2024-04-25
HomeEkintza SindikalaPribatizazioarekin amaitzea eta zaintza lanetan diharduten langileen lan-baldintzak duintzea eskatu dugu

Pribatizazioarekin amaitzea eta zaintza lanetan diharduten langileen lan-baldintzak duintzea eskatu dugu

Kotxe-karabana eta kontzentrazioa egin ditugu Donostian, Gipuzkoako Foru Aldundiaren egoitzaren aurrean. Zaintzaren arloan ari diren langileen izaera publikoa nabarmendu dugu, zaintzarekin negoziorik ez egitearen eskaera luzatzarekin batera. KPIa bermatu eta ratioak hobetzea ere eskatu dugu.

Aski ezaguna da Gipuzkoako herritarrentzat zaharren egoitzetan, esku hartze sozialean, etxez etxeko laguntza zerbitzuan eta aniztasun funtzionalean lanean diharduten langileon egoera larria. Horregatik, LABetik bizi dugun egoeraren erantzule zuzenak diren Gipuzkoako Foru Aldundiko agintariak darabilten jukutria salatu nahi dugu. Urteak dira, gure gobernanteek patronalarekin eskutik helduta, zaintza lanekin lotutako lanpostuak pribatizatzeari ekin ziotenetik. Ordutik, negozio bilakatu dira zahar egoitzak, etxez etxeko laguntza, aniztasun funtzionalari loturiko zerbitzuak, esku hartze sozialean barnebiltzen direnak eta enpresa pribatuen irabaziak bihurtu dira lehentasuna, kalitatezko zaintza eta gizarte zerbitzuak jasotzeko eskubidearen ordez.

Joera kapitalistaren baitan, zaintzaren merkantilizazio prozesuan eta emakume* langileen prekarizazio prozesuan sakondu eta benetan funtsezkoak diren zeregin hauei etekin ekonomikoa ateratzeko apustua egin zuten.

Gipuzkoako Zainketa eta Gizarte Politiketako Departamentuaren menpe dauden azpisektore guztiak antzeko egoeran aurkitzen dira pribatizazioaren eraginez.

KPIaren bermerik ez dago zaintza eta gizarte zerbitzuetako langileentzat. Soldata igoerak langileen ordezkarien eta patronalaren artean hiTzarmen bidez adostu behar diren arren, negoziazio kolektiboa erabat baldintzatzen du Gipuzkoako Foru Aldundiak, zerbitzu gehienen titular eta finantziatzaile nagusiak izanik, berak mugatzen duelako enpresa-elkarte gehienen negoziaziorako gaitasun ekonomikoa. Gaur gaurkoz aipaturiko sektoreetan ez dago langileei eros ahalmena bermatzeko inolako ziurtasunik.

Gehiegizko lan karga jasanezinak ezartzen ditu Aldundiak zerbitzu guztietan, kasu askotan gainera, ratio horiek ez dira betetzen. Ratioak hobetzea urgentziazko kontua da, gehiegizko lan kargak langileen osasun fisiko eta psikosozialean kalte larriak eragiten ari direlako. Eta nola ez, zerbitzuaren kalitatean ere eragin ukaezina izaten ari delako.

LAB sindikatutik argi dugu eredu aldaketa baten beharra agerikoa dela eta zaintza sistema publiko-komunitariorantz bidea egiten jarraitu behar dugula. Horregatik mobilizatu gara gaur, eta Gipuzkoako Foru Aldundiari bilera eskaera egin diogu. Une honetan zerbitzu hauek pribatizaturik badaude ere, lan publiko bat egiten ari garen langileak gara. Langile publikoak gara. Ezinbestekoa da pribatizazioarekin amaitzea eta zaintza lanetan dihardugun langileon lan baldintzak duintzeaz gain, zaintza lanei zor zaien errekonozimendu sozial, politiko eta ekonomikoan urratsak ematea.

AZKEN ALBISTEAK | ÚLTIMAS NOTICIAS

Euskara baztertzailetzat jo eta hizkuntzaren normalizazio prozesua kolpatzen duen enegarren epaia

Euskal administrazioa euskalduntzeko prozesuaren aurka pairatzen ari garen oldarraldiaren barruko epai berri bat ezagutu dugu. Kasu honetan, Donostiako Administrazioarekiko Auzien Epaitegiak Eibarko udaltzain lanpostu baterako euskara-eskakizuna frogatu beharretik salbuetsi ditu hautagaiak ezohiko egonkortze deialdi batean, hautagaietako batek jarritako helegitea partzialki onartuta.

Lan osasuna bermatzeko prebentzioa jorratzea premiazkoa dela aldarrikatu dugu sindikatuok

Gaur, Laneko Segurtasun eta Osasunaren Nazioarteko Egunaren bezperetan gauden honetan, LAB, ESK, STEILAS, EHNE-Etxalde, HIRU eta CGT (Nafarroan) sindikatuok osatzen dugun intersindikalak irmoki salatu dugu langileok gure osasuna jokoan ipintzen dugula, bizitza duin baterako diru sarrera nahikorik bermatzen ez duten enpleguetan.

Nafarroako Arartekoak Hezkuntzari gomendatu dio Lanbide Heziketan diharduten PTak ere “saritu” ditzala

LABek eskatuta, Patxi Verak zuzentzen duen erakundeak Hezkuntzari eskatu dio beharrezko neurriak har ditzala Lanbide Heziketako PTei ere aplikatzeko DBHra atxikita daudenek jasotzen duten soldataren %5,45eko osagarria.