2024-06-18
HomeEkintza SindikalaIruñea-Tuterako San Juan de Dios ospitaleko langileek ez dute "low cost" langileak...

Iruñea-Tuterako San Juan de Dios ospitaleko langileek ez dute “low cost” langileak izaten jarraitu nahi

Mobilizazioa egin dute Iruñeko Udaletxe plazan, zuzendaritzari negoziatu dezala eskatzeko. Enpresa-batzordeak 5 hilabete daramatza 2022ko abenduan bukatu zen hitzarmen kolektiboa berritu nahian. Soldata duinak eskatu ditu, bizitzaren garestitzearen eta KPIaren arabera eguneratutakoak.

Negoziazioa oso konplexua eta zaila gertatzen ari dela salatu du enpresa-batzordeak, “oztopo bat bestearen atzetik”. Hilabete hauetan, Giza Baliabideen burua eta Pertsonen eta Balioen arduraduna ez dira eskura egon, negoziazioak eten egin dira, eta orain zentroko zuzendaritzak oso jarrera itxia hartu du. Horren ondorioz, zenbait mobilizazio egin behar izan dituzte langileek, eta gaur, Udaletxe plazan elkarretaratzea egin dute, egoera jendaurrean salatzea beste aukerarik ez dutelako ikusten.

Enpresa batzordeak salatu du zortzi urte daramatzala zuzendaritzaren aitzakia berdinak entzuten: “Ez dago itunik Osasunbidea-Nafarroako Osasun Zerbitzuarekin. Osasunbideak ez ditu tarifak eguneratzen. Osasunbideak oso gutxi ordaintzen du”.

Langileek adierazi dute, osasun arloko profesionalak diren aldetik, erabateko dedikazioarekin atenditzen dituztela herritar guztiak. Eta halaxe segitu nahi dutela, “baina asko lan egiteaz eta gutxi kobratzeaz nazkatzen hasi gara”, gaineratu dute.

Zehaztu dute hiru legegintzaldi igaro direla, kolore bateko eta besteko gobernuak pasa direla, eta ez direla gauza izan hitzarmen edo itun serio eta iraunkor bat arautzeko. “Batzuk eta besteak erkidego honentzat funtsezkoa eta beharrezkoa den osasun arretaren kontura aberasten dira bidegabeki. Eta horrekin ere nazkatzen hasi gara”, gaineratu dute.

Nazkatuta daude ikusten dutelako azken urteotako gobernuak eta zentroko zuzendaritza ez direla gai aspalditik agintzen dieten akordioa adosteko eta aurrera eramateko.

Nabarmendu dute egoera horretan, eurak direla pagaburuak, San Juan de Dios ospitaleko zuzendaritzaren gaitasun eta interes falta ordaintzen dutenak. Egunero-egunero eta urtero-urtero artatzen dituzte pazienteen beharrak, euren bizkarren gainean motxila handi bat dutela. Pazienteen % 95 osasun sistema publikotik datozela gaineratu dute.

Osasunbidearen marka zuria izateaz nazkatuta daudela adierazi dute. “Sektore publikoarekin konparatuta, jasaten dugun soldata-arrakala izugarria da, eta gero eta handiagoa izanen da”, gaineratu dute. Soldatak KPIaren arabera igotzea eskatzen dute, gero eta pobreagoak ez izateko, baina enpresak tinko segitzen du proposamen guztiei atea itxiz.

Salatu dute gauza bat edo bestea dela, 8 urte daramatzatela egoera berean. Eta gaineratu dute poz handiz ospatuko dutela Sanferminetako Txupinazoaren jaurtiketa, sinatutako hitzarmen on batekin iristen badira, soldata duinekin, bizitzaren garestitzearen eta KPIaren arabera eguneratutakoak. Gaineratu dute 5 puntuko aldea dagoela langileek eskatzen dutenaren eta zuzendaritzak eskaintzen duenaren artean.

AZKEN ALBISTEAK | ĂšLTIMAS NOTICIAS

Nafarroako etxebizitzen alokairuari buruzko datuek erakusten dute premiazkoa dela gaia legez arautzea eta parke publikoa zabaltzeko konpromiso handiagoa hartzea

Iragan ortziralean Nafarroako Estatistika Institutuak Etxebizitza alokatzeari buruzko estatistika argitaratu zuen. LAB sindikatuaren iritziz, ikerketa horrek berresten du merkatuak ez duela alokairuaren prezioa behar bezala erregulatzen eta premiazkoa dela lege eta administrazio neurriak hartzea. Azterlan horren arabera, alokairuaren hileko batez bertzeko prezioa 541,6 eurokoa da, baina azterketak berak onartzen du datu horrek ez duela islatzen alokairuko etxebizitza bat eskuratzeko prezio erreala, etxebizitza librearen prezioa askoz ere garestiagoa baita.

Gernikako Ospitalean erizainen eta erizaintzako laguntzaileak falta direla eta egoera kritikoa dela salatu dugu

Larrialdietako paziente kritikoei arreta ematean, triajean eta boxetan dauden pazienteen segurtasuna arriskuan jartzen da.

Eskola garraioaren hitzarmena desblokea dezatela exijitzeko mobilizazioa egin dugu

Kolektibitateen sektoreko patronalaren enpresetako bat den Eulenen aurrean izan da elkarretaratzea, Eusko Jaurlaritzako Hezkuntza Sailaren mendeko ikastetxeetako eskola-garraioko eta jolastokiko zaintzaileen hitzarmen kolektiboaren negoziazioaren blokeoa salatzeko.