“Gaurko eguna berezia da LAB sindikatua osatzen dugunontzat. Gaurkoa ez da edozein hitzordu. Gure istorio propioan mugarri berri bat jarri nahi dugu. Euskal Herriko langileriari tresna berri bat eskaini nahi diogu”.
Jauzi berri bat egin du sindikatuak. Ekintza Sozialeko Komunitatea aurkeztu dugu, Bilboko Bidebarrieta Kulturgunean egindako ekitaldian, eta hasierako hitz horiekin ekin diogu bideari. Abiatu izena izango du tresna berriak.
Hain zuzen ere, enpleguaren eremua zabaldu eta, lan baldintzez gain, bizi baldintzei buruz hitz egin eta hauen inguruan borrokak sustatu nahi ditugu egitura berriarekin, egun piztuta dauden borroketan parte hartu eta ekarpena egiteaz gain, aliantzak indartzeko helburuarekin.
Bizi baldintzen borroka erdigunean jartzea ezinbestekoa da. Hala adierazi dugu aurkezpen ekitaldian: “Prekarizazio eta pobretze prozesuak ez dira soilik lantokietan ematen, eta gero eta lotura gehiago du lantokietatik kanpoko errealitateak barruko egoerarekin”.
Hauek dira gako nagusiak, LABeko Ekintza Sozialeko kide Endika Perez eta Iratxe Delgadoren hitzetan: “Borroken elkarrekintza sustatu. Kalea eta lantokia, lantokia eta kalea. Enplegua eta lana bere osotasunean. Enpleguaren eremua baldintzatzen duten zapalkuntzei aurre egitea. Eta, nola ez, hau guztia antolaketa modu berriekin, lan egiten dugun lekuaren arabera baino, bizi garen lekuaren araberakoa baizik. Horixe da martxan jartzen duguna. Horixe da Ekintza Sozialeko Komunitatea”.
Euren esanetan, “gurea sindikalismo borrokalaria da. Ez dugu performancetan geratu nahi. Lantokietan, gure ekintzaren bidez, langile-klasearen baldintza materialak hobetzeko borrokatzen dugu. Gizarte-ekintzaren eremuan, helburu bera dugu. Ez dugu salaketan bakarrik geratu nahi. Pixkanaka-pixkanaka, dinamikak sortzeko gai izan behar dugu, langileen bizi-baldintzak hobetzeko eta jendartea eraldatzeko prozesuan aurrera egiteko”.
LABeko idazkari nagusi Garbiñe Aranburuk ere hartu du parte aurkezpenean, eta egindako urratsaren garrantzia nabarmendu du. “Bizitza erdigunean jartzeko, sistema errotik aldatu behar da”, adierazi du. Hala, trantsizio ekosozialista eta feminista bat aldarrikatu du, eta burujabetza prozesua sustatzeko beharra azpimarratu du eraldaketa lortzeko.
Garbiñe Aranbururen hitzetan, “sindikatuak erakutsi du proposamen alternatiboak eta eraldatzaileak egiteko duen gaitasuna, Programa Sozioekonomikoarekin eta Euskal Lan Kodea eta Gizarte Segurantza propio baterako lege proposamenekin egin bezala”. Oraingoan Ekintza Sozialeko Komunitatea eratu dugu, “lan eta bizi baldintzen alde borrokatzeko, bizitza bizigarri baten alde aritzeko”.
Abiatu gara!
Hitzartzeak ez ezik, poesiarako tartea ere egon da. Olerki musikatuak oso ondo laburtu du komunitate berriaren izaera: “Ekintzetan baino elkarrekintzan sinisten dugulako; norbanakoan baino kolektiboan jardun nahi dugulako, eta gezurren eta mamuen gainetik, komunitate bat hezurmamitu nahi dugulako. Gure betiko habia utzi, eta abiatu gara; lantokiak zabaldu eta bizitokietara goaz. Gure jardunak ez duelako ez barru, ez kanpo; esparru guztietara heltzen delako baizik”.
“Badakigu zer eskatzen digun gorputzak: eskatzen digu guztiontzako etxebizitza, aldarrikatzen dugu ekologia, oinarritzen gara feminismoan eta amesten dugu burujabetzan. Eta borroka egingo dugu eskubideen globalizazioaren alde, hegoari iparra erakutsiz eta iparrari hegoak emanaz”.
Aurkezpena amaituta, kale ekintza bati ekin diogu. Herritarrengana jo dugu, galdetegi bat eskuan, egunerokoan zer nolako egoerak bizi dituzten jasotzeko, bizi baldintzak eta prekaritatea ardatz. Kale inkesta Bilboko gune hauetan egin dugu: Areatzan, Plaza Zirkularreko Primark-en, Atxurin eta San Nicolasen. Komunitateari jarri diogun izena dioen moduan, ABIATU gara!
