“Alarma egoera pasatzen denean, aldatu beharko litzatekeena da, ahalik eta azkarren, lan harremana aitortzea definitiboki. ‘Cuenta ajena’ delako langileak garela onartzea, eta autonomoetan baja ematea behin betiko. Horrek sekulako hobekuntzak ekarriko lituzke, langile guztiek dituzten eskubide guztiak guk izatea: oporrak eta lan egutegia izatea, astean bat edo bi atseden egun hartzea edo sindikalki antolatzeko eskubidea. Laburbilduz, lan baldintzak duintzeko neurriak ezartzea, eta ostalaritzako hitzarmenean egoteko eskubidea bermatzea”.
LABeko kide eta Glovoko langile Klemen Celestinoren hitzak dira hauek, duela urtebete baino gehiago egindakoak, etxean konfinatuak ginenean, riderrak pandemia egoeran zein baldintzatan lan egiten ari diren galderari erantzunez. Bada, Klemen Celestinok igarlea bailitzan, patuak erabaki du alarma estatua bertan behera geratzeko bezperan etortzea Bilboko 11. epaitegiaren epai garrantzitsua: Bizkaiko Glovoko ia 300 langileren lan-harremana aitortzen duen epaia, alegia.
Hain zuzen ere, riderren aldarriei bide emateko aukera emango du joan den ostiraleko erabakiak, mugarri bat izango da; eta ez bakarrik Glovoko langileentzat, baita plataforma baten bidez lan egiten duten langile guztientzat ere. Lehen urratsa da kolektibo horiek duten babesgabetasun egoera iraultzeko; lehen urratsa da langile klasea sektore horietan sindikatu gisa antolatu ahal izateko. Eta, nola ez, LAB langile hauen guztien bidelagun izango da.
Izan ere, lan-harreman horien gai praktikoak jorratzeko konpromiso irmoa dugu, hala nola, harreman horien arau-esparrua definitzea. Dagoeneko proposatu genuen figura hori Bizkaiko Ostalaritzaren Hitzarmen Kolektiboan sartzea, baina, ez patronalak ez gainerako sindikatuek ere, ez zioten behar horri erantzun. Hala, epai honek hauspotuta, sektoreari lege-esparru bat emateko borrokan jarraituko dugu indartsu.