Gasteizko Salburua ikastetxearen aurrean mobilizatu gara, EAEko eskola jangeletako langileen lanpostuak eta osasuna bermatzea eskatzeko. Lakuako Hezkuntza Sailaren jarrera kritikatu dugu, eta eskola jangeletako langileen aldarrikapenen berri eman dugu.
“Gaur hemen, Gasteizko Salburuako hezkuntza komunitateko jangelako langileak, irakasle-hezitzaileak eta gurasoak gaude, Eusko Jaurlaritzari eskatzeko baliabide guztiak jar ditzala jangela zerbitzua erabili nahi edo behar duen edozein ikaslek eskubide hori bermatua izateko. Azken finean, jangela funtsezkoa da ikasleen hezkuntza integralean, beste hezkuntza-eremu bat gehiago, eskolako beste edozein bezain garrantzitsua”, adierazi dugu.