Joan den asteazkenean, enpresarekin negoziazio mahaia egin genuen. Azkenengo mahaia maiatzean izan zen, aurrera eramandako 6 greba egun eta hamaika mobilizazioen aurretik; ondorioz, enpresaren proposamena desberdina izango zelakoan geunden.
Ez zen horrela izan. Garbialdi 2017ko ekainean botatako eskaintza hura errepikatzera mugatu zen: %0,3ko igoera 2017rako eta %0koa gainontzeko urte guztietarako. Urteak igaro dira aldarrikapen argi batekin borroka hau piztu zutenetik: Udalhitzeko 6. Mailarekin ekiparatzearena, alegia, horrek suposatuko lukeen %6,54ko soldata igoerarekin. Administrazioko soldatetara ekiparatzea, administrazioaren egiturazko-parte bat garelako.
Pasa den abenduaren 5etik astero mobilizatzen ari gara. 50 protesta baino gehiago aurrera eraman ditugu ordutik.Igarotako hilabete guzti hauek, ahuldu beharrean, gure burua antolatzeko eta boteretzeko erabili ditugu. Honaino helduta, gaur, aurrera egitearen aldeko apustua egin dugu.
Gaur egin den asanbladan, mobilizazioak areagotzea erabaki dugu. Modu honetan negoziazioa desblokeatzeko gai ez bagara, grebara irtengo gara berriro ere. Eta asanbladan adostu dugun bezala: greba hori, maiatzean burututakoa baino gogorragoa izango da.
Momentuz, hurrengo asteartean, urriaren 16an, 11:30ean Bilboko Foru Jauregiaren aurrean kontzentrazioa egingo dugu, berriro ere lanbasak altxatuz.