Lan eta zerbitzuen azpikontratazioa Euskal Herriko instituzioak gobernatu dituzten alderdien erabakia izan da; bereziki EAJ-PNV, PSE eta UPNrena. Langileontzat ondorio larriak ekarri dituen erabaki politikoa izan da. Erabaki honen ondorioz lan baldintzek txarrera egin dute. Gainera, krisiaren ondorioz, enplegua suntsitu eta lanpostuak galdu dira azpikontratazioetan.
LABek argi dauka herritarrei eskaintzen zaizkien zerbitzuak langile publikoek eskaini behar dituztela. Gure helburua horixe izan arren, jakitun gara asko direla azpikontratatzen diren zerbitzuak eta, beraz, azpikontratazioa burutzeko bideak arautu eta prekarietatea ezabatu behar dugu.
Gauzak horrela, administrazio publikoaren kontratazio irizpideetan klausula sozialak sartzearen aldeko apustu garbia egin nahi dugu. Klausula sozial hauen bidez, kalitateko enplegua sortu nahi dugu, gizon eta emakumeen arteko berdintasuna bultzatu, hizkuntza eskubideak bermatu, ingurugiroa babesteko irizpideak sartu eta oinarrizko eskubide sozialak babestu nahi ditugu. Hau guztia derrigorrez betebeharreko arau batek jasotzea nahi dugu.
2016ko lehen hilabeteetan, gai hau lantzeko batzordea eratu zuen Basauriko Udalak. Sindikatuek batzorde honetan parte hartzeko eskaria egin zuten. Eskaria egin bai, baina ukatu egin zitzaien bertan parte hartzeko eskubidea. Udaletxean ordezkaritza duten alderdiek baino ez dute parte hartzen aipatu batzordean.
Klausula sozialen oinarrizko helburua azpikontratatutako enpresen gehiegikeriak eta neurrigabekeriak saihestea da. Gobernu taldeak aurkeztu duen zirriborroa ikusteko aukera izan dugu, eta zoritxarrez, mahai gainean dagoen proposamena aipatu helburu horiek betetzetik oso urrun dagoela esan beharra daukagu.
Honengatik guztiagatik, LABek, erregistroan sarrera emanez, gure klausula sozialen proposamena helarazi zion batzordeari. Udaletxeko azpikontraten langileen lan baldintzak hobetzeko asmotan beharrezkoak ziren proposamenak aurkeztu genituen, baina ez dugu inolako erantzunik jaso.
Gure proposamenak legezkoak dira eta berauek ezartzea alderdi politikoen esku dago. Badirudi Basauriko gobernu taldeak ez duela honetarako borondaterik. Azpikontratatutako langileen lan baldintzak hobetzeko asmoa hutsaren hurrengo bihurtu da. Lan munduari eta Segurtasunari dagozkion klausula mamitsu eta garrantzitsuenak alboratu dira klausula sozialen benetako izaera.
Hori dela eta, kontzentrazioa egin dugu gaur Basauriko Udaletxearen aurrean.