UGTk jarritako helegitea onartu du Gasteizko 2. Administrazio Auzitegiak. Epaile batek ebatzitakoaren arabera, 2021eko deialdi publikoko Udaltzaingoaren lan poltsarako ez da euskararen B2 maila behar. Ondorioz, ebazpenean bertan, epaileak B2 maila ez duten hautagaiak atzera onartzeko agindu du. Administrazio publikoaren eremuan euskararen erabileraren normalizazioa oztopatu nahi duen eraso larria dela uste dugu. Sindikatu baten interes korporatiboek lagunduta, berriz ere, euskal hiztunon oinarrizko eskubideak zapalduak izango dira, hau da, euskaldunok are gehiago diskriminatuko gaituzte.
LABen ustez, euskararen normalizazioak herri-akordio zabalak behar ditu. Bada garaia Administrazioa euskalduntzeko hizkuntza-politika ausartak egiteko eta behar bezala blindatzeko eta, horretarako, eragile sindikal, sozial eta politiko ororen ekarpena ezinbestekoa izango da. Egun, tamalez, edozein ebazpen judizialek urteetako ahalegina, euskal jendartearen bultzadaz lortutako urratsak zapuztu ditzake.
LAB sindikatuak herritarrekiko hurbiltasunean eta integrazioan oinarritutako tokiko polizia-eredu bat defendatuko du, komunitatea eraikitzen laguntzeko aktiboa; eta horretarako, besteak beste, udaltzain euskaldunak behar ditugu, herritar guztion hizkuntza eskubideak errespetatuak izan daitezen.
Euskararen kontrako erasoen aurrean, euskal langile publikoon mobilizazio eraginkorra antolatzeko eta, euskalgintzako eragileekin batera, irmoki erantzuteko garaia da.