Donostiako Infernua auzoan burutzen ari utzaraztea, operazioa zilegiztatzeko egindako kriminalizazio kanpaina eta arrazakeria instituzionala salatzen ditugu. Polizia operazio bortitzak eta errepresio etengabea jasaten ari diren bertako bizilagunei gure elkartasun osoa adieraztearekin batera.
Donostiako Udalarentzat, pertsona guztientzako bizitza duina eta eskubideak bermatzearen betebeharra defendatu ordez, hirigintza proiektu suntsitzaile eta desjabetze planek lehentasun osoa izaten jarraitzen dutela argi geratzen da, beste behin ere. Honela, bertako bizilagunak kriminalizatu eta kanpaina mediatiko oso baten ostean hustutze bat justifikatzen ari dela salatu nahi dugu.
Infernuko auzoan hirigintza eredu eta sistema honek kanporatutako eta baztertutakoen erresistentzia gauzatzen dela badakigu, prekarietatea bizi duten herritarren eta egoera zaurgarrian dauden bizilagunen bizitokia dela. Hain zuzen, arduradun politikoek eta instituzio publikoek herritarron eskubideak sistematikoki urratzen dituztelako auto antolatzen diren herritarrei, eta sistemaren hutsuneak bistaratu, salatu eta eraldaketa proiektuak gauzatzea ahalbidetzen duen okupazioari, jazartzen ari zaie. EAJ-PSEren kudeaketa instituzional penagarriaren beste erakusgarri bat: pandemiak azaleratutako behar sozial eta premiakoei erantzuteko konpromisorik adierazi ez bezala, oraingoan ere, non daude baliabideak?
Ekintza kolektiboa, elkartasuna eta erresistentzia eragotzi nahi dutenen aurrean, eta aldiz arrazakeria, prekarietatea eta errepresioa zilegiztatzen dutenen aurrean, pertsona guziontzat eskubide guztiak eta bizitza duina defendatzera eta mobilizazioetan parte hartzera dei egiten dugu.