ETB3 ez itxi! Haurrentzako euskarazko kate irisgarri bat bermatu! lelopean, agiri bateratua aurkeztu du LABek, beste hainbat eragilerekin batera egin duen agerraldian.
Agirian jasotzen den moduan, bere sorrera legean dagoen euskararen normalizaziorako helburuari lotzeko eskatzen dio LABek ETBri, Euskal Herriko etxe guztietara haurrentzako euskarazko edukiak modu unibertsalean eta ordu oro iritsiko direla bermatuz.
ETB3 ixteko erabakiak, batetik, haurren hizkuntza eskubideetan zuzeneko eragina du, euskarazko kate unibertsal bat desagertzean euskarazko edukiak jasotzeko eskubidea mugatu baitzaie. Eta bestetik, euskararen normalizazioan azken urteotan egondako geldotzeak, euskararen leiho guztiak zabalik mantentzea eskatzen duelako, ez ditugun bakanak ixtea.
Era berean, LABek salatzen du EITBko zuzendaritzak erabaki hau sindikatuekin, euskalgintzako eta hezkuntzako eragileekin, eta soziolinguistikan aditu direnekin konpartitu eta kontrastatu gabe hartu duela, egun batetik bestera ETB3ren itxiera iragarri eta gauzatuz, euskararen normalizazioan erabaki honek izan dezakeen eraginari buruzko inolako azterketa eta hausnarketa partekaturik burutu gabe.
Gainera, begibistakoa da EITBren erabakiak kezka eta ezinegon handia sortu duela euskal jendartean. Horren erakusle da Pantailak Euskaraz-ek ETB3 ez itxi lelopean 25.000 sinadura bildu dituela 10 eguneko epean.