Bizkaiko egoitzen mapak zerbitzuaren titulardun Aldundiaren benetako asmoa agerian uzten du eta ez da erresidenteen autonomia eta bizitza kalitatea hobetzea, ez horixe! Aldundiak pertsonen beharretatik etekin atera nahi duten enpresa pribatuen eskuetan utzi nahi du, uzten du, zerbitzua.
Bizkaiko Aldundia egoitza zerbitzuen titularduna da. Zerbitzuen titulartasuna publiko izan arren, Aldundiak egoitza publikoen kopurua gutxitu du kudeaketa pribatua duten egoitzen aldeko hautua eginez. Gaur egun, Bizkaian dauden 186 egoitzetatik 33 baizik ez dira publikoak, eta gehienak udal egoitzak dira.
Delako datuak gure arreta bereganatu beharko luke. Nola uler daiteke titulartasun publikoa duen zerbitzua izan arren, egoitza gehienek kudeaketa pribatua edukitzea? Eta zertan eragiten die egoitzei hala izateak? Aldundiak diru publikoa inbertitzen du kudeaketa pribatuaren esku utziz. Lur publikoa, inmueble publikoa, negozio pribatuen eskuetan utziz.
Guztiaren gainetik etekin ekonomikoa lehenesten duten enpresa pribatuak dira, erresidenteen bizitza kalitatearen gainetik ere. Pertsonal faltatik etekin ateratzen duten enpresak, menpekotasun duten pertsona askoren zaintzaren erantzukizuna bere gain hartzen duen pertsonala beretik ere etekina ateratzen duten enpresak.
Sarritan salatu dugu legez,langileek jasangaitza diren lan erritmoak, kudeaezinak diren lan zamak pairatu behar eta beren lan osasuna urratzen duten egoerak ere jasan behar dituztela. 2016an, LAB sindikatuak Gizarte Zerbitzuen pertsonal ratioa berriztu dezaten sinadura bilketari ekin zion. Aspaldidanik galdegin dugu Gizarte Zerbitzuen erregulazioa bere osotasunean eman dadin, arreta ratioa kopuru egokian, era presentziala eta kategorietan kontutan har dadin, erabiltzaileen beharrak asetzen dituen zerbitzua berma dadin; hots, beharrezkoa den kalitatea eta pertsona langileen lan nahiz osasun eskubideak berma daitezen.
Legebiltzarrean egon ginen kalitatezko zerbitzuak emateko beharrezkoa den langile kopurua bermatu behar dela galdegiteko. Joan den uztailaren 31n, Eusko Jaurlaritzak egoitzetan pertsonala ratioa erregulatzen duen dekretua aprobatu zuen.
Dekretu berriak egiturazko izaera daukan prekarietatean sakontzen duela salatu egin dugu, nahiz eta zerbitzuaren titularrek behinolakoa dela emateko itxura egin. Egoitzetan arreta bermatu behar duen pertsonala eznahikoa denean, ez zerbitzu ona, ez, asistentzia kalitatea, ezta beren esfortzuagatik beti kaltetu ateratzen diren langileen osasuna ere ez dira bermatzen. Soilik enpresaburuen etekina haunditzen da.
Titulardun publikoak jotzen ditugu egoeraren erantzuleetzat. Urte asko daramagu esanez arazoaren irtenbide zuzena zerbitzu publiko, doakoa, nahikoa, unibertsala, erresidenteen zaintza eta ezinbestekoa den lana burutzen duten langileak erdigunean jarriko lukeen zerbitzua eskaintzean datzala. Era berean, zerbitzua menpekotasun duten pertsonen beharretatik etekin atera nahi duen ideiatik urrundu beharko litzateke.