Lehen lehenik, LAB sindikatutik gure babes eta elkartasuna adierazi nahi diogu familia, senide eta adiskideei.
Istripuak ez dira halabeharrezkoak, lan baldintza eta eredu produktiboaren ondoriozkoak dira, langileen osasunaren gainetik irabazi asmoa nagusitzen baita. Kasu honetan gainera, Basalan enpresa Bizkaiko Foru Aldundiaren menpekoa dela azpimarratu nahi dugu, zerbitzu publiko azpikontratatua, eta ohi denez, azpikontratetako prekarietatea eta lan segurtasun eza aldagai determinante bilakatzen dira honelako istripuak gertatu ahal izateko.
Beharrezko ikerketa burutzea eta enpresetan benetako prebentzioa gauzatzea exijitzen dugu. Bizkaiko Foru Aldundiari ere ikerketa honetan esku hartu dezan eskatu nahi diogu, eta berriro horrelakorik gertatu ez dadin beharrezko neurriak planteatu ditzan.
Guzti honek aldaketaren beharra agerian uzten du, hemendik egin beharreko aldaketaren beharra. Ezinbestekoa da botere publiko eta elite politikoek urteetan elikatu eta gizendutako patronalari aurre egingo dion, eta langile klasearen interesak eta eskubideak lehenetsiko dituen marko propioa eraikitzea.
Horregatik, LAB sindikatutik heriotza berri hau salatu eta datozen orduetan antolatuko diren mobilizazioetan parte hartzera dei egiten dugu. Ildo beretik, eredu justu eta langileen segurtasuna eta osasuna aintzakotzat hartuko dituen marko propio baten beharra aldarrikatu nahi dugu.