2026-01-02
Blog Page 207

Eusko Jaurlaritzako Hezkuntza Sailari eskatzen diogu ikastetxe publikoetako eskola-jantokiak arautzen dituen 2000ko aginduaren aldaketa negozia dezala

Zubiate(e)ko Aritz
-
0
Eusko Jaurlaritzako Hezkuntza Sailari eskatzen diogu ikastetxe publikoetako eskola-jantokiak arautzen dituen 2000ko aginduaren aldaketa negozia dezala

LAB sindikatuak hainbat eta hainbat aldiz salatu du jendaurrean, jangela publikoak arautzen dituen 2000ko martxoaren 22ko Agindua eta jangela horien funtzionamenduari buruz Hezkuntza eta Zerbitzuen sailburuordeak emandako Zirkularra aldatu behar direla. Horretarako, ezinbestekotzat jotzen genuen Hezkuntza sailburua den Jokin Bildarratzek eta Xabier Aizpurua sailburuordeak langileon ordezkariekin elkarrizketa-mahaira deitzea.

Bada, Hezkuntza Sailak, 23 urteren ondoren, ikastetxe publikoetako jangelak arautzen dituen 2000ko agindua aldatzeko prozedura hasi du, alde bakarrez eta inolako elkarrizketa sozialik gabe. Are gehiago, abuztua aprobetxatu du, zeina sektorearen jarduera eza den, aldaketa egiteko.

Gainera gogorarazi nahi dugu ekainaren 1ean LAB Sindikatuak Hezkuntza Sailarekin sinaturiko “hezkuntza-legea garatzeko langileen lan-baldintzak hobetzeko sindikatuon eta hezkuntza sailaren arteko akordioa”-k jasotzen duela 2023an kontrataturiko zerbitzuen azterketa zehatza burutzeko prozedura, oinarrizko aztergaiak eta irizpideak adostuko direla, jantokiko hezitzaileak lehenetsitako langile kolektiboetako bat izanik. Hortaz, Hezkuntza sailari dei egiten diogu jangelako hezitzaile eta gainerako langileei eragingo dien agindu berria langileon ordezkariokin negoziatzeko.

Jangelak ikastetxeko beste gune bat izan behar du, bertan hezten eta ikasten jarraitzekoa, eta ez zerbitzu osagarri soil bat gehiago. Horregatik, ezinbestekoa da ikastetxe bakoitzaren hezkuntza-proiektuan txertatzea.

Ezin dugu ahaztu agindu horrek zuzenean eragiten diela jangeletako langileen lan-baldintzei; besteak beste, hitzarmen kolektiboan jasotzen diren baino funtzio gehiago beren gain jartzen baititu.

Horregatik, hezkuntza komunitatea osatzen dugun sindikatu zein eragileekin biltzeko eskatzen diogu, Jangela eredu berri baterantz trantsizio adostu bat egin dezagun.

Eros ahalmena berreskuratu eta lanaldia murriztearen alde egingo dugu Arabako aisia hezitzailearen hitzarmenaren negoziazioan

Zubiate(e)ko Aritz
-
0
Eros ahalmena berreskuratu eta lanaldia murriztearen alde egingo dugu Arabako aisia hezitzailearen hitzarmenaren negoziazioan

Gaur, irailak 8, Arabako aisialdiko III. hitzarmenaren bigarren mahai negoziatzailea izan dugu. Mahaia urte honen hasieran eratu bazen ere, gaur arte ez da bilerarik egin, eta gaur bertan adostu dugu sindikatu bakoitzaren ordezkaritza.

Aurreko negoziazioetan egin izan den bezala, LABek hirugarren hitzarmen hau negoziatzeko plataforma bat proposatuko die gainontzeko sindikatuei, honako alderdi nagusi hauek jasotzen dituena:

  • Hiru urteko indarraldia, 2023, 2024 eta 2025.
  • Soldata-igoera, hitzarmena indarrean dagoen bitartean, urteko KPIa eta ehuneko finkoa %2 handituko da urtean, hau da, %6koa indarraldi osoan.
  • 2025ean 1.592 ordura iristeko lanaldi-murrizketa.
  • Opor-egunak 40ra arte igotzea 2025ean.
  • Hainbat hobekuntza hitzarmenean jasotako lizentzietan, bizitza erdigunean jartzera lagunduko dutenak.
  • Bilera intersindikal bat adostu dugu datorren asterako. Gainerako sindikatuekin negoziaziorako proposamen bakarra adosten saiatuko gara, eta patronalari helaraziko diogu, hurrengo mahai negoziatzailea, irailaren 19ean, baino lehen baloratu ahal izan dezaten.
  • Dagoeneko aurreratu dezakegu ez dela negoziazio erraza izango eta, beraz, sektoreko langileen antolaketa ezinbestekoa izango dela aisialdiko hirugarren hitzarmen honen negoziazioarekin lortu nahi ditugun hobekuntzak lortzeko

LAB, alarde publiko, parekide eta bakarraren alde

Zubiate(e)ko Aritz
-
0
LAB, alarde publiko, parekide eta bakarraren alde

LAB sindikatuak, eta bereziki Oarso-Bidasoa eskualdeak, Jaizkibel konpainiarekin bat egin dugu aurten ere. Jaizkibelek 25 urte daramatza Hondarribiko alardean emakumeen* parte hartu dezaten aldarrikatzen, oztopoak oztopo eta borroka eredugarri baten bidez.

LABetik adierazi nahi dugu emakumeen* parte hartze librerik gabeko jaiak ez direla parekideak, ezta askeak ere. Kaleak emakumeenak* ere badira, eta jaietan libre izateko eskubide osoa aldarrikatzen dugu.

Alarde publiko, parekide eta bakarra aldarrikatzen du LABek, eta bide horretan urratsak egiteko eskatu nahi die eragile politiko zein sozialei. Zenbaitek Jaizkibelek jasaten duen mespretxua elkarbizitza arazo moduan aurkeztu nahi badute ere, LABen argi dugu emakumeen* kontrako eskubide urraketa ezin dela modu horretan hartu. Gatazkari konponbidea emateko urratsak eskatzen dizkiegu inplikatutako guztiei, emakumeek* jai horretan libreki parte har dezaten.

Gora alarde parekidea! Gora borroka feminista!

Greba mugagabea abiatu dugu Olazabal y Huarten enpresaren pasibotasunaren aurrean

Zubiate(e)ko Aritz
-
0
Greba mugagabea abiatu dugu Olazabal y Huarten enpresaren pasibotasunaren aurrean

Gaur, irailak 7, 41 langile dituen eta Gasteizen kokatuta dagoen Olazabal y Huarte fundizioko langileek greba mugagabeari ekin diote, lan baldintza duinak eta bidezko hitzarmena eskatzeko. Uztailean 12 egunetako greba egin ondoren, enpresako zuzendaritzak jarrera pasibo bera izaten jarraitzen du, hitzarmenaren negoziazioa oztopatuz.

Horregatik, hainbat negoziazio-saio egin ondoren, eta enpresak ados jartzeko inolako borondaterik ez duenez, langileek greba mugagabea egitea erabaki dute batzarrean. 2021eko soldaten jaitsierak (%15), azken urteetako KPIaren igoerari gehituta, eroste-ahalmenaren galera izugarria ekarri du.

Grebaren jarraipena ia erabatekoa izan da, eta ekoizpena txanda guztietan gelditu dute.

Herritarrei dei egiten diegu laster deituko diren mobilizazioetan parte har dezaten.

Bizkaiko Correoseko garbitzaileek grebari ekingo diote ez dizkietelako soldatak ez ordaintzen

Zubiate(e)ko Aritz
-
0
Bizkaiko Correoseko garbitzaileek grebari ekingo diote ez dizkietelako soldatak ez ordaintzen

Bizkaiko Correosen azpikontrata den Limpiezas J Cordoba enpresako langileek mobilizazioa egin dute gaur Bilbon, LAB, ESK eta CCOOek deituta, enpresak zor dizkien soldatak ordaintzea eskatzeko. Abenduan enpresak zerbitzua bere gain hartu zuenetik, langileek mobilizazioak egin dituzte nominak atzeratu egin dizkietelako eta ez dizkietelako ordaindu. Konpondu beharrean, ez-ordaintzeak bata bestearen atzetik gertatu dira uztaileko eta abuztuko nominekin (aparteko ordainsaria barne), eta, beraz, egoera horren aurrean, bost greba-egun deitu dituzte, irailaren 11tik 15era.


Irailaren 6an langileen asanblada egin ostean, eman beharreko hurrengo urratsak erabaki dituzte, Correosek egoeraren larritasuna serioski har dezan eta enpresa modu irmoan behartu dezan soldatak ordaintzera. Ezinezkotzat jotzen dute da 24 milioi euro baino gehiago mugitzen dituen kontratu publiko batean, langileak kobratu gabe egotea. Salatu dute Correos Limpiezas J. Cordoba garbiketa-enpresari ordaintzen ari dela, diru publikoa dela, eta, beraz, erantzukizunak eskatzen dituzte. Adierazi dute Correosek bilera egin behar duela langileekin eta beharrezko azalpenak eman behar dituela, eta langileei zor dizkieten soldatak, dagokion berandutza-interesarekin, ordaintzera behartu dezakeela enpresa eta ez-ordaintze gehiago ez egotera behartu. Correosek kontratazio publikoaren araudia aplikatu behar duela uste dute langileek, eta azpikontratatutako enpresak betetzen ez badu, kontratua deuseztatu behar diola eta baldintza duinak bermatzen dituen plegu berri bat ate

Langileek salatu dute azpikontratazioak dakartzan egoera hauek lan-prekaritatearen iturri handienetako bat direla, eta, beraz, garaia dela Correosek zerbitzua bere gain hartzeko eta ez diru publikotik etekin handiena ateratzea baino bilatzen ez duten enpresa piraten esku uzteko, langileen eta zerbitzuaren lan-baldintzak prekarizatzearen kontura.

Hori dela eta, greba egingo dute irailaren 11tik 15era bitartean eta egoera premiaz aldatzen ez bada, greba mugagabera joko dutela adierazi dute.

Viveroko adingabeen zentroaren itxiera eta 19 langileren kaleratzearen aurrean, greba mugagabeari ekingo diote langileek irailaren 12tik aurrera

Zubiate(e)ko Aritz
-
0
Viveroko adingabeen zentroaren itxiera eta 19 langileren kaleratzearen aurrean, greba mugagabeari ekingo diote langileek irailaren 12tik aurrera

Galdakaon kokatuta dagoen Vivero adingabeen zentroa Bizkaiko Foru Aldundiaren zerbitzua da eta Emankor Taldearen baitan dagoen Landalan enpresak kudeatzen du. Orain dela urtebete inguru, Landalanek zerbitzua emateari utziko ziola adierazi zien langileei eta baita LABeko 4 ordezkarik eta ELAko 1ek osatutako komiteari ere. Ordutik hona, 50 langile izatetik, 19 langile izatera pasatu dira, kaleratzeak egon dira eta lan baldintzak nabarmen kaskartu dira. Orain, zentroa itxi nahi dute eta langileak kaleratu. Honen aurrean, greba mugagabeari ekingo diote langileek.

Landalaneko zuzendaritzarekin zein zerbitzuaren titularra den Bizkaiko Foru Aldundiaren Gizarte ekintzako buru izan zen Sergio Murillorekin hainbat bilera egin zituzten sindikatuek, komiteko kideekin batera.

Bilera horietan, Landalanek zerbitzua emateko aukerarik ez zuela ikusten esaten zuen, eta Aldundiarekin zuen hitzarmena bukatzerakoan zerbitzua emateari utziko ziola iragarri zuen. Enpresa berriari subrogaziorako datu guztiak emango zizkiola agindu zuen, hitzarmen kolektiboak adierazten duen bezala, baina hau ez dute bete. Ordutik hona, zerbitzua ematearen hitzarmena hainbatetan luzatu dute, eta langileen lan baldintzak kaskartu dituzte; ratio falta, plaza itunduak baino erabiltzaile gehiago eta abar luzea, hilabetez hilabete langileen lan osasuna jokoan jartzeraino.

Gogoan izan behar da Landalan, urteetan zehar sektoreko hitzarmen kolektiboa errespetatu ez duen enpresa dela eta Bizkaiko Foru Aldundiak, hau guztia jakin arren, beste alde batera begiratu duela.

Egoera zaila zela aurreikusita, ekainean, gaur egun Bizkaiko Foru Aldundiaren Gizarte ekintzako burua den Amaia Antxustegi Ziardari eskatu genion bilera bat, baina ez dugu erantzunik jaso. Eta orain, Foru Aldundiak, zentroa itxi eta 19 langile kaleratzea erabaki du.

Bizkaiko Foru Aldundia eta Amaia Antxustegi Ziarda guzti honen erantzule dira, baita Landalan enpresa ere, ia 20 urtez oso lan baldintza gogorretan lanean aritu diren langileak kalean utzi nahi baititu. Errudunak, egoeraren berri izan eta langileei emandako hitza bete ez dutelako, langileei agindu baitzieten zentroa irekita mantenduko zutela. Errudunak, lan zentroa pixkanaka-pixkanaka desegiten ibili baitira. Eta errudunak, langileek zein egoiliarrek salatu duten bizi eta lan egoera kaxkarrak zeintzuk diren urteetan jakin jakin arren beste albo batera begiratu izan dutelako, langileen lan eta bizi proiektuekin jolastuz.

Beste behin ere, argi geratu da publikoak izan beharko liratekeen eta Aldundiaren menpe dauden zerbitzuen pribatizazioak langileen miseria dakarrela. Horregatik, langile zein egoiliarren lan eta bizitza duinen aldeko borrokan, lanpostuen defentsan eta kaleratzeen aurka, mobilizazio zikloa hasiko dute langileak, irailaren 12tik aurrera greba mugagabea deituz. Egun horretan, mobilizazioa egingo dute Bilbon, 11:00etan, Bizkaiko Foru Aldundiaren egoitzaren aurrean.

Urruñako heriotzak agerian uzten ditu langile migranteek jasaten dituzten muturreko prekaritate egoerak

Zubiate(e)ko Aritz
-
0
Urruñako heriotzak agerian uzten ditu langile migranteek jasaten dituzten muturreko prekaritate egoerak

Gaur Urruñan lan istripuz hil den 50 urteko langileak I.D. izena zuen, Boli Kostakoa zen jatorriz, eta bi seme-alabaren aita. Bi seme-alaba horiek, emaztearekin batera, Afrikako herrialdean bizi dira. I.D. 2019an etorkizun hobe baten bila iritsi zen Ipar Euskal Herrira. Harrezkero, hainbat lan egin zituen, batez ere ABLEen bidez, beti prekaritatean murgilduta. Egun, eraikuntzan ari zen lanean eta gidatzen ari zen hondeamakina, antza denez, irauli egin da eta langilea harrapatu du bere heriotza eraginez. Urte hasieratik 34 laneko heriotza izan dira Euskal Herrian, horietatik 3 Ipar Euskal Herrian.

Lehenik eta behin, LAB sindikatuak elkartasuna adierazi nahi die senide, lagun, lankide eta Boli Kostako komunitateari.

Lan-istripuak saihets daitezke, eta agerikoa da kasu honetan ere segurtasun-neurriek huts egin dutela hondeamakina iraultzean; LABek istripuaren inguruko ikerketa zorrotza eskatzen du, eta egon daitezkeen erantzukizunak argitzea.

Nolanahi ere, argi dago langile etorkinak kolektibo kaltebera direla, eta, kasu askotan, beren segurtasuna arriskuan jartzen duten lan-baldintza prekarioetan lan egitea onartu behar izaten dute.

LAB sindikatua Ipar Euskal Herriko hainbat sindikaturekin harremanetan jarriko da lan-istripu honi erantzuteko.

EAEn 1.400 euroko gutxieneko soldata ezarri ahal izateko jarrera proaktiboa eskatu diogu Eusko Jaurlaritzari

Zubiate(e)ko Aritz
-
0
EAEn 1.400 euroko gutxieneko soldata ezarri ahal izateko jarrera proaktiboa eskatu diogu Eusko Jaurlaritzari

Eusko Legebiltzarrak Jaurlaritzari eskatu bezala, EAEn langile guztientzat gutxieneko soldata ezarri ahal izateko patronal eta sindikatuon arteko akordioaren alde lan egiteko eskatu diogu.

Gaur EAEko Lan eta Enplegu Sailak eskatuta, bilera egin dugu Eusko Jaurlaritzan. Bertan, Idoia Mendia sailburu eta Lehendakariordeak, Elena Perez Lan sailburuordeak eta Alfonso Gurpegui Enplegu sailburuordeak parte hartu dute Jaurlaritzaren izenean eta LABen ordezkari gisa Ainhize Muniozguren Idazkaritza Juridikoko arduraduna, Xabier Ugartemendia Zerbitzu Publikoen federazioko arduraduna eta Oihana Lopetegi Ekintza Sindikaleko arduraduna bertaratu dira.

LABeko ordezkariek, ikasturte honetako erronkak azaltzearekin batera, EAEn 1.400 euroko gutxieneko soldata ezarriko lukeen akordioa ahalbidetzeko lanketa egitea eskatu diote Jaurlaritzari. Gogoan izan behar dugu iazko ikasturtean EH Bilduren proposamen baten ondotik, Eusko Legebiltzarrak 1.400 euroko gutxieneko soldataren aldeko jarrera proaktibo bat izan zezan eskatu ziola. Egungo eskumenekin hori gauzatu ahal izateko modu bakarra Gai Zehatzari Buruzko Akordio bat egitea litzateke, ordezkagarritasun handiena dugun patronal eta sindikatuon arteko akordioa.

Hego Euskal Herriko langileentzat Lanbidearteko Gutxieneko Soldata (LGS) Madrilgo Gobernuak ezartzen du. LGS bera daukagu espainiar Estatuko lurralde guztietan, errealitate soziolaborala erabat desberdina izan arren. Europako Karta Sozialak LGS ezartzeko irizpide zehatza ematen du: lurralde bateko soldaten batezbestekoaren %60 izan beharko litzatekeela. Hego Euskal Herrian 1.400 eurokoa da zenbateko hori.

1.400 euroko gutxieneko soldata ezartzeak sektore prekario eta zaurgarrienei hobekuntzak ekarriko lizkieke: emakumeei, pertsona migratu eta arrazializatuei edota gazteei, batik bat. Sektore prekarioenetako soldatak hobetzea langile horien lan eta bizi baldintzak hobetzeko urrats handia litzateke, soldata arrakalaren aurkako neurri garrantzitsua, langileon lan baldintzen dualizazioa —gero eta handiagoa— gutxitzen lagunduko luke. Horrez gain, hemen bertako eragileon artean Gutxieneko Soldata adostea —langileentzat hain  garrantzitsua— urratsa litzateke Lan Harremanetarako eta Babes Sozialerako Esparru Propioa eraikitzeko bidean, LABen aldarrikapen nagusienetako bat dena, hain zuzen ere.

Akordioa gauzatu ahal izateko borondate politikoa behar da. Batetik, Confebask-en borondatea. Bestetik, Eusko Jaurlaritzaren borondatea, akordioaren aldeko jarrera aktiboa. LAB, Euskal Herrian eta kasu honetan EAEn langile guztientzat gutxieneko soldata duina ezarriko duen akordio oro bultzatzeko prest dago eta horretan jarraituko du lanean.

Erakundeei exijitzen diegu Celsa Taldeko lantegien jarduera, enplegua, lan-baldintzak eta etorkizuna bermatzeko

Zubiate(e)ko Aritz
-
0
Erakundeei exijitzen diegu Celsa Taldeko lantegien jarduera, enplegua, lan-baldintzak eta etorkizuna bermatzeko

Bartzelonako Merkataritza Arloko 2 zenbakiko Epaitegiak Celsa Taldearen inbertsio-funtsen berregituraketa-plana homologatu ondoren, Nervacero eta Laminaciones Arreguiko LAB, LEKU, ELA eta ESK-ko sail sindikalek, biak Celsa Taldekoak, erakundeei exijitzen diegu Celsa Taldeko lantegien jarduera, enplegua, lan-baldintzak eta etorkizuna bermatzeko, batez ere aipatutako bi enpresetakoak.

Ez dugu ezagutzen Celsa Taldeak zuen berregituraketa-planaren edukia, ez eta epaitegiak onetsitakoa, inbertsio-funtsena, plantillekiko bermeak barnebiltzen dituena.

Lehen esan dugun bezala, gure lehentasuna langileak dira, eta epai honek, beraz, ez du gure etorkizunari buruzko ziurgabetasun-giroa saihesten. Epe laburrean aldaketa handirik espero ez dugun arren, epe ertaina eta luzea dira kezkatzen gaituztenak. Epaiak berak esaten badu ere enplegua mantendu behar dela erabakigune estrategikoak aldatu gabe, hori ez da mugagabea izango eta, beraz, gure kezka handiena epe ertain-luzean gerta daitekeena da.

Erakunde Publikoek bermatu behar dute hori beteko dela. Badakigu Espainiako gobernuak inbertsio-funtsekin negoziazioak hasteko asmoa duela etorkizuneko bideragarritasunaz eta enpleguari eusteaz, eta uste dugu negoziazio horietan langileen ordezkariek parte hartu eta kontuan hartu behar dituztela.

Eusko Jaurlaritzak ere ezin du bere erantzukizuna saihestu, jarrera proaktiboa izan behar du gatazka honetan, Nervacero eta Laminaciones Arreguiko langileen interesak babestuz eta, honetan ere, langileen ordezkaritzaren parte-hartzearekin.

Horregatik, Nervaceron eta Laminaciones Arreguin ordezkaritza duten LAB, LEKU, ELA eta ESK-ko sekzio sindikalek, epaiaren ondorengo lehen ekimenetako batean, bilera bat eskatu diogu Industria Sailari, egoera berri horretan inplikatzeko beharra azaltzeko.

1...206207208...1,583Page 207 of 1,583

COOKIAK | COOKIES

LEGE OHARRA ETA PRIBATUTASUN POLITIKA | AVISO LEGAL Y POLĂŤTICA DE PRIVACIDAD

www.lab.eus