Gipuzkoako Esku Hartze Sozialeko langileek beren aldarrikapenak barnebilduko dituen hitzarmena aldarrikatzeko manifestazioa egin dute Donostian. 10 hilabete pasa dira negoziatzen hasi zirenetik, eta Hedatzen patronalak negoziazioa blokeaturik dauka.
LAB, ELA eta CCOO sindikatuok plataforma bateratu bat egin genuen, aldarrikapen nagusi modura langile publikoen soldatarekin ekiparazioa eskatuz, langile publikoak garelako eta horretarako bidean jarri garelako. Patronalak argi esan digu ez daudela ekiparazioarekin ados. Hau da, Esku Hartze Sozialeko sektorea negozio parametroetan ulertzen dute, eta ez gizartearen beharrak asetzeko zerbitzu publiko gisa. Eurek eros-ahalmena mantentzeaz soilik mintzo dira, baina ez dute inondik inora gaur egungo sistema iraulzteari buruz hitz egin nahi. Argi dugu guk ere langile publiko izan beharko genukeela, lan berdina egiten baitugu, eta horretarako lehen pausua ekiparazioa izan behar da.
Aurrerapausoak ematen hasteko garaia da bai mahi negoziatzailean, bai lan zentroetan, bai kalean. Artatzen ditugun pertsonek zerbitzu hobe bat jasotzeko ezinbestekoa da gure lan baldintzak hobetuko dituen Hitzarmen Kolektiboa erdiestea. Hau mobilizazio zikloaren hasiera da, langile indarraz merezi dugun hitzarmena lortzeko, langile borrokaz lortuko duguna.