Gaur, urtarrilak 17, Getxoko epaitegietan deklaratzera deitu dituzte Alconzako bi grebalari, enpresaren etorkizuna defendatzeko eta Irizar-Alconzak egindako kaleratzeen aurka egindako borrokagatik. Horren aurrean, LABek 2 orduko lanuztea egin du Berangoko lantegian, eta baita elkarretaratzea ere Getxoko epaitegien aurrean, deituak izan diren lankideei babesa emateko.
Bi langileek aurre egin behar dieten akusazioak itxurazko kalte-delitu bati buruzkoak dira. Greba amaitu zenetik, 5 prozedura ireki dira 6 langileren eta LABeko kide baten aurka, eta baita hainbat zigor-espediente ere.
Mendeku eta errepresio dinamika honen helburua da lan-baldintza duinen alde eta enpleguaren defentsan langile klaseak egindako edozein borroka kriminalizatzea, 2019an eta beste gatazka batzuetan gertatu zen bezala.
LABetik, langileek lanpostuen defentsan egindako mobilizazioetan parte hartu zutenen aurkako jazarpena salatzen dugu, eta Irizarri mendeku eta errepresio dinamika alde batera uzteko eta egindako salaketa guztiak eta zigor guztiak behingoz kentzeko eskatzen diogu.
Horregatik guztiagatik, LAB sindikatuak dei egin du lantegian 2 orduko lanuztea egitera eta Getxoko epaitegien aurrean elkarretaratzera, deituak izan diren lankideei babesa emateko, prozesu judizial guztiak bertan behera uztea eskatzeko eta borroka sindikala delitua ez dela aldarrikatzeko.
LABek egoera salatzen eta mobilizatzen jarraituko du Alconza-Irizarrek irekitako zigor eta prozesu judizial guztiak kendu arte.
LAB, CGT, Steilas, ESK, EHNE eta Hiru sindikatuok elkarretaratzea egin dugu gaur Iruñean, Nafarroako Gobernuaren egoitza nagusiaren parean, duela bi egun Arriben altueratik erorita zendu zen langilearen heriotzagatik protesta egiteko. Gauza da gaur berean bertze langile bat hil dela Cadreitan eta atzo bertze bat hil zela Funesen, beraz, dagoeneko lau langile direla urtarrilaren 10etik 17ra Nafarroa Garaian hil direnak. 2023an 12 izan ziren denera.
2024. urteak, dagoeneko, sei hildako utzi ditu Euskal Herrian, horietako lau Nafarroan. Azken urteetan Nafarroak lan istripuetan marka guztiak apurtu ditu eta badirudi joerak ez duela etenik. 2023an Nafarroan 26.360 lan istripu izan ziren (baja gabeak + bajadunak + larriak).
Izan ere, patronalak inpunitate osoz egiten dio muzin lan osasuneko araudiari. Aliatu estrategiko bat baitu horretan, Nafarroako Gobernua, zeinak ez baitu bitartekorik jartzen araudia betearazteko. Eta horren ondorioa urtetik urtera ikusten ari gara: lan istripu andana eta heriotz ugari.
Hobe luke Maria Txibiteren gobernuak ikuskatzaile gehiago kontratatzea patronala kontrolatzeko, eta ez milaka eta milaka euro xahutu prebentzio lurralde delegatua bezalako figuretan, zeinak enpresei araudia betearazi beharrean “xumeki gonbidatzen ditu” lan osasunerako araudia bete dezaten. Gogoratzekoa da badirela 28 urte Europan derrigorrezkoa dela araudi horiek betearaztea. Berandu dabiltza.
Arribeko heriotzaren gibelean badira arduradunak. Eta arduradun horiek badituzte laguntzaileak, konplizeak. Eta horiek guztiek erantzun beharko dute inoiz. Soilik langileria antolatuak irauliko du egoera hau. Lantokietan antolatzen jarraitu behar dugu, gero eta indar gehiago izateko, eta patronalari gauzak gero eta zailagoa jartzeko, Gobernuak babesten duen inpunitate hori behingoz buka dakion.
Nutec Procal Berrizko Eitua poligonoan dagoen eta 50 langile inguruko plantilla duen enpresa da, eta bertako langileek kimikako estatu-hitzarmenean zehaztutako lan-baldintzak dituzte. Bertan ohikoa da ABLE bidezko kontratazioak egitea egiturazko lanpostuetarako, asko luzatzen direnak, batzuk urteetan. Egoera horren aurrean, langileek grebak hasi dituzte.
Enpresarekin hainbat aldiz saiatu dira negoziatzen, lan- eta soldata-baldintzak hobetzeko barne-itun bat sinatu ahal izateko, baina langileek zuzendaritzaren ezezkoa baino ez dute jaso, eta honek okertu ere egin du hasierako proposamena.
Orain arte, nahikoa ez zen igoera baino ez zuen eskaintzen enpresak, eta ez zuen lan-baldintzak estatalizatuta eta nahiko prekarizatuta dituzten langileekin beste hobekuntzarik negoziatu nahi. Are gehiago, hasierako eskaintza baino okerragoa egin du plantilla mobilizatuko zela jakitean, bere benetako aurpegia erakutsiz eta enpresak planteatzen dituen baldintzekin nekatuta dauden langileei beldurra sartu nahian.
Atzo egin zuten lehen greba eguna langileek, hainbat hilabetez itun bat negoziatzen saiatu ondoren, erosteko ahalmena bermatuko dien igoera bat eta ABLE bidezko kontratuen luzapena mugatzea lortzeko, langile horiek urteak baitaramatzate horrela kontratatuta, eta lanpostu estruktural eta finkoetan ari baitira lanean.
Ordezkaritza sindikal osoa LABek osatzen du, eta borroka proposamena egin zien irabazi handiak dituen eta, Estatuko hitzarmenaz harago, hobekuntzarik proposatzen ez duen enpresako langileei. Langileek irmo erantzun zuten eta %100eko jarraipena izan zuen grebak, enpresari plantillaren kohesioa erakutsiz eta itun duin baten beharra aldarrikatuz.
Adostasunik ez badago, langileek mobilizazio gehiago egingo dituzte. Horrela, bihar, urtarrilak 18, 22:00etan, 24 orduko bigarren greba egunari ekingo diote eta ostiralean, hilak 19, lantegiaren sarreraren aurrean elkarretaratzea egingo dute 07:00etatik 15:00etara. Gainera, urtarrilaren 24tik aurrera, 8 greba egun egingo dituzte, otsailaren 2ra arte.
Joan den ostiralean herritar bat hil zen Laudioko anbulategian bihotzekoak jota, bertan medikurik ez zegoenean. Gaur, mobilizazioa egin dugu bertan, Osakidetzaren kudeaketak arriskuan jartzen gaituela salatzeko.
Era berean, datorren ostiralean, hilaren 19an, Aiaraldean egingo den eskualdeko mobilizazioan parte hartzeko deia egin dugu. 18:30ean izango da, Laudioko Herriko Plazatik, osasun sistema publiko eta duin baten alde.
EHI eta EIB patronalek Ikastoletako mahai-negoziatzailera LABek ekainaren 1ean sinaturiko akordioaren edukiak ekarri dituzte, eta, horrez gain, mahaia desblokeatzeko erosahalmena bermatzen duen proposamena, enplegua mantentzeko edukiak, lan zamei loturiko neurriak zein lizentzia eta baimen gehigarriak. Eremu batean posible dena Gizarte ekimenean posible bihurtu behar dugula uste du LABek, eta, horregatik, mobilizazioekin jarraituko du.
LABek gogora ekarri nahi du ekainaren 1ean Hezkuntza Sailarekin sinaturiko akordioak itunduriko eremuan langile guztien ekiparazioa eta lan-baldintzen homologazioa gauzatzeko neurriak adostea jasotzen zuela. Bada, Ikastoletako kategoria guztietako langileek 2027an langile publikoak jasoko dituzten soldatekin ekiparatzea adostu da. Gainera, 2024an langileon eros ahalmena bermatzen duen igoera jaso da, 2024rako langile guzti-guztiek %15,3ko soldata igoera bat jasoko dutelarik. Ekiparazioa langileen garaipen handia da eta urteroko igoerak gehituz 2027rako %18-20ko soldata-igoerak ekarriko ditu langile kategoria guztietan.
Lan-hitzarmenaren indarraldia 2022-2024 bitartekoa izango dela adostu da, lansarien atalean ekiparazioa 2027 urte arte jasoz. Halaber, azpimarratzekoa da 0-2 urteko hezitzaileen soldata 2 urteko hezitzaileen soldatekin parekatzea jaso dela 2024ko urtarriletik aurrera.
Bestetik, jaiotze-tasaren jaitsieraren aurrean enplegua mantentzeko prozedura jasotzen du akordioak. Akordioaren ondorioz, ondorengo hilabeteetan negoziatu eta adostuko dira euskara eta hizkuntza gaitasuna indartzeko, behar bereziak dituzten ikasleei arreta hobetzeko, hezkuntza berrikuntzan sakontzeko, kudeaketa hobetzeko eta langileen lan zaman arintzeko figura berriak. Eta horrekin batera, 60 urtetik gorako langileen gazte berritze planak gauzatzeko neurri zehatzen azterketa ere.
Bukatzeko, lan-zamak arintzeko neurriak adostu dira Haur Hezkuntzako, Lehen Hezkuntzako eta Bigarren Hezkuntzako irakasleentzat zein hezkuntza laguntza espezialistentzat eta zerbitzuetako zein jarduera osagarrietako langileentzat norberarentzako egun gehigarriak jaso dira.
Gizarte Ekimeneko mahaian aldiz, ikastoletako mahaian lortu bezala esfortzu gehigarri bat eskatzen diegu Kristau Eskola eta AICE-IZEA patronalei, ekiparazioaz gain 2024rako eros-ahalmena bermatzeko eta lan-zamak jaisteko neurri gehigarriak ekartzeko. LABek negoziazioetan aurrera egiteko mahaian eskatu du %15etik gorako igoera jasotzea beharrezkoa dela. Horrekin batera 0-2 urteko hezitzaileen soldata 2 urtekoekin parekatzea jaso behar da.
Bestetik, lan zamak jaisteari begira esfortzu gehigarri bat eta neurri bana eskatzen diegu. Haur eta Lehen Hezkuntzan ordu osagarri batzuk gehiago norberaren lanetarako izan behar dira, DBHn ikastoletako lan-hitzarmenean daukaten ordu-lektibo kopurua ekarri beharko lukete mahaira eta Lanbide Heziketan bikoizketak arautzeko prozedura zein konpentsazio ordu gehigarriak behar dira.
Halaber, enpleguari eusteko neurriez gain birkokapen prozesua era gardenean jasotzeko bermedun prozedura lan-hitzarmenean jaso behar dela ezinbestekoa dela adierazi diegu eta bestelako prozedura bat adostu eta arautu behar dela. Gizarte Ekimeneko ikastetxeetako langileen gatazka desblokeatu eta mahaira eduki gehiago ekartzeko LABek intersindikalean deituriko mobilizazio eta grebei eusten diela adierazi nahi du.
Nafarroako Kontseilu Ekonomiko eta Soziala (KES) Iruñean batzartu da gaur, 2024rako Nafarroako Aurrekontu Orokorren Aurreproiektuari ekiteko. LAB sindikatuak gogorarazi nahi du presio fiskalari dagokionez Nafarroa Europako ligan jokatzetik 8,7 puntura dagoela, zerga gaietan anbiziorik ez duelako. Eta, hain zuzen ere, anbizio falta horrek eragozten du Nafarroak egitea Barne Produktu Gordinaren arabera legokiokeen Europako Batasuneko batezbesteko inbertsioa, eta eragozten du Gobernuak aurkeztu dituen 2024ko aurrekontu hauetan, 700 eta 400 milioi euro gehiago jasotzea, hurrenez hurren, Osasun eta Hezkuntzarako.
LAB zorrotza eta zehatza izaten ari da langileen lan baldintzak hobetzeko neurriak exijitzeko orduan. Hala, Gobernuari eskatzen diogu 2024ko aurrekontuetan lehentasun hauek jasotzea: zahar egoitzetako Nafarroako lehen hitzarmenaren finantziazioa, Osasunbidean eta Navarrabiomeden lorturiko akordioak betetzea eta Nafarroan 1.080 euroko gutxieneko pentsioa bermatzea.
LAB sindikatuak azpimarratu du lehenbailehen erreforma fiskala egin behar dela azken urteotako aurrekontuei eta, jakina, 2024rako Aurrekontuen Aurreproiektu honi benetako aldaketa emateko. Alde horretatik, diru-sarrerak handitu behar dira Nafarroak gaur egun behar dituen funts publikoak indartzeko, haren politikek bat egin dezaten Nafarroako gizartearen gehiengoaren kezka eta beharrekin. Ezin gara Nafarroako eskuinak egindako finantza kudeaketara itzuli, garai hartan Nafarroako kontuak ez baitziren orekatuak.
Gainera, Europak adostutako arau fiskalek 2024. urtean hartuko dute indarra, eta horrek ondorioak ekarriko dizkio Nafarroari, Espainiako estatuak defizit publikoaren mugak bete behar dituelako. Inbertsioa indartu egin behar da, eta ez da une egokia zerbitzu publikoetan eta gizarte-babesean murrizteko, eta ezin zaio aurre egin Europako Batasuneko arau fiskalak betetzeko, herritarrentzako oinarrizko zerbitzuak eta babesak berriz murriztuz. Bada garaia kapitalak, enpresaburuek, hau da, gehien dutenek zerga bidez gehiago ordaintzeko.
LABek egindako azterketaren arabera, Nafarroak Osasunean eta Hezkuntzan BPGaren araberako Europako Batasuneko batez besteko inbertsio bera eginen balu, 2024ko Aurrekontu Orokorren Aurreproiektuak 701.463.727 milioi gehiago jaso beharko lituzke Osasunean eta 393.513.079 milioi euro gehiago Hezkuntzan. Urte luzez behar eta ukatu den inbertsio mailaren dimentsioa ematen duten zifrak dira, eta, era berean, oinarrizko zerbitzu horiek gaur egun dituzten gabeziak eta ahuleziak azaltzen dituztenak, Nafarroako gizartearen gehiengoa kezkatzen dutenak. Bi sektore horietan, gainera, langileek mobilizazio eta greba dinamikak izan dituzte zerbitzu publiko horiek eta beren lan baldintzak hobetzeko.
Gaur goizean, Nafarroako Arriben, 42 urteko langile bat hil da eraikuntzan, altuerako erorketa baten ondorioz. Joan zen astean, Gipuzkoako Aginagan kokatuta dagoen Viveros de mariscos Viuda e Hijos de JerĂłnimo Izagirre enpresan gertatutako altuerako istripu baten ondorioz langile bat oso larri dago. Dagoeneko 2024ak, bere lehen bi asteetan, 4 hildako utzi ditu Euskal Herrian.Â
Urtearen hasiera latzak ohiko joera ziklikoa berretsi besterik ez du egin. Iaz, urtea 58 hildakorekin itxi genuen, aurrekoan baino gutxiagorekin. Aurtengo joera ikusita berriro ere hilkortasun tasaren gorakada baten aurrean geundeke. Istripu guzti hauen atzean neurri prebentiboen eza dago. Segurtasun bitartekorik gabeko altuerako erorketak ohikoak dira gurean.
Nahiz eta altueretako lanek baduten araudi propioa, zorrotza, errealitatean patronalak inpunitate osoz saihesten du langilearen bizitzarako bermeak eskaintzea, araua hautsiz. Honen aurrean administrazioek ez dute nahikoa neurri hartzen eta isunak, istripua gertatu ostean soilik egoten dira, inoiz ez aurretik egondako ez betetzeengatik.
Patronalaren inpunitateak iaz 58 hildako utzi zituen Euskal Herrian, inpunitate honek berak aurten dagoeneko 4 langile erail ditu. Zenbat hildako langile behar ditu patronalak bere diru gosea asetzeko?
Langile klase antolatuak soilik lortuko ditu aldaketa sakonak. Egoera hau salatzeko eta langileriaren elkartasuna adierazteko, datorren asteazkenean, urtarrilaren 17an, mobilizazioa egingo dugu LAB, ESK, STEILAS, EHNE, HIRU eta CGT/LKN sindikatuok, eguerdiko 12:00tan, Iruñean, Gobernuaren egoitzaren aurrean.
Osakidetzan, obra esleipenetan, irregulartasunak atzeman eta frogatzeko aukera izan du LABek. 2022an egindako kontratu txikien esleipen prozedurak aztertu eta hortik ondorio argia atera du: 8.000.000 euro esleitu dituzte legez kanpoko kontratazio prozedura bidez.
“Osakidetzaren ibilbidean izandako jarrera desegoki eta irregulartasunekin liburu mardula idatzi daiteke” adierazi du LABeko koordinatzaile orokor Garbiñe Araburuk. Oraingoan ere praktika orokortua izan da, Araba, Gipuzkoa zein Bizkaiko OSIetan; guztietan atzeman ditu LABek kasuak eta ESIrik zipriztinduenak bi dira: Arabako ESIa eta Gurutzetako Ospitala.
Guztira 380 kontratutik gora (381 zehazki) dira lehiaketa publikorako behar zuketenak eta atera ez direnak (atxikita eranskina) eta esan bezala 8.000.000 euro izan dira zuzenean enpresa jakin batzuri emanak.
Modu batera edo bestera zatikatuak izan dira kontratu txikien laburpena:
Iruzurrezko praktikaren oinarria
LABen Osakidetzako ordezkari den Jesus Oñatek eman ditu zehaztapenak: “Obra, zerbitzu eta horniketarako kontratu txikietan ezarritako kopuruak gaindituz gero, lehiaketa publikoa deitu beharra dago. Esleitu beharreko kopuruak zatituz, lanak lehiaketara ateratzea saihesten dute. Horrek bi ondorio ditu: nahi duten enpresari eman diezaiokete kontratua zuzenean, eta enpresen arteko lehia ekiditzen da kontratuak garestituz. Legez kanpoko kontratazio prozedura horrek arindu eta azkartu egiten du kontratazio lana, baina guztiz legez kanpokoa da eta gainera zuzenean kontratatutako enpresen eta zipriztindutako OSIko zuzendarien eta arduradunen arteko erlazioa ere susmopean jartzen du”.
Iruzurra egiteko bide ezberdinak erabili dira: kontratuak/obrak zatikatuz, obra gremiotan banatuz, zerbitzu diren kontratuak obra gisa bideratuz; jabe berdina duten izen ezberdineko enpresak kontratatuz, eginbehar bererako; xede bera duten kontratuak bata bestearen atzetik kontratatuz…
Legeak ezartzen duena
Kontratazio prozedura horrek kontratazio legearen (9/2017 legea LCSP) sarreraren II. puntuan adierazten diren legearen bi oinarriak hankaz gora jartzen ditu:
“Lege honetan jasotako erregulazioaren oinarri diren helburuak, lehenik eta behin, kontratazio publikoan gardentasun handiagoa lortzea eta, bigarrenik, kalitatea-prezioa erlazio hobea lortzea dira”.
Iruzurrezko praktika batez ari gara, beraz. “Legez debekatua dago argi eta garbi. LCSPren 99.2 artikuluak adierazten du; kontratazio legearen (LCSP) 13.3 artikuluaren aurka egindako obrak dira, hau da, “obra completa” kontzeptua hausten dute eta kontratazio legearen 28.4 artikuluaren aurka egindako kontratuak dira (urtero berritzen diren kontratu txikiak eta batzuetan urte berean berritzen direnak)”, zehaztu du LABeko bozemaleak.
Enpresa eta enpresari berak errepikatzen dira kontratu txiki horien esleipen askotan. Bizkaiko Gurutzetako eta Arabako OSIetan bereziki nabarmena da hori.
“Ikuspuntu ekonomikotik, enpresen arteko lehia ekiditen da, horrek euskal zerga ordaintzaileentzako dakarren galerarekin, eta agerian uzten du Osakidetzako zuzendari eta arduradun jakin batzuren kudeaketa eredua zein den. Gardentasun ezak, gainera, Osakidetza ustelkeriaren susmopean uzten du”, gehitu du Jesus Oñatek.
Kontratu publikoen legeak argi uzten du obra esleipenak zatikatzea ez dela legala. LABek aztertutako kasuetan zatikatzearen beharra arrazoitzen duen zio ekonomiko, organizatibo edo teknikorik ez dago. “Arrazoia bakarra da, enpresa batzuk mesedetzea eta saritzea; gainera, egiteko modu horrek kontrol publikoa saihestea dakar, opakua da, honelako lanak esleitzerakoan beharrezkoak diren publizitate baldintzak saihesten ditu. Hori oso larria da. Larria da, helburu argia duelako”, kritikatu du Aranburuk.
“Ingeniaritza politika da” obrak zuzenean esleitzeko prozedura, “ez dira kudeaketan gertatzen diren hutsuneak, erabaki politikoak baizik”, LABeko arduradunen hitzetan, eta gogor kritikatu du EAJren eredu neoliberal eta klientelarra. “Neoliberala da osasun sistema publikoa ahuldu eta pribatua indartzea duelako helburu. Ez da behar adinako inbertsiorik egiten, eraisten ari dira, bistakoak dira lehen arretan hitzordua lortzeko ditugun zailtasunak, ebakuntzetarako edo espezialistek artatzeko dauden itxaron zerrenda luzeak… Eta, gainera, Osakidetza bertako langileek egin ahal dituzten lanak kanpora ateratzen ari dira”. Eta klientelarra da eredua, “alderdiaren inguruko enpresak saritzen direlako”.
Aranbururen hitzetan, “osasun zerbitzu publikoaren prestigioa, irudia eta zerbitzua kaltetzen ari dena EAJren gobernua da. EAJ kudeatzaile eta zaintzaile ona da negozio pribatuak babestea denean helburua, baina ez zerbitzu publiko indartsuak defendatzerakoan”.
Kontrara, Osakidetzako profesionalek egiten duten lana aitortu eta txalotzen du LABek. “Euren lan baldintzak etengabe kaskartuz joan badira ere, eurak ari dira benetan osasun publikoaren defentsan”.
Urkullu eta Sagarduiri zuzendu zaie Aranburu: “Lehendakariari eta Osasun sailburuari agortu zaie denbora. Alferrik saiatuko dira gertatzen ari denaren ardura langile eta sindikatuon higadura estrategia bati egozten; kritika hori ez da sostengatzen. Langileok eta herritarrak gara osasun zerbitzu publiko duin baten alde egiten dugunak. Aspaldi salatu dugu hau langileok; greba eta mobilizazioak egin ditugu, enplegu publiko gehiago sortzea eta enplegua egonkortzea eskatuz, osasun sistema publikoa indartzea eskatuz, langileen lan baldintzak hobetzea eskatuz”.
Irregulartasunak atzematean horiek salatzen eta osasun sistema publikoaren defentsan jarraituko du LABek.
LABek eta Hezkuntza Sailak itunpeko ikastetxeen soldatak parekatzeko sinatutako akordioa langile guztiei aplikatzea ekarri dute negoziazio-mahaira Kek eta AICEk. Horrekin batera, enplegua mantentzeko eta plantillen esleipen irizpideak zein gazteberritze neurriak adosteko egutegi eta prozedura ekarri dute.
LABek positibotzat jo du azken hilabeteetan egindako mobilizazioei esker KEk eta AICEk proposamen bat egin izana 14 negoziazio-mahairen ondoren. Proposamen hori, orain bi egun aurkezturikoa baino hobea den arren, gaur-gaurkoz, ez da nahikoa honako alderdi hauetan, eta hala jakinarazi diegu patronalei:
Lan-kargak arintzeko neurriei dagokienez, AZLentzat eta irakasle ez diren tituludunentzat soilik egin dute ordu-murrizketa. Gainerako kategorietarako (0-3koak, irakasleak, hezkuntza laguntza espezialistak edo langileak), ez da proposamenik egin.
Soldatei dagokionez, 2027an langile guztiak kategoria guztietan langile publikoekin ekiparatzeko proposamena egin digute. LABen ustez langileon lorpen handia da hau, hala ere, ekiparazioa lortu bitartean 2024rako langileon erosahalmena bermatzeko igoera handiagoa beharrezkoa dugu. Izan ere, patronalek planteaturiko %13ko igoera hori handitu behar da 2024an langileon erosahalmena KPIaren arabera bermatu dadin.
Lanbide Heziketarako, egungo hitzarmena hobetzen ez duen proposamen bat egin dute, bikoizketaren aipamenik ez dute egiten eta lanaldi irregularrari dagokionean eskaintzen dituzten konpentsazio orduak ez dira nahikoak. Gainera, lantokiko prestakuntzarako 6 ordu onartu arren, 2. ikasturterako bakarrik eskeintzen dituzte; egun lehenengo ikasturtean praktikaldiak egiten dira.
Enplegua mantentzeko, langileen plantillen esleipen irizpideak negoziatzeko eta gazteberritze neurri gehigarriak adosteko egutegi eta negoziazio prozedura bat ekarri dute, lan hitzarmenetik kanpo kokatzen dena. LABek Hezkuntza Sailarekin ekainaren 1ean sinaturiko akordioaren garapenaren parte dela adierazten du eta horregatik ondo baloratzen du. Hala ere, puntu honetan zehaztasun gehiago eskatzen dizkio patronalei.
Euskalduntzeko-planak, berdintasun-planak eta arrisku psikosozialen ebaluazioari dagozkien proposamenen inguruan, zehaztapen gehiago ekarri arren, hainbat puntuekin desadostasuna erakutsi diegu.
Patronalen proposamenak Gizarte Ekimeneko ikastetxeetako langileen lan-baldintzak hobetuko dituen hitzarmen berri bat lortzeko negoziazio bidea irekita mantentzen duen arren, urtarrilaren 16rako mahaian eros-ahalmena bermatzeko proposamena, enpleguari eusteko zehaztasun gehiago eta lan zametan neurri gehigarriak ekarri behar dituzte patronalek. LABek lanean jarraituko du hori horrela izan dadin eta mahai negoziatzaileak edukiz bete daitezen. Mahaietako negoziazioen balorazioak uneoro egin eta mobilizazio eta borrokarekin jarraituko du.
