Enpresa batzordea osatzen dugun sail sindikal guztiok, aipatu itunarekin bat etorri ginen, hartan bi hileko epean lanetik bota zituzten 5 langileak berriro hartuko zituztela agintzen zelako, eta Hitzarmen Kolektiboaren urraketekin bukatzeko kontsultak egiteko aldia zabaltzen zelako. Gaur, maiatzak 15, kaleratutako bost langileak oraindik ez dira lanean hasi eta Hitzarmen Kolektiboaren ez betetzeen zerrenda loditu baino ez da egin, enpresa-zuzendaritzak gobernu taldeak egindako eskaintza ekonomikorik onenari uko egin eta gero. Gauzak horrela, argi geratu da Aldi Baterako Enpresa-Elkarteak hasieran gatazka konpontzeko omen zuen nahia iruzur hutsa izan dela.
%1eko soldata-igoerari eta aurtengo zein aurreko urteei loturiko arrazoi partikularretako egunei dagokienez, Udalak eta enpresak akordioa lotu omen badute ere,(akordioa ez dago erabat itxita, eta egoera ikusita, zaila ikusten dugu benetan gauzatzea, enpresa-zuzendaritzak ezarritako blokeoagatik), honek ez luke gatazka erabat konponduko, enpresa-zuzendaritza gure 5 lankideen berrartzea baldintzatzen ari delako gobernu taldearekin egiten ari diren negoziazioekin. Enpresaren asmoa akordio ekonomikoa lortzea da. Hau agerian geratu da enpresak Gasteizko Udalaren azkenengo eskaintza ekonomikoa errefusatu duenean.
Maiatzaren 2an, gobernu taldeak 72 ordutako epe berria eskatu zigun sail sindikalei, aldi baterako enpresa-elkartearekin, in extremis, akordioa lotzen saiatzeko. Hasieran ezarritako epea agortua zela gogorarazi genion arren, epe berria onartu genuen gure borondate ona adieraziz, beti ere, gatazka konpontzeko helburuarekin. Gaur arte inolako akordiorik gauzatu ez denez momentuz, eta negoziaketarako epea gehiago luzatzen ari direnez, LAB sindikatuko sail sindikalak argi adierazi nahi du, gure lankide guztien eskubideen alde jardungo dugula eta gurekiko hartu diren konpromisoak betetzen ez badira, beharrezkoak diren bitarteko guztiak erabiliko ditugula gure eskubideak errespeta ditzaten.