2024-09-20
HomeEkintza SindikalaLanuzteak eta mobilizazioak egingo ditugu ekainaren 2an, Aiaraldearen etorkizunaren alde

Lanuzteak eta mobilizazioak egingo ditugu ekainaren 2an, Aiaraldearen etorkizunaren alde

Datorren ekainaren 2rako lau orduko lanuztea eta mobilizazioak deitu ditugu Aiaraldean euskal gehiengo sindikaletik, eskualdeko hainbat eragile sozialekin batera, “SOS Aiaraldea” leloarekin. Laudion egingo dugu manifestazioa goizez eta Amurrion, arratsaldez.

Hauxe da sindikatuok eta eragileek osatutako manifestua:

– Aiaraldearen egoera kezkagarria da gaur egun, enpresen itxierak, kaleratzeak, lan-baldintzen prekarizazioak eta eskualde honen aldeko apustu argi eta irmoaren konpromiso instituzional ezak eraginda. Etorkizunik gabe geratzen ari gara.

– Gaurko ekitaldian aldarrikatu dugun bezala, sareak ehuntzen ari dira eragile sozial, sindikal eta Aiaraldeko hainbat mugimenduren artean (enpresa-batzordeak, euskal gehiengo sindikala, gazteak, mugimendu feminista, pentsiodunak, merkataritza eta ostalaritza, hezkuntza, zerbitzu publikoak… besteak beste). Horregatik, eskualde gisa erantzuteko deia egiten dugu, eta gaur “eskualdeko fronteak” bide berri bati ekiten dio etorkizunari begira.

– Zentzu horretan, lanuztea orain arte egindakoaren pausu handi eta logiko bat da eta etortzear dagoen guztiaren urrats berria. Indar-erakustaldia egingo dugu, eta sektore eta mugimendu horiek guztiak bat eginda mobilizazio-egunean parte hartzeko eta egun horretarako deitutako manifestazioetan parte hartzeko deia egiten dugu.

– “S.O.S. Aiaraldea” lelopean, 4 orduko lanuztea deitu da ekainaren 2rako (asteazkena), 10:00etatik 14: 00etara, sektore guztietan, saltokietan eta ostalaritzan izan ezik; izan ere, egun horretarako deitutako manifestazioetan negozioak itxiko dituzte eta protesta bisualak egingo dituzte haien erakusleihoetan.

Bi manifestazio izango dira ekainaren 2an:

-Lehenengoa goizeko 11:00etan deitu dute, Laudioko Herriko Plazatik irtenda.

-19:00etan Amurrion izango da bigarren manifestazioa, Amurrioko Herriko Plazatik (Juan de Urrutia Plaza) irtenda.

Aiaraldea larrialdi egoeran dago. Defenda dezagun gure etorkizuna.S.O.S. Aiaraldea!

AZKEN ALBISTEAK | ÚLTIMAS NOTICIAS

Bilboko hiribilduaren mantentze elektrikoari buruzko agiri teknikoa inpugnatu dugu, hitzarmena ez betetzeagatik

2024ko irailaren 4an, Bilboko Udalak argitara eman zituen Bilboko argiteria publikoaren eta instalazio elektriko eta osagarrien mantentze- eta kontserbazio-zerbitzuaren lizitazio berriaren agiri teknikoak. Agiri horietan, Bilboko Argiakeko 39 langile agertzen dira langile subrogagarri gisa, eta subrogazio-zerrendatik kanpo geratzen dira mantentze elektrikoko zerbitzuko obren atalari atxikitako 9 pertsonak.

Karrera profesionala guztiontzat exijitu dugu

Sindikatuak Nafarroako Parlamentuaren aurrean elkarretaratzea egin du gaur goizean helburu bikoitz bati jarraiki: batetik, ateez bestaldean izenpetu behar zen akordioa ospatzeko, zeinaren bitartez Osasunbideko 3.000 langile baino gehiagorentzako karrera profesionala onartuko baita; eta bestetik, eskubide hori bera gainerako langileentzat ere zabal dadila aldarrikatzeko. Egun historikoa dela nabarmendu dute, borroka sindikalaren beharra eta garrantzia azpimarratzearekin batera.

Pentsioen inguruko akordio berriak erretiro adina atzeratzen du eta pauso berri bat suposatzen du gizarte segurantzaren pribatizaziorantz

Gaur, Pedro Sanchez buru dutela, sinatu dute CCOO eta UGT sindikatuek eta CEOE eta Cepyme patronalek pentsioen alorrean adostutako akordio sozial berria. Akordio hori estatu-mailan egin da, eta legezko adina eta kotizazio-urteak igotzen jarraitzea du helburu, erretiro adina atzeratzea sustatuz. LABen uste dugu akordio honek ez diela erantzuten euskal gehiengo sindikalak eta Euskal Herriko Pentsiodunen Mugimenduak aurkeztutako premiazko eskaerei. Aitzitik, Espainiako Gobernuak aurrera egiten du Bruselatik garatutako politika neoliberaletan, betiere patronala babesten duten sindikatuen bermearekin.