Envases Ugaoko enpresan 50 langile kaleratzea aurreikusten dituen EEE bat aurkeztu dute. Honen aurrean, enpresa-batzordeak prentsaurrekoa egin du espedientea errefusatzen duela adierazi eta manifestazio bat deitzeko. Mobilizazioa martxoaren 16an izango da, 17:30ean, Ugaoko Udaletxetik aterata.
Adierazi dute enpresak arrazoi produktibo eta organizatiboak argudiatzen dituela EEErako, eta hau erabat baztertzen dute enpresa-batzordetik. Orain arte egin diren lau bileretan agerian geratu da multinazionalaren diruzalekeriak ez duela mugarik. Zehaztu dute enpresaren ekoizpena ez dela jaitsi eta erabaki estrategiko bat dagoela, produkzioa Ugaoko lan-zentrotik atera eta berau Leon eta Holandako lan-zentroetara eramateko.
Euren iritziz, ez gaude produkzioaren jaitsiera baten aurrean, deslokalizazio baten aurrean baino. Horrela, urtero irabaziak dituen Envases enpresak, are gehiago irabazi nahi du eta horretarako 50 langile kaleratu nahi ditu, inolako begiramenik gabe eta pertsonak kontuan izan gabe.
Enpresa-batzordeak orain arteko ekoizpena Ugaon mantentzearen eta enpleguari eustearen alde egiten du.
Aste hauetan babes ugari jaso dituzte eta euretariko batzuk agerraldian parte hartu dute. Hauen artean daude Hego Uribe eta Arratiako hainbat enpresa-batzorde, Megatech, Maderas de Llodio, DYF, Cartisa, Residencia Etxe Maitia, Acciona, Galletas Artiach, Cementos Lemona, Bilboko Argiak, Tubacex, Elis Arrigorriaga, Lavanindu edota Dascor. Eskualdeko hainbat gizarte eragilek ere babesa erakutsi diete, hala nola Txarraska, Kiskali, Basauriko Pentsiodunen Elkartea, Elkarlaguntza Galdakao, Emahots talde feminista, Ugaoko Pentsiodunen Elkartea, Ugaoko Merkatarien Elkartea, Zizpa Gazte konpartsa, Momoak talde feminista edo Ernai Galdakao.
Oraindik ari dira martxoaren 16an 17:30ean Ugaoko Udaletik abiatuta egingo dute manifestaziorako babes eta atxikimenduak jasotzen. Hauek dira deialdiaren aldarrikapenak: Envaseko produkzioak Ugaoko lan-zentroan jarraitzean, Enplegu Erregulazio Espedientea erretiratzea eta enplegua enpresan, Ugaon eta eskualdean mantentzea.
Instituzioei eskatu diete Envaseseko gatazkan inplikatzea. Era berean, langileria, enplegua suntsitu eta Euskal Herria desindustrializatzen ari diren enpresen eskuetan erortzetik babestuko duten politikak exijitu dituzte.
Euskal erakundeetan gobernatzen duten alderdiek aldatu egin behar dituzte haien politikak langileen erosteko ahalmena berreskuratzeko, pribatizazioak geldiarazteko, enplegu publikoa sortzeko eta kontsolidatzeko. Estatuko aurrekontuak aukera bat dira Madrilen ezarritako betoak ezabatzeko.
LAB, ELA, CCOO, STEILAS eta ESK sindikatuak EAEko sektore publiko osoan deitutako grebak jarraipen oso zabala izan du. Aurreko grebak baino jarraipen handiagoa, besteak beste, hezkuntzan, administrazio orokorrean eta udaletan. Grebaren arrakastaren adibide garbia da EAEko hiru hiriburuetan eguerdian deitutako manifestazioetan 30.000 langile baino gehiagok parte hartu dutela “Zerbitzu publikoen alde, soldatak eta enplegua hemen adostu“ lelopean.
Grebaren arrakasta ikusita, hauteskunde osteko Eusko Jaurlaritzak, Foru Aldundiek, Udalek eta Estatuko Administrazioak errotik aldatu behar dituzte orain arte aurrera eraman dituzten politika publikoak. Erakunde horiek benetako neurriak hartu behar dituzte zerbitzu publikoak indartzeko eta hemen erabakitzeko, pribatizazioekin amaitzeko, enplegu publikoa sortzeko eta finkatzeko, lan baldintzak hobetzeko, galdutako erosteko ahalmena berreskuratzeko, langileen lan osasuna bermatzeko, administrazioaren euskalduntzean urratsak egiteko eta genero diskriminazioarekin amaitzeko.
Bestalde, euskal alderdi politikoek euren botoak baliatu behar dituzte Estatutik datozen mugak eta betoak behingoz ezabatzeko, hemen enplegua, soldatak eta plantillen lan baldintzak erabakitzeko. Laster Estatuko aurrekontuak negoziatuko dira, eta euskal alderdi politikoen botoek helburu hori lortu behar dute.
Grebaren jarraipena Hezkuntzan: Hezkuntza publiko ez unibertsitarioan eta unibertsitarioan grebak jarraipen oso zabala izan du. Unibertsitatez kanpoko hezkuntzari dagokionez, grebaren jarraipena %65ekoa izan da. Aipagarriak dira irakas jarduera ia osotasunean geldirik izan duten ondorengo ikastetxeak, irakasleriaren gehiengo zabal batek greba egin duelako: Errekabarri, Toki Eder edo Umandi eskolak Gasteizen eta Legutioko Garazi Eskola Araban; Zubieta edo Aitor eta Ibaia Ikastolak Donostian, Errenteriako Koldo Mitxelena, Eibarreko J.A. Moguel, edo Debako Mendata BHI eskolak Gipuzkoan; eta Bilboko Atxuri eskola edo Basauriko Jose Etxegarai eskolak Bizkaian.
Heziketa Bereziko langileen kasuan, gutxieneko zerbitzuak handitzeak eta azken orduko nahasmenak erabat baldintzatu du jarraipena. Halere, greba egiteko aukera izan duten hezitzaileen zati handi batek grebarekin bat egin du, besteak beste, Donostiako Altza eskolan eta Amara Berriko Ferrerias eraikinean edo Urretxuko Gainzurin Gipuzkoan; Bilboko Basurto eskolan, Balmasedako Mendia eskolan edo Durangoko Zabalarra eta Basauriko Jose Etxegarai Bizkaian; eta Gasteizko Salburua eta Zabalgana eskoletan Araban.
Sukalde eta garbiketako langileei dagokionez, jarraipena plantillaren %60 baino handiagoa izan da. Aipatzekoa da zenbait sukalde itxita izan direla sukaldarien %100k greba egin duelako, esaterako, San Inazio eta Iruarteta Bilbon edo Balmasedako CEP Mendia Bizkaian; Gainzuri Urretxun, Mutrikuko eskola edo Donostiako Intxaurrondo Gipuzkoan. Gernika BHIn edo Zarautzeko eskolan garbitzaile guztiek ere greba egin dute.
Haurreskoletan langileriaren %75 ingururen babesa izan du grebak. Haurreskola askotan, ia erabatekoa izan delarik jarraipena, besteak beste Gasteizko Arana, Izarra edo Mariturri, Erriberabeitiko Haurreskola, edo Amurrioko Ttipi ttapa Araban; Bilboko Miribilla eta Basauriko Etxeko Kuttuna Bizkaian; eta Zaldibarko haurreskola, Donostiako Bidebieta, Deba, edo Beasain eta Oñatiko Haurreskolak Gipuzkoan.
EHUn ere jarduera akademikoa oso urria izan da, leku askotan azterketetarako gutxieneko zerbitzuak izanik emandako jarduera bakarrak. Jarraipen osoa fakultate batzuetan; Araban Magisteritza, Lan Harreman, Enpresa eta Ekonomia, Letra Fakultatean; Bizkaian Kazetaritza, Lan Harremanak; Gipuzkoan Psikologian, HEFA I , HEFAII, Arkitektura, Ekonomia eta Enpresa eta Informatikan. Ikasgelategietan jarduera oso eskasa hiru lurraldetan. Administrazio eta zerbitzuetako langileen artean lekuz leku jarraipen desberdina, baino zerbitzu guztietan izan du eragina.
Udal eta Foru esparruan: grebaren jarraipena oso zabala izan da. Hainbat eskualdetako udal handienetan jarraipena oso esanguratsua, horien artean aipagarriak hiru hiriburuetakoak. Donostia, Bilbo eta Gasteizen, hainbat zerbitzuak itxi dira, hala nola udaltegiak, liburutegiak, kiroldegiak etab. Gipuzkoan: Hernani, Astigarraga, Arrasate, Zarautz, Tolosa, Orio, Beasain, Oñati, Ordizia, Anoeta, Azpeitia, Bergara, Urretxu, Usurbil, Lazkao, Zizurkil, Itsasondo, Idiazabal, Sasieta mankomunitatea, Legorreta, Debagoieneko mankomunitatea , Urretxu Zumarraga euskaltegia, Soraluze, Garbitania zero zabor. Bizkaian: Barakaldo, Ortuella, Trapaga , Markina, Bermeo, Lekeitio, Atxondo, Elorrio, Gernika, Basauri (polikiroldegia eta kultur etxea itxita), Igorre, Getxo, Lemoa, Orozko Galdakao, Berriz eta Arrigorriaga (polikiroldegia itxita), Maruri, Erandio. Araban: Agurain, Laudio eta Amurrio.
Osakidetzan: ezarritako gutxieneko zerbitzuek erabat baldintzatu dute grebaren jarraipena. Izan ere, milaka langileri greba eskubidea ukatu zaio, %100eko gutxieneko zerbitzuak ezarriz. Bereziki deigarria da gaurko egunean EAG bezalako zerbitzuetan %100eko zerbitzua inposatzea, egunerokoan asko medikurik gabe irekita daudenean.
Aurreko deialdietan bezala, grebaren intzidentzia handiagoa izaten ari da Lehen Arretan, batez ere pazientearen arretako langileen artean. Nabarmentzekoa da kolektiboaren jarraipena Gasteizko San Martin Osasun Zentroan; Bilboko Zorrotzan, Boluetan eta Alde Zaharrean; edo Ezkerraldeko Buenavistan eta Mamarigan.
Ospitaleetan, gutxieneko zerbitzuek eragin handiagoa dute, eta, horregatik, jarraipena txikiagoa izan da. Hala ere, Zumarragako Ospitalean ebakuntza gelak itxita daude, eta itxita dago ere Debagoieneko Ospitaleko ebakuntza gela bat eta Txagorritxuko traumatologiako ebakuntza gela guztiak itxita eta isteroskopiarik ez da egin. Baita Arabako Unibertsitate Ospitaleko Neurologia, Neurokirurgia eta Traumatologia zerbitzuko harrera ere. Era berean, itxita daude Gorlizko Ospitaleko X izpien zerbitzua, Basurtuko Ospitaleko zerbitzu horretako zelari zerbitzua eta Zamudioko Ospitaleko gidari zerbitzua.
Komunikabide eta garraio publikoei dagokionez, greba jarraipen oso zabala izaten ari da. Horren adibide da irrati eta telebista publikoan gutxienezko zerbitzuak ezarritakoa, informatiboak bakarrik emititzen ari direla, eta adibidez Miramonen jarraipena %80 ingurukoa da. Garraio publiko ez pribatizatuan ere jarraipen zabala, nagusiki Eusko Tren eta Metron.
Administrazio Orokorrean eta Justizia administrazioan jarraipena aurreko grebarena baino zabalagoa izan da, baina herrialdeka eta esparruka aldakorra, adibidez, Lakuan jangela zerbitzurik ez da izan. Estatuko langileen esparruan jarraipena apalagoa izan da.
Enpresa publikoei dagokionez, Euskadiko Orkestra Sinfonikoko OSE langileek grebarekin bat egin dute, eta ondorioz, gaur Iruñean eman beharreko kontzertua bertan behera geratuko da.
Iruñeko Claret Larraona ikastetxeko kiroldegiko langileak greban daude atzo eta gaur, 20 urte inguru lan baldintza berberekin eta, beraz, soldata izoztuta daramatela salatzeko. Atzo eta gaur, enpresak kiroldegia ireki du, nahiz eta Lan Ikuskaritzak adierazi zion halakorik ez egiteko, harrerako langileen greba-eskubidea urratzen baitzuen.
Iragan urteko azaroan, langileak enpresarekin bildu ziren egoeraren larria ulertarazteko eta negoziazioa eskatzeko, baina honek berandu eta gaizki erantzun zuen —bi hilabete eta erdi geroago, eta mezu elektroniko baten bidez—. Horrela, immobilismo hori ikusita, plantillak erabaki zuen kalera ateratzea eta bi egun hauetan greba egitea.
Kiroldegia irekitzeaz gain, grebalariek salatu nahi dute klaretarrak greba baldintzatzen saiatu direla, informazio faltsua emanez, hala nola delegatuak komisio bat lortzen duela greba egiten duen pertsona bakoitzeko, eta langileei beldurra eraginez, greba egitea erabakitzen duten pertsonei hitzik ez egiteko eskatu ere.
Hala ere, traba guztiak gorabehera, Claret Larraona kiroldegiko langileek borrokan jarraituko dute beren lan eskubideen alde eta klaretarrek ezartzen dieten prekarizazioaren aurka.
LAB, ELA, CCOO, STEILAS eta ESK sindikatuok deitu dugu greba EAEko sektore publiko osoan, “Zerbitzu publikoen alde, soldatak eta enplegua hemen adostu” lelopean.
Lehen orduan jasotako datuen arabera, EAEko sektore publikoko grebaren jarraipen zabala izaten ari da. Sektorean %80ko ordezkaritza duten sindikatuek deitu dute. Sektoreka aztertuta:
– Hezkuntzan, hezkuntza publiko ez unibertsitarioan eta unibertsitarioan grebak jarraipen oso zabala izango duela dirudi. Hezkuntza Publiko ez unibertsitarioan gutxieneko zerbitzuak handitu izanak milaka hezitzaile utziko ditu greba eskubiderik gabe.
– Komunikabide eta garraio publikoei dagokionez, grebaren jarraipena oso zabala izaten ari da lehen orduotan. Horren adibide da irrati eta telebista publikoan gutxieneko zerbitzuek ezarritako albistegiak bakarrik emititzen ari direla. Garraio publiko ez pribatizatuan ere, grebaren jarraipena zabala izaten ari da.
– Osakidetzan gutxieneko zerbitzuek guztiz baldintzatuko dute grebaren jarraipena. Milaka langileri greba eskubidea ukatu zaio, zerbitzu askotan gutxieneko zerbitzuak %100ekoak direlako. Adibidez, gaueko txandako langileetako ia inork ere ezin dezake greba egin.
– Administrazio Orokorrean eta Justizi administrazioan jarraipena aurreko grebarena baino zabalagoa izango da, baina herrialdeka eta esparruka aldakorra. Udal eta foru esparruan ere grebaren jarraipena oso zabala izango dela dirudi.
– Datu bezala, Euskadiko Orkestra Sinfonikoko (OSE) langileek grebarekin bat egin dute, eta ondorioz, gaur Iruñean eman beharreko kontzertua bertan behera geratuko da.
Lehen orduko piketeen ostean, hiru hiriburutan egingo dira manifestazioak 11.30ean hasita: Bilbon Udaletxetik, Donostian Bulebardetik eta Gasteizen Bilbao plazatik. Greba jarraipena ikusita manifestazioak oso jendetsuak izango direla uste dute sindikatu deitzaileek.
Jaurlaritzaren gutxieneko zerbitzuaren aginduak milaka langile greba eskubiderik gabe uztea du helburu. Horretaz gain, sindikatuok salatu nahi dugu Eusko Jaurlaritzak greba bezperetan argitaratu duela agindua, hauen aurkako bide juridikoa oztopatzeko.
Martxoaren 12ko greba eguna otsailaren 13an egin genuen publiko LAB, ELA, CCOO, STEILAS eta ESK sindikatuok. Grebaren erregistro formala orain dela hamabi egun, zehazki otsailaren 29an.
Eusko Jaurlaritzako Lan Delegaritzak gutxieneko zerbitzuen inguruko agindua martxoaren 8an argitaratu eta jakinarazi du. Greba deialdia publiko egin genuenetik hilabete igaro da eta formalki erregistratu genuenetik 8 egun. Agindua ostiral batean eta greba egunaren bezperan argitaratu du beraz, lan egunei erreparatzen badiegu. Hau, gainera, langileon ordezkari eta grebaren deitzaile garen sindikatuokin inolako aurretiazko bilerarik edota kontrasterik egin gabe.
Portaera hau ohiko bihurtu da Lan delegaritzarentzat. Zerbitzu minimoen aginduak greba egunen bezperetan argitaratzen ditu sistematikoki, eta garai batean sindikatu deitzaile eta administrazioekin gauzatzen zen audentzia fasea gauzatu gabe. Martxoaren 12rako aginduak, urrian eta abenduan egindako greba egunetarako ezarritakoak baino zerbitzu minimo handiagoak ezarri ditu, arrazoibide eta motibazio nahikorik azaldu gabe.
Sindikatuok larunbatean aurkeztu genuen aginduaren aurkako demanda EAEko Auzitegi Nagusiaren aurrean, eta bertan neurri kautelar gisa agindua bertan behera uzteko eskaera gauzatu genuen milaka langileri greba egiteko eskubidea ez ukatzeko. Auzitegiak, greba egunaren aurretik epaia ez aurreratzea erabaki du, greba eskubidearen urraketaren inguruko erabakia prozesu guztia gauzatutakoan ematea ebatziz.
Sindikatuok salatu nahi dugu greba eskubidearen aurkako urraketen aurka bide juridikoa edota bestelako ekintzak gauzatzeko aukerak zapuztea eta gero eta langile gehiago greba eskubiderik gabe uzteko asmoa dagoela jarrera honen atzean.
Izan ere, zerbitzu minimoen aginduetan gero eta zerbitzu minimo handiagoak ezarriz doa Jaurlaritza poliki poliki; greba eskubidea hustuz eta langile publiko gero eta gehiago grebarako eskubide gabe utziz. Osakidetza edo hezkuntza bezalako sektoreetan gutxieneko zerbitzuek milaka langile greba eskubide gabe uzten ditu, lan egun arruntetan lanean dagoen langile kopurua bermatzen ez duen bitartean, greba egunetarako langileen %100a lanera joatera behartuz gutxieneko zerbitzu gisa. Martxoaren 12ko grebari dagokionez, pauso bat gehiago eman du Jaurlaritzak greba eskubideraen urraketa honetan eta hezkuntza publikoko hezitzaile guztiak greba eskubiderik gabe utzi nahi ditu.
Gaur, LAB, ELA, CCOO, SATSE, ESM, SME eta UGTren deialdiari jarraituz, elkarretaratzea egin dute Bilbon, Maria Diaz de Haroko larrialdietako Osakidetzako basearen aurrean, negoziazioa eskatzeko.
Urteak daramatzate Osakidetzaren larrialdietako egoera jasanezina salatzen. Langileen lan-baldintzak okertzen ari dira, eta, gainera, gero eta txanda gehiago daude bete gabe, herritarrei arreta emateko orduan sor daitekeen arriskuarekin. Hori guztia Kudeaketa Talde eta horien arduradunen kudeaketa txarraren ondorioz da; izan ere, ez dira gai Osakidetzako larrialdiak puntako eta kalitatezko zerbitzu bihurtzeko.
Egunez egun egiaztatzen ari den gainbeheraren eta kudeaketa txarraren aurrean, eta Zuzendaritzak zerbitzua hobetzeko borondaterik ez duenez, LAB, ELA, CCOO, SATSE, ESK, SME eta UGT sindikatuok azken hilabeteetan egiten ari garen mobilizazioekin eta protestekin jarraituko dugu, eta, era berean, Zuzendaritzari premiazko bilera bat eskatzen jarraituko diogu, zerbitzuaren arazoak konpondu ahal izateko. Horrela, zerbitzua murrizten jarraitzea eta gero eta prekarioago lan egitea saihestuko da.
Horregatik guztiagatik, zerbitzuaren politika aldatu eta herritarrei kalitatezko arreta bermatzeko benetako negoziazioa egon arte, langileen eskubideak errespetatuz, borrokarekin eta mobilizazioekin jarraituko dugu.
Horrela, martxoaren 24ra arte, Osakidetzako larrialdietako langileek borroka hamabostaldiaeta mobilizazioak egingo dituzte, negoziazioa eta egoera hobetzea lortu arte. Horrela, martxoaren 19an elkarretaratzea egingo dute Donostian, Gipuzkoa Plazan eta martxoaren 22an beste horrenbeste egingo dute Gasteizen, Andra Mari Zurian. Era berean, kanpoko langileei dei egiten diete euren borrokarekin bat egiteko eta bitarte horretan larrialdietako zerbitzuko txandak ez onartzeko.
Euskal Herriko Eskubide Sozialen Kartak, Emakumeen Mundu Martxak eta Gune Ekosozialistak manifestazioak deitu ditugu maiatzaren 11rako Bilbo eta Iruñean Alternatiba Ekosozial Justua aldarrikatzeko. Iruñekoa, 12:00etan abiatuko da Gaztelu Plazatik eta Bilbokoa, 17:00etan Jesusen Bihotzetik.
Irailaren 30ean, Ozaetan, Euskal Herriko Eskubide Sozialen Kartak antolatuta 40 eragiletik gora bildu ziren “Su txikien itsasoa” lemapean egin ziren topaketetan, helburua su-txiki handi guzti horiek aldaketarako itsaso bihurtzeko zoru komuna eraikitzea zen. Hausnarketa horiek abiapuntu, zazpi ardatzetan laburtu dira alternatiba ekosozial justu baten alde eredu ekonomiko eta politikoan eman beharreko eraldaketak.
Mobilizazioen deitzaileak Euskal Herriko Eskubide sozialen Kartak, Emakumeen Mundu Martxa eta Gune Ekosozialista izanik ere, beste hainbat eragilek babesten dituzte gaur aurkeztutako mobilizazioak. Orain arteko bideari jarraiki, datozen hilabeteetan babesak biltzen eta lantzen, eta elkarrekin egindako prozesua eta sortutako konfluentzia jorratzen jarraituko dute.
Alternatiba ekosozial justua beharrezkoa da. Egungo egoerak krisi ekologiko sakonera eta bizitza eta lan gero eta prekarioagoetara garamatza. Erregai fosilei eta ekonomiaren hazkunde infinituaren logikari lotuta jarraitzen dugu. Murrizketek, merkantilizazioak eta prezio altuek elikadura osasuntsua, pentsio duinak edo etxebizitza duina izateko eskubidea ukatzen dute. Zerbitzu publikoak eraisten ari dira. Zaintza lanak funtsezkoak dira, baina egun zaintza sistema publikoa ez dago bermatuta. Matxismoa eta arrazakeria gorantz doaz. Gerrak eta autoritarismoa ugaritzen ari dira. Bitartean, gero eta irabazi handiagoak metatzen dituzte enpresariek, finantza-funtsek, supermerkatu handiek, banketxeek. Egungo gobernuek eta maila instituzionaletik sustatzen dituzten politika publikoak ez nahikoak dira norabide hau aldatzeko. Askotan bide berean sakontzen dute.
Alternatiba ekosozial bat beharrezkoa da. Ekologikoa eta sozialki justua. Honen alde lan egiteko 7 oinarrizko ardatzak oinarrizko adostu dituzte:
Planeta bizigarri bat behar dugu guztiontzat eta horretarako larrialdi klimatikoari eta krisi ekologikoari aurre egin behar diogu.
Eredu ekonomiko eta sozialaren helburua bizitza bizigarriak bermatzea izan behar da, ez negozioa bermatzea.
Lanak, eta bereziki funtsezko lanak eta enpleguak, duindu eta birbanatu behar ditugu. Aberastasuna ere banatu behar da, eta gehien dutenek gehiago ordaindu behar dute horretarako.
Bizitzarako funtsezkoak diren eremuak ez ditugu merkatuaren esku utzi nahi. Elikadura burujabetza, telekomunikazioak edo energia ezinbestekoak dira eta horren alde egin behar da eremu publikotik.
Eskubide guztiak nahi ditugu pertsona guztientzat, denok dugulako bizitza duina izateko eskubidea. Diskriminazio matxista, arrazista edo ezein motakoekin amaitu behar da, eta lehentasunez, Atzerritartasun Legea bertan bera uztea ezinbestekoa da.
Gerra eta gastu militarrari ezezkoa esaten diogu eta gure gizarteen eta ekonomiaren desmilitarizazioa eskatzen dugu.
Egin behar diren eraldaketa guzti hauek ezin dira merkatuaren esku utzi. Plangintza publiko sendoak eta demokratikoki eraikiak behar ditugu.
Horregatik maiatzaren 11n Bilbon eta Iruñean egingo ditugun mobilizazio ekimenetan parte hartzeko deia luzatzen dugu ekimen honen sustatzaileok.
Gipuzkoako egurgintzako hitzarmena 2003tik berritu gabe dago, honek ondorio larriak sortu ditu sektoreko langileengan, askok beraien lan baldintzak eguneratu gabe baitauzkate azken 20 urteotan. LABentzat hau onartezina da, egurgintzako langileek hitzarmena behar dute.
LABek ibilbide luzea egin du hitzarmena berreskuratzeko helburuarekin, 2023ko uztailean negoziaketa mahaia osatzen saiatu ginen baina ADEGIk borondate falta argia erakutsi zuen eta ez zen posible izan negoziaketa mahaia osatzea. Ordutik enpresetan mozioak, sinadura bilketak eta beste hainbat ekintza egin ditugu ADEGIren jarrera aldatzeko.
Horretaz gain ADEGIk pausorik eman ez duenez berriro negoziaketa mahaia osatzeko bilkura deitu dugu martxoaren 12rako.
Gure erronkak argiak dira:
• Eros ahalmena berreskuratu behar da.
• KPIri lotutako soldata igoerak.
• Lanaldi murrizketa.
Azken finean Gipuzkoako egurgintzak hitzarmena behar du eta argi daukagu lortu arte borrokan jarraituko dugula.
Jaurlaritzaren gutxieneko zerbitzuaren aginduak milaka langile greba eskubiderik gabe uzten ditu. Greba eskubidea egikaritzeko neurri kautelarrak epaitegian eskatzea aztertzen ari dira deitzaileak. Bestalde, ehunka asanbladek bat egin dute sektore publikorako deitutako grebarekin.
Eusko Jaurlaritzak eta Estatuko administrazioko ordezkariak plazaratu dute martxoak 12ko grebaren gutxieneko zerbitzuen agindua. Beste behin ere, inposatutakoak dira, ez direlako deitzaileekin negoziatu. Aurreko deialdian gertatu bezala, milaka langile publiko oinarrizko greba eskubidea egikaritu ezinik utziko ditu.
Zerbitzu publikoen gainbehera nabarmena den honetan, hala nola, langile eskasia edo ordezkapen falta, badirudi faktore horiek bat-bateko garrantzia hartzen dutela greba iristerakoan. Azpimarratu behar da, gainera, greba egun bakar bat izanik, guztiz funtsezkoa dena bakarrik bermatu beharko litzatekeela. Ordea, grebarako eskubidearen erabilera oztopatzeko saiakera berri baten aurrean gaude, grebaren eragina gutxiarazteko eta lantokietan normaltasun itxura emateko.
Aginduen edukia ikusita, argi dago erakundeek apustu egin dutela pandemiaren aurretik ezartzen zituen gutxieneko zerbitzuak baino handiagoak iraunarazteko. Pandemia aitzakia ezin hobea izan da gutxieneko zerbitzuak esponentzialki handitzeko, Adibidez:
Osakidetzan: Lehen Arretan jaiegun bateko gutxienekoak ezartzen ziren, eta orain, berriz, larunbat batekoak.
Hezkuntzan: unibertsitatez kanpoko hezkuntza publikoan, zuzendaritzako pertsona bat eta sarrera kontrolatzeko beste bat egon behar ziren. Orain, berriz, irakasle bat egon behar da hezkuntza etapa bakoitzean, eta horri Haur Hezkuntzako eta Lehen Hezkuntzako 100 ikasleko beste pertsona bat batu behar zaio.
Gainera heziketa bereziko hezitzaileen kasuan, zerbitzu minimoak handitu dituzte, eta utzi ditu praktikan kolektibo horretako langileria guztia greba eskubiderik gabe. Horren aurrean, agindua errekurritzea eta greba eskubidea egikaritzea ez oztopatzeko neurri kautelarrak eskatzea aztertzen ari gara.
Bestetik, azken egunetan ehunka asanblada egiten ari dira lantokietan. Bertan, langileek harriduraz eta atsekabez ikusten dute sektore publiko osoko bi greba egun egin ostean eta hirugarrenaren atarian, erakundeek sektore publikoa indartzeko eta horiek aurrera eramaten dituzten langileen lan baldintzak hobetzeko erakusten duten borondate eza. Izan ere, bozkatzeko kultura dagoen eskualdeetan, aldeko botoa nagusitzen ari da egindako bozketa guztietan (udaletan, eskoletan etab…). Ondorioz, martxoaren 12ko grebaren jarraipena zabala izango dela espero dute sindikatuek.
