2024-04-25
HomeEkintza SindikalaEuskararen aurkako oldarraldiak ez du etenik

Euskararen aurkako oldarraldiak ez du etenik

LAB eta ELA sindikatuok Euskal Herrian euskaraz bizi eta lan egiteko euskaldunon eskubidearen aurkako eraso berri bat salatu dugu. Izan ere, joan den astean jakin genuen administrarien 119 plaza egonkortzeko Gipuzkoako Foru Aldundiak (GFA) deitutako prozesua epaitegietara eraman dutela. Oraingoan ere lanpostu hauek duten beharreko baldintza den Hizkuntza Eskakizuna dago auzitan. Ez dakigu zein izan daitekeen ekintza horren atzean dagoen benetako intentzionalitatea baina ezin dugu onartu euskal herritarren eta euskal langileon hizkuntza eskubideak kolokan jartzea.

Euskararen normalizazioa euskal langile mugimenduaren lanabesa da, euskaraz biziko den Euskal Herriko administrazio publikoak euskaraz funtzionatu behar baitu, euskara ez dakiten herritarren hizkuntza hautua errespetatuz beti eta non nahi.

Urraketa hori salatzeko  GFAko Langile Batzordea osatzen dugun gehiengo sindikalak elkarretaratze batera deitu ditugu GFAko langile nahiz kargu politikoak eta baita euskal eragileak ere. Foru Aldundiak bat egin du deialdiarekin, erakutsiz, gipuzkoarron zerbitzura dagoen heinean, bere ardura eta betebeharra ere badela euskara sustatzea eta defendatzea.

Gauzak horrela, batetik euskaraz lan eta bizitzen jarraitzeko deia egiten dugu, mobilizazio dinamikari eutsiz. Bestetik, indar politikoei behar diren aldaketa legalak egin ditzatela eskatzen diegu, bizi dugun ameskaiztoak aurrera baitarrai.

Euskal Herrian euskaraz lan eta bizi nahi dugulako, euskaldunon hizkuntza eskubideen alde borrokatzen jarraituko dugu.

AZKEN ALBISTEAK | ÚLTIMAS NOTICIAS

Euskara baztertzailetzat jo eta hizkuntzaren normalizazio prozesua kolpatzen duen enegarren epaia

Euskal administrazioa euskalduntzeko prozesuaren aurka pairatzen ari garen oldarraldiaren barruko epai berri bat ezagutu dugu. Kasu honetan, Donostiako Administrazioarekiko Auzien Epaitegiak Eibarko udaltzain lanpostu baterako euskara-eskakizuna frogatu beharretik salbuetsi ditu hautagaiak ezohiko egonkortze deialdi batean, hautagaietako batek jarritako helegitea partzialki onartuta.

Lan osasuna bermatzeko prebentzioa jorratzea premiazkoa dela aldarrikatu dugu sindikatuok

Gaur, Laneko Segurtasun eta Osasunaren Nazioarteko Egunaren bezperetan gauden honetan, LAB, ESK, STEILAS, EHNE-Etxalde, HIRU eta CGT (Nafarroan) sindikatuok osatzen dugun intersindikalak irmoki salatu dugu langileok gure osasuna jokoan ipintzen dugula, bizitza duin baterako diru sarrera nahikorik bermatzen ez duten enpleguetan.

Nafarroako Arartekoak Hezkuntzari gomendatu dio Lanbide Heziketan diharduten PTak ere “saritu” ditzala

LABek eskatuta, Patxi Verak zuzentzen duen erakundeak Hezkuntzari eskatu dio beharrezko neurriak har ditzala Lanbide Heziketako PTei ere aplikatzeko DBHra atxikita daudenek jasotzen duten soldataren %5,45eko osagarria.