Gora Garbitzaileak kolektiboaren oharra:
GORA GARBITZAILEAK kolektiboa kaleetara bueltatu da gaur Bizkaiko garbiketako hitzarmenaren blokeoa salatzeko. Martxoan sortu genuen GORA GARBITZAILEAK kolektiboa, LAB eta ESKren babesarekin, eta ordutik hainbat ekimen burutu ditugu Bizkaiko garbiketako sektoreko borroka berotu asmoz. Izan errepide mozketak, zein enpresen okupazioa, hitzarmenaren blokeoaren arduradunak direnak seinalatu genituen ekimen ikusgarrien bitartez.
GORA GARBITZAILEAK bueltan da eta gaur CEBEK aurrean eserialdia egin dugu eta bertan kateatu gara. Argi daukagu patronalek ardura handiena dutela hitzarmenaren blokeoan eta haiek hitzarmena blokeatzen badute guk patronala blokeatuko dugu. Jada ez daukagu ezer galtzeko, 6 greba egun egin ditugu oraingoz, oraindik ere dena daukagu irabazteko eta prest gaude haiek seinalatzeko eta duintasun osoz dagokigunagatik borrokatzeko, izan okupazio, eserialdi zein mozketen bitartez.
Argi esan nahi dugu hitzarmen duin bat sinatu arte borrokan jarraituko dugula, blokeoan diharduen edozein seinalatuz. Bizkaiko garbitzaileontzat baldintza duinak lortu arte aurrean izango gaituzte, izkutatuta nahi gaituzte baina gu borrokaren lehen lerroan kokatu gara jada eta hor egoten jarraituko dugu.
Honengatik guztiagatik, argi izan dezatela guren eskubideen defentsan borrokan jarraituko dugula. Garbitzaileok kaleetan aurkituko gaituzte eta aurrez aurre izango gaituzte. Ezkutuan lan egitetik kaleak hartzera pasatu gara eta honek ez du atzera bueltarik. Horregaitik, hitzarmena blokeatzen badute guk patronala blokeatuko dugu gure helburuak lortu arte.
