LABen iritziz, Nafarroako parlamentuan aurkeztu berri den lege proposamenak iraganeko akatsetan sakontzen jarraitzen du, hainbat arlotan norabide egokia hartu baldin bada ere.
Nafarroako Industriak izugarrizko erronkei aurre egiten ari diola eta hurrengo urteetan are erronka handiagoei erantzun behar diela ezin du inork ukatu. Nafar gizartearen azalean daude oraindik pasa den urteko prozesu traumatikoak: BSH, Sunsundegui, Tenerías Omega… dira horren adibide desberdinak.
Testuinguru horretan aurkeztu berri da Industriako Foru Lege proposamena eztabaidarako Nafarroako Parlamentuan. LABen iritziz, proposamen honek, asmoetan argi batzuk baldin baditu ere anbizio falta du estrategikoak diren bertze arlo batzuetan, batez ere Nafarroako industriaren errotzeari eta erabakiguneen presentzia lurraldean egoteari dagokionez.
Legearen titularretako bat “administrazioa sinplifikatzeko eta arintzeko neurriak” dira, helburu argi batekin, kanpoko inbertitzaileak; transnazionalak, funts putreak… erakartzea. Eredu horrekin bakarrik lortuko dena, etorkizunean BSH bezalako itxiera gehiago eta zer eta nola produzitu nahi dugun erabaki ahal ez izatea, izango da.
Legearen garapenean bertze eragile batzuekin batera parte hartu ahal izateak bertan agertzen diren eduki batzuk norabide onean joatea suposatu du, baina halere hainbat aldarrikapen garrantzitsu kanpo gelditu dira. 2025eko maiatzean salatu genuen moduan, prozesuan zehar LABek aurkeztutako alegazio gehienak atzera bota ziren: industriako eraldaketen plangintza handiagoa lortzera bideratuta zeudenak, proiektu industrialen titulartasun publikoarekin lotuta zeudenak edota enpleguaren kalitatea hobetzera, lanaldia murriztera, deskarbonizazio planen negoziazio kolektiboa ziurtatzera eta deslokalizazioen aurkako legedia indartzera bideratuak zeudenak adibidez.
Industria behar eta nahi dugu Nafarroan, baina ez edozein gauza egiteko, ez edozein modutan produzitzeko eta ez edozein lan baldintzekin. Zenbait elementu positiboki baloratzen ditugun arren, nola aplikatzen diren horien eragina asko baldintzatuko du. Horixe da Bidezko Trantsiziorako Estrategiarekin, industria suspertzeko mahaiekin edo kontratazioko diskriminazioari buruzko diagnostikoarekin egiten den koordinazioaren kasua.
Hurrengo hilabeteetan eztabaida emanen da, emendakinak egonen dira, ekarpenak, aldaketak, eta LABen, beti egin duen moduan, horretan eragiten segituko du, lege honek defendatu dezan jasangarritasunean eta langileen bizi baldintza duinetan oinarritutako Nafarroako industria.