Gaur, maiatzak 27, Euskal Autonomi Erkidegoan Lanbide Heziketako matrikulazio aldia irekitzen da eta LAB sindikatuak Lanbide Heziketako ikasle berriak D ereduan matrikulatzeko deia egiteko eskaera luzatu nahi die.
Hurrengo ikasturterako, Lanbide Heziketako eskaintza:
| A | D | Eredu mixtoa | Guztira | A (%) | D (%) | Eredu mixtoa (%) | |
| Araba | 81 | 4 | 32 | 117 | 69,23 | 3,42 | 27,35 |
| Bizkaia | 215 | 32 | 108 | 355 | 60,56 | 9,01 | 30,42 |
| Gipuzkoa | 67 | 89 | 101 | 257 | 26,07 | 34,63 | 39,30 |
A eta D ereduetako eskaintza ikusirik eta eleaniztasuna guztion ahotan dagoen honetan, nekez lortuko dela euskaldun eleanitzak sortzea euskararen ezagutza bermatzen ez duen eskaintzen bidez.
Aparteko azterketa merezi du AD edo eredu misto gisa ezaguna den eskaintzak. Oinarrian, AD eskaintzak ikastetxe horretan A eta D ereduak eskaintzen direla adierazi nahi du. Gela osatzeko legeak ezartzen duen kopuru minimora iristen ez diren kasuetan (azken urteetako murrizketek gogortu dituzten kopuruak), eredu mistoaren aukera ematen da. Eredu mistoa gaztelerazko ziklo bat da non D ereduaren aukera egin dutenek modulu batzuk euskaraz jaso ahal izango dituzten. Eredu mistoa, euskaldun kopuru txikia duten zonalde soziolinguistikoetarako edota hiriburuetarako irtenbide gisa planteatzen da. LAB-en iritziz, ordea, azken urteetan D ereduak izan duen igoerara (eta horrek sortzen duen errealitate soziolinguistiko berrira) egokitu eta bide horretan garatu ez den eredua da, askotan inor kanpoan ez uzteko aitzakian euskarazko ereduaren kaltetan ezartzen dena, euskara bere lurraldean baztertzen duena.
Euskarari dagokionez, Lanbide Heziketako argazkia izoztua gelditu da, arrotzak zaizkigun eta zaharkituak gelditu diren lege eta arauek ezartzen duten galgaren baitan, ez aurrera eta ez atzera. Egoera honen erakusle, Hezkuntza Sailaren menpeko irakasleen %70-80-k 2. hizkuntza eskakizuna edukitzea eta soilik lanpostuen %30-20ean eskatzea, irakasle hauen lan itxaropen eta aukerak guztiz kaltetuz.
Zorionez, legeek egin ez dutena, irakasleen ahaleginari esker eta herri ekimenetik egiten ari da. Materialgintza arloan, eskuliburu eta material ezberdinak euskaratzeko muxutruk egiten den lana, Ipar Euskal Herriko ikasleei lanbide heziketa euskaraz egiteko mugikortasun programak martxan jartzea… Eguneroko lan horrekin, egunez egun Euskal Herriak behar duen eredua eraikitzeko baldintza berrik sortzen ari gara. Euskararen normalizazioan aurrera egiteko oztopo zaizkigun legeak gainditu eta eredu euskalduna egunez egun eraikitzen goaz.
Lanbide Heziketaren euskalduntzeak funtsezko ekarpena egingo dio lan munduan euskararen normalizazioari. Era berean, lan zentroetan martxan jartzen diren euskalduntze plangintzak edota langileen iniziatibei hauspoa ematen die. Horretarako, Lanbide Heziketak bere osotasunean euskalduntzeko, egoera irauli eta plan integrala behar du, besteak beste, euskarazko eskaintza ziurtatu dadin, lanpostuen hizkuntza eskakizunak epe arrazoitu batean aldatu eta euskararen ezagutza derrigorrezkoa izan dadin, ikas-material euskalduna sortzeko (eskuliburuak, aplikazio informatikoak,…) , enpresetako praktikak ere euskaraz egin ahal izateko, eskola eta lan munduaren arteko euskalduntze prozesuek elkarri elikatu diezaioten…
Hau guztia errealitate bilakatzeko, euskaraz ikasi, lan eta bizi biziko diren ikasleek, herritarrek hartu behar dute hitza. Testuingurura bueltatuz, deialdi honekin amaitu nahi dugu: datorren ikasturtean Lanbide Heziketa aukeratu eta ziklo bat burutuko duen orori, D ereduan matrikulatzeko deia egin nahi diegu, etorkizun oparo eta kalitatezko enpleguaren alde gaurdanik urratsak emateko.
{module[111]}