Euskal Herriko klase sindikatua den heinean, LAB sindikatuak, gaur maiatzaren 29an, osasun sistema publiko baten alde deituriko borroka egun nazionalaren harira, Italiako langile klaseari eta bereziki Unione Sindacale di Base sindikari bere elkartasuna helarazten dio.
Italiako gobernuak onartutako “hobekuntza dekretuak”, pandemia egoera honetan Italiako osasungintza arloan politika neoliberalak aplikatzen jarraitu egin dela agerian utzi du.
Koronabirusaren pandemiak pribatizazio prozesuen ondorio lazgarriak eta urte hauetan guztietan herrialde askotan osasungintza publikoa nola suntsitu duten agerian utzi du. Baina, aldi berean, testuinguru honetan langile klasean eta klase herritarretan osasungintza publikoaren beharraren aldeko kontzientzia bat piztu du, eta gero eta sektore zabalagoak enplegua, egonkortasun laborala, soldata duinak, ohe eskaintza handiagoa… bermatuko dituen osasungintza publiko bat behar beharrezkoa dela uste du.
Gaur Italian deituriko borroka egun nazionala murrizketen eta langileen eskubideen kontrako erasoen aurka mundu guztian borrokan dihardugun langile guztien borroka da. Garai zail hauetan politika neoliberal hauen aurka langileak antolatuko dituen Unione Sindacale di Base bezalako klase sindikatu indartsuak behar ditugu. Soilik ongi antolaturiko langile klaseak lortuko ditu bere helburuak eta soilik borrokaren bitartez lortuko dugu gure helburuetan aurrera egitea.