2024-06-25
HomeEkintza PolitikoaLan erreformari aurre egiteko proposamenak helarazi dizkiegu aurka bozkatu zuten Euskal Herriko...

Lan erreformari aurre egiteko proposamenak helarazi dizkiegu aurka bozkatu zuten Euskal Herriko alderdiei, Eusko Jaurlaritzari eta Nafarroako Gobernuari

Urte hasieran Espainiako Kongresuan onarturiko lan erreformak ez zituen konpondu langileriaren arazo nagusienak, ezta 2012ko lan erreformaren neurri atzerakoienak indargabetu ere. Euskal Herrian erreformaren neurri okerrenei muga jartzeko aukera daukagu, eta LABek horri begirako proposamena garatu du. Bi patronalei aurkezteaz gain, Euskal Herriko alderdiei dagokienez, Euskal Herria Bildu eta Eusko Alderdi Jeltzalea izan ziren aurka bozkatu zuten alderdi bakarrak eta eurei ere aurkeztu diegu proposamena.

Hauxe da aurkeztu diegun dokumentua:

Urtarrilean bertan esan genuen euskal bide orri bati ekiteko momentua zela, izan ere, ez zen kontraerreformarik egon, CEOEren garaipen bat baizik: ez zen indargabetu aurreko lan erreforma eta neurririk atzerakoienak bere horretan mantendu ziren. Orduan ere, lan erreformaren aplikazioa oztopatu behar genuela genion eta Euskal Herrian bertan borrokatu behar genuela langileriak beharrezkoa duen eraldaketa sakona. Bide horretan proposatu genuen Euskal Herrirako Lan kode proposamena.

LABek lanean jarraitu du azken hilabete hauetan ere. Egoerak eskatzen duelako, langileriaren pobretzea egunez egun zabaltzen ari den errealitatea delako, lan erreforma desaktibatzeko eta langileriaren lan eta bizi baldintzak hobetzeko akordioak lortzeko garaia dela uste dugu. Bide horretan, CEN eta Confebask patronalei proposamen zehatza helarazi genien, materia zehatzeko bost akordioren bidez Hego Euskal Herriko langileon gutxieneko lan baldintzen bermea adosteko helburuz. Azaroan jaso zuten gure proposamena eta oraindik ez dugu inolako erantzunik jaso euren aldetik. Akordio horiek sinatzeak langileon lan baldintzak nabarmen hobetzea ekarriko luke, horregatik, bi patronalei geure eskakizunei entzungor egiteari utzi eta akordioen aldeko jarrera hartzeko deia luzatzen diegu.

Jakin badakigu ordea patronalak ez direla euren kasa mugituko, jendartearen eta instituzioen presioa sentitzen ez badute ez behintzat. Horregatik erabaki genuen Euskal Herriko alderdi, instituzio zein eragile sindikal eta sozialekin ere gure proposamena konpartitzea. Espainiako Estatuko Kongresuan lan erreformaren aurka bozkatu zuten alderdi politikoei aurkeztu diegu batetik (Euskal Herria Bildu eta Eusko Alderdi Jeltzalea), baita Eusko Jaurlaritzari eta Nafarroako Gobernuari ere, gure proposamenaren inguruko euren posizionamendua eta babesa eskatuz, eta euren jarrera akordioen aldekoa izatea espero dugu.

Datozen hilabeteetan ere, gehiengo sindikala osatzen duten gainerako sindikatuei eta eragile sozialei gure proposamena azaldu eta akordio horiek gauzatzeko lanean jarraituko dugu. Akordio zabalak osatzeko garaia da, lan erreformari langileon eskubideak defendatuz aurre egitekoa. Euskal Herrian egingo dugu Madrilen posible ez dena!

AZKEN ALBISTEAK | ÚLTIMAS NOTICIAS

Bero boladen aurrean garatu beharreko ekintza sindikalaren inguruko prestakuntza eman diogu 350 delegaturi

Iaz, lantokietan beroaren arazoari aurre egiteko gida argitaratu genuen Lan Osasuneko idazkaritzaren eskutik. Gure egoitzetan zein sarean eskuragai dagoen argitalpen honek gero eta ohikoagoak diren diren bero egunen aurrean garatu beharreko ekintza sindikalerako proposamenak jasotzen ditu, lan osasunaren arloan prebentzioak duen garrantzia azpimarratuz. Aurten, gaiaren inguruko prestakuntza saioak antolatu ditugu Araba, Bizkaia, Gipuzkoa eta Nafarroan. Industria, Zerbitzu Pribatuak eta Zerbitzu Publikoetako Federazioetako 350 delegatuk hartu dute parte egin diren 16 saioetan.

Espainiar Estatuko langile publikoentzako soldata igoera inposatua da eta erosahalmenaren galeran sakontzen du Hego Euskal Herriko langileentzat

LABen ez dugu ontzat ematen bihar Espainiako Gobernuko Ministro Kontseiluak Estatu osoko langile publikoentzako (*) onartuko duen %2ko igoera gehi %0.5eko baldintzatutako gehigarria.

Zumarragako posta zerbitzuaren egoera onartezina da

Plantillari dagokionez, lanpostu huts ugari daude; adibide gisa, goizeko txandako langileen egoera; izan ere, egun batzuetan 5 pertsona baino ez daude bete beharreko 13 lanpostutarako, hau da, % 62 ez da betetzen. Zoritxarrez, egoera hori oso ohikoa da lantoki honetan. Plantillak hainbat elkarretaratze egin ditu langile-falta salatzeko, baina arazoa ez da hobetzen hauteskunde-aldiaren ondoren, eta enpresak ez du inolako asmorik kontrataziorik egiteko. Uztailaren 7an oporraldian sartuko gara eta oporretara joango diren langileak inork ez dituela ordezkatuko aurreikusten da.