Bilboko 11. epaitegiak Bizkaiko ia 300 langileren lan-harremana aitortzen duen epaia eman du, eta Lan Ikuskaritzak ezarritako aldiak kotizatzera behartu du enpresa, 343.814,44 euro alegia.

Horrelako lehen epaia da Euskal Herrian, eta irmotasunaren zain, mugarri bat da. Ez bakarrik Golvoko langileentzat, baita plataforma baten bidez lan egiten duten langile guztientzat ere. Lehen urratsa da kolektibo horiek duten babesgabetasun egoera iraultzeko bide luze batean. Langile klasea sektore horietan sindikatu gisa antolatu ahal izateko lehen urratsa, eta hor egongo da LAB.

Lan-harreman horien gai praktikoak jorratzeko konpromiso irmoa dugu, hala nola harreman horien arau-esparrua definitzea. Dagoeneko proposatu genuen figura hori Bizkaiko Ostalaritzaren Hitzarmen Kolektiboan sartzea, eta ez patronalak ez gainerako sindikatuek ez zioten behar horri erantzun. Sektoreari lege-esparru bat emateko borrokan jarraituko dugu.

Azkenik, Ministroen Kontseiluak hurrengo egunetan izapidetzen hasiko dena “Rider Legea”rekiko posizioa hartu nahi dugu. Zuzenean interpelatu nahi ditugu Eusko Legebiltzarra osatzen duten alderdi politikoak, asmo handiagoko erregulazio baten aldeko jarrera har dezaten, uberizatutako sektore guztiak kontuan hartuko dituena.

IƱigo Alonso, LABeko Zerbitzu Pribatuetako kidea