2024-06-18
HomeEkintza SindikalaBergaran lan istripua izan duen langile bat oso larri dago

Bergaran lan istripua izan duen langile bat oso larri dago

Asteazken arratsaldean lan istripu larria gertatu zen Bergarako Embalan3 enpresan. Enpresako langilea, kamioi bat zamatzen ari zela, zama gainera erori eta azpian harrapatuta geratu zen. Une honetan langilea oso larri zaurituta dago erietxean.

2024a ere gogor kolpatzen ari da euskal langileria. 25 hildako dagoeneko istripuetan, eta ehunka zauritu, zer esanik ez laneko gaixotasunei dagokienez. Bitartean patronalak, sistemaren komunikabideek eta jaurlaritzako arduradunek absentismoaz hitz egiten digute, langileon ardura balitz bezala euren aberastasuna sortzen dugun bitartean lanean hiltzea.

LAB sindikatuak irmoki salatu du lan osasunerako araudia betetzen ez duten enpresariek langileak hiltzen dituztela, eta halakoak zigorgabe ezin direla geratu azpimarratu du.

Zamatze lanak hainbat arrisku eragiten ditu eta istripu honetan salatu behar dugu larriki zauritutako langilea bakarrik ari zela egiten prozesu guztia. Zarata handi bat entzutean, kabinan zegoen garraiolaria jabetu zen langileari zama gainera erori zitzaiola. “Nola liteke pabilioi osoan langile bakar batek bere gain hartu behar izatea ardura hori?”, hausnartu du LABek. Sindikatuak sarritan aldarrikatu izan du garraiolariek leku seguruan egon behar dutela enpresako langileek zamatze lanak egiten dituzten bitartean, baina zamatze lan horiek, lan arriskutsuak diren heinean, hainbat langileren artean koordinatuta egin behar dira.

Honela, LABekazpimarratu du enpresek zamatze prozedurak garatu eta abian ipini behar dituztela, horietan jardungo duten langileen arriskuak aurreikusi eta beharrezkoak diren neurri guztiak ezarriz.

Guzti honen aurrean, araudia betetzen ez duten enpresariak eroso daude Eusko Jaurlaritzaren konplizitatearekin, LABek adierazi duenez. Osalan inolako ahalmenik ez duen aholkularitza bilakaturik eta lan ikuskaritza apenas ikuskaririk gabe, patronalak inpunitaterako ingurumari ezin hobea dauka eta langileriak bere osasuna urratuaz ordaintzen du.

Datorren asteartean, maiatzak 28, LAB, ESK, STEILAS, Hiru eta EHNE-Etxaldek osatzen duten intersindikaletik mobilizazioa deitu dute Bergarako San Juan auzoko Larramendi industrialdean, azken istripu hau salatzeko Embalan 3 enpresaren atarian, 12:30ean.

AZKEN ALBISTEAK | ÚLTIMAS NOTICIAS

Nafarroako etxebizitzen alokairuari buruzko datuek erakusten dute premiazkoa dela gaia legez arautzea eta parke publikoa zabaltzeko konpromiso handiagoa hartzea

Iragan ortziralean Nafarroako Estatistika Institutuak Etxebizitza alokatzeari buruzko estatistika argitaratu zuen. LAB sindikatuaren iritziz, ikerketa horrek berresten du merkatuak ez duela alokairuaren prezioa behar bezala erregulatzen eta premiazkoa dela lege eta administrazio neurriak hartzea. Azterlan horren arabera, alokairuaren hileko batez bertzeko prezioa 541,6 eurokoa da, baina azterketak berak onartzen du datu horrek ez duela islatzen alokairuko etxebizitza bat eskuratzeko prezio erreala, etxebizitza librearen prezioa askoz ere garestiagoa baita.

Gernikako Ospitalean erizainen eta erizaintzako laguntzaileak falta direla eta egoera kritikoa dela salatu dugu

Larrialdietako paziente kritikoei arreta ematean, triajean eta boxetan dauden pazienteen segurtasuna arriskuan jartzen da.

Eskola garraioaren hitzarmena desblokea dezatela exijitzeko mobilizazioa egin dugu

Kolektibitateen sektoreko patronalaren enpresetako bat den Eulenen aurrean izan da elkarretaratzea, Eusko Jaurlaritzako Hezkuntza Sailaren mendeko ikastetxeetako eskola-garraioko eta jolastokiko zaintzaileen hitzarmen kolektiboaren negoziazioaren blokeoa salatzeko.