmoldaketa).

Eskola-garraioan

  • Indarrean dagoen araudia aldatzea. Zehazki, 69/2015 Dekretua, maiatzaren 19koa, EAEko unibertsitatez kanpoko ikastetxe publikoetako ikasleen eskola-garraioari buruzkoa, hezkuntza-arloan eskumena duen sailak finantzatua.
  • Araudian autobuseko langileentzat eta patioko zaintzaileentzako ratioak sartzea.
  • Ikastetxeko erabaki-organoetan parte-hartze aktiboa izatea, ikastetxeko gainerako langileek bezala.
  • Itunpeko ikastetxeetako eta ikastoletako langileei sare publikoko ikastetxeetako langileen gutxieneko lan-baldintzak aplikatzea.

LABen ustez, orain inoiz baino beharrezkoagoa da Eusko Jaurlaritzako Hezkuntza Sailaren eta sindikatuen ordezkaritzaren arteko elkarrizketa-prozesuari ekitea, aurreko puntuei eta EAEko Hezkuntza Lege berriari buruzko akordioan jasotakoei ekiteko.

Gorabideko langileak kanpaldia egiten ari dira Bizkaia plazan, zuzendaritzaren eta aldundiaren negoziatzeko borondaterik ezaren aurrean

Zubiate(e)ko Aritz
-
0
Gorabideko langileak kanpaldia egiten ari dira Bizkaia plazan, zuzendaritzaren eta aldundiaren negoziatzeko borondaterik ezaren aurrean

Gorabide elkarteak, adimen desgaitasuna duten pertsonen familiek osatuak, 37 zerbitzu kudeatzen ditu Bizkaia osoan. Enpresa honetan 600 pertsonak lan egiten dugu eta aniztasun funtzionala pairatzen duten ia 5000 lagun artatzen ditugu.

Gorabideko Zentro Arteko Batzordeak Gorabideko eta Bizkaiko Foru Aldundiko arduradunei leporatzen die egungo gatazkaren errudunak izatea.

Aldundiaren arduragabekeria, blokeo horri eutsita, oso larria da. Agerian geratzen da zeinen gutxi axola zaien zerbitzu publikoen kalitatea, eta are gutxiago axola zaie zaintzen ditugun pertsonen eta haien senideen egoera.

Duela 20 egun baino gehiago, negoziazioaren desblokeoa errazteko proposamen berri bat helarazi genion Txema Francori, Gorabideko gerenteari. Gaur egun, Gorabideko Zuzendaritzak ez du erantzunik eman, eta ez da Enpresa Batzordearekin ezer negoziatu. Gorabideko gerentea negoziatzeko gaitasunik eza eta nagusikeria baino ez da erakusten ari. Hala, Hitzarmenaren negoziazioari heltzeko oztopo bat da.

Elixabete Etxanoberi bilera eskatu diogu idatziz, baina ez dugu erantzunik jaso. Publikoki eskatzen dizugu harrera egin diezaguzula, gure egoera eta proposatzen ditugun konponbideak zuzenean entzun ahal izan ditzazun.

Bizkaiko Foru Aldundia salatzen dugu aniztasun funtzionala duten pertsonen zaintzaren kudeaketan sistema gaiztoa ezartzeagatik. Aldundiko arduradun politikoei gogorarazten diegu zerbitzu hori bermatzeko ardura beraiek dutela. Bizkaiko Foru Aldundia da, diru-bilketa errekorra izanik, emakume langileen erosteko ahalmena bermatzeari uko egiten diona. Egun erosahalmenaren galera gure soldataren 13,49% da. Txiroagoak eta prekarioagoak izatea, horixe da proposatzen digutena. Gainera, zerbitzuaren kalitatea okertzen ari da, gero eta tresna gutxiago baitaude heziketa-laguntzarako.

Agerian geratzen da ez Aldundiak, ez Gorabideko gerentziak, ez dutela konponbiderik bilatu nahi. Horregatik, 48 orduko etengabeko mobilizazioa egiten dihardugu Gorabideren egoitzaren aurrean. Gorabideren eta Bizkaiko Aldundiaren jarrera arduragabea mantentzen bada, mobilizazioak areagotuko ditugu eta greba mugagabea deitzea baloratuko dugu.

1...217218219...1,583Page 218 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLÍTICA DE PRIVACIDAD

www.lab.eus