Impactoko enpresa batzordeak eta Zornotzako Udaleko enpresa batzordeak elkarretaratze batera deitu dute gaurko, Zornotzako udal kiroldegian astelehenean zendutako langilearen lan heriotza salatzeko. Aldi berean, lan uzteak egin dituzte.
Impacto enpresako langilea zen hildakoa. Bertako enpresa batzordeak ikerketa bat exijitu du gertatutakoa argitzeko, eta Zornotzako Udalari eskatu dio azpikontratatutako langileen segurtasuna eta lan osasuna zaindu ditzala, "ardura zuzena" duelako langile horiekiko.
LABek ere lan heriotza ikertzeko exijitu du, eta instituzioetako arduradunei eskatu die azpikontratazioekin bukatzu eta kalitatezko enplegu eta lan-baldintza duinen aldeko apustua egin dezatela. Era berean, Lan Segurtasunaren eta Lan Osasunaren Nazioarteko Egunean egingo diren mobilizazioetarako deia luzatu du sindikatuak.
Hain zuzen ere, kalera irtengo gara apirilaren 28an, lan heriotzak salatzeko eta istripu gehiagorik gerta ez daitezen neurriak aldarrikatzeko.
Gasteiz, Bilbo, Iruñea eta Baionan
Gasteizen izango dira mobilizatzen lehenak. Ostegunean, apirilaren 27an, elkarretaratzea egingo dugu SEA patronalaren egoitzaren aurrean, 11:00etan, euskal gehiengo sindikalak deituta. Bilboko eta Iruñeko manifestazioak ostiralean izango dira, euskal gehiengo sindikalak deituta ere. Bilbon 11:00etan izango da, Confebasken egoitzatik abiatuta. Iruñean 12:00etan izango da, Fremap mutuatik irtenda.
Bestalde, Baionan ere irtengo gara kalera. Herriko etxearen aurrean elkartuko gara 12:30ean, eta lan istripu bat irudikatuko dugu.
Iruñean, euskal gehiengo sindikalak deitutako manifestazioaz gain, Arrotxapeako elkarte batek beste mobilizazio bat antolatu du ostiral arratsalderako. Lanean hildako hainbat senide biltzen ditu elkarteak, eta martxa bat egingo dute udaletxeraino. Hain zuzen ere, 3.000 sinadura bildu dituzte eskaera bat egiteko: langile klasearen omenez monolito bat ezar dezan eskatuko diote udalari. Martxa 19:00etan irtengo da Arrotxapeatik, Matesa lantegia zegoen lekutik.