Euskal gehiengo sindikalak deituta, elkarretaratze bat egin dugu Lezon, Ipintza industriagunean, ostiralean hildako 26 urteko langilearen lan heriotza salatzeko. Hildakoaren senide eta hurbilekoei elkartasuna eta babesa adierazi eta gero, LABeko Oarso-Bidasoko arduradun Kristina Getek gogora ekarri du dagoeneko 31 langile hil direla aurten Euskal Herrian, eta azken lan heriotza honen arrazoiak ikertzeko eskatu du: "Argi dugu lan istripuak ez direla kasualitateak sortutakoak. Ematen diren prekarizazioaren eta lan baldintzen okertzearen ondorio zuzena dira".
Kristina Geteren hitzetan, "lan heriotzen sarraskiarekin bukatzeko bide bakarra borroka eta antolakuntza dira. Eredu berri bat gauzatu behar dugu, enpresen irabazi ekonomikoaren aurretik langileon bizitza eta osasuna lehenetsiko duena".
Honengatik guztiagatik, langile guztiak lan baldintza duinen alde borrokatzera deitu ditu: "Lanetik onik eta bizirik bueltatzeko eskubidea dugu".