LABLangile Abertzaleen Batzordeak

ELA eta LAB sindikatuek, Bizkaiko Arte Grafikoen sektorean ordezkaritza % 70etik gorakoa izanik, greba deitu dugu martxoaren 17, 18, 20, 23, 24, 25, 26, 27, 30 eta 31rako eta apirilaren 1erako, patronalak negoziazioak blokeatu dituelako eta sektorearentzat hitzarmen duin bat adosteko helburuarekin.

Bizkaiko Arte Grafikoen Hitzarmen Sektoriala berritu gabe dago 2012tik. Sektoreko soldata taulak 2011koak dira, 17.000 euro gordin pasatxoko soldatak dituzten kategoria batzuekin.

Sektoreko hitzarmen hau 2023an negoziatzen hasi zen berriro. Patronala hasieratik saiatu zen hainbat edukitan murrizketak ezartzen (antzinatasuna, bajen osagarria, malgutasuna…). 2024an, 12 greba egun egin ziren sektorean, jarraipen handiarekin. Greba horiei esker, Cebek patronalak murrizketen zati handi bati uko egin zion. Hala ere, beste eduki batzuetako aldeak mantendu egiten ziren, batez ere Hitzarmena indarrean zegoen bitartean soldatak eguneratzearekin eta soldata igoerekin lotuta zeudenak.

2025ean, Negoziazio Mahaiaren 9 bilera egin ziren (34 egin ditugu guztira). Ez dago funtsezko aurrerapenik negoziazioetan. 2025ean sindikatuok mugimendu desberdinak egin ditugu sindikatuen arteko plataforman, Cebek-en erantzun egokirik jaso gabe. Gainera, agerian geratu da patronalak Hitzarmenak duen errelebo kontratuaren eskubidea ezabatu nahi duela, eta hitzartutako igoera guztiak konpentsagarriak eta xurgagarriak izatea nahi duela.

Testuinguru horretan, joan den abenduan, ELA-LAB-STEE EILAS-ETXALDE-HIRU sindikatuek greba orokorra deitu zuten Euskal Herrian gutxieneko soldata propioa lortzeko. 21.000 euro gordineko gutxieneko soldata herrialde honetako langile guztientzat. Arte grafikoen sektoreko soldata taulek soldata minimo horretatik behera dauden 6 kategoria jasotzen dituzte gutxienez. Ildo horretan, ELAk eta LABek Bizkaiko arte grafikoetako greben egutegiaren hasiera eta martxoaren 17ko greba orokorra bateratu nahi dituzte. Martxoaren 17a beste borroka batzuetarako bultzada izan daitekeela eta izan behar duela uste dugu. Eta kasu zehatz honetan, gure ustez, Arte Grafikoen sektoreak eta grebek bultzada geldiezina hartuko dute martxoaren 17tik aurrera.

Arte Grafikoetako plantillek merezi dute 2011. urtean amaitutako hitzarmen bat berreskuratzea. Baina ondo berreskuratu behar da, soldata igoera duinak bermatuz, konpentsatuak eta irentsiak izango ez direnak, hitzarmena aplikatzeko bermeekin, murrizketarik gabe, eta beste hobekuntza batzuekin.

Datorren otsailaren 24an Negoziazio Mahaiaren beste bilera bat dugu aurreikusita patronalarekin. Cebeki eskatzen diogu negoziazioetako blokeoaren jarrera berriz aztertzeko. Sindikatuok negoziatzeko borondatearekin joango gara, baina baita sektoreko greba eta gatazka ziklo berri baterako prest gaudela irmo erabakita ere.

Horregatik guztiagatik, ELA eta LAB sindikatuek dei egiten diegu sektoreko langile guztiei deitutako 11 greba egunetan parte har dezaten. Greba egun horiek 2025eko martxoaren 17an hasiko dira, greba orokorrarekin batera.

Zubietako langileek mobilizazioekin jarraitzen dute ostegunero 13:00etan beraien lan baldintzak duinduko dituen enpresa hitzarmena exijitzen. Urtebete luzez Ekobal enpresarekin negoziatzen egon eta hilabeteko mobilizazioen ondoren, errepresioa eta gezurrekin erantzun dute enpresak eta Gipuzkoako Aldundiak.

Ekobal enpresak LAB-eko delegatua den langile bati zigorra ezarri nahi izan diote bere delegatu lanak burutzeagatik eta langileen artean prebentzio aholkuak zabaltzeagatik, enpresarekiko desleialtasuna leporatuz. Argi daukagu zigor hau komiteko kideak jazartzeko, kikiltzeko eta beraien aldarrikapenak betan behera uzteko asmoarekin ezarri nahi izan dutela. Ez dugu etsiko!

Bestalde, Gipuzkoako Aldundiak Zubietako erraustegiko langileen aldarrikapenak Ekobal enpresaren ardura dela adierazi du, ingurumen arduradunaren hitzetan, Jose Ignacio Asensio, erantzukizuna bere gainetik kendu nahian eta Errraustegiko langileen borroka gutxietsiz. Gure aldetik Jarraituko dugu Aldundia azken arduradun bezala interpelatzen!

Errepresioa eta gezurrak gorabehera, borrokan jarraituko dugu!

Gora langileon borroka! 

LAB sindikatua desgaitasunaren sektoreko langileekin elkartu da gaur goizean Anfasen aurrean hitzarmen kolektiboaren negoziazioa desblokeatzea exijitzeko. Negoziazioa blokeatuta dago gaur egun, entitateen eta Nafarroako Gobernuaren borondate faltagatik.

LABek salatu du blokeo egoera honek sektorea lan-prekaritatean mantentzen duela, eta horrek eragin zuzena duela bai langileen lan-baldintzetan, bai desgaitasuna duten pertsonek jasotzen duten arretaren kalitatean. Sindikatuak azpimarratu du ezin dela onartu neurri handi batean finantzaketa publikoarekin sostengatzen den funtsezko sektore batek bere lan-esparruan benetako aurrerapenik gabe jarraitzea.

LABek entitateei eta Nafarroako Gobernuari eskatu die beren erantzukizuna bere gain har dezatela eta negoziazioari berriro ekin diezaiotela proposamen zehatzekin, sektorearen errealitatera egokituko den hitzarmen duin bat adosteko.

LABetik baieztapen argi batekin hasi nahi dugu negoziazio hau: Bizkaiko egoitza pribatuen egungo ereduak ez du balio. Zerbitzu publiko honen pribatizatzeko egungo politikak, tratu txarren egoerak normalizatzea dakar, bai langileentzat, erabiltzaileentzat, bai haien senideentzat. 

Erresidentzien pribatizazioa bateraezina da lan-eskubideen bermearekin eta kalitatezko arreta duin batekin. Beharrezkoa da Bizkaiko Egoitzak publifikatzeko prozesu bat irekitzea.

LABen proposamena Bizkaiko Erresidentzien Sektorerako:

Arrisku psikosozial eta fisiko larriei aurre egiteko neurriak. Lan-kargak aztertzen dituzten ebaluazio espezifikoak, langileentzako laguntza psikologikoa eta kanpo-ikuskapena, formazio espezifikoa eta langile gehiago, besteak beste.

Ratioen proposamen bat. Beste gutxieneko ratio batzuen artean:

– eguneko ratioa: gerokultore bat lan-txanda bakoitzeko 4 egoiliarreko

– gaueko ratioa: 2 langile 15 egoiliarreko

– erizaintza zerbitzua eguneko 24 orduetan

Lan-bizitzaren azken etapari aurre egiteko neurriak. 58 urteko emakumezko langileei %40ko lanaldi-murrizketak ezartzea, soldata-murrizketarik gabe; erretirorako koefiziente murriztaileak eta txanda-kontratua

Zaintza erdigunean jarriko duten kontziliazio neurriak. Medikuarengana joateko eta laguntzeko behar den denbora, baimenak binkulograma batera luzatuta, zaintzarako ordutegi-malgutasuna, besteak beste.

Euskara ikastea eta erabiltzea bermatuko duten neurriak.

Berdintasun-planak. Enpresa guztiek berdintasun-plana izateko betebeharra eta plan hori ordezkariekin adosteko betebeharra

Prekarietatearen aurkako neurriak. Lanaldi partzialak mugatzea eta lehentasuna izatea lanaldi osoko lanpostu hutsak eskuratzeko, baja medikoen osagarriak % 100era iristeko…

LABentzat ezinbestekoa da Bizkaiko Erresidentzien ratioari buruzko benetako eztabaida eta ezinbestekotzat jotzen du benetako neurriak adostea, negoziazio honetan.

Negoziazioa parekatze-terminoetan egin behar da, behingoz. Aurreko hitzarmenak ez ditu sektoreak dituen arazoak konpontzen. LABentzat, egiten dugun lan publikoaren aitortzan benetako aldaketak egiteko unea da. 

ELA, LAB eta CGT sindikatuetatik salatu nahi dugu, onartezina delako, VW Navarra, UGT eta CCOOen jokabidea; izan ere, VW-Nafarroako kontratazioan Legea ez betetzeagatik Lan Ikuskaritzak egin dituen eskakizunen ondoren, presionatzen eta hertsatzen saiatzen ari dira. Eskakizun horiek, zuzenbidearekin bat badatoz ere, multinazionalaren enpresa-politikaren aurkakoak dira. Izan ere, enpresa-politika horiek mota guztietako lege eta araudiak urratzeko ohitura du, errepresaliarik jaso gabe.

Jarduteko modu horrek mespretxu eta diskriminazio argia dakarkigu Nafarroako gainerako enpresa eta langileekiko, guk bai zorrotz betetzen ditugunak. Gainera, multinazionalaren barneko Jokabide Kodea ez betetzea dakar ere bai.

Jakinarazi nahi dugu joan den urtarrilaren 20an premiazko bilera bat eskatu geniola enpresa-batzordeari, enpresaren mehatxuen aurrean sortutako egoera elkarrekin aztertzeko, fabrikan Batzar Orokorrak deitzeko, langileei horren berri emateko eta beharrezko erabakiak hartzeko, enpresak gogoeta egin eta atzera egin zezan.

Bilera hori, gaur egun eta Batzordeko lehendakariak hala erabakita, ez da egin. Horrek esan nahi du, de facto, blokeatuta eta baliogabetuta geratu dela plantillaren ordezkaritza-erakunde gorena.

Gure gaitzespenik irmoena adierazi nahi dugu UGTren eta CCOOen jarrera inkoherentearen aurrean; izan ere, multinazionalaren alde agertuz, alde batetik balizko EEEa onartzen dute, eta bestetik, kontratazioak eskatzen dituzte.

ELAk, LABek eta CGTk deitoratu egiten dugu VW-NAko zuzendaritzak, UGTren eta CCOOren baldintzarik gabeko babesarekin, ebazpenak betetzetik urrun, langileak ikaratu nahi izatea etorkizuneko EEEen mehatxuarekin. Horren justifikazio bakarra Legea bete behar izatea litzateke, zenbait hamarnaka langile finko eginez; ez liratekeelako beren enpresa-planetan sartuko, aldi berean aldi baterako 400 langileren kontratazioa negoziatzen ari direnean.

Egoera horrekin, inola ere ezingo lukete plantillako soberakinik justifikatu. Inmorala litzateke gobernu batek horrelako planteamendua onartzea, batez ere enpresa honek enplegua mantentzeko ERTE bidez jasotzen dituen dozenaka milioi diru publikoaren ondoren.

Era berean, gogorarazi nahi dugu UGTk eta CCOOk X. Hitzarmen Kolektiboan dagoeneko hitzartuta dutela zenbait eraldaketa-proiektuetarako kontratatutako TAS eta MOD langileak kaleratzea, baldin eta kolektibo horietan soberakinik badago.

Beldur gara enpresak egoera hori aprobetxatu nahi ote duen, UGTren eta CCOOren laguntzarekin, hurrengo hitzarmenaren aurreakordio bat argi eta garbi beherantz negoziatzeko.

Horregatik guztiagatik, bai indarrean dagoen legeria ez betetzeagatik, bai behin azaleratuta egindako kudeaketagatik, Zuzendaritzaren barruan erantzukizunak argitzea eskatzen dugu.