LABek Santurtziko Udalari eskatzen dio gertatutakoak berehala ikertu ditzala, ardura politiko zein mota guztietakoak argitu ditzala eta gertakari larri hauek berriz gertatu ez daitezen beharrezko neurri guztiak hartu ditzala.
Udal poliziaren esku-hartze bortitza tarteko, aste honetan santurtziar gazte bat hil da. Esan gabe doa familia, lagun eta gertukoei gure dolumin sentikorrenak helarazten dizkiegula. Gertakariak argitzeko LABentzat ezinbestekoa da barne ikerketa bat abiatzea. Esku-hartzearen zergati, nolakotasun eta ondorioak zeintzuk izan diren argitu behar da, horiekiko ardurak eskatzeko eta beharrezkoak diren ondorioak ezartzeko.
LABetik argi dugu egun indarrean dagoen polizia ereduari eusteak eta eztabaida ukatzeak edo geroratzeak ondorio larriak dituela. Interbentziorako arrazoi eta moduetan, armen erabileran eta oro har segurtasuna ulertzeko eta bermatzeko moduetan eraldaketa sakona egitea ezinbestekoa da. Formakuntza baliabideak sortu eta eskaini behar dira horretarako, jarduera polizialaren gainbegiratzea zorroztu, eta taserren eta arma hilgarrien erabilera debekatu.
Hori horrela, udal mailan egingo diren beste ekimenez harago, langileon ordezkariokin urgentziaz gaiari heldu behar diogulakoan gaude. Santurtziko eta Kabiezeseko jaien atarian gaude eta berehalako kontingentzia neurri batzuk hartu behar direla uste dugu, jarrera bortitza izan duten udaltzain konkretu hauek egindakoa areagotu ez dadin. Ezinegona eta tentsioa areagotu daitezkeen honetan, udal gobernuak helburu horri begira dagokion ardura bere gain hartu behar du.
Bukatzeko, adierazi nahi dugu gertakari traumatikoa dela, bai. Pertsona baten heriotza atzera bueltarik ez duen ondorio tamalgarria da eta etsipena dakar. Baina gertukoen mina ez sakontze aldera, hauen prozesuak errespetatzeko eta enpatiaz aritzeko deia zabaldu nahi dugu. LABek bere esku dagoena egingo du norabide honetan ere.