Ekintzaile ekofeministak hitzaldia emango du gaur, 17:00etan, Oreretako Reina Aretoan. Eredu produktiboa aldatzeko beharraz arituko da, gaurko ereduaren mugak eta ondorioak gero eta agerikoagoak diren honetan, eta alternatibak proposatuko ditu. Solasaldi honen aurretik, LAB sindikatuko zenbait kide, exekutibokoak eta batzorde sozialekoak tartean, Yayo Herrerorekin bildu gara Donostiako Igarako egoitzan. Mintegi honetan, arratsaldean jorratuko dituen gaien inguruan ibili gara gogoetan.
Eredu produktiboa aldatzeko beharraz aritu gara Yayo Herrerorekin, goizean, arratsaldean Oreretan emango duen hitzaldiaren aurretik. Egungo ereduak bizitzarekin berarekin talka egiten duela nabarmendu du antropologa madrildarrak, eta eredu produktibo alternatibo batek nolakoa izan beharko lukeen azaldu du jasangarritasun ikuspegitik, aintzat hartuta ere trantsizio energetiko bat egitea eskatuko lukeela. Azken batean, eredu produktiboaren aldaketa nondik planteatu behar den hausnartu dugu, eredu ekosozialista bateruntz joan nahi dugula jakinda.
Norabide horretan, bere ustez mugimendu soziosindikalak zein erronka dituen galdetu diogu Herrerori, eta sindikalismoaren ikuspuntutik jadanik martxan jarri beharreko praktika sindikalez ere bai. Zer nolako aliantzak behar dira? Zer nolako prozesu demokratikoren baitan egin daiteke bidea? Erantzunak arratsaldean emango dizkigu berriro, Oreretako hitzaldian.
