Telelan plan duin baten alde eta Bizkaiko Foru Aldundian akordioa/hitzarmena negoziatzearen alde deitu ditugu mobilizazioak.
Bizkaiko Foru Aldundian (BFA) maiatzaren 18an egindako langileen batzarrean mobilizazio ziklo bati ekitea erabaki zen, benetako Telelan plana eta Akordio/Hitzarmenaren negoziazioen desblokeoa aldarrikatzeko.
Azken asteotan, LABek, BFAko Langileen Batzordea osatzen duten gainerako sindikatuekin batera, hainbat elkarretaratze egin ditu Ogasuneko, Foru Jauregiko eta Ugaskoko foru lantokien atean, Aldundiak bere langileei egiten dien inposizioa eta negoziazioaren blokeoa salatzeko. LABek uste du Aldundiak negoziazioan erakusten duen blokeoa eta inposaketa apurtzeko langileen mobilizazioa eta bultzada funtsezkoak direla.
Halaber, azken asteotan, Bizkaiko Foru Aldundiko Gobernu Kontseiluak, Elixabete Etxanobe buru zela, 2027 eta 2028 urteetarako Telelan Plana onartu zuen. Oso larria iruditzen zaigu. Planaren gaitzespen zabalaren aurrean eta mobilizazio eta lanuzteen iragarpenaren aurrean, BFAk telelan eredu hau inposatuz erantzun du, gutxienez 2029ra arte.
Hau da BFAk eskaintzen digun negoziazio eredua: Akordioa/Hitzarmena blokeatzea, plantillak baztertutako telelan eredua ezartzea, lan baldintzak hobetzen dituzten lege aldaketak aplikatzeko errezeloak…
Bada garaia Bizkaiko Foru Aldundiari mezu argia helarazteko: langileok ez gaude prest egoera honetan jarraitzeko, eta, horregatik, kalera irtetea erabaki dugu, gure eskubideak aldarrikatzeko eta Bizkaiko Foru Aldundiak negoziatzeko borondaterik ez duela salatzeko.
Horregatik uste dugu mobilizazio hauek ezinbestekoak direla BFAk duen inposaketa jarrera aldatzea nahi badugu. Hala erakutsi dute euskal administrazio publikoko beste sektore batzuetan (Hezkuntza, Ertzaintza,…) mobilizazio ziklo batzuen ondorioz sinatu berri diren akordioek. Mobilizaziorik gabe, ez da egongo aurrerapausorik negoziazioan.
Hauek dira hurrengo egunetan burutuko ditugun mobilizazioak:
- Astelehena, ekainak 15, 11:00etan, Maria Diaz de Haron dagoen Foru Artxibategian langileen batzarra eta ondoren manifestazioa Foru Jauregira.
- Asteazkena, ekainak 17: bi orduko lanuztea (11:00etatik 13:00etara goizeko txandan eta 16:00etatik 18:00etara arratsaldeko txandan) eta manifestazioa 11:30etan Foru Jauregitik.
Aldundiko langileok benetako telelan plan baten alde eta Hitzarmenaren blokeoa salatzeko PLANTO EGITEA erabaki dugu!
