LABeko koordinatzaile orokor Igor Arroyok nabarmendu duen bezala, “langile publikoek eta herritar guztiek erantzun argia eta zabala eman diete egunotan grebarako arrazoirik ez zegoela esan dutenei; Urkulluk autopistan kontrako norabidean doan gidaria dirudi”. Hala, erakundeetako arduradunei eskatu die entzuteko eta negoziazio kolektiboa desblokeatzeko, eta hemengo langileen lan-baldintzak hemen negoziatu eta erabakitzeko beharra azpimarratu du.
“Ongizate estatu delakoa hiru zutabetan oinarritu izan da: Gizarte Segurantza, Hezkuntza eta Osasungintza. Bada, argi ikusi dugu horiek nola ahuldu diren azken urteotan. Beraz, horiek indartu eta, gainera, laugarren hanka bat ezarri behar da, zaintza sistema publiko komunitarioa”, jarraitu du Arroyok Bilboko manifestazioaren bueltan prentsari egindako adierazpenetan. Hala, koordinatzaile orokorrak adierazi du Euskal Herrian badagoela horretarako nahikoa aberastasun, baina patronalari eta eliteei mesede egiten dien politika fiskala aldatu behar dela horretarako.
Goizean goizetik zutabeekin hasi da gaurko greba eguna hiriburuetan, eta eragina nabarmena izan da funtzio publikoan oro har, gehiegizko gutxieneko zerbitzuak gorabehera. Adibide gisa, Gipuzkoan 25 udaletan erabateko itxiera egon da, eta Txagorritxuko ospitalean bertan behera geratu dira ebakuntza guztiak, atzeratu ezinezkoak izan ezik. Hezkuntzan ere jarraipena oso zabala izan da, unibertsitatez kanpokoan %75 gainditu duelarik. Garraio publiko gehienen kasuan ere zerbitzu minimoak baino ez dira egon, eta komunikabide publikoetan albistegiak baino ez dira ematen ari.
Gaur milaka eta milaka langile publikok salatu dute zerbitzu publikoen gainbehera, lan-baldintzen okertzea eta horrek herritarrei eskaintzen zaien arreta-kalitatean duen higadura. Hala, argi adierazi dugu ez gaudela arazo artifizialen aurrean, baizik eta plantillek eta herritarrek pairatzen duten zerbitzu publikoen gainbeheraren aurrean.
Eta instituzio eta alderdi politikoei eskaera zehatza luzatu diete, behingoz zerbitzu publikoen eta horiek ahalbideratzen dituzten pertsonen alde egin dezatela. Bide horretan, honako erabaki hauek exijitu ditugu:
– Estatutik datozen mugak eta betoak behingoz kentzea, soldata eta enplegu publikoaren beharrak hemen erabakitzea.
– Aurrekontu-partida nahikoak onartzea: Zerbitzu publikoak indartzeko, pribatizazioekin amaitzeko, enplegu publikoa sortu eta eta kontsolidatzeko, lan-baldintzak hobetzeko, galdutako erosteko ahalmena berreskuratzeko, langileen lan-osasuna bermatzeko, administrazioaren euskalduntzean urratsak emateko eta genero-diskriminazioarekin amaitzeko benetako neurriak hartzeko.
– Hamarkada bai baino gehiagoan eguneratu eta adostu gabe dauden Lan Hitzarmenak negoziatu ditzatela. Horretarako lan zamak arintzeko neurriak, eros-ahalmena berreskuratzeko planteamenduak, Lan osasuna bermatzeko plangintza eta neurriak, erretiroa aurreratzeko, behin behinekotasun erreala %8ra jesiteko kontsolidazio prozesuak eta administrazioak esukalduntzeko planak zein berdintasun planak adostuz.
Bukatzeko sindikatu deitzaileak, zorionak eman nahi dizkiete greba eta mobilizazioetan partehartu duten guztioi, gaur guztiontzako eta kalitatezko zerbitzu publikoen alde egin duten ekitaldian parte hartzeagatik eta borroka horretan jarraituko dutela adierazi nahi dute.
