EHUko irakasleek elkarretaratze bat egin dute gaur Gobernu Kontseiluaren aurretik, bosturtekoak behin behinekoei ordain dakizkien exijitzeko. Protesta Bilbon izan da, Bizkaia Aretoaren sarreran.

Bosturtekoak aitortuta eduki arren, irakasle ez-iraunkorrak ez daude kobratzen ari. Irakasle ez-iraunkorren urtetako aldarrikapena izan da bosturteak aitortu eta kobratzearena.

2016ko otsailean, EAEko Auzitegi Nagusiaren gizarte arloko epaimahaiak EHUko behin behineko irakasle bati bost urtekoen deialdian parte hartzeko eskubidea aitortu zion. Orduan, deialdi berezia zabaldu zen irakasle ez-iraunkorrek bosturtekoak eska zitzaten. Batzuek aitorpena lortu arren, kobratu barik jarraitu zuten, irakasleen soldatak ezartzen dituen 41/2008 dekretuan jasotzen ez dela aitzakiatuz.

2017ko martxoan beste sententzia batek EHU kondenatu zuen irakasle atxiki bati aitortutako 5 urtekoak ordaintzera, baita ordaindu beharreko kantitatea ezarri ere. Epaileak zehazten du ez dela beharrezkoa 41/2008 aldatzea bost urtekoa ordaintzeko. Ez ordaintzeko erabilitako argudioa bertan behera geratu zen, beraz. EHUko zuzendaritzak helegitea jarri zion sententzia horri.

2017ko irailean epaileak helegitea bertan behera utzi eta irakasleari ordaintzera behartzen zuen epaia eman zuen. Hala ere, ordainketa ez da orokortu eta horretarako aipaturiko 41/2008 dekretuaren aldaketaren beharrean justifikatzen du EHUK ordaindu ezina.

Hori dela eta, irakasleek EHUko zuzendaritzari eskatzen diote langileen alde egin dezan eta behin behiko irakasleei zor zaizkien bosturtekoak ordaintzen has dakizkien, Jaurlaritzak araudian egin beharreko aldaketak egin ditzan itxaron barik.

Abenduaren 5ean, Eusko Jaurlaritzaren aurrean, Lakuan, hogei bat irakasle bildu ziren Gasteizko Gobernuari 3/2004 Legean eta 41/2008 Dekretuan beharreko aldaketak egin ditzan eskatzeko. Gaur, aldarrikapen berarekin, Bilbon bildu dira berriro.