Sindikatuetako eragileok eta Bilboko langabetuen Batzarkideok Bilboko udaleko Gobernu Batzordeari LAB sindikatuak aurkeztu mozioan agertzen diren neurriak aintzat har ditzala eskatzeko elkartu gara gaur Udaletxearen aurrean. Enplegu eta lan baldintza duinen alde udal honek kontratatutako obretan eta zerbitzu publikoetan diharduten langileen aldeko klausula sozialak bete ditzala eskatzen dugu.
Bilbo etengabe berritzen ari da hirigintza arloan. Horren adierazgarri egiten ari diren edota esleitzeke dauden herri-lanak ditugu. Horien adibide ditugu: Zorrotzaurren, Deustuko kanaleko herri-lanak, Termibuseko lanak, Prim parkekoak, Garellanokoak, Sabino Arana berreskuratzeko lanak,… Horiek guztiak diru-publikoaz egiten ari dira eta Bilboko udala kudeatzen ari da.
Horrez gain, gure udalak hainbat zerbitzu azpikontratatu ditu, hala nola, polikiroldegien kudeaketa, lorezaintza, bide garbiketa, eraikuntzen garbiketa, putzu septikoen garbiketa,… Zeregin hauek guztiak diru publikoaz kudeatzen dira.
Eraikuntza sektorean nahiz azpikontratazioan lanari lotutako problematika handia dago. LAB sindikatua aurre egiten ari zaio, hainbat proposamen eginez erakunde publikoetan.
Urrian, duela 4 hilabete, LABek mozio bat aurkeztu zuen klausula sozialak sustatu nahian. Horren harira, 11 neurri zehatz aurkeztu zituen Bilboko udalean. Neurriok, gure ustez, laneko problematikari aurre egiteko balio dute, lanetan zein azpikontratatutako zerbitzuetan. Hala ere, EAJk uko egin zion urriko udalbatzan eztabaidatzeari. Duela gutxi, Bilboko udalak jakinarazi du ez zituela eztabaidatuko urtarrileko udalbatzan ere eta klausula sozial batzuk onartu dituztela.
Aztertu ditugu udalaren gobernu-batzarrak onartu dituen klausulak eta etsipen handia eragin digute. Klausula sozial horiek boluntaristak dira, ez da jasotzen nahitaez bete behar direla. Haietan esaten denez, beharginen kontratazio berriak egin behar izango balira langabetuei emango zaie lehentasuna; esaten denez, ezarri behar izango diren lan baldintzak bete behar izango dira, bestelako zehaztasunik adierazi gabe; esaten denez, azpikontratatu behar izango balitz, batik bat, halakoak kontratatzeko….
Enpresak ez dituzte behartzen probintzia hitzarmena betetzera; aukera ematen dute beste probintzia hitzarmenak, estatuko hitzarmena edota behe-mailako enpresetako hitzarmenak erabiltzeko.
Ez dute eragozten estatu mailako enpresen hitzarmena ezartzea (normalki, probintziakoaren azpitik daudenak).
Ez dute eragozten, enpresak erabaki badu hitzarmena ez aplikatzea.
Ez dute ziurtatzen beharginen subrogazioa, kasu guztietan; hori eginez prekarietatea sustatzen da.
Ez dute ziurtatzen, une oro, behar beste beharginei eutsiko zaiela, zerbitzua edo obra betetzeko.
Ez dute hizkuntza eskubideen aipamenik egiten, zerbitzua eta lanpostuak euskalduntzeko.
Ez dute ziurtatzen probintzia hitzarmena azpikontratetan ezarriko denik.
Ez dute ziurtatzen, udalak kontratatuko dituen obretan edota zerbitzuetan, langabetuak kontratatuko dituztela, ez dutelako egoera horretan daudenentzat kontratatze-portzentajerik jasotzen obra edota zerbitzu guztietan eta bakoitzean; langileen kontratazio berriak beharrezkoak gertatuko balira, kontrata daitekeela bakarrik proposatzen dute.
Bilboko langabezia-tasa %20koa izanik, 31.042 langabetu ditugu, ARBUIATZEN DUGU herri-lanak edo zerbitzuak egiteko kontratatzen diren langileak probintzia-hitzarmenean ezartzen diren lanordutan baino gehiagotan lan egitea, hitzarmenaren azpitik kobra dezatela, lanetik egoztea beste enpresa batek esleituko duelako zerbitzua eta haren langileak dakartzalako, ez dadila langabeturik kontratatu enpresek langile guztiak dakartzatelako,…
Ez da erraz ulertzen Udalak bere burua zuritu nahian Lan Erreformak eragozten duela esan izanak, duela egun batzuk, Euskal Autonomia Erkidegoko Justizia Auzitegi Nagusiaren bi epairen berri izan dugunean. Haietan onartzen da Gipuzkoako Aldundiak sustatzen dituen obra publikoetan probintzia hitzarmena bete behar dela agintzen duen Foru Arauaren klausula sozialen legaltasuna.
Berriro ere jazoerek frogatzen dute borondate politikorik eta konpromisorik badago hiritarrekin, langileriari dagozkion eskubideen alde aurrera egin daitekeela.
Udal ekintza edota geldotasuna ez daiteke lan baldintzekin, langileen bizitzarekin, lana bilatzeko itxaropenarekin,… jolastu.
Horrengatik, hemen elkartu garenok, sindikatuetako eragileok eta Bilboko langabetuen Batzarkideok Bilboko udaleko Gobernu Batzordeari eskatzen diogu aintzakotzat har ditzala LAB sindikatuak aurkeztu mozioan agertzen diren neurriak eta onartu ditzala Udal honek kontratatutako obretan eta zerbitzu publikoetan diharduten langileen aldeko klausula sozialak, benetan betez.