Euskal gehiengo sindikaletik pentsio publikoen defentsan mobilizatu gara Bilbon eta Iruñean, Espainiako Gobernuaren delegaritzen aurrean. LABeko idazkari nagusiak hartu du hitza Bizkaiko hiriburuko elkarretaratzean, eta larunbaterako pentsiodunen mugimenduak deitutako mobilizazioekin bat egiten dugula jakinarazi du.
Garbiñe Aranburuk gogorazi bezala, Madrilgo Gobernuak pentsioen erreforma berriari ateak ireki dizkio. Neurri horietako batzuk erretiro aurreratua zigortzea, erretiro-adina luzatzea, pentsio-plan pribatuak zabaltzea edo pentsioak kalkulatzeko kotizazio-urteak handitzea dira. “Neurri horiek guztiak pentsioen sistema publikoaren aurkako beste eraso bat dira”, adierazi du LABeko idazkari nagusiak.
Garbiñe Aranbururen hitzetan, “ez da gutxieneko pentsiorik ezartzen, eta ezin dugu ahaztu emakume pentsiodunek pairatzen duten diskriminazioa zuzentzeko neurririk ere ez dagoela; zaintza-lanak egin dituzten emakumeei, sektore feminizatu eta prekarizatuetan lan egin dutenei eta misieriazko pentsioak jasotzen dituztenei begira”.
Pentsiodunen mugimendua pentsio duinen alde borroka eredugarria egiten ari dela nabarmendu du, eta adierazi du gai izaten ari direla asteroko mobilizazio-dinamikari eusteko, konfinamenduan bakarrik gelditu dena. “Langile guztioi dagokigu pentsio publiko duinen alde borrokatzea. Horregatik, sindikatuok eta Euskal Herriko Eskubide Sozialen Kartako eragileek eta beste sindikatuek bat egin dugu larunbateko mobilizazioekin”.
Euskal Herrian argi eta garbi agertu dugu 2011ko eta 2013ko erreformen eta bi lan-erreformen aurka gaudela. Pentsioen gaia ere aldarrikapen nagusien artean egon zen, azken greban. “Koronabirusak erabat aldatu ditu gure bizitzak, baina aldaketen alde borrokatzen jarraitzen dugu. Zentzu horretan, larunbatekoa mobilizazio egun garrantzitsua izatea nahi dugu. Eta kalean jarraituko dugu, greba eta mobilizazio berriak etorriko dira, pentsiodunekin batera pentsio publiko duinak borrokatzen jarraitzeko, lan duin baten alde edo kalitatezko zerbitzu publikoen eta zaintza-sistema publiko baten alde”.