2024-04-22
HomeUncategorizedGrebalariak ASKE! plataformak mobilizazio sozialen kontrako jazarpenaren eta errepresioaren areagotzea salatu du

Grebalariak ASKE! plataformak mobilizazio sozialen kontrako jazarpenaren eta errepresioaren areagotzea salatu du

Grebalariak ASKE! plataformak prentsaurrekoa eskaini du gaur batez ere greba orokorren testuinguruan ematen ari den jazarpenaren eta errepresioaren areagotzea salatzeko. Modu berean, dei berezia egin die arlo sozial eta sindikalean lanean ari diren pertsonei eta herritar guztiei, lanean jarraitzeko, errepresioaren aurrean ez kikiltzeko, auzipetutako pertsona guztiei elkartasuna adierazteko eta maiatzaren 30eko greba orokorrean parte hartzeko. 

GREBALARIAK ASKE! Plataformaren 

Maiatzaren 30ean beste Greba Orokor bat deituta dago Euskal Herrian. Greba hori beste aurrerapauso bat izango da gure eskubideen defentsan, egunetik egunera gero eta gehiago murriztu, mugatu eta zapaltzen dizkiguten eskubideen defentsan. Aurrekoetan gertatu den bezala, greba eguna hurbiltzen den neurrian hemen sistema kapitalista basati honi eusten diotenek errepresioa areagotzeari ekin diote.

Hala, azken asteotan Iruñeko 5 gazte epaituak izan dira, Estafeta kalean ustezko pikete batean gertatutako eraso batzuengatik, nahiz eta gazte horietako batzuk handik hurbil ere ez zeuden eta beste batzuek inolako erasoan parte hartu izana ukatzen duten. Bestetik, fiskaltzak 4 urtera arteko espetxe zigorrak eskatu ditu Gasteizko 7 pertsonarentzat, martxoaren 29ko greban Xuban Nafarrate gazteak pairatu zuen eraso bortitza salatzeko kontzentrazio batean parte hartzeagatik. Eta orain dela gutxi jakin dugu fiskaltzak espetxe-zigor eskaera neurrigabea egin duela Deustuko Greba Asanbladako kideak diren Bilboko 3 gazterentzat: 42 urte guztira, 14 bakoitzarentzat. Azken kasu hori muntaia polizial hutsa da, polizien deklarazioetan soilik oinarrituta dago. Sindikatuen manifestazioa Bilboko epaitegiaren albotik pasatzean krisiaren kontrako margoketak egiten ari zen talde bat atxilotzen saiatu zirenean bi ertzaini egindako eraso bat hiru gazte horiei leporatu nahi diete.

Ez da kasualitatea mugimendu sozialetako kideen kontrako eta sistema sozial eta ekonomiko justuago baten alde lan egiten duten pertsonen kontrako eraso horiek guztiak hurrengo greba baino aste batzuk lehenago gertatzea. Azken greba orokorraren aurretik, Gernikako pikete baten kontrako epaiketa egin zen: 72 urteko espetxe-zigorra eskatzen zuten azkenean absolbituak izan ziren 18 pertsonarentzat. Halaber, greba baino egun batzuk lehenago, Ertzaintzak Imanol Gonzalez gaztea atxilotu zuen Balmasedan, sindikatuen aurreko deialdian gertatutako eraso bat leporatuz. Eta Iruñerrian greba guztien ondoren grebalari asko atxilotuak izan dira, hainbat delitu leporaturik. Azkenik, Xuban Nafarrateren kasua gogorarazi nahi dugu: martxoaren 29ko greban oso eraso bortitza pairatu zuen, eta gaur egun bera dago inputatuta, bi kiderekin batera. Berak jarritako salaketa artxibatua izan da, baina familiak helegitea jarri du.

Kasu horiek guztiak salatzeko asmoz, Grebalariak Aske! plataformatik prentsaurreko bateratu hau antolatu dugu. Hemen dira Deustuko, Gernikako, Gasteizko, Iruñerriko, Lizarrako, Balmasedako eta Bilboko auzipetuetako batzuk, beraien senide eta lagunekin batera. Hemen bildu garenok mobilizazio sozialen kontrako jazarpenaren eta errepresioaren areagotzea salatu nahi dugu, batez ere greba orokorren testuinguruan.

Hemendik, dei berezia egin nahi diegu arlo sozial eta sindikalean lanean ari diren pertsonei eta herritar guztiei, lanean jarraitzeko, errepresioaren aurrean ez kikiltzeko, auzipetutako pertsona guztiei elkartasuna adierazteko eta, nola ez, maiatzaren 30eko greba orokorrean parte hartzeko. Halaber, maiatzaren 30ean langile guztien greba eta mobilizazio eskubideak babesteko eskatzen diegu Gasteizko eta Iruñeko Barne sailetako arduradunei.

Azkenik, Grebalariak Aske! plataformatik gogoratu nahi dugu mobilizazio eta ekimenen dinamika bat jarriko dugula abian Bilboko 4 gazteren kontrako auzia artxibatzea eskatzeko. Ahal beste eragile sozial eta sindikalen inplikazioa eta ahalik eta herritar kopururik handienaren atxikimendua lortzen saiatuko gara. Aitor, Irantzu, Jon eta Urtzi errugabeak dira, ez dago leporatzen zaien erasoan parte hartu izanaren inolako frogarik, guztia poliziaren bertsioan oinarrituta dago, eta astakeria hutsa da bakoitzarentzat 14 urteko kartzela eskatzea. Era berean, horrelako muntaia eta ekintza errepresibo guztiak buka daitezela eskatzen dugu.

Maiatzaren 30ean denok grebara, eskubide sozial eta laboral duinak bermatuko dituen Gutun Sozialaren defentsan.

 

 

LAB SAREAN
{module[111]}

    

AZKEN ALBISTEAK | ÚLTIMAS NOTICIAS

LABek ez du sinatu EAEko anbulantzietako aurreakordioa, hilabete luzetako borrokan planteatutako gutxieneko hobekuntzak ez baititu jasotzen

Anbulantzietako langileentzat Osakidetzako lankideekiko homologazioa eta soldataz haragoko bestelako hobekuntzak alde batera utzi dituzte azken asteetan LABi bizkar emanda aritu diren ELA, CCOO eta UGTk. LABek ez du sinatu aurreakordioa.

Patronalaren eta instituzioen utzikeriak dirauen bitartean prekaritateak hiltzen jarraitzen duela salatu dugu Gasteizen

Iragan asteburuan bi Euskal langileren heriotzen berri izan dugu, garraiolari bat Lleidan eta langile autonomo batena, Gasteizen. Gure elkartasuna eta besarkada beroena hurbilekoei.

Euskal Herriko Pentsiodunen Mugimenduak iragarritako Herri Ekimen Legegileari babesa adierazi dio LABek, gutxieneko pentsioak 1080 eurotara premiaz osagarritu daitezen

Atzo, apirilak 19, milaka euskal pentsiodun atera ziren kalera. Gasteizen egindako mobilizazioan, 1080 eurotako gutxieneko pentsioa behingoz berma dadin 170 udaletan baino gehiagotan aurkeztutako mozioak izan zituzten hizpide, baita horren segida izango den lantzen dabiltzan Legez besteko Proposamena ere. LABek mugimenduaren aldarriekin bat egiten du eta ekimen berri hau babesten duela adierazi du.