Emakumeen* kalitatezko osasun arreta bermatuko duen osasun sistema publikoa defendatzen dugu, eta negoziazio kolektibo integralaren alde egiten dugu.
LAB sindikatutik Gurutzetako ospitaleko eta Barrualde eskualdeko emaginen borrokari gure babesa erakusten diogu, eta adierazten dugu emaginen osasuna eta emakumeei* ematen zaien arreta guztiz kaltetuta daudela. Duela 2 urte piztu zen gatazkak ez du inongo hobekuntzarik lortu kontratazioan, ezta formatzen ari diren diren emagin kopuruan. Ordutik hona ez da egin zerbitzuen dimentsionamendu eta planifikazio egokirik, eta horrek zuzeneko eragina izan du EAEko emakumeen* sexu- eta ugalketa-osasunean. Gure iritziz, botere publikoek nahi duten osasun arretaren adierazlea da emaginen defizita. Emakumeen* bizi prozesuek, osasun prebentzioak eta bere sustapenak ez dute behar duten arreta jasotzen.
Oporraldietan larriagotu egiten den egiturazko arazo baten aurrean gaude. LABen ustez beharrezkoa da zerbitzu-zorroa, horren ondoriozko plantillaren dimentsionamendua eta BEE (Barne Erizain Egoiliar) prestakuntza plazen kopurua handitzea bezalako gaiei heltzea. Aparteko orduekin (autokontzertazioarekin) eta gehiegizko lan-kargekin bukatu behar da. Honen ondorioz, Osakidetzako profesionalen artean arrisku psikosozialak areagotu egin direla azpimarratzen dugu.
Guzti honengatik, Osakidetzako langileen lan baldintzen inguruko akordio arautzailearen negoziazioa premiaz irekitzea exijitzen dugu, kategoria eta unitate bakoitzaren beharren inguruan negoziatzea eta adostasunetara heltzeko.
Gauzak horrela, guztiz partekatzen dugu emaginen egoeraren larritasunaren diagnostikoa, arazoaren erroa egiturazkoa da eta irtenbidea klase ikuspegi kolektibotik landu behar da.
Osasun sistema publikoa indartzeko negoziazio kolektibo integral eta gardena defendatzen dugu. Lan-baldintzak hobetu behar dira egungo arreta beharrei eta plantilla osoaren interesei erantzuteko. Era berean, premiazkoa da kategoria eta unitate bakoitzaren berezitasunak kontuan hartuta plantilla behar bezala dimentsionatzea.
%100 publikoa, unibertsala, euskalduna eta komunitarioa izango den osasun eredua borrokatu eta defendatze aldera denon arteko batasuna beharrezkoa izango da.