![[BIDEOA] Bizkaibus borrokan](https://www.lab.eus/wp-content/uploads/2014/10/materiala_argazkiak_zerbitzuPublikoak_garraioa_14_10_23Bizkaibus_BizkaibusBideoa.jpg "[BIDEOA] Bizkaibus borrokan")
Albaro González (CAVSA) eta Iban Ureta (TCSA) LABeko delegatuek Bizkaibuseko gatazkaren gakoak azaldu dizkigute.
Blog Page 1183
«Gazteontzako lan eskubideen gida», pauso bat aurrera LAB eta Ernairen arteko aliantzan
LAB eta ERNAIk duela urte beteko aliantzari jarraikiz, gazteen lan eskubideak jasotzen dituen gida aurkeztu du Bilbon. Gida aliantzaren ondorioa da eta gazteei geroa ukatzen dien sistemaren aurka borrokarako tresna izatera dator eta unibertsitatean, langile heziketa zentroetan, kalean eta enpresetan zabalduko da. Bigarren fase batean, gazte antolakundeak eta LABek gazteen lan eskubideen defentsan mobilizazioak iragarri dituzte.
«Gazteontzako lan eskubideen gida», pauso bat aurrera LAB eta Ernairen arteko aliantzan
Bi erakundeek “Gazteontzako lan eskubideen gida” aurkeztu dute gaur komunikabideen aurrean.
Ainhoa Etxaidek bi antolakundeen arteko aliantza kokatu du, Maiatzaren Lehenaren testuinguruan aurkeztu zena.
Aliantza honen helburuak honakoak lirateke. Batetik, langile eta gazte mugimenduen indarrak batu egoera aldatzeko borroka indartzeko. Konpartitzen dugun oinarri sendoena hori da: egoera hau ez dugu onartzen, ez dugu egoeraren aurrean gobernuek egiten ari direna onartzen eta ez dugu egiten dutena errespetatuko, egiten dutenaren kontra borrokatuko dugu egoera aldatu dezagun.
Bigarrenik, Ernai eta LABen arteko lankidetza antolatu borroka eskaintza eraginkor eta egoki bat egiteko. Maiatzaren lehenetik hona horretan ibili gara. Elkarlan eremuak zehazten, borrokan bat egiteko bideak arakatzen, bakoitzak bere eremuan borrokatzeko barne lanak egiten.
Aliantzaren emaitza da “Gazteontzako lan eskubideen gida”, bereziki kezkatzen gaituelako euskal gazteriaren egoera lan munduari dagokionez.
Etxaideren esanetan, gazteek beren aldea bete dute, inoizko gazteriarekin trebatuena eta prestatuena dugu. Eskaintzen zaien bakarra prekarietatea da eta bazterketa soziala da.
Ikasketak bukatuta gazteak ez dute eskubiderik eta ez dute eskubideak sortzeko aukerarik. Hiru aukera dituzte, familiari lotuta jarraitu, kanpora alde egin edo bazterketa soziala. Aurrekoaren ondorioz, kasurik onenean, guztiz prekarioa den enplegu bat onartzera behartuta daude. Gogoratzekoa da gazteen arteko langabezia %40tik gorakoa dela.
Etxaidek aipatu du bizi proiektu duin eta autonomo bat eraikitzeko eskubidea ukatzen zaiela gazteei. Hori da gaurko sistemaren errealitatea, egungo gobernuen politika bakarra gazteriari begira.
Egoera guztiz aldatuko litzateke gazteak lan munduan modu duin batean sartzeko aukera izango balute. Baina lan merkatuan sartzeko aukera lapurtu egiten zaie hartzen diren neurriekin: jubilazioak atzeratzea, enplegua sortzeko neurririk ez hartzea, gazteak kontratatzeko bide egokirik ez ezartzea eta gazteen kontratazioa lagunduko duten benetako bideak antolatzea.
Lan mundura sartzeko bideak guztiz prekarioak dira neurri handi batean; praktika kontratuak, krisi honetan nagusitzen ari diren kontratu partzialak… Norabide honetan nabarmentzekoa da instituzioen utzikeria. Adibidez, Eusko Jaurlaritzak orduan 3 euroko soldatak aurreikusten ditu bere gazteentzako planean.
Gazteak lan mundura nola sartzen diren erreparatuz egin da gida. LABen arabera sarbide duinen alde borrokatu behar dugu, gazteei euren burua defendatzeko eta euren eskubideen alde borrokatzeko tresnak ziurtatu behar dizkiegu.
Etxaideren arabera, ezin dugu errealitate honen aurrean beste alde batera begiratu eta LABen aldetik norabide hirukoitzeko lerroa finkatuko dugu. Lehenik, gazteak antola daitezen eta borroka dezaten laguntzea. Bigarrenik, borrokak bateratzea. Eta hirugarrenik, gazteen lan eskubideen aldeko borroka sindikala indartzea.
Gidak hiru norabidetan aurrera egiteko balio duela esanez amaitu du bere interbentziao Etxaidek. Egoeraren ezagutzea eta egoerari aurre egiteko tresna egin da gazteek borroka hau antolatu dezaten. Bestetik, gazteak lan merkatuan sartzeko dauden bide ankerrak gure indarrak batuz salatu eta borrokatuko dituen lerrorako tresna da. Hirugarrenik, lan munduan egoera hauek borrokatzeko konpromiso sindikalak hartuko ditugu: praktiken jarraipena, negoziazio kolektiboan klausula zorrotzagoak, egoera zehatzen salaketa…
Jarraian, Ernaiko bozeramaile Irati Sienrak hartu du hitza eta gidaren arrazoiak azalduz hasi du bere interbentzioa. Alde batetik, urrats berria da LAB eta Ernairen arteko aliantzan.
Gazteak lan merkatuan bakarrik daudela sinestarazi nahi dietela aipatu du, eskubide eta informazio gabe. Hasi berriak direnaren aitzakiapean esplotatu egin nahi dituztela. Gazteek bizi duten prekarietate basatia ez da kasualitatea. Bestetik, lan merkatu harremanak eraldatu nahi ditugunok, egoera zein den jakin eta borrokatu behar dugu (ditugun eskubideak eta eduki beharko genituzkenak). Gidak gazteria eta borroka sindikalaren arteko ekinbidea eta gazteria eta sindikatuen arteko harremana estutzen ditu.
Gida hau gazteen lan eskubideak zeintzuk diren ezagutzeko tresna da, gazte langileen atomizazioa gaindituz. Kapitalaren aurrean eta eskubideekin aberasten direnen aurrean antolatzeko beharra azalerazten du. Eskubideen murrizketa eta ukazioa etengabe ematen dela agerian uzteko tresna bezala kokatu du gida. Bestalde, inposatutako prekarietatearen aurrean gazteek burujabetza behar dutela aldarrikatzeko tresna da.
Gidaren edukiei dagokionez, kontuan hartu behar da borrokarako tresna bat dela. Informazioa emateaz gain praktikara begira tresna da, antolakuntza eta borrokarako tresna. Lau ataletan dago banatuta:
– Lan merkatuan sartu aurretik kontuan hartzekoak. Hemen gazteen lan bila daudenean kontuan izan beharrekoak jasotzen ditu, ABLEak zertarako diren, bekadun moduan dituzten eskubideak…
– Lan kontratuaren inguruko zehaztapenak. Dauden kontratu motak, bakoitzaren ezaugarriak…
– Behin kontratua sinatuta, kontuan hartzekoak. Nomina, lan osasuna, hitzarmen kolektiboak…
– Lan kontratuen amaiera. Kaleratzearen aurrean zer egin, nora jo…
Aurrera begirakoak ere izan ditu mintzagai Irati Sienrak. Gidaren zabalpena izango da aurrena. 12.000 ale argitaratuko dituzte. Zabalpenerako, hiru eremu identifikatu dituzte. Lehenik eta behin, hezkuntza, unibertsitate eta lanbide heziketako zentruak. Bertako gazteak dira gero lan merkatuan erarik prekarioenean sartuko direnak. Hitzaldi eta tailerrak antolatuko dituzte. Bigarrenik, kalea, gazteen borroka espazio naturala ere badelako. Herri eta eskualdeetan ere zabalpenerako ekimenak burutuko dituztela adierazi du. Eta hirugarrenik, enpresetan.
Zabalpenaz gain, aurrera begira ildo mobilizatzaile bati ekiteko asmoa dutela adierazi dute, gazteen eskubideen defentsan, eskubideak ezagutzetik borrokatzera igarotzeko.
Irakurri, zabaldu eta borrokatu
Gazteontzako lan eskubideen gida [PDF]
Guía de derechos laborales para jóvenes [PDF]
Akordio faltan Bizkaibuseko langileak greba deialdiekin aurrera jarraitzen dute
Atzo sindikatuak eta Bizkaiko Aldundia Bizkaibusen bizi den egoera desblokeatzeko bilera izan zuten. Egun osoan luzatu zen bileran, naiz eta aurrepausu batzuk eman elkarrizketetan, sindikatuek ez dute Aldundiarekin lanpostuak eta egungo zerbitzuak mantenduko dituen akordiorik lortzeko aukerarik ikusi, eta beraz mobilizazio eta greba egunekin jarraituko dutela adierazi dute. Gaur bertan, 10:00etan EITBko egoitzatik hasiko den manifestazioa deitu dute.
LABek Osakidetzaren EPE iragarpena hauteskunde propaganda hutsa dela deritzo
Gaurko Mahai Sektorialeko bileran, Osakidetzako Zuzendaritzak egin duen proposamena guztiz ez-nahikoa izan da. Osakidetzak ez du zentzuzko proposamenik jarri mahai gainean modu errealista batean ez baitie heltzen batasun sindikalaren aldarrikapen biei.
Bertaraturiko sindikatuok tristura handiz ikusi dugu Osakidetzak zelan galtzen zuen sektorean aurreikusita dauden lanuzteak gelditzeko aukera. Osakidetzak 2014-2015 epealdian deitu nahi dituen 2 EPE prozesutan zentratu egin du negoziatzeko proposamena. Balizko EPE hauek barne promoziorako 474 plaza eta deialdi librerako beste 474 ekarriko lituzkete, baina kategoriak eta epeak zehaztu gabe.
LAB sindikatuak honako EPE iragarpenari hauteskunde propaganda hutsa deritzo eta enplegu suntsiketa izkutatzen duela baieztatzen dugu. Orain arte lanean aritu den langile kopurua egonkortzeko, 2018 urte bitartean 15.000 plaza finko sortu beharko lirateke. Gure kalkuluen arabera, 2018ra bitartean 4000 langile inguru jubilatuko dira; beraz, 2104-2105 urteotako jubilazioen %10 eta %50 soilik kubrituko lituzkeen EPE bati buruz aritzeak gainontzeko %90 eta %50ak deuseztatuko direla esan nahi du.
Orain da garaia batasun sindikala irmotasunez defendatu eta mobilizazioen egutegiarekin aurrera egiteko. Gaur bertan, ehunka langile mobilizatu gara zentro guztietan, bertan zeuden erabiltzaileen erabateko elkartasunez eta animoz. PNV eta Darponen propagandak, EPE berriak proposatuz, ospitale berriak eskainiz eta inaugurazioz inaugurazio korrika ibiliz, ez du inor engainatzen. Euskal jendarteak oso argi dauka osasun publikoa defendatzen ari garela. PNVren esku dago konponbidea.
LABek azpikontratetako enplegu eta lan-baldintza duinak defendatzeko ekimena aurkeztu du
Ainhoa Etxaide eta Xabier Ugartemendiak, garbiketa, eraikuntza, lorezaintza, egoitzak, garraioak, mantenua, anbulantziak, kiroldegiak, telefono-arreta eta jantokietako delegatuek lagunduta, azpikontratetan klausula sozialak sartzeko ekimena aurkeztu dute gaur komunikabideen aurrean.
Lan eta zerbitzuen azpikontratazioa Euskal Herriko instituzioetan agintean egon diren alderdiena da, nagusiki EAJ, PSE eta UPNrena. Politika interes ekonomiko pribatuen mesedetan jartzearen argibide argienetakoa da. Dimentsio nabarmena duen arazoa du, zerbitzuak etengabe pribatizatzeko politikaren ondorio. Praktika honek negozio biribila suposatu du enpresarientzat, diru publikoz finantziatua. Honek irabazien gorakada ekarri du, prekarietatearen kontura.
Bide pribatizatzaile hau bi gezurretan oinarritu da. Lehena, kudeaketa pribatua publikoa baino hobea dela, errealitatearekin talka egiten duena, azpikontratazioek zerbitzua kaltetzen baitute. Bigarrena kosteak merketzeari buruzkoa da. Argudio hau ez da eusten enpresa azpikontratatzailerearen irabazi-marjina bermatu behar delako.
Azken urteotako azpikontratazioen bilakaera betikoen, boterearen lagunak diren enpresarioen mesedetan dagoen menpeko politikaren adibide argiena da.
Lehenik eta behin, enplegu suntsiketa. Zerbitzu bera eskaintzen da, aurrekontu berdinarekin finantzatua, murriztutako plantilekin.
Bigarrenik, muturrueko prekarizazioa, errentagarritasuna bermatu lan erreforma baliatuz. Emaitza, zerbitzuaren kalitatea kaltetzea, prekarietatearen eta langileen lan-baldintza kaskarren ondorioz.
Hirugarrenik, aurrekontu publikoaren azpitik egiten diren eskaintzak.
Egoera honen aurrean, LABek konpromiso argiak eskatzen dizkie instituzioei enplegua bermatu eta lan-baldintzak hobetzeko. Era berean, eskatzen du gai honetako politika enplegua eta langileak babestea izan dadila eta ez enpresariei irabaziak bermatzea.
LABek borondate politikoa eskatzen du egoera hau gainditzeko, enpresarien irabazien gainetik langileen interesak lehenetsiz, aurrekontu berdinarekin.
Horretarako, azpikontratazioetan klausula sozialak sartzea eskatzen du; instituzio bakoitzak, bere esparruan, kontratu publikoak eskuratzeko baldintzak zehaztea. Neurri ezberdinak dira, hiru alderditan zentratzen direnak, enplegua (subrogazioa, aukera-berdintasuna), lan-baldintzak (hitzarmena, lan-osasuna…) eta kalitatea (euskara).
Posible da. Zentzu honetan, mozioak aurkeztu dira zenbait udaletan, Donostia eta Mungian, adibidez. Bihar aurkeztuko da Gipuzkoako Aldundian. LABek horrelako eskariak egingo ditu Bizkaia eta Arabako Aldundietan; Bilbo, Iruñea eta Gasteizko udaletan eta Gasteiz eta Iruñeko Gobernuetan. Ekimen hau instituzio eta ente publiko guztietara hedatu beharko litzatekeela ere uste du LABek, alderdi politikoekin batzartuko da horretarako.
Ekimen hau lan-zentruetara ere eramango du LABek, zenbait euskarri informatibo dituen kanpainaren bidez.
LAB: «Nafarroa osoan euskara ofiziala izan arte lanean jarraituko dugu»
PSN-ren orain arteko jarrera inmobilistei, edo orain arte Nafarroan aldaketari behin eta berriz ateak isteko bete duen paperari, erreparatzen badiogu, pausu positibotzat jo beharko genuke gaurkoa balorazioa Vascuenceren legean aldaketak egiteko proposamena.
PSN, I-E eta NaBai alderdi politikoek, azto Nafar parlamenduan, Vascunceren legean aldaketak egiteko porposamena aurkeztu zutela jakin dugun honetan, LABen balorazioa kaleratzea ezinbestekotzat jo dugu, euskararen normalizazioan ere lanean dihardugun eragilea izanik.
PSN-ren orain arteko jarrera inmobilistei, edo orain arte Nafarroan aldaketari behin eta berriz ateak isteko bete duen paperari, erreparatzen badiogu, pausu positibotzat jo beharko genuke atzokoa.
Hori hala da, baina ezin dugu ahaztu planteatzen duten aldaketa ”zonalde ez baskofonoetan” euskaraz ikasteko aukera zabaltzea suposatzen duela, beti ere gaur egungo zonaldeen sistema auzitan jarri gabe, eta praktikan honetarako aukerak mugatuak izaten jarraituko dutelarik, kontuan izan behar dugulako “zonalde ez baskofonoetan” D eredua ezartzeko eskuduntza Nafar Gobernuari dagokiola.
Nafar guztiak, bizi diren lekuan bizi direla, euskaraz bizitzeko aukera izan behar dutela da gure aldarria, herritar guztiak izan behar dituzte hizkuntz eskubide berdinak, hortaz Vascunce legea aldatu ordez lege hau bertan behera utzi eta Nafarroa osoan euskara ofiziala izan arte lanean jarraituko dugu.
LAB, gure sindikatua
Egoera politiko, ekonomiko eta sozialak bultzatuta Euskal Herrian bizi dugun errealitatearen aurrean sindikatuari sortzen zaizkion erronkak azaldu eta haiei aurre egiteko langileok elkarrekin LABen borrokatzeak duen garrantzia azpimarratzen duen bideoa.
Hauteskunde sindikalen epealdi garrantzitsuenean sartzera goaz eta sindikatua bertatik indarberritua ateratzeak langileok eta euskal herritarrok aldarrikatzen dugun aldaketaren bidean urratsak emateko aukerak biderkatuko ditu. Eta horregatik, Guk LABekin batera egin nahi dugu bidea.
Aldaketarekin bat egiten duten langilez bete da Labrit
LAB sindikatuak ekitaldia burutu zuen atzo Labrit Pilotalekuan, hauteskunde sindikalen garai trinkoari hasiera emateko. Ikasturte honetan Nafarroako ordezkaritza sindikalaren erdia baino gehiago berrituko da. LAB maximo historikoetan (%13,43) eta hazten ari dela ekingo dio garai trinkoari.
Ekitaldiaren protagonistak LABek lantokiz lantoki duen ordezkaritza eta afiliazioa izan zen, hauek baitira aldaketaren benetako motore. Honela, Zerbitzu Publikoak, Zerbitzu Pribatuak eta Industriako Federazioetan kokatutako 200 enpresa baino gehiagotako ordezkariak blokean atera ziren oholtza gainera, azken urteetan izandako lorpenetako batzuk azalduz: sektore publikoaren defentsa, entxufismoaren kontrako borroka (Iruñeko Udala), Donapeako expolioaren gelditzea, jardunaldi murrizketa (Altsasuko hirugarren adineko egoitza), enpleguaren sorrera (Argal), blindajearen bidez lan erreforma bertan behera uztea (Dornier, ISN), ETTak sartzen ez uztea (TRW), aukera berdintasuna (KYBSE), kaleratzeak bertan behera uztea (LEDR), kontratazio berrientzako lan baldintzen berdintzea (Norton)…
Era berean, gazte, prekario eta pentsiodunek ere parte hartu zuten. Pentsiodunen arloko Juanjo Lautrek 70. hamarkadako borroken lorpenak aipatu zituen eta garai horretan lortu ahal izan ez zen aldaketa gaur lortzeko dauden aukerak baliatu beharra azpimarratu, Ernaiko Maialen Etxeberriak prekarietatearen kontra eta eredu ekonomiko eta sozial berriaren alde borroka egiteko gazteriaren borondatea azaldu duen bitartean.
Azken interbentzioa LABeko Nafarroako bozeramaile Igor Arroyok egin zuen: “Herri garaipenei balioa eman behar zaie, txikiak izanagatik ere. Eta Kapitalaren erasoen aurrean geure jendearen eguneroko erresistentzia txikiei ere eman behar zaie balioa. Gaurko erresistentzia txikiak baitira biharko aldaketaren hazia”.
Hauteskunde sindikalei buruz, Arroyok ohartarazi zuen ez direla hauteskunde garbi eta demokratikoak izango, orain arte izan ez diren bezala. “Hala balira, UGT eta CCOO ez ziren helduko ordezkaritza sindikalaren erdira ere. Hauteskunde sindikaletan putxerazoak ematen dira egunero-egunero. Patronalak arma guztiak erabiltzen ditu sindikalgintza borrokalariari bidea itxi eta UGT edo CCOO sustatzeko, jakin badaki bi sindikatu horiek bere eskutik jango dutela”.
LABeko bozeramaileak La Moreako McDonald’s-en adibidea jarri zuen, non senideak lan kontratuarekin Colombiatik ekartzeko agindu baitzien Enpresak hainbat langileri, UGTren izenean aurkeztearen truke. “Patronala, UGT eta CCOOen arteko tratu lotsagarri hauek lantokiz lantoki errepikatzen dria, Nafarroako Gobernuak beste aldera begiratzen duen bitartean. Izan ere, UGT eta CCOO dira UPN eta Erregimena eror zitezen eragotzi duen oinarri soziala. UGT eta CCOOek prebendak jasotzen dituzte, izan Caja Madrideko kreditu txartel beltzak, izan Andaluziako EREen dirua, izan Nafarroan bakoitzak urtero jasotzen duen 7 milioi euroak. Zorionez, langile duintasun ekintzak biderkatzen ari dira eta horri esker LAB da aurten gehien hazi den sindikatua. Entxufismo, putxerazo eta diru publikoaren xahuketa ez dira nahikoak izan UGT eta CCOOen erorketa eragozteko: 50 ordezkari galdu dituzte urte hasieratik, eta askoz gehiago galduko dituzte. Jada ordezkaritzaren %53a baino ez dute biltzen”.
Arroyok LABen ordezkaritza lantokiz lantoki hazteko deia egin zuen. “Guk ez dugu nahi, beste batzuk egiten duten bezala, hazi haztearren. Guk hazi nahi dugu, Nafarroan aldaketa sozial eta politikoaren akuilu izateko. Denon artean tira egin beharra dago Erregimena behera bota arte”.
Ekitaldia zehar hainbat ikuskizun izan ziren (besteak beste, Internazionalaren interpretazio ineditoa Txalapartarekin) eta Lluis Llach-en L’estacaren doinuaz dantzatutako zinta-dantzarekin amaitu zen, Erregimena behera bota beharra sinbolizatuz. Amaitu ostean, kalejira egin zen Labritetik Sarasate Pasealekura, "Kalera, Kalera"ren doinuekin, nafar presoen eskubideen aldeko asteroko enkarteladan parte hartzeko.